Sõng-y y Biibl karen-biisã tɩ b sak sɩdã

1-2. a) Bõe yĩng tɩ Biibl karen-biis kẽer yɛɛsd n pa rat n sak sɩdã? b) Bõe yell la d na n gom sõs-kãngã pʋgẽ?

BŨMB kẽer n da kɩt tɩ y yɛɛsd n pa rat n lebg a Zeova Kaset soab bɩ? Tõe tɩ y ra yɛɛsdame tɩ y tʋmd-n-taase, y zo-rãmb wall y zakã rãmb sũy na n yika ne yãmba. Pa rẽ bɩ y ra tagsdame tɩ y pa na n tol n tõog n tũ Wẽnnaam noyã ye. Sã n yaa woto, y wʋmda Biibl karen-biis kẽer sẽn yɛɛsd n pa rat n sak sɩdã võore.

² A Zeezi ra miime tɩ yɛl a woto tõe n gɩdga ned nana-nana t’a pa tũ a Zeova ye. (Mat. 13:20-22) La a pa bas neb nins sẽn da yɛɛsd n pa rat n tũ-a wã sõngr ye. A sõnga a karen-biisã tɩ b bãng b sẽn tõe n sõng neb a woto tɩ b bãng bũmb nins sẽn gɩdg-bã, tɩ paas b sẽn nong a Zeova to-to wã pãnga, tɩ b toeem bũmb nins b sẽn lʋɩɩsd taoorã la b bãng b sẽn tõe n maan to-to b sã n wa namsd-ba. D sã n wa zãmsd ned Biiblã ne Vɩɩmd-y wakat sẽn kõn sa! sebrã, wãn to la d tõe n tũ a Zeezi sẽn wilg a karen-biisã bũmb ningã n sõng-a t’a bãng sɩdã?

SONG-Y Y BIIBL KAREN-BIIGÃ T’A BÃNG BŨMB NINS SẼN GƖDG-A WÃ

3. Bõe n kɩt tɩ ra yaa toog ne a Nikodɛm t’a lebg a Zeezi karen-biiga?

³ A Nikodɛm sẽn da yaa Zʋɩf-rãmbã naab a ye wã ra rat n lebga a Zeezi karen-biiga, la bũmb n da gɩdg-a. Kiuug a yoob a Zeezi sẽn sɩng a koe-moonegã poor bala, a Nikodɛm bãngame t’a gomda Wẽnnaam yʋʋr yĩnga. (Zã 3:1, 2) La a Nikodɛm yãka yam n soos n kẽng a Zeezi nengẽ a “sẽn zoet Zʋɩf-rãmbã yĩnga.” (Zã 7:13; 12:42) Tõe t’a tagsame t’a sã n lebg a Zeezi karen-biiga, a na n bõna bũmb wʋsgo.a

4. Wãn to la a Zeezi sõng a Nikodɛm t’a bãng Wẽnnaam sẽn dat t’a maanã?

⁴ A Nikodɛm ra mii Tõogã, la a ra rata sõngr sẽn na yɩl n bãng a Zeova sẽn dat t’a maanã. Bõe la a Zeezi maan n sõng-a? A Zeezi sakame n sõs ne a Nikodɛm baa a sẽn wa a nengẽ ne yʋngã. A Zeezi wilga a Nikodɛm bũmb nins a sẽn segd n maan n lebg a karen-biigã vẽenega. A wilg-a lame t’a segd n teka yam n kos sugri, n deeg lisg la a tẽ Wẽnnaam Biigã.—Zã 3:5, 14-21.

5. Bõe la y tõe n maan n sõng y Biibl karen-biig t’a bãng bũmb ning sẽn gɩdg-a t’a nan pa yãk yam n na n tũ a Zeova wã?

⁵ Baa Biibl karen-biig sã n mi Gʋls-sõamyã sõma, a tõe n data sõngr sẽn na yɩl n bãng bũmb ning sẽn gɩdg-a t’a nan pa yãk yam n na n tũ a Zeova wã. Tõe tɩ yaa a nug-tʋʋmdã n dɩt a sẽk wʋsgo, wall a zakã rãmb n pa rat t’a lebg a Zeova Kaset soaba. Woto wã, bao-y sẽk n sõng y Biibl karen-biigã. Y tõe n baoo rɩɩb n bool-a t’a wa tɩ y naag taab n dɩ, wall y kẽng a zakẽ wã n tɩ sõs ne-a. Y sã n maan woto, tõe n sõng-a lame t’a pelg a pʋg n togs-y zu-loees nins a sẽn maood ne wã. Rẽ poor bɩ y sõng-a t’a bãng a sẽn tõe n maan to-to n toeeme. Tẽeg-y-yã-a t’a segd n maana rẽ a sẽn nong a Zeova wã yĩnga, la pa a sẽn dat n noog yãmb sũur yĩng ye.

6. Bõe la y tõe n maan n sõng y Biibl karen-biig t’a tall raood n sak sɩdã? (1 Korẽnt rãmbã 16:13)

⁶ Biibl karen-biig sã n kɩs sɩd t’a Zeova na n sõng-a lame t’a tõog n tũ Biiblã noyã, na n kɩtame t’a paam raood n tõog n tũ bũmb nins a sẽn zãmsdã. (Karm-y 1 Korẽnt rãmb 16:13.) Y tõe n maka y sẽn segd n maan bũmb ningã ne lekoll karen-saamb tʋʋmde. Y sẽn wa n kẽnd lekollã, karen-saam-bʋg buud la y ra nonga? Tõe tɩ yaa karen-saamb sẽn da maagd a yĩng n sõngd-y sẽn na yɩl tɩ y kɩs sɩd tɩ y tõe n maana bũmb ning y sẽn segd n maanã. Woto me, Biibl karen-saam-sõng pa wilgd a karen-biisã bũmb ning Wẽnnam sẽn dat tɩ b maanã bal ye. A sõngd-b lame me tɩ b kɩs sɩd tɩ ne a Zeova sõngre b tõe n toeemame. Bõe la y tõe n maan n yɩ karen-saam-sõngo?

SÕNG-Y Y BIIBL KAREN-BIIGÃ T’A PAAS A SẼN NONG A ZEOVA TO-TO WÃ PÃNGA

7. Bõe la a Zeezi maan n sõng a kɛlgdbã tɩ b paas b sẽn nong a Zeova to-to wã pãnga?

⁷ A Zeezi ra miime t’a karen-biisã sã n nong Wẽnnaam, na n sõng-b lame tɩ b tũ bũmb nins b sẽn zãmsdã. A wae n zãmsd-b-la bũmb toor-toor sẽn na n kɩt tɩ b paas b sẽn nong a Zeova to-to wã pãnga. Wala makre, a maka a Zeova ne rao sẽn kõt a kamb bõn-sõma. (Mat. 7:9-11) Tõe t’a Zeezi kɛlgdbã kẽer ba-rãmb ra pa nong-b a woto ye. Mams-y b tagsg sẽn yɩ to-to a Zeezi sẽn wa n wẽ yel-bũnd n gom ba sẽn yaa nimbãan-zoɛt yellã. A biigã basa a ba wã n tɩ tʋm tʋʋm-dẽgd n lebg n wa t’a sak n deeg-a. Sõng-b lame tɩ b yã t’a Zeova zoeta a kambã sẽn be tẽngã zugã nimbãanega.—Luk 15:20-24.

8. Bõe la y tõe n maan n sõng y Biibl karen-biig t’a paas a sẽn nong a Zeova to-to wã pãnga?

⁸ Yãmb me sã n wa zãmsd y Biibl karen-biiga, y tõe n gomda Wẽnnaam zʋg-sõma wã yell n sõng-a t’a paas a sẽn nong a Zeova to-to wã pãnga. Zãmsg fãa sasa, sõng-y-yã-a t’a bãng bũmb nins y sẽn zãmsdã sẽn tar loees to-to ne a Zeova nonglmã. Y sã n wa gomd a Zeezi maoongã yelle, bɩ y sõng-a t’a bãng rẽ sẽn wilgd to-to t’a Zeova nonga yẽ mengã. (Rom. 5:8; 1 Zã 4:10) Karen-biig sã n bʋgs a Zeova sẽn nong yẽ mengã to-to wã zugu, tõe n kɩtame tɩ yẽ me wa nong a Zeova.—Gal. 2:20.

9. Bõe n sõng a Mikayɛll t’a toeeme?

⁹ D gom a Mikayɛll sẽn be Ẽndonezi wã yelle. A roagdbã zãms-a-la Biiblã, la a pa yãk yam n deeg lisg ye. A sẽn wa n tar yʋʋm 18, a kẽnga tẽn-zẽng n tɩ lebg kamyõ sofɛɛre. A wa n kẽe kãadem n bas a pagã Ẽndonezi la a leb tẽn-zẽng n tɩ tʋmdẽ. Kaoosg zugẽ, a pagã ne a bi-puglã wa n sɩnga Biiblã zãmsg n tũud bũmb nins b sẽn bãngdã. A Mikayɛll ma wã wa n maana kaalem t’a yãk yam n lebg n kuil n na n tɩ ges a ba wã yelle. A wa n sak n na n zãmsa Biiblã. B sẽn wa n ta Vɩɩmd-y wakat sẽn kõn sa! sebrã sak 27 wã n ta “D bao n bãng n paasã” zĩigẽ, zãmsgã kẽ-a-la wʋsgo. A sẽn wa n bʋgsd a Zeova sũur sẽn segd n sãam to-to a sẽn wa n get a Biigã sẽn namsdã zugã, a raaga nintãam. A sẽn bãng t’a Zeova ne a Zeezi nong-a-la wʋsg woto wã, kɩtame t’a rat n wilg t’a sũur nooma ne b sẽn maanã. A sak n toeemame n wa reeg lisgu.

SÕNG-Y Y BIIBL KAREN-BIIGÃ T’A TOEEM BŨMB NINS A SẼN LƲƖƖSD TAOORÃ

10. Bõe la a Zeezi maan n sõng a karen-biisã tɩ b toeem bũmb nins b sẽn da lʋɩɩsd taoorã? (Luk 5:5-11) (Ges-y fotã me.)

¹⁰ A Zeezi pipi karen-biisã bãnga tao-tao tɩ yaa yẽ la Mesi ning Wẽnnaam sẽn da pʋlmã. La b ra rata sõngr sẽn na yɩl n lʋɩɩs koɛɛgã mooneg taoore. A Zeezi sẽn wa n na n bool a Pɩyɛɛr ne a Ãndere tɩ b bas bũmb fãa n pʋg-a wã, rẽ tɩ b ra zoe n yaa a karen-biis tɩ kaoos bilfu. (Mat. 4:18, 19) Bãmb ne a Zak la a Zã ra naaga taab n yõgd zĩm tɩ kẽesd-b ligdi. (Mark 1:16-20) Yaa vẽeneg tɩ nand t’a Pɩyɛɛr ne a Ãndere “bas b zĩm-gãmba wã” n pʋg a Zeezi, b maana bũmb toor-toor sẽn na yɩl tɩ b zakã rãmb yõd n paamd bũmb nins sẽn yaa tɩlɛ ne-bã. Bõe n sõng-b tɩ b toeem bũmb nins b sẽn da lʋɩɩsd taoorã? Luk sebrã wilgdame t’a Zeezi maana yel-solemd sẽn kɩt tɩ b maneg n kɩs sɩd t’a Zeova tõe n gesa b yelle.—Karm-y Luk 5:5-11.

11. Bõe la y tõe n togs y Biibl karen-biig n keng a tẽebã?

¹¹ D pa tõe n maan yel-soalem wa a Zeezi ye. La d tõe n togsa d Biibl karen-biigã kibay sẽn wilgd a Zeova sẽn teend neb nins sẽn lʋɩɩsd a raabã maaneg taoorã to-to. Wala makre, y tẽra a Zeova sẽn sõng yãmb to-to y sẽn wa n sɩng tigissã kẽndã bɩ? Tõe tɩ yɩɩ tɩlɛ tɩ y sõs ne y tʋʋmdã taoor soab n wilg-a bũmb ning sẽn kɩt tɩ y pa le tõe n tʋm n loog sigbã lɛɛr tigissã daarã. Y sã n wa togsd y Biibl karen-biigã a Zeova sẽn maan bũmb nins n sõng-yã, wilg-y-yã-a y tẽebã sẽn paam pãng to-to y sẽn yãa a Zeova sẽn ning-y bark y sẽn yãk yam n lʋɩɩs a raabã maaneg taoorã.

12. a) Y sã n zãmsd ned Biiblã, bõe yĩng tɩ yaa sõma tɩ y mi n bool koe-moondb toor-toor tɩ b yãag-yã? b) Wãn to la y tõe n tũnug ne video-rãmbã n sõng y Biibl karen-biigã? Rɩk-y makre.

¹² Y Biibl karen-biigã sã n bãng kiris-neb a taab sẽn maan to-to n toeem n lʋɩɩs a Zeova raabã maaneg taoorã, na n naf-a lame. Woto wã, mi n bool-y y tẽed-n-taas toor-toor tɩ b yãag-y n tɩ zãms-a Biiblã. Kos-y-b tɩ b togs b sẽn bãng sɩdã to-to la bũmb nins b sẽn maan n tõog n lʋɩɩs a Zeova raabã maaneg taoorã. Sẽn paase, naag-y y karen-biigã n ges video nins sẽn be Vɩɩmd-y wakat sẽn kõn sa! sebrã “D bao n bãng n paas” wall “Bũmb a taabã” zĩigẽ wã. Wala makre, y sã n wa zãmsd sak 37 wã, y tõe n naaga taab n ges video ning gom-zug sẽn yaa: A Zeova na n gesa tõnd yelle. Rẽ poor bɩ y tik video wã zug n sõng-a t’a bãng t’a sã n lʋɩɩs a Zeova raabã taoore, a Zeova na n sõng-a lame.

SÕNG-Y Y BIIBL KAREN-BIIGÃ T’A BÃNG A SẼN TÕE N MAAN TO-TO B SÃ N WA NAMSD-A

13. Bõe la a Zeezi maan n sõng a karen-biisã tɩ b segl b mens namsg yĩnga?

¹³ A Zeezi togsa a karen-biisã naoor wʋsg tɩ b n na n paama namsg b tũudmã yĩnga, la tɩ namsgã tõe n yii b roagdbã nengẽ. (Mat. 5:11; 10:22, 36) A Zeezi koe-moonegã sẽn wa n kolgd saabã, a keooga a karen-biisã tɩ b tõe n kʋ-b lame menga. (Mat. 24:9; Zã 15:20; 16:2) A sagl-b lame tɩ b yɩ gũusdb koɛɛgã mooneg sasa. A yeel-b lame tɩ b sã n dat n kell n moon koɛɛgã, b pa segd n wẽ no-koɛɛm ne neb nins sẽn kɩɩsd-bã, la tɩ b segd n maana gũusg ne b no-goamã la b tʋʋm-tʋmdɩ wã.

14. Bõe la y tõe n maan n sõng y Biibl karen-biig t’a segl a meng namsg yĩnga? (2 Tɩmote 3:12)

¹⁴ Sẽn na yɩl n sõng d karen-biig t’a segl a meng namsg yĩnga, d tõe n wilg-a-la a tʋmd-n-taase, a zo-rãmb wall a roagdb sẽn tõe n yeel bũmb ninga. (Karm-y 2 Tɩmote 3:12.) A tʋmd-n-taas kẽer tõe n yaand-a-la a sẽn bas bũmb kẽer maanegã yĩnga. Neb a taab tõeeme n pa nong bũmb nins a sẽn zãmsdã, baa a roagdb menga. D sã n sõng d Biibl karen-biisã pĩnd-pĩnd tɩ b segl b mense, namsgã sã n wa wa b bãngda b sẽn na n maanega.

15. Biibl karen-biig zak rãmb sã n wa namsd-a, bõe la y tõe n maan n sõng-a?

¹⁵ Y Biibl karen-biig zak rãmb sã n namsd-a bɩ y sõng-a t’a bãng bũmb ning sẽn kɩt t’a zakã rãmb kẽer sũy yikã. Tõe tɩ yaa b sẽn tagsd tɩ b kẽes-a-la moog yĩnga, wall b sẽn wʋm goam sẽn pa sɩd a Zeova Kaset rãmbã zug yĩnga. Baa a Zeezi zakã neb kẽer ra tagsdame t’a zugã lebgame. (Mark 3:21; Zã 7:5) Sõng-y y Biibl karen-biigã t’a tall sũ-mar ne a zakã rãmb la neb a taaba, la a gomd ne gũusgu.

16. Bõe la y tõe n maan n sõng y Biibl karen-biig t’a gomd bũmb nins a sẽn tẽedã yell ne gũusgu?

¹⁶ Sõng-y y Biibl karen-biigã t’a bãng tɩ baa a roagd sã n wa rat n bãng a sẽn zãmsd bũmb ninsã, a pa segd n bao n wilg-a bũmb fãa vugr ye. A sã n maan woto, a roagdã yam tõe n yiime t’a pa le rat n sõs ne-a ye. Wilg-y-yã-a t’a sã n sõs ne-a koɛɛg-koɛɛga, tõe n paka sor t’a le paam n sõs ne-a nindaare. (Kolo. 4:6) A tõe n sagla a roagdã t’a kẽ jw.org sɩtẽ wã. Woto, a tõogd n bao n bãnga a Zeova Kaset rãmbã wa a sẽn date.

17. Bõe la y tõe n maan n sõng y Biibl karen-biig t’a bãngd n leokd neb nins sẽn tar tags-kɛg a Zeova Kaset rãmbã zugã? (Ges-y fotã me.)

¹⁷ Sõss n be jw.org tɩ b gom-zutã yaa: “Sogsg nebã sẽn wae n sokdẽ.” Y tõe n tũnuga ne sõs-kãens n sõng y Biibl karen-biigã t’a bãng a sẽn tõe n leok a roagdb wall a tʋmd-n-taas sogsg nana-nana to-to. (2 Tɩm. 2:24, 25) Y sã n zãms Vɩɩmd-y wakat sẽn kõn sa! sebrã sak n baas fãa bɩ y tẽeg n sõs “Neb kẽer sẽn yetã” zugu. Sagl-y y karen-biigã t’a mak n wilg a sẽn na n togs ned bũmb a sẽn tẽed to-to. Sã n yaa tɩlɛ, bɩ y sõng-a t’a bãng a sẽn tõe n leok to-to tɩ yɩ sõma n yɩɩda. Woto na n sõng-a lame t’a gomd a sẽn tẽed bũmb ninsã yell n pa yɛɛsdẽ ye.

18. Bõe la y tõe n maan n sõng Biibl karen-biig t’a lebg koe-moond sẽn nan pa reeg lisgu? (Matiye 10:27)

¹⁸ A Zeezi yeela a karen-biisã tɩ b moon nebã koe-noogã. (Karm-y Matiye 10:27.) Biibl karen-biig sã n sɩng koɛɛgã mooneg pĩnda, a na n yãa a Zeova sẽn sõngd-a to-to wã pĩnd-pĩnda, tɩ kɩt t’a maneg n kɩs-a sɩda. Wãn to la y tõe n sõng y Biibl karen-biigã t’a tõog n maan dẽ? Yãmb tigingã sã n wa sigl koe-mooneg sẽn yaa zalle, y tõe n sagla y Biibl karen-biigã t’a tags n ges a sã n pa tõe n kos n lebg koe-moonda. Bilg-y-yã-a bũmb ning sẽn kɩt tɩ neb wʋsg getẽ tɩ yaa nana tɩ b sɩng koɛɛgã mooneg koe-mooneg sẽn yaa zall sasa wã. Bũmb a to me a sẽn tõe n maan yaa a sẽn na n gʋls a yʋʋrã Kiris-nebã vɩɩm la b tʋʋmdã lekollã. La nand t’a tõog n maan dẽ, a na n zãmsa a sẽn tõe n wilg ned bũmb a sẽn tẽed to-to.

WILG-Y TƖ Y KƖSA SƖD TƖ Y KAREN-BIIGÃ RAT N MAANA SẼN NOOM A ZEOVA

19. Wãn to la a Zeezi wilg t’a kɩsa a karen-biisã sɩda, la wãn to la d tõe n dɩk a togs-n-taare?

¹⁹ Nand t’a Zeezi leb saasẽ, a yeela a karen-biisã tɩ daar n wat tɩ b na n le paam taaba. B pa bãng t’a Zeezi gomdã rat n yeelame tɩ b na n wa kẽnga saasẽ ye. Baasgo, yaa b sẽn da maand sɩdã la a Zeezi ra geta. Pa b sẽn maand sãmbsã ye. (Zã 14:1-5, 8) A ra miime tɩ na n dɩka sẽk tɩ b yaool n wa wʋm bũmb kẽer võore. Wala makre, tɩ b na n wa kẽnga saasẽ. (Zã 16:12) Tõnd me tõe n wilgame tɩ d kɩsa sɩd tɩ d Biibl karen-biigã rat n maana sẽn noom a Zeova.

20. Wãn to la Malawi saam-bi-poak a ye wilg t’a kɩsa sɩd t’a Biibl karen-biigã rat n maana sẽn yaa tɩrga?

²⁰ Kɩs-y sɩd tɩ y Biibl karen-biigã rat n maana sẽn yaa tɩrga. Saam-bi-poak a Sɩfũndo sẽn be Malawi wã maana woto. A sɩnga Biiblã zãmsg ne pag a ye yʋʋr sẽn boond t’a Alinafe sẽn yaa Katolik. B ra zãmsda Vɩɩmd-y wakat sẽn kõn sa! sebrã. B sẽn wa n zãms sak 14 n sa wã, a Sɩfũndo soka a Biibl karen-biigã a tagsg sẽn yaa a soab ne nebã sẽn tũnugd ne bõn-naands n pʋʋsdẽ wã. A Alinafe sũurã yikame t’a yeel yaa: “Yaa ned kam fãa n yãkde!” A Sɩfũndo ra sokda a meng a Alinafe sã n pa na n basa Biiblã zãmsgo. La a kell n zãmsa a Alinafe Biiblã ne sũ-mare, n saagdẽ t’a na n wa bãngame tɩ bõn-naandsã pʋʋsg pa sõma ye. Kiuug a wãn poore, b sẽn wa n zãmsd sak 34, a Sɩfũndo sok-a lame yaa: “Yãmb sẽn sɩng Biiblã zãmsg n bãngd a Zeova sẽn yaa Wẽnnaam sɩd-sɩdã, wãn to la nafd yãmba?” A Sɩfũndo wilga a Alinafe sẽn leok to-to wã n yeel yaa: “A sõdga bũmb wʋsg sẽn noom-a. Wala makre, a yeelame t’a Zeova Kaset rãmbã pa maand bũmb Biiblã sẽn gɩdg ye.” Rẽ poore, a Alinafe basa bõn-naandsã pʋʋsg n wa tõog n deeg lisgu.

21. Bõe la d tõe n maan n sõng Biibl karen-biig t’a yãk yam n tũ a Zeova?

²¹ Baa sẽn yaa a Zeova la soab ning “sẽn kɩtd tɩ bɩtẽ wã,” tõnd me tõe n maana bũmb n sõng d Biibl karen-biig t’a tẽebã pãng paase. (1 Kor. 3:7) D pa zãmsd-a Wẽnnaam sẽn dat t’a maanã bal ye. D sõngd-a lame sẽn na yɩl t’a wa nong a Zeova ne a sũur fãa. D sagend-a lame me t’a lʋɩɩs a Zeova raabã taoor n wilg t’a nong-a lame. D wilgd-a-la a sẽn tõe n teeg a Zeova to-to a sã n wa maood ne zu-loeese. D sã n wilgdẽ tɩ d kɩsa sɩd t’a rat n maana sẽn yaa tɩrga, na n sõng-a lame t’a paam raood n yãk yam n tũ a Zeova.