Bõe la Biiblã yet rap ne rapa, la pagb ne pagb sẽn kẽed ne taabã wɛɛngẽ?

Biiblã sẽn yete

Wẽnnaam sẽn naan ninsaalbã, a yeelame tɩ yaa pag ne rao sẽn kẽ kãadem bal n tõe n kẽ ne taaba. (Sɩngre 1:27, 28; Maan-kʋʋre 18:22; Yel-bũnã 5:18, 19) Biiblã wilgame tɩ rao ne pag sẽn pa kẽ kãadem pa tog n kẽ ne taaba, rao ne raoa wall pag ne pag me pa tog n kẽ ne taab ye. (1 Korẽnt rãmbã 6:18) B pa tog me n salemd taab raolem bɩ poglem, n mogsd taab taoore, bɩ n gãe taab se-nifẽ ye.

Yaa sɩd tɩ Biiblã gɩdgame tɩ rao ne raoa, wall pag ne pag pa tog n kẽ ne taab ye. La a pa yet tɩ d tog n kisga neb nins sẽn maand woto wã ye. Kiris-nebã tog n ‘waooga nebã fãa’—1 Pɩyɛɛr 2:17.

Bi-ribl rogdame t’a yam kẽed rap bal bɩ, wall bi-pugl rogdame t’a yamã kẽed pagb bal bɩ?

Biiblã pa leokd sok-kãngã vẽeneg ye. La a wilgdame tɩ ninsaalbã fãa pa zems zãng ye. Dẽnd b nong n maanda Wẽnnaam sẽn kisi. (Rom dãmbã 7:21-25) La baa Biiblã sã n pa wilgd tʋls-wẽnsã sẽn yitẽ, a yeta vẽeneg tɩ rao ne rao wall pag ne pag pa tog n kẽ ne taab ye.

La bõe la ned tõe n maan n ta Wẽnnaam yam, a sã n wa tar tʋls-wẽns-kãensã?

Biiblã yetame: ‘Kɩɩs-y y yĩngã ratem dũniyã zug ka.’ (Kolos rãmbã 3:5) Yãmb sã n dat n kɩɩs y yĩngã ratem sẽn kɩtd tɩ y maand sẽn yaa wẽngã, y tog n gũusa ne y tagsa wã. Y sã n nong n tar tags-sõma, y na n tõog n maoo ne tʋls-wẽnsã. (Filip rãmbã 4:8; Zak 1:14, 15) Sɩngrẽ wã tõe n yɩɩ toogo, la tarẽ-n-tarẽ, na n wa lebga nana n yɩɩda. Wẽnnaam pʋlmame t’a na n sõng-y lame tɩ y “tek y yamã.”—Efɛɛz rãmbã 4:22-24.

Neb milyõ-rãmb maoodame n tõogd b tʋlsmã, sẽn na yɩl n tũ Biiblã noyã. Wala makre, neb kẽer n pa tõe n kẽ kãadem ye. Sãnda me kẽe kãadem, tɩ bũmb wa kɩt tɩ b pa le tõe n kẽ ne b sɩdã bɩ b pagã ye. Baa sẽn pa nana wã, nin-kãensã modgdame n tõogd b mense, hal n tar sũ-noog menga. Dẽnd rap nins sẽn tar rao ne rao lageng tʋlsmã, bɩ pagb nins sẽn tar pag ne pag lageng tʋlsmã me tõe n tõoga b mense, la b tar sũ-noogo.—Tõodo 30:19.