M roagdbã sã n kao b kãadmã, m maanda wãna?

Bũmb sẽn namsd kom-bɩɩsã n tɩ yɩɩda, yaa b roagdbã sã n kao b kãadmã. Bõe la f tõe n maan n tõog n mao ne zu-loe-kãngã?

Sõs-kãngã pʋgẽ d na n yãa:

• Bũmb a tãab f sẽn pa segd n maane

• Bũmb a tãab f sẽn tõe n maane

• Kom-bɩɩs a taab sẽn yete

Bũmb a tãab f sẽn pa segd n maane

1. Ra tags tɩ yaa fo yell ye

“Vugri, m ma yeela maam tɩ yẽ ne m baaba zu-loeesã sɩnga mam rogmã poore. Rẽ kɩtame tɩ m ra tagsdẽ tɩ yaa mam yĩng la m roagdbã kãadmã sẽn pa yãk nengã.”—A Diana.

Ning woto f yamẽ: Pa fo yĩng la f roagdbã sẽn kao b kãadmã ye. Yaa bãmb b yiibã sẽn pa zems taabã yĩng la b sẽn kao b kãadmã. Ka foom n wa ne b zu-loeesã, f le pa tõe n welg-b me ye. Yaa bãmb n segd n welg b kãadmã zu-loeesã.

2. Ra maan sũ-kẽk ye

“M sũur sãama wʋsg ne m baaba, a sẽn zãmb m ma wã yĩnga. Na n yɩɩ toog ne-m tɩ le kɩs-a sɩda.”—A Rianna.

Ning woto f yamẽ: Tõe tɩ f sũurã sãama wʋsgo, bũmb ning sẽn maan f roagdbã sʋkã yĩnga. F bee bʋʋm. La f sã n maan sũ-kẽka, pa sõma ne foo ye. Tõe n booga f yĩnsã laafɩ, la f sũ-noogã. Yaa rẽ la b sẽn mi n yet tɩ ned sẽn maand sũ-kẽk yaa wa ned sẽn yũud pozõno, n yaool n dat tɩ ned ning a sẽn maand sũ-kẽk ne wã lʋɩ bãagã.a

3. Ra tags tɩ f pa na n wa paam sũ-noog f kãadmã pʋgẽ ye

“M yɛɛsda m na n wa maan wa m baaba sẽn maanã. M yɛɛsda m sã n wa kẽ kãadem, n wa paam kamba, m na n wa maana wa m roagdbã sẽn maan bũmb ningã, tɩ kɩt tɩ m kao m kãadmã.”—A Jessica.

Ning woto f yamẽ: F roagdbã kãadmã sẽn pa yãk nengã, pa rat n yeel tɩ fo me kãadmã pa na n yãk neng ye. F pʋd n tõe n dɩka yam bũmb ning sẽn paam f roagdbã pʋgẽ. Wala makre, f tõe n bɩɩsa zʋg-sõma sẽn na n wa sõng-f tɩ f yɩ pʋg-sõngo, wall sɩd-sõngo.

Bũmb a tãab f sẽn tõe n maane

1. Sõs ne neda. Neb nins sẽn pa togsd bũmb nins sẽn namsd-bã wat n maana bũmb kẽer sẽn tõe n wã-ba. Wala makre, rãamã yũ tɩ looge, la dorgã yũubu. Wall tɩ f maan wa bãmba, ad bũmb kẽer f sẽn tõe n maane:

Sõs ne f roagdbã. F roagd a ye bɩ b yiibã fãa sã n dat tɩ f kẽes f toog b zu-loeesã pʋsẽ bɩ n teel-a, tall raood n gom ne bʋgsem n wilg-a rẽ sẽn namsdf to-to wã. Sã n yaa toog tɩ f togs-b bũmb ning sẽn namsd-fã vẽenega, f tõe n gʋlsa rẽ sebr zug n kõ b nin-yend bɩ b yiibã fãa.

Sõs ne f zoa f sẽn kɩs sɩd ne. F sã n tar ned sẽn na n sak n kelg foo, sõngd-f lame tɩ f yamã gãande. Biiblã yetame yaa: “F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.”—Yel-bũnã 17:17.

Pʋʋs f Naandã. A Zeova sẽn yaa “Soab ning sẽn wʋmd pʋʋsgã” na n kelg-f-la wakat fãa. (Yɩɩn-sõamyã 65:2) Biiblã yetame yaa: “Sik-y y yɩɩrã fãa n bas ne-a, bala a geta yãmb yelle.”—1 Pɩyɛɛr 5:7.

• F roagdbã sʋka, ãnd n tõe n tõog a sũuri, tɩ f tõe n sõs ne-a ne bʋgsem?

• F zoa bʋgo, tɩ yaa bi-bɩɩg bɩ kãsma, la f tõe n teeg t’a sõng-f tɩ f mao ne f zu-loɛɛgã?

• Bõe takɩ la f tõe n pʋʋs n kose?

2. Sak n deeg tɩ yɛlã toeemame

F roagdbã kãadmã kaoobã tõe n kɩtame tɩ f toeem zaka, lekolle, la zo-rãmba. Baa ligd ning b sẽn da n kõt foomã tõe n boogame. Vẽenega, rẽ tõe n sãama f sũur wʋsgo, la kɩt tɩ f maand yɩɩre, n pʋd n getẽ tɩ f vɩɩmã pa le lebd be ye. Bõe n tõe n sõng-f tɩ toeengã ra yɩ toog ne-fo? Ges f sẽn tõe n maan n tõog n toeem tɩ zems ne yɛlã sẽn yaa to-to masã wã.

• Bõe la f segd n toeem hal tɩ pa nana, f roagdbã sẽn kao b kãadmã yĩnga?

• Bõe la f tõe n maan tɩ sõng-f tɩ f tõog n toeeme?

3. Bao n bãng zʋg-sõma nins f sẽn tarã

Baa ne f roagdbã kãadmã kaoob sẽn tõe n kɩt tɩ f maan yɩɩr wʋsgã, tõe n sõng-f lame me tɩ f bãng tɩ f tara zʋg-sõma. Pʋd n tõe n sõng-f lame tɩ f bɩɩs zʋg-sõma a taaba. A Zeremi sẽn yaa bi-bɩɩg roagdb sẽn kao b kãadem t’a tar yʋʋm 13 yeelame yaa: “M roagdbã kãadmã kaoob kɩtame tɩ m tʋmd tʋʋm m sẽn da pa minim n tʋmd zakã pʋgẽ. Maam n da yaa bi-kãsenga. Rẽnd m da segd n sõnga m ma n yɩɩd pĩndã. M da segd n sõnga m yaoã me.”

• F roagdbã sẽn kao b kãadmã kɩtame tɩ f bãng tɩ zʋg-sõma bʋs la f tara?

• Zʋg-sõma bʋs la f rat n bɩɩse?