Bõe la Biiblã yet zɩɩmã reegr wɛɛngẽ?

Biiblã sẽn yete

Biiblã yeelame tɩ d pa segd n dɩ zɩɩm ye. Rẽnd d pa segd n dɩ zɩɩm wall plasmã wã, globil ruuz-rãmbã, globil blã-rãmbã la plakɛt-rãmbã sẽn be zɩɩmã pʋgẽ wã, pa rẽ bɩ d sak tɩ b ning-d bõn-kãens ye. Ad vɛrse-rãmb sẽn wilgd rẽ:

• Sɩngre 9:4. Sa-kãsengã poore, Wẽnnaam kõo a Nowe ne a zakã rãmb sor tɩ b tõe n wãb rũms nemdo, la b ra pa segd n dɩ zɩɩm ye. Wẽnnaam yeela a Nowe yaa: “Bũmb sẽn be bala, yaa tɩ yãmb ka tog n dɩ rũng ne a vɩɩm ye. Rat n yeelame tɩ y ra rɩ-a ne a zɩɩmã ye.” Rẽ tɛka, ninsaalbã fãa segd n tũu no-kãngã, bala b fãa yaa a Nowe yagense.

• Maan-kʋʋre 17:14. “Da rɩ-y bũmb zɩɩm ye. Bala, bõn-vɩɩl buudã fãa vɩɩm be a zɩɩmẽ. La ned sã n dɩ zɩɩm b na n yiis-a-la buudã sʋka.” Wẽnnaam nifẽ, vɩɩm bee zɩɩm pʋgẽ, n yaa yẽ rẽnda. Baa sẽn yaa Israyɛll buudã neb la b kõ no-kãnga wã, a wilgdame tɩ Wẽnnaam nifẽ, noor ning sẽn gɩdg zɩɩm dɩɩbã pa reem yell ye.

• Tʋʋma 15:20. “Lak b mens ne . . . zɩɩm.” Wẽnnaam kõo kiris-nebã noor ning a sẽn da kõ a Nowe wã. Bãngdbã wilgame tɩ pipi kiris-nebã zãgsa zɩɩm rɩɩbo, la b zãgs meng tɩ b kõn tall zɩɩm n tɩp-b ye.

Bõe yĩng tɩ Wẽnnaam yeel tɩ d segd n laka d mens ne zɩɩm?

Logtoɛɛmbã tara kaset wʋsg sẽn wilgd tɩ zɩɩmã reegr tõe n waa ne bãase. La sẽn yɩɩd fãa, Wẽnnaam yeelame tɩ d segd n laka d mens ne zɩɩm, bala zɩɩmã sẽn makd bũmb ningã yaa sõng a nifẽ.—Maan-kʋʋre 17:11; Koloos-rãmbã 1:20.