Y sẽn tõe n maan tɩ sõngd-y tɩ y tẽegd vɛrse-rãmba

Mi n yaa toog ne-y tɩ y tẽeg vɛrse y sẽn nong goam wall a sẽn be zĩig ning Biiblã pʋgẽ bɩ? Tõe n yaa vɛrse goam sẽn belsd yãmba, sẽn tõe n sõng-y tɩ y bas tags-kɛga, pa rẽ bɩ goam y sẽn dat n wilg neda. (Yɩɩn. 119:11, 111) Ad sagls a wãn sẽn tõe n sõng-y tɩ y tẽegd vɛrse-rãmba.

• Tũnug-y ne JW Library^® wã. Y tõe n paka zĩig JW Library wã not-rãmbã zĩigẽ n gʋls tɩ “Vɛrse-rãmb m sẽn nonge,” tɩ y sã n wa karemd Biiblã n yã vɛrse y sẽn dat n wa tẽeg bɩ y ning-a be.

• Gʋls-y vɛrse wã n tabl zĩig y sẽn tõe n yã. Bao-y sebr n gʋls vɛrse ning y sẽn dat n tẽegdẽ wã, n tabl zĩig y sẽn na n wae n yãt-a. Neb kẽer tabendeda sɛb a woto b nen-gɛtgã sɛɛga, tɩ sãnda yaa b firgo wã zugu. Kẽer me yõkda vɛrse wã goam foto, n ning b ordinatɛɛrã wall b portaablã ekrã zugu.

• Bao-y seb-peds n tʋm ne. Gʋls-y vɛrse wã seb-pɛdgã neng a yembr zugu, la y gʋls a goamã neng a to wã zugu. Mak-y n ges-y y sã n tõe n gesa vɛrse wã n tẽeg a sẽn yet bũmb ningã, wall y ges a goamã n bãng a sẽn be zĩig ning Biiblã pʋgẽ.