Bõe yĩng t’a Zeova Kaset rãmbã pa naagd n maand bũmb kẽer b sẽn maand tẽngã yʋʋr yĩnga?
A Zeova Kaset rãmbã waoogda goosneema-rãmbã la bũmb nins sẽn makd-bã. D miime tɩ neb a taabã tara sor n na n wẽen tɩ b na n saka b tẽngã raabo, bɩ n pʋʋs darpo wã wall b yɩɩl tẽngã tãb-kaoor yɩɩllã.
La a Zeova Kaset rãmbã yãka yam n pa na n naag n maan yel-kãensã, bala d tẽedame tɩ rẽ kɩɩsda Biiblã sẽn yetã. Neb a taabã sã n pa modgd tõnd tɩ d tẽ bũmb nins b sẽn tẽedã wa tõnd me sẽn pa modgd bãmb tɩ b tẽ bũmb nins d sẽn tẽedã, d sũur noomame.
Ad bũmb kẽer yell d sẽn na n gom sõs-kãngã pʋgẽ:
La laloa wã sã n yeel tɩ yaa tɩlɛ tɩ d naag n maan yel-kãensã yẽ?
A Zeova Kaset rãmbã teenda neb sẽn dat toeeng bɩ politik sull bɩ?
Bõe la Biiblã yet rẽ wɛɛngẽ?
Ad bũmb a yiib Biiblã sẽn yet tɩ sõngd tõnd d yam-yãkrã wɛɛngẽ:
Wẽnnaam bal n tog ne waoogre. Biiblã yeelame yaa: “Yaa yãmb Wẽnnaam a Zeova la y segd n waooge. Yaa yẽ a ye bal la y segd n sak ne y sũur fãa.” (Luk 4:8) Nebã sã n mi n na n wẽen tɩ b na n saka b tẽngã raabo, bɩ b sã n na n yɩɩl tãb-kaoorã yɩɩla, b wae n yetame tɩ b na n nonga b tẽngã n yɩɩd bũmb fãa. Yaa rẽ yĩng la a Zeova Kaset rãmbã sẽn get tɩ pa zems tɩ b naag n maan yel-kãensa wã.
A Zeova Kaset rãmbã getame me tɩ b sã n pʋʋsd darpo wã yaa wa b sẽn waoogd bõn-naandg bɩ b sẽn pʋʋsd-a. Biiblã yaool n gɩdga rẽ. (1 Korẽnt rãmbã 10:14) Kʋdemd yel-mitb kẽer wilgame tɩ sɩd-sɩda, tẽng darpo yaa wa tũudum bũmbu. Kʋdemd yel-mit a Carlton Hayesa yeelame yaa: “Tẽng-n-bɩɩlmã yaa wa tũudum, tɩ darpo wã yaa a pipi bãnde, la a bũmb ning b sẽn waoogdã.” Seb-gʋlsd a Daniel Mannix goma pipi kiris-nebã yell n yeel yaa: “Kiris-nebã ra zãgsdame . . . tɩ b kõn maan maoong n kõ Rom naabã wẽnd ye. Rũndã-rũndã, rẽ yaa wa f sẽn na n zãgs tɩ f kõn pʋʋs darpo wã ye.b
Baa ne a Zeova Kaset rãmbã sẽn pa pʋʋsd darpo wã, b pa na n sak n sãam-a, n yõog-a bugum bɩ n paoog-a ne manesem a to ye. B pa maand woto ne bũmb baa a ye sẽn makd tẽngã me ye.
Ninsaalbã fãa yaa a ye Wẽnnaam nifẽ. (Tʋʋma 10:34, 35) Biiblã yeelame tɩ Wẽnnaam “tũnuga ne rao a ye n maan buud toɛy-toɛyã fãa.” (Tʋʋma 17:26) Rẽ n so t’a Zeova Kaset rãmbã tẽed tɩ pa zems tɩ b waoog buud bɩ tẽng neb n yɩɩg a taabã ye. Tõnd waoogda neb buud fãa, baa b sẽn yitẽ wall b sẽn be zĩig ninga.—1 Pɩyɛɛr 2:17.
La laloa wã sã n yeel tɩ yaa tɩlɛ tɩ d naag n maan yel-kãensã yẽ?
A Zeova Kaset rãmbã pa kɩɩsd goosneema wã ye. D tẽedame tɩ goosneema-rãmbã naaga Wẽnnaam “sẽn sigl yɛlã to-to wã,” rat n yeel tɩ yaa yẽ n bas tɩ b rɩt naam. (Rom dãmbã 13:1-7) D tẽedame me tɩ kiris-nebã segd n sakda nanambsã.—Luk 20:25.
La nanambsã sã n kõ noor sẽn kɩɩsd Wẽnnaam noyã, d segd n maana wãna? Wakat ninga, d tõe n kosa goosneema wã t’a maneg noorã, wall t’a toeem-a.c B sã n pa sak n toeem noorã, a Zeova Kaset rãmbã yãkda yam n na n sak Wẽnnaam sẽn yaa “naab ning tõnd sẽn segd n sakã, pa ninsaalbã ye.”—Tʋʋma 5:29.
A Zeova Kaset rãmbã teenda neb sẽn dat toeeng bɩ politik sull bɩ?
Ayo. A Zeova Kaset rãmbã pa teend neb sẽn dat toeeng sulli, b pa kẽesd b toog politik yɛlẽ me ye. D sẽn pa wẽend tɩ d na n saka tẽngã raabã, d sẽn pa pʋʋsd darpo wã, la d sẽn pa yɩɩnd tãb-kaoorã yɩɩlã pa d sẽn maood n dat toeeng yĩnga, leb n pa politik yĩng ye. Yaa d sẽn tũud bũmb ning Biiblã sẽn yet yel-kãensã wɛɛngẽ wã yĩnga.
a Essays on Nationalism, seb-neng 107-108.
b The Way of the Gladiator, seb-neng 212.
c Wala makre, ges-y sõsg ning gom-zug sẽn yaa “Le courage et la conscience de deux petites filles conduisent à une décision historique en 1943.”