Yel-wẽnd yaa bõe?
Biiblã sẽn yete
Yel-wẽnd yaa tʋʋmde, yel-manesem wall tagsg buud fãa sẽn pa zems ne Wẽnnaam noyã. Leb n yaa f sẽn na n maan bũmb sẽn yaa wẽng wall sẽn pa tɩrg Wẽnnaam nifẽ, n kɩɩs Wẽnnaam noyã. (1 Zã 3:4; 5:17) Biiblã gomda bũmb sẽn yaa tɩrg f sẽn na n bas n pa maan tɩ yaa yel-wẽnd me yelle.—Zak 4:17.
Ebre wã la Gɛrkã pʋgẽ, gom-bil ning b sẽn lebg tɩ yel-wẽndã rat n yeelame tɩ “lobg wall tão bũmb n yõsge.” Wala makre, pĩnd wẽndẽ Israyɛllã ra tara tãb-biis sull sẽn mi loaabg lobr sõma hal n da “pa lobgd bũmb ne loaabg n yõsg” ye. B sã n da lebga gom-biisã yembr-yembre, b ra na n ningame tɩ b “ra pa maand yel-wẽnd ye.” (Bʋ-kaoodbã 20:16) Rẽnd yel-wẽnd yaa f sẽn na n mak Wẽnnaam noyã sẽn zems zãngã tũubu, n yõsge.
Wẽnnaam sẽn yaa ninsaalbã Naandã yĩnga, a tara sor n na n lugl noy d sẽn segd n tũ. (Vẽnegre 4:11) A na n kaoo tõnd bʋʋd wa sẽn zems d tʋʋma.—Rom dãmbã 14:12.
D tõeeme n pa tol n maan yel-wẽnd bɩ?
Ayo. Biiblã yeelame tɩ “nebã fãa maana yel-wẽna, n pa tõe n ta Wẽnnaam ziirã ye.” (Rom dãmbã 3:23; 1 Rĩm-dãmbã 8:46; Koɛɛg soaba 7:20; 1 Zã 1:8) Bõe yĩng tɩ yaa woto?
Sɩngrẽ wã, tõnd yaab a Ãdem ne a Awa ra pa tar yel-wẽnd ye. Bala Wẽnnaam ra naan-b-la a meng wõnego, tɩ b zems zãnga. (Sɩngre 1:27) La b sẽn kɩɩs Wẽnnaamã, b pa le yaa neb sẽn zems zãng ye. (Sɩngre 3:5, 6, 17-19) B sẽn wa n dog kambã, yel-wẽndã longa b kambã tɩ bãmb me yaa neb sẽn pa zems zãnga. (Rom dãmbã 5:12) Yaa wa Israyɛll rĩm a Davɩɩd sẽn yeelã: “Mam doga ne taale.”—Yɩɩn-sõamyã 51:5.
Yel-wẽn beeme n yaa wẽns n yɩɩd b taabã bɩ?
N-ye. Wala makre, Biiblã yeelame tɩ pĩnd wẽndẽ Sodom nebã ra “ra yaa nin-wẽnse, n maand yel-wẽn-kãsemse,” la tɩ b yel-wẽnã ra “tara pãng hal wʋsgo.” (Sɩngre 13:13; 18:20) D ges bũmb a tãab sẽn sõngd tɩ d bãng yel-wẽnd wẽnem sẽn ta zĩig ninga.
A wẽnemã. Biiblã keoogda tõnd tɩ d ra maan yel-wẽn-kãsems wala yoobo, bõn-naands pʋʋsgo, wagdem, rãam yũ tɩ looge, fãabo, nin-kʋʋre, la zĩn-dãmb yɛl maanego. (1 Korẽnt rãmbã 6:9-11; Vẽnegre 21:8) Biiblã wilgdame tɩ rẽ yaa toor ne yel-wẽnd f sẽn tudg n maan f sẽn pa tags tɩ bɩ yĩnga. Wala makre, f sẽn na n togs gomd wall f maan bũmb n sãam f to sũuri. (Yel-bũnã 12:18; Efɛɛz rãmbã 4:31, 32) Baasgo, Biiblã sagenda tõnd tɩ d gũus d meng ne yel-wẽnd buud fãa, bala b tõe n wa kɩtame tɩ d maan yel-wẽn-kãsems n kɩɩs Wẽnnaam noyã.—Matiye 5:27, 28.
Bũmb ning sẽn kɩt tɩ b maan-a wã. Neb kẽer mi n maana yel-wẽnde, b sẽn pa mi Wẽnnaam noyã yĩnga. (Tʋʋma 17:30; 1 Tɩmote 1:13) Baa Biiblã sẽn pa yeel tɩ yel-wẽn a woto pa wẽngã, a wilgdame tɩ b yaa toor ne ned sẽn na n kɩɩs Wẽnnaam noyã ne yamleoogo. (Sõdbo 15:30, 31) Ned sã n maand yel-wẽn ne yamleoogo, wilgdame t’a ‘sũurã yaa wẽnga.’—Zeremi 16:12.
B sẽn maan-a n yɩlem to-to wã. Biiblã wilgdame me tɩ ned sẽn maan yel-wẽnd vugr yaa toor ne ned sẽn minim n maand yel-wẽnd n kaoose. (1 Zã 3:4-8) Neb nins sẽn zãms n bãng b sẽn tõe n maan sẽn yaa tɩrg to-to la b baas n “maand yel-wẽn ne yamleoogã” tara taal Wẽnnaam taoore.—Ebre-rãmbã 10:26, 27.
Ned sã n maan yel-wẽn-kãsenga, a sũurã tõe n sãamame hal t’a pa mi a sẽn maandg ye. Wala makre rĩm a Davɩɩd yeelame yaa: “Mam yel-wẽnã zamame tɩ b zãntlmã zʋʋg mam zugã. B yaa wa zɩɩb sẽn yaa zɩsgo, n yɩɩd mam sẽn tõe n tʋke.” (Yɩɩn-sõamyã 38:4) La Biiblã wilgame tɩ yellã tara tɩɩm. A yeelame: “Bɩ nin-wẽng bas a manesem-wẽngã, tɩ nin-yoog bas a tags-yoodã. Bɩ a lebg n wa a Zeova nengẽ, t’a na n zoee a nimbãanega. A lebg n wa tõnd Wẽnnaamã nengẽ t’a na n kõ-a-la sugr wʋsgo.”—Ezayi 55:7.