Y sẽn tõe n maane, y sã n wa yik bãag zĩig pʋgẽ

Y zoe n tiig n lʋɩɩ bãag bɩ? Sã n yaa woto, y miime tɩ laafɩ wã zu-loees tõe n kɩtame tɩ y maand yɩɩre, n namsdẽ, la kɩt tɩ y yiis ligd wʋsg sẽn na yɩl n tɩp y menga. Sã n wa yaa woto, bõe n tõe n sõng-yã? Wãn to la y tõe n sõng y zakã ned wall y zoa t’a mao ne a bãaga? Baa ne Biiblã sẽn pa logtoeemd sebrã, a tara sagls sẽn tõe n sõng-y tɩ y mao ne y zu-loɛɛgã wa y sẽn tõe tɛka.

Sagls sẽn tõe n sõng-yã, y sã n wa ka laafɩ

• Bao-y tɩbsg logtoɛɛmb nengẽ

  Biiblã sẽn yete: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.”—Matiye 9:12.

  Y sẽn tõe n tũ rẽ to-to: Bao-y logtoɛɛmb sõngr sã n wa yaa tɩlɛ.

  Y sẽn tõe n mak n gese: Bao-y tɩbsg y sẽn tõe n paam tɩ yaa sõma n yɩɩda. Wakat ninga, yɩta sõma tɩ y bao logtoɛɛmb a yiib bɩ sẽn yɩɩd rẽ saglse. (Yel-bũnã 14:15) Togs-y logtorã bũmb ning sẽn namsd yãmbã vẽenega. Modg-y n wʋm-y bũmb ning b sẽn yet yãmbã võore, la y bao n bãng b sã n mii sẽn yaa bãag ning la sẽn namsd yãmbã vẽenega. (Yel-bũnã 15:22) Bao-y n bãng-y bãag ning sẽn namsd yãmbã, la tɩbsg buud toor-toor sẽn be. Y sã n bãng y sẽn datã, na n sõng-y lame tɩ y bãng y sẽn na n mao ne y bãagã to-to, la y bãng n yãk tɩbsg sẽn yaa sõma.

• Maand-y bũmb nins sẽn paasd y yĩnsã keelmã

  Biiblã sẽn yete: “Yĩngã wɩsgr tara yõod bilfu.”—1 Tɩmote 4:8.

  Y sẽn tõe n tũ rẽ to-to: Maand-y bũmb nins sẽn paasd y yĩnsã laafɩ wã, wala makre yĩn-wɩsgre.

  Y sẽn tõe n mak n gese: Nong-y n maand-y yĩn-wɩsgre, n dɩt rɩ-sõma la y gũsdẽ tɩ sekdẽ. Tõe tɩ y modgdame n na n toeem bũmb kẽer tɩ zems ne y laafɩ wã sẽn yaa to-to wã, la logtoɛɛmbã wilgame tɩ y sã n bao sẽk la y modg n maand bũmb nins sẽn paasd y keelmã, na n naf-y lame. La y segd n gũusame tɩ y sẽn maand bũmb ninsã ra wa keng y bãagã, la y maan gũusg me n da wa maan bũmb sẽn pa zems ne tɩbsg ning logtoɛɛmbã sẽn kõ-yã ye.

• Bao-y neb a taab sõngre

  Biiblã sẽn yete: “F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.”—Yel-bũnã 17:17.

  Y sẽn tõe n tũ rẽ to-to: Y zo-rãmbã tõe n sõng-y lame tɩ y tõog toog zu-loees sasa.

  Y sẽn tõe n mak n gese: Sõs-y ne y zoa y sẽn kɩs sɩd ne, la y sẽn tõe n pelg y pʋg n togs-a sẽn be y sũurẽ. Y sã n maan woto, tõe n booga y yɩɩrã la kɩt tɩ y kell n tall sũ-noogo. Y zo-rãmbã la y zakã neb tõe n dat n maana bũmb a taab n sõng-yã, n yaool n pa mi b sẽn na n maan rẽ to-to ye. Rẽ wã, togs-y-b bũmb ning yãmb sẽn dat tɩ b maan n sõng yãmbã vẽenega. Ra bao-y tɩ b maan sẽn yɩɩd b pãng ye. B sã n sõng-y me, bɩ y wilg wakat fãa tɩ y sũur nooma ne rẽ. La tẽeg-y tɩ baa ne y zo-rãmbã sẽn dat n sõng yãmbã, tõe n wa yɩɩ tɩlɛ tɩ y kos-b tɩ b bas-y tɩ y paam n vʋʋse.

• Kell-y n tall-y yam-sõngo

  Biiblã sẽn yete: “Sũ-noog yaa tɩɩm sẽn yaa sõma, la sũ-sãang boogda ned pãnga.”—Yel-bũnã 17:22.

  Y sẽn tõe n tũ rẽ to-to: Y sã n tar tagsg sẽn zemse, na n sõng-y lame tɩ y ra maan yɩɩr tɩ loog noore, la sõng-y tɩ y mao ne y bãagã.

  Y sẽn tõe n mak n gese: Y sã n wa maood n na n toeem bũmb kẽer tɩ zems ne y yɛlã sẽn yaa to-to masã wã, tagsd-y bũmb ning y sẽn tõe n maanã yelle, la pa bũmb ning sẽn yɩɩd y pãngã yell ye. Gũus-y n da wa mak y mengã ne neb a taabã, wall y sẽn da yaa to-to nand tɩ y lʋɩ bãagã ye. (Galat-rãmbã 6:4) Yãk-y bũmb nins y sẽn dat n wa maanã tɩ zems ne y yɛlã sẽn yaa to-to wã. Rẽ na n sõng-y lame tɩ y ra wa koms raood n bas ye. (Yel-bũnã 24:10) Sõng-y neb a taabã wa y sẽn tõe tɛka. Sũ-noog ning y sẽn na n paam y sẽn sõngd y taabã yĩngã na n sõng-y lame tɩ y ra tagsd y zu-loeesã yell tɩ loog noor ye.—Tʋʋma 20:35.

Wẽnnaam tõe n sõng-y lame tɩ y mao ne y bãagã bɩ?

Biiblã wilgame tɩ Wẽnnaam a Zeovaa tõe n sõnga ned t’a tõog n mao ne zu-loees nins bãag sẽn wat ne wã. Baa ne d sẽn pa gũud t’a Zeova maan yel-solemd n sõng-dã, neb nins sẽn tũud-a wã tõe n paamame t’a kõ-b bũmb kẽere, wala makre:

Laafɩ. A Zeova tõe n kõ-y-la a “laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.” (Filip rãmbã 4:6, 7) Laafɩ kãng bɩ sũur pʋgẽ bãanã tõe n sõnga ned t’a ra maan yɩɩr tɩ loog noor ye. Wẽnnaam kõta laafɩ kãng neb nins sẽn pʋʋsd-a la b basd b yɩɩrã ne-a wã.—1 Pɩyɛɛr 5:7.

Yam. A Zeova tõe n kõ-y-la yam tɩ y bãng n yãk yam-sõngo. (Zak 1:5) Ned tõe n paama yam a woto buudu, a sã n zãmsd Biiblã la a tũud a saglsã sẽn sõngd wakat fãa wã.

Saagr tɩ beoog na n yɩɩ neere. A Zeova pʋlmame tɩ wakat n wat tɩ “tẽngã ned baa a ye pa na n yeel t’a ka laafɩ ye.” (Ezayi 33:24) Saag-kãng sõnga neb wʋsg tɩ b kell n tall b sũ-noogã, baa ne b sẽn da bẽed bã-kɛgemsã.—Zeremi 29:11, 12.