M sã n tudgi, bõe la m segd n maane?

Bõe la fo na n maane?

D gom bũmb ning sẽn paam a Karina wã yelle. Tags n ges sã n da yaa foo, yellã pʋgẽ bõe la fo ra na n maane?

A Karina: “Daar a ye, m da wẽnda mobill n dabd lekolle, n kẽnd wʋsg tɩ polɩɩs yõk-ma, n kõ-m almãnde. M sũurã sãama wʋsgo. M togsa m ma, t’a yeel tɩ m segd n togsa m baaba. La m yaool n da pa rat n maan dẽ ye.”

1. Pipi: Fo na n sĩndame n tagsdẽ tɩ f baaba kõn bãng bɩ?

2. Yiibu: Fo na n togsa f baaba bũmb ning sẽn maanã kɛpɩ bɩ?

F yamã tõe n bee pipi soabã yãkre. Sẽn yaa a soab fãa, tõe tɩ f ma na n tagsame tɩ f tɩ togsa f baaba bũmb ning sẽn maanã. Bʋʋm waoog sẽn kɩt tɩ f tog n sak n deeg f kongre, tɩ yaa almãnd la b kõ-fo, wall sẽn yaa kongr ning fãa.

Bũmb a tãab sẽn kɩt tɩ f tog n sak n deeg f kongre

1. 1. Rẽ maaneg zemsame. Biiblã goma kiris-nebã sẽn tog n tall manesem ningã yelle. A yeelame tɩ yaa “d sẽn dat n zã d mens ne pʋ-peelem bũmb fãa pʋgẽ wã yĩnga.”—Ebre-rãmbã 13:18.

   “M modga wʋsg sẽn na yɩl n yɩ pʋ-peelem soaba, n pa rɩkd m yell n dogl ned ye. M sã n konge, m sakd n deega tao-tao tɩ m kongame.”—A Alexis.

2. 2. Ned sã n sakd n deegd a kongre, nebã kõt-a-la sugr nana-nana. Biiblã yetame: “Ned ning sẽn solgd a beegr yɛl pa na n yãk neng ye. La sẽn vẽnegd-a a beegr n togs la a bas rẽ, b na n zoee a nimbãanega.”—Yel-bũnã 28:13.

   “Yɩl n sak n deeg tɩ f kongame baooda raoodo. La yaa f sã n maand woto la nebã na n kɩs-f sɩda. B neeme tɩ f yaa pʋ-peelem soaba. F sã n sak n deeg f kongre, f kɩtdame tɩ bũmb sẽn pa sõma lebg sõma.”—A Richard.

3. 3. Sẽn yɩɩd fãa, nooma Wẽnnaam a Zeova. Ad Biiblã sẽn yete: “A Zeova kisa zãmb soaba, la yaa nin-tɩrsã n paamd a zoodo.”—Yel-bũnã 3:32.

   “M sẽn wa n maan yel-wẽn-kãsengã, m bãngame tɩ m segd n kolg n togsame. M sã n pa maand yɛlã wa a Zeova sẽn datã, a pa tol n tõe n ning-m bark ye.”—A Rachel.

Bõe la a Karina maan a kongrã poore? A solgame n pa togs a baaba ye. La a pa tõog n solg-a wakat fãa yĩng ye. Ad a sẽn yeele: “Yʋʋmd poore, m baaba ra wa n geta mobillã asirãns sɛba, n yã tɩ b kõo maam almãnde. Badaarã pa paoog-m ye. Baa m ma sũurã yika ne maam, m sẽn pa maan bũmb ning a sẽn yeel-mã yĩnga.”

Yam-bʋg la a Karina rɩk-yã?: A yeelame: “Fo sã n maan bũmb n solge, fo yãngda yellã. Na n wa pukame, tɩ pa yɩ nana ne-f ye.”

F sẽn tõe n dɩk yam f kongr pʋgẽ to-to

Nebã fãa tudgdame. (Rom dãmbã 3:23; 1 Zã 1:8) La wa d sẽn zoe n yã wã, d sã n sakd n deegd d kongr tao-tao, d wilgdame tɩ d yaa ned sẽn bɩ, la sẽn yaa sik-m-meng soaba.

Bũmb a to f sẽn segd n maan yaa f rɩk yam f kongr fãa pʋgẽ. Bʋko, kom-bɩɩs kẽer pa maand woto ye. Tõe tɩ b tagsda wa pʋg-sad a ye yʋʋr sẽn boond t’a Priscilla sẽn da tagsdã. A yeelame: “M sũurã mi n sãamda wʋsg m kongr toor-toorã yĩnga. M da tagsdame tɩ m ka võor ye. Mam kongrã ra mii n yaa wa zɩɩb kãseng m sẽn tʋke. Ra mi n loog-m lame tɩ m getẽ tɩ m yellã pa tar tɩɩm ye.”

Fo-me mi n tagsa woto bɩ? Sã n yaa rẽ bɩ f ning f yamẽ yaa: Fo sã n tagsd f kongr yell wakat fãa, yaa wa f sẽn na n wẽnd mobill la f get f poorẽ. Fo sã n ket n get bũmb nins f sẽn maan pĩndã, na n kɩtame tɩ f tagsd tɩ f ka võore, la kɩt tɩ f pa paam raood n mao ne zu-loees nins f sẽn na n paamã ye.

Tall tagsg sẽn zems f kongrã zugu.

“F sã n tags f kongr yelle, bɩ f rɩk yam a pʋgẽ n da le maan a buud nindaar ye. La ra tags b yell wʋsg hal tɩ b wa koms f raood ye.”—A Elliot.

“M sã n konge, m modgdame n dɩk yam rẽ pʋgẽ. Yam-kãng na n sõnga maam tɩ m bɩɩs zʋg-sõma n paase. Rẽ nindaare, m sẽn na n tall manesem ningã yɩta sõma n paase. Woto n yaa sõma n yɩɩda, bala sõngd-f lame tɩ f bɩ.”—A Vera.