A Zeezi sẽn vʋʋge, tɩ põentsã bogd ket a nusẽ wã, t’a tedg a meng n yaa ninsaala, tɩ tʋm-tʋmd a Toma ne karen-biis a taab yã-a

A Zeezi vʋʋgrã poore, a ra tara yĩn-bʋg buudu?

Biiblã sẽn yete

Biiblã yetame: “Nebã sẽn wa n na n kʋ bãmbã tɩ b yaa ninsaala, la Wẽnnaam vʋʋg-b lame tɩ b yaa malɛka.”—1 Pɩyɛɛr 3:18; Tʋʋma 13:34; 1 Korẽnt rãmbã 15:45; 2 Korẽnt rãmbã 5:16.

A Zeezi mengã yeela bũmb sẽn wilgd t’a pa vʋʋg ne yĩn-nems wa ninsaal ye. A yeelame t’a kõo a yĩn-nemsã tɩ yɩ maoong “dũniyã vɩɩm yĩngã,” rat n yeel tɩ ãdem-biisã yĩnga. (Zã 6:51; Matiye 20:28) A sã n da ket n tar yĩn-nems a vʋʋgrã sasa, dẽnd a pa kõ a yĩngã tɩ yɩ maoong ye. Biiblã yaool n yeelame t’a kõo a yĩngã la a raag a zɩɩmã tɩ yɩ maoong “vugr wakat fãa yĩnga.”—Ebre-rãmbã 9:11, 12.

La a Zeezi sã n vʋʋgame n lebg malɛka, a karen-biisã maana wãn n tõog n yã-a?

Malɛgsã tõe n tedgame n lebg wa ninsaalba. Wala makre pĩnd wẽndẽ, malɛgs n tedg n lebg ninsaalba, hal n naag neb n dɩ la b yũ menga. (Sɩngre 18:1-8; 19:1-3) La b ra ket n yaa malɛgse, n lebg n loog saasẽ.—Bʋ-kaoodbã 13:15-21.
A Zeezi vʋʋgrã poore, a tedgame n lebg ninsaala, wa malɛgs kẽer sẽn maan pĩndã. A sẽn da lebg malɛkã yĩnga, a ra tõe n pukame, la a menem zĩig pʋgẽ. (Luk 24:31; Zã 20:19, 26) A Zeezi sã n da na n puki, a sẽn da tedgd n dɩkd yĩng ningã ra yaa toore. Rẽ n so t’a zo-rãmbã meng pa bãng-a, sã n pa a goma ne-ba, bɩ a maana bũmb tɩ b bãng tɩ yaa yẽ.—Luk 24:30, 31, 35; Zã 20:14-16; 21:6, 7.
A Zeezi sẽn na n puk tɩ tʋm-tʋmd a Toma yã-a wã, põentsã bogd ra keta a yĩngẽ wã. A sẽn maan dẽ wã yaa sẽn na yɩl n keng a Toma tẽebã, bala a ra sãmbda a Zeezi sã n sɩd vʋʋgame.—Zã 20:24-29.