Zĩn-dãmbã sɩd beeme bɩ?

Biiblã sẽn yete

N-ye. Zĩn-dãmbã n yaa “malɛgs nins sẽn maan-b yel-wẽnã,” n kɩɩs Wẽnnaam n lebg tõatbã. (2 Pɩyɛɛr 2:4) Pipi malɛk ning sẽn lebg zĩn yɩɩ a Sʋɩtãana, soab ning Biiblã sẽn boond tɩ “zĩn-dãmbã naabã.”—Matye 12:24, 26.

Malɛgs sẽn kɩɩs Wẽnnaam a Nowe wakatẽ wã

Biiblã wilgame tɩ malɛgs n kɩɩs Wẽnnaam sẽn deng a Nowe wakatẽ sa-kãsengã, n yeele: “Wẽnnaam kom-dibli wã gesame tɩ ninsaalbã kom-pugli wã yaa neeba, la bãmb baoo kom-pugli bãmb sʋkã n maan b pagba.” (Sɩngre 6:2) Malɛg-wẽn-kãens ‘yi n basa b mens zĩigã’ saasẽ, n tedg b mens n lebg ninsaalb sẽn na yɩl n tõog n kẽ ne pagba.—Zʋʋd 6.

Sa-kãsengã sẽn sɩng niibã, malɛg-tõatbã tedga b mens n le lebg malɛgs n kẽng saasẽ. La Wẽnnaam rig-b lame n pa bas tɩ b naag malɛg-sõamyã wã ye. Bũmb a to me la Wẽnnaam maan n sɩbg-ba. A kɩtame tɩ b pa le tõe n tedg b mens n lebg ninsaalb ye.—Efɛɛs-rãmbã 6:11, 12.