Bõe la Biiblã yet pornografɩ wã wɛɛngẽ?

Biiblã sẽn yete

Biiblã pa gomd pornografɩ wã, tũnug ne ẽntɛrnetã n maan bũmb sẽn nekd pag ne rao lageng tʋlsmã, wall bũmb sẽn wõnd woto yell ye. La Biiblã wilgda Wẽnnaam tagsg sẽn yaa a soab vẽenega, neb sẽn kẽed ne taab n yaool n pa kẽ kãadmã wɛɛngẽ, la manesem buud toor-toor sẽn wat ne tags-kɛg pag ne rao lagengã wɛɛngẽ wã. Ges-y Biiblã vɛrse-rãmb sẽn yete:

• “Dẽ wã yĩnga, kɩt-y tɩ y dũni ka yalẽ wã ki. Yaa yoobo, tʋʋm-rẽgdo, wẽng maaneg ratem, datem wẽnse.” (Koloos-rãmbã 3:5) Ned sã n get pornografɩ, a pa kʋʋd a yĩngã ratem wẽnsã ye. A pʋd n yãngd-b lame. Wẽnnaam nifẽ, nin-kãng soab yaa rẽgdo.

• “Mam yeta yãmb tɩ ned ning fãa sẽn get pag ne ratem wẽng zoe n maana yoob ne-a a sũurẽ.” (Matye 5:28) Fot-rãmb bɩ imaaz-rãmb sẽn wilgd yoob yɛl tõe n kɩtame tɩ ned tags yoob yelle, n wa baas n yo.

• “Da saag-y tɩ b pʋd yoobo, la rẽgd buud baa a yembre, la rat-wʋsg yell yãmb sʋk ye.” (Efɛɛs-rãmbã 5:3) D pa tog n gomd yoob yɛl yell n deemdẽ, bɩ n get yoobã yɛla, wall n karemd sɛb sẽn gomd rẽ yell ye.

• “Yĩngã tʋʋm yaool n yaa vẽenese. Yaa yoobo, rẽgdo . . . la bũmb sẽn wẽnd a woto. Mam pĩnd n keoogda yãmb wa mam sẽn da zoe n maanã. Neb nins sẽn maand bõn-kãensã kõn paam Wẽnnaam soolem tɩ yɩ b pʋɩɩr ye.” (Galat-rãmbã 5:19-21) Neb nins sẽn get pornografɩ wã, bɩ n tũnugd ne ẽntɛrnetã, telefonnã wall mesaaz-rãmbã n maand bũmb toor-toor sẽn nekd pag ne rao lageng tʋlsmã yaa rẽgd Wẽnnaam nifẽ. D sã n maand yɛl a woto, d tõe n wa konga Wẽnnaam zood zãng-zãnga.