Sõngre, neb nins b pagb bɩ b sɩdb sẽn namsd-bã yĩnga

Siglg ning sẽn get laafɩ wã yell dũniyã gill zugã yeelame: “Pagbã namsg dũniyã gill zugã lebga wa bã-longdg sẽn yelgd tʋʋl-tʋlle, la tɩ rẽnda b maan bũmb tao-tao sẽn na yɩl n welg yel-kãngã. Siglg-kãng wilgame tɩ pagb nins sẽn vɩ ne rapã sʋka, bãmb koabg zugu yaa sẽn ta bãmb 30 la b sɩdbã pãb-yã, bɩ n modg-b n kẽ ne-ba. Nasiõzĩni wã maana vaeesg sẽn nan pa kaoose, n mik tɩ dũniyã gill zugu, pagb nins b sɩdbã bɩ b zakã ned a to sẽn kʋ wã taa bãmb koabg la pis-tã la a yopoe daar fãa.a

Gɛɛlã b sẽn maandã sõngda tõnd tɩ d bãng tɩ b sẽn namsd pagbã zagsã pʋsẽ wã yaa yel-kãseng meng-menga, la b pa sõngd tõnd tɩ d bãng namsgã toom sẽn ta zĩig ning ye.

Y sɩdã bɩ y pagã namsda yãmb zakã pʋgẽ bɩ? Bɩ y mii ned t’a pagã bɩ a sɩdã namsd-a? Sã n yaa woto, bũmb nins sẽn pʋgdã wilgdame tɩ Biiblã tõe n sõng-y lame.

Y sɩdã sã n namsd-y lame, pa yãmb yell ye

Y tõe n paama sõngre

Y pa y yembr ye

B sẽn namsd pagbã zagsã pʋsẽ wã na n wa saame

Y sẽn tõe n maan n sõng pag a sɩd sẽn namsd-a

Y sɩdã sã n namsd-y lame, pa yãmb yell ye

Biiblã sẽn yete: “Tõnd ned kam fãa na n yalsa Wẽnnaam taoor t’a kao a bʋʋd wa sẽn zems a tʋʋma.”—Rom dãmbã 14:12.

Ra yĩm ye: Sẽn namsd-a yãmbã tara taal a sẽn maandã yĩnga.

Y sɩdã sã n yeel t’a sẽn namsd yãmbã yaa yãmb yelle, yaa ziri fasɩ. Pagbã segda ne nonglem, la pa ne namsg ye.—Kolos rãmbã 3:19.

Naoor wʋsgo, rap nins sẽn namsd b pagbã bẽeda zu-kaoolg bãaga, b zakã neb kẽer sẽn da yaa nen-kɛglem-dãmb yĩnga, wall b sẽn yũ rãam n tɩg yĩnga. Sẽn yaa a soab fãa, a tara taal Wẽnnaam taoor bũmb ning a sẽn maand yãmbã yĩnga. Yaa yẽ n segd n maan a sẽn tõe fãa n toeem a manesmã.

Y tõe n paama sõngre

Biiblã sẽn yete: “Sagendb sã n yaa wʋsgo, yãkda nenga.”—Yel-bũnã 15:22.

Ra yĩm ye: Y sã n wa getẽ tɩ tõe n waa ne yelle, wall y pa mi y sẽn na n maanega, y tõe n baoo neb a taab sõngre.

Bõe yĩng tɩ y segd n bao neb a taabã sõngre? Y sɩdã sã n namsda yãmba, tõe n yɩɩ toog wʋsg ne-yã. Yɩl n bãng y sẽn na n yãk yam n maan bũmb ninga tõe n yɩɩ toogo. Bala bũmb kẽer wɛɛngẽ, y pa mi bũmb ning sẽn tar yõod n yɩɩdã, tɩ y segd n yãk yam n maan ye. Wala makre:

• Y yõorã koglgo

• Y kãmbã neer yĩnga

• Yɩl n paam ligd n ges y meng yelle

• Y sẽn nong y sɩdã

• Y sɩdã sẽn tõe n wa toeem a manesmã tɩ y kãadmã ra sãamã yĩnga

Y sã n bee yell a woto buud pʋgẽ, y wat n pa mi y sẽn maandg ye. Ãnda sõngr la y tõe n bao?

Y zoa y sẽn kɩs sɩd ne wall y zakã ned tõe n maana bũmb takɩ n sõng-y la a bels-yã. Y sã n gom ne ned yãmb yell sẽn pake, tõe n sõng-y-la wʋsgo.

Sigls nins sẽn sõngd neb nins b sẽn namsd zagsã pʋsẽ wã tõe n maana bũmb n sõng-yã. Neb nins sẽn tʋmd sigl-kãens pʋsẽ wã tõe n sõng-y lame tɩ y bãng y sẽn tõe n maan n kogl y menga. Y sɩdã sã n sak n deeg t’a kongame la a rat ne a sũur fãa n toeeme, siglg-kãng tõe n sõng-a lame t’a bãng a sẽn segd n deng n maane.

Neb a taab sẽn tar minim tõe n sõngame, sã n wa mik tɩ y rata sõngr zĩig pʋgẽ. Tõe n yɩɩ logtoɛɛmba, neb sẽn get bãad-rãmb yell bɩ neb a taab sẽn tar minim takɩ neb sẽn tar zu-loees a woto buud gesg wɛɛngẽ.

Y pa y yembr ye

Biiblã sẽn yete: “A Zeovab pẽe sũ-sãams rãmbã. A fãagda neb nins raood sẽn komsã.”—Yɩɩn-sõamyã 34:18.

Ra yĩm ye: Wẽnnaam pʋlmame t’a na n sõng-y lame.

Yãmb yell paka a Zeova wʋsgo (1 Pɩyɛɛr 5:7) A mii yellã sẽn namsd yãmb n ta zĩig ninga, la y tagsg sẽn yaa a soaba. A tõe n belsa yãmb ne a Gomdã sẽn yaa Biiblã maasem. Sẽn paase, a ratame tɩ y pʋʋs-a. Y sã n wa pʋʋsdẽ, y tõe n kos-a lame t’a kõ-y yam la pãng tɩ y tõog n mao ne y zu-loɛɛgã.—Ezayi 41:10.

B sẽn namsd pagbã zagsã pʋsẽ wã na n wa saame

Biiblã sẽn yete: “B ned kam fãa na n vɩɩmda a viyn tɩɩg tẽngre, la a kankang tẽngre, tɩ ned kae n na n kẽes-b rabeem ye.”—Mise 4:4, notã.

Ra yĩm ye: Biiblã pʋlmame tɩ ka la bilfu, laafɩ na n zĩnda nebã fãa zagsẽ.

Yaa Wẽnnaam a Zeova a ye bal n tar d zu-loeesã fãa tɩɩm. Biiblã yetame yaa: “Wẽnnaam na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye.” (Vẽnegre 21:4) Wakat kãnga, d pa na n le tẽeg bũmb nins sẽn da namsd tõndã yell ye. D na n tẽra bũmb nins sẽn yaa sõma wã yell bala. (Ezayi 65:17) Yaa laafɩ a woto buud la Biiblã wilgd tɩ y tõe n wa paamame.