Sʋɩtãanã sɩd beeme bɩ?

Biiblã sẽn yete

N-ye. Sʋɩtãanã sɩd beeme. A yaa ‘dũniyã naaba,’ malɛk sẽn lebg wẽnga, n kɩɩsd Wẽnnaam. (Zã 14:30; Efɛɛs-rãmbã 6:11, 12) Biiblã sẽn boond a Sʋɩtãan ne yʋy ninsã wilgda a sẽn yaa a soabã:

Sʋɩtãanã, sẽn dat n yeel tɩ “Kɩɩsdã.”—Zoob 1:6.
Rõatã, sẽn dat n yeel tɩ “Munaafɩɩkã.”—Vẽnegre 12:9.
Waafã, sẽn mi n makd “Bɛlgd” Biiblã pʋgẽ wã.—2 Korẽnt-rãmbã 11:3.
Makdã.—Matye 4:3, Wẽnnaam Sebre, 1983.
Zĩrẽ-yagdã.—Zã 8:44.

A Sʋɩtãan pa wẽngã tʋlsem ye

Neb kẽer tagsdame t’a Sʋɩtãan yaa wẽngã tʋlsem sẽn be tõnd sũyẽ wã bala. La kibar n be Biiblã pʋgẽ n wilgdẽ tɩ Wẽnnaam goma ne a Sʋɩtãana. Wẽnnaam zemsa zãnga. Rẽnd a ra pa gomd ne wẽng sẽn be a sũurẽ ye. (Tõodo 32:4; Zoob 2:1-6) Sẽn paase, a Sʋɩtãan maka a Zeezi sẽn pa tar yel-wẽndã. (Matye 4:8-10; 1 Zã 3:5) Rẽnd Biiblã wilgdame t’a Sʋɩtãan sɩd beeme, la t’a pa wẽngã tʋlsem sẽn be ninsaal sũurẽ wã ye.

Neb wʋsg sẽn pa tẽed t’a Sʋɩtãan sɩd beeme wã segd n linga tõnd bɩ? Ayo. Bala, Biiblã yeelame t’a Sʋɩtãan tũnugda ne sɩlem sẽn na yɩl n pids a raabã. (2 Tesalonik-rãmbã 2:9, 10) Sɩlem-kãseng a ye yaa a sẽn lut neb wʋsg yam n kɩtdẽ tɩ b tẽed t’a ka be wã.—2 Korẽnt-rãmbã 4:4.

Tags-kɛg a taab neb sẽn tar Sʋɩtãanã zugu

Tags-kegre: Lisifɛɛr yaa a Sʋɩtãan yʋʋr a to.

Sɩdã: Ebre wã gom-bil ning Biibl-dãmb kẽer sẽn lebgd tɩ “Lisifɛɛrã” rat n yeelame tɩ “sẽn yãgd-a wã.” (Ezayi 14:12) D sã n karem Ezayi sak 14 vɛrse-rãmb a taaba, d bãngdame tɩ gom-bi-kãng bilgda Babilon na-roogã bɩ a nanambsã, Wẽnnaam sẽn da na n sik b wilg-m-mengã yĩngã. (Ezayi 14:4, 13-20) Babilon na-roogã lʋɩɩs poore, b bool-a lame tɩ “sẽn yãgd-a wã” sẽn na yɩl n yaal-a.

Tags-kegre: A Sʋɩtãan tʋmd n kõta Wẽnnaam bʋʋdã kaoob wɛɛngẽ.

Sɩdã: A Sʋɩtãan yaa Wẽnnaam bɛya. A pa a tʋm-tʋmd ye. A Sʋɩtãan zabda ne neb nins sẽn tũud Wẽnnaamã, n dõt-b zaalem yĩng bala.—1 Pɩyɛɛr 5:8; Vẽnegre 12:10.