Yʋʋmd 2022 yɩɩ yɩɩr la zũnd-zãnde: Bõe la Biiblã yeta?

Yʋʋmd 2022 sasa, d ra wae n wʋmda kibay sẽn gomd zab yelle, ligd zu-loeese, la sabab-wẽns yelle. Yaa Biiblã bal n togsd yel-kãensã fãa sẽn be wã võore.

Yɛl nins sẽn maan yʋʋmd 2022 sasa wã võore

Yɛl nins sẽn maan rɩẽ wã kɩtame tɩ d ne vẽeneg tɩ d vɩɩ wakat ning Biiblã sẽn bool tɩ “yaoolem wakatã.” (2 Tɩmote 3:1) Wakat kãng sɩnga yʋʋmd 1914. Bɩ d ges yɛl kẽer sẽn zĩnd yʋʋma noore, tɩ wilgdẽ tɩ Biiblã sẽn pĩnd n togs yɛl ninsã pidsda tõnd wakatã.

“Zaba.”—Matiye 24:6.

• “Yʋʋmd 2022 yɩɩ yʋʋmd zab-toos sẽn lebg n sɩng Erop soolmẽ wã.”a

“Kom.”—Matiye 24:7.

• “Kom ning sẽn zĩnd yʋʋmd 2022 buud ra zĩnd n zĩnd ye.b

“Bã-longdse.”—Luk 21:11.

• “Bãas kẽer wala poliyo wã bãagã lebg n paama pãnga. Tarmangãs nins wãambsã sẽn wat ne wã lebga zu-loɛɛg meng-menga. Koronaviriisã bã-longdgã me ket n namsda nebã wʋsgo. Woto kɩtame tɩ d ne vẽeneg tɩ bã-longdsã yaa yell meng-menga, la tɩ ninsaalbã pa tar pãng n tõe n kɩt tɩ b sa fasɩ ye.”c

“Bũmb toor-toor sẽn kẽesd rabeem.”—Luk 21:11.

• “Tʋʋlgã, warã, weoogã sẽn kokd bugmã, la sa-kãsemsã. Yʋʋm 2022 yaa yʋʋmd nebã sẽn pa na n tol n yĩm a yell ye. Bala yʋʋm-kãnga, sabab-wẽns n zĩnd zĩis wʋsg n kʋ neb ka tɛka, n sãam teed wʋsgo, la kɩt tɩ neb milyõ-rãmb zoe n bas b zagse.”d

“Tẽn-dãmbgo.”—Luk 21:9.

• “Yʋʋm 2022 wã, nebã sũy yika wʋsg ligdã zu-loees yĩnga, sẽn yɩɩd fãa teedã ligd sẽn tall paasgã, tɩ rẽ kɩt tɩ b yi n kẽn n wilg b sũ-pa-noaang ne goosneema-rãmbã.”e

Bõe n na n maan yʋʋmd 2023?

Ned kae n tõe n togs bũmb ning sẽn na n maan yʋʋmd 2023 ye. D sẽn mi bal yaa tɩ ka la bilfu, Wẽnnaam Rĩungã bɩ a goosneema wã sẽn be saasẽ wã na n wa welga ãdem-biisã zu-loeese. (Dãniyɛll 2:44) Goosneema-kãng na n wa menesa bũmb nins fãa sẽn kɩt tɩ ninsaalbã namsdẽ wã, la a kɩt tɩ Wẽnnaam raabã maan tẽngã zugu.—Matiye 6:9, 10.

D sagend-y lame tɩ y tũ a Zeezi Kirist saglgã n “kell n gũ,” la y get yɛl nins sẽn maand dũniyã zugã sẽn pidsd Biiblã bãngr-goamã to-to. (Mark 13:37) Y sã n gʋls n kose, d na n sõng-y lame tɩ y bãng Biiblã saglsã sẽn tõe n sõng-y to-to masã menga, la b sẽn tõe n sõng yãmb ne y zakã rãmb to-to tɩ y bãng tɩ beoog na n yɩɩ neere.