M sã n pa paamd not-sõma lekollẽ wã m maanda wãna?

“Mam mi n nee m karen-bi-taas sẽn wat n zĩ karen-doogẽ wã n pa zãad sebre, n ning ekutɛɛr-dãmb n kelgd miziki, n pa kelgd karen-saambã ye. Karen-bi-kãens sokda b mens bõe yĩng tɩ b pa paamd not-sõma! Karen-biis a taab me n be n yaa wa maam. B maanda b sẽn tõe n zãmsd bũmb ning b sẽn wilg-b lekollẽ wã, n yaool n pa paamd not-sõma ye. Sɩd-sɩda, m pa mi bũmb ning sẽn kɩt tɩ yaa woto wã ye. M sã n karem semennã tõr hal tɩ zĩigã zʋʋg tɩ m wa pa paam not-sõma, m sũurã sãamda wʋsgo.”—A Yolanda.

Bũmb ning sẽn paam a Yolanda wã buud zoe n paama foo bɩ? F sã n paamd not-rãmb sẽn pa sõma n pʋgl taaba, f sɩd tõe n komsa raoodo.

Kom-bɩɩs kẽer sẽn pa paamd not-sõma lekollẽ wã wat n basame n pa le modgd n na n paam not-sõma ye. Sãnda meng pʋd n basda lekollã. Baa f sã n getẽ tɩ woto maaneg n são, bũmb a taab la f tõe n maan n welg yellã. D ges bũmb a nu f sẽn tõe n maan n paam not-sõma.

• F sẽn tõe n maane

• Kom-bɩɩs a taab sẽn yete

F sẽn tõe n maane

• Kẽnd lekollã n pa vaandẽ ye. F tõe n tagsame tɩ nebã fãa mii rẽ, la f sã n nong n vaand n lekollã f pa tõe n paam not-sõma ye.

  “Tõnd lekollẽ wã, yaa karen-biis nins sẽn maand b toog kae ne b not-rãmbã n wae n vaand lekollã. Rẽ yaool n pa nafd-b ye.”—A Matthew.

  Biiblã saglga: “Bũmb ning fãa ned sẽn bʋte, yaa rẽ me la a na n kẽebe.”—Galat-rãmbã 6:7.

• Modg n dɩ zãmsg fãa yõodo. F sã n kẽnd lekollã n pa vaandẽ yaa sõma, la f sã n kẽng bɩ f modg n dɩ zãmsg fãa yõod sõma. Gʋls bũmb sẽn na n sõng-f tɩ f wa tẽege. Bao n wʋm karen-saambã sẽn yet bũmb ningã võore. Sã n tõe bɩ f sok sogsgo.

  “M sã wa be karen-doogẽ wã m sokda sogsg wʋsgo, bala m sã n maan woto karen-saambã manegd n bilga a sẽn zãmsd-d bũmb ningã võor sõma, a sẽn mi tɩ karen-biig n pa wʋmd a võorã yĩnga.”—A Olivia.

  Biiblã saglga: “Bɩ y gũus ne y sẽn kelgd to-to wã.”—Luk 8:18.

• Ra maan zãmb ye. Zãmbã yaa pʋ-lik tʋʋmde. Bũmb toor-toor la f tõe n maan lekollẽ wã tɩ yaa zãmbo. Wala makre f sã n soos n ges f karen-bi-taag sebrẽ n gʋlse. Woto yaa pʋ-lika. A pa na n naf-f me ye.

  “F sã n pa wʋmd bũmb võore, ra soos n ges leoorã f karen-bi-taasã nengẽ ye. F sã n maand zãmbo, pa na n tol n naf-f ye. Sẽn paase f pa zãmsd f sẽn tõe n welg f zu-loeesã f toor to-to ye. F na n baooda f taabã sõngr wakat fãa.”—A Jonathan.

  Biiblã saglga: ‘D rat n zãa d mens ne pʋ-peelem bũmb fãa pʋgẽ.’—Ebre-rãmbã 13:18.

• Lʋɩɩs f devoaar-dãmbã maaneg taoore. Sã n tõe bɩ f reng n maan f devoaar-dãmbã la f yaool n tʋm f tʋʋm a taabã, sẽn yɩɩd fãa bũmb nins f sẽn maand n kokd pemsmã.a Woto f sã n maan f devoaar-dãmbã n sa, f na n paama sẽk n maan bũmb a taab sẽn kõt-f sũ-noogo!

  “M dengd n maana m devoaar-dãmb nins b sẽn kõt-m tɩ m wa maan zakẽ wã. Rẽ sõngd-m lame tɩ m paamd not-sõma. M sã n yi lekoll n kuil fãa m nong n dat n gãand n vʋʋsame wall m kelg miziki. La m modgdame n deng m maan m devoaar-dãmbã n sa, n yaool n maan dẽ.”—A Calvin.

  Biiblã saglga: “Bãng bũmb nins sẽn tar yõod n yɩɩdã n bake.”—Filip rãmbã 1:10.

• Kos sõngre. Ra zoe yãnd n pa rat n sak neb a taab sõngr ye. Kos f roagdbã saglse. Kos f karen-saambã t’a sõng-f tɩ f wʋm bũmb ning a zãmsd yãmbã võor sõma, tɩ f tõog n paam not-rãmb sẽn yaa sõma n yɩɩd pĩndã. Wakat ning me f tõe n baoo ned t’a wat n zãmsd-f bũmb kẽer zakẽ.

  “Kẽng n tɩ gom ne karen-saambã. Kos-a t’a sõng-f tɩ f wʋm bũmb ning a sẽn zãms foomã võor sõma n tõog n wa paam not-sõma. A sũur na n yɩɩ noog a sẽn ne tɩ f maanda f sẽn tõe fãa n na n paam not-sõma wã, n sõng-fo.”—A David.

  Biiblã saglga: “Sagendb sã n yaa wʋsgo, yãkda nenga.”—Yel-bũnã 15:22.