Yaa yɛ la a Sʋɩtãan be-yã?

Biiblã sẽn yete

A Sʋɩtãan sẽn yaa malɛkã yĩnga, a bee zĩig ninsaal nif sẽn pa tõe n yã. La zĩ-kãng pa bugum yiri, t’a be be n namsd nin-wẽnsã wa d sẽn ne sõs-kãngã desẽ wã zugã ye.

Zab-kãseng n zĩnd saasẽ

Wakat n zĩnd t’a Sʋɩtãan ra gilgd saasẽ wa a sẽn date, hal n da tõe n naag malɛg-sakdbã n kẽng Wẽnnaam taoore. (Zoob 1:6) La Biiblã ra pĩnd n togsame tɩ zab-kãseng n na n zĩnd saasẽ, la tɩ b ra na n diga a Sʋɩtãan t’a sig ‘tẽngã zugu.’ (Vẽnegre 12:7-9) Biiblã sẽn wilgd yɛlã sẽn pʋgd taab to-to wã, la yɛlã sẽn yɩ to-to dũniyã zugã wilgdame tɩ zab-kãng zoe n zĩnda saasẽ. Masã, b gɩdga a Sʋɩtãan t’a pa le tõe n zãag ne tẽngã ye.

La woto rat n yeelame tɩ Sʋɩtãanã tara zĩig takɩ tẽngã zug n be be bɩ? Yaa sɩd tɩ Biiblã goma pĩnd wẽndẽ Pɛrgammã galʋ-tẽngã yelle, n yeel tɩ yaa zĩig ning “a Sʋtãan geerã” sẽn be, la “zĩig ning a Sʋtãan sẽn be wã.” (Vẽnegre 2:13) La sɩd-sɩda, tõe tɩ gom-kãensã yaa sẽn na n wilg t’a Sʋɩtãan tũudmã ra tara pãng galʋ-tẽng-kãng pʋgẽ. Biiblã yeelame tɩ Sʋɩtãanã rɩta naam “dũniyã soolem-dãmbã” fãa zutu. Dẽnd a Sʋɩtãan pa tar zĩig takɩ tẽngã zug n beẽ ye. La a pa tõe n zãag ne tẽngã ye.—Luk 4:5, 6.