Wẽnnaam na n leoka m pʋʋsgã bɩ?

Biiblã sẽn yete

N-ye. A na n leokame. Biiblã ne neb wʋsg kibay wilgdame tɩ Wẽnnaam leokda pʋʋsgo. Biiblã yetame: “Sẽn-Ka-Saab pidsda sẽn zoet-b bãmbã ratem. B sã n bool-b n kos sõngre, bãmb wʋmdame n wa sõng-ba.” (Yɩɩn-sõamyã 145:19) La Wẽnnaam na leok yãmb pʋʋsgã bɩ a kõn leokã bee ne yãmb n yɩɩda.

Ad bũmb nins sẽn tar yõod Wẽnnaam nifẽ

• D segd n pʋʋsa Wẽnnaam, pa a Zeezi, a Maari, nin-sõamyã wã, malɛgsã, bɩ bõn-naands ye. Yaa Wẽnnaam a Zeova bal n “kelgd pʋʋsgã.”—Yɩɩn-sõamyã 65:3.

• D segd n pʋʋsame tɩ zems ne Wẽnnaam daabã wall a noyã sẽn be Biiblã pʋgẽ wã.—1 Zã 5:14.

• D segd n pʋʋsa ne a Zeezi yʋʋre, tɩ wilg tɩ d nand-a lame. A yeelame: “Ned baa a yembr ka tõe n wa m ba nengẽ tɩ ka tũ ne maam ye.”—Zã 14:6.

• D segd n pʋʋsa ne tẽebo, tɩ sã n yaa tɩlɛ bɩ d kos tẽeb n paase.​—Matye 21:22; Luk 17:5.

• D segd n talla sik-m-meng la pʋ-peelem. Biiblã yetame: “Sẽn-Ka-Saab bee hal yĩngri, la b nee sik-m-mens rãmbã.”—Yɩɩn-sõamyã 138:6.

• D segd n wɩnga ne pʋʋsgo. A Zeezi yeelame: “Bɩ y ket n kotẽ, tɩ b na kõ-yã.”—Luk 11:9, Traduction du monde nouveau.

Ad bũmb nins sẽn pa tar yõod Wẽnnaam nifẽ

• Yãmb yĩngã kõbg wall y sẽn yit tẽng ningã. “Wẽnnaam ka tũusd neb ye. Ned ning fãa, sẽn yaa buud ning fãa sẽn zoet Wẽnnaam la a maand tɩrlem, yẽnda soab tata bãmb yam.”—Tʋʋma 10:34, 35.

• Y zĩndame n pʋʋs tɩ y wõgemdame wall y yĩgimda a rũm-kur pa rẽ bɩ y yalsame n pʋʋs me, Wẽnnaam pa get rẽ ye.​—1 Kibayã 17:16; Neemi 8:6; Dãniyɛll 6:10; Mark 11:25.

• Y zẽka y koɛɛg n pʋʋs wall y pʋʋsa y sũurẽ. Baa ned sã n pʋʋsd a sũurẽ tɩ neb a taab pa miẽ, Wẽnnaam leokdame.​—Neemi 2:1-6.

• Yaa zu-loe-kãseng bɩ zu-loe-bil poorẽ la y pʋʋsda. Wẽnnaam yetame tɩ y “sik y yɩɩrã fãa n bas ne bãmba, bala, bãmb n get yãmb yelle.”—1 Pɩyɛɛr 5:7.