M segd n pʋʋsa nin-sõamyã wã bɩ?

Biiblã sẽn yete

Ayo. Biiblã wilgdame tɩ d segd n pʋʋsa Wẽnnaam a ye tãa ne a Zeezi yʋʋre. A Zeezi yeela a karen-biisã yaa: “Ad yãmb sẽn tog n pʋʋs to-to: Tõnd ba sẽn be arzãna, bɩ yãmb yʋʋrã paam waoogre.” (Matye 6:9) A zɩ n yeel a karen-biisã tɩ b pʋʋs nin-sõamyã, malɛgse, wall ned a to n zʋʋg Wẽnnaam ye.

A Zeezi leb n yeela a karen-biisã yaa: “Maam la sore, la sɩda, la vɩɩm. Ned baa a yembr ka tõe n wa m ba nengẽ tɩ ka tũ ne maam ye.” (Zã 14:6) Yaa a Zeezi bal la Wẽnnaam kõ sor t’a yõk sɛɛg tõnd yĩnga.—Ebre-rãmbã 7:25.

La mam sã n pʋʋsd Wẽnnaam la m pʋʋsd nin-sõamyã wã yẽ?

Wẽnnaam sẽn wa n togsd Tõod piigã, a yeelame: “Mam yaa Sẽn-Ka-Saab sẽn yaa yãmb Wẽnnaam. Mam yaa Wẽnnaam sẽn yaa sũ-kiir soaba.” (Yikri 20:5) Wẽnnaam sẽn yeel t’a yaa “sũ-kiir soabã” rat n yeelame tɩ bõe? Traduction du monde nouveau wã pʋgẽ, b lebga vɛrse-kãngã n yeel tɩ Wẽnnaam “datame tɩ d waoog yẽ a ye bala.” Wẽnnaam datame tɩ bũmb nins d sẽn maand n waoogd yẽ bɩ n tũud-a wã yɩ yẽ yĩng bal la d maand bõn-kãense. Wala makre, pʋʋsgã.—Ezayi 48:11.

D sã n pʋʋs ned a to d beegda Wẽnnaam, baa sã n yaa nin-sõamyã wã wall malɛg-sõamyã wã. Tʋm-tʋmd a Zã sẽn wa n mak n na n waoog malɛkã, malɛkã gɩdg-a lame n yeele: “Da saag n maan a woto ye! Mam yaa fo tʋmd-n-taaga, la fo ba-biis nins sẽn tar a Zeezi kasetã tʋmd-n-taaga. Waoog Wẽnnaam!”—Vẽnegre 19:10.