Lebs n dogã võor yaa bõe?
Biiblã sẽn yete
B sã n yeel tɩ ned lebs n dogame, wilgdame tɩ zood n sɩng Wẽnnaam ne nin-kãng sʋka. (Zã 3:3, 7) Wẽnnaam sakdame tɩ neb nins sẽn lebs n dogã lebg a kamba. (Rom dãmbã 8:15, 16; Galat-rãmbã 4:5; 1 Zã 3:1) Ned sẽn lebs n dog paamdame n naag Wẽnnaam zakã neba, tɩ yaa wa biig sẽn paam tɩ ned reeg-a t’a lebg a bi-roaka.—2 Korẽnt rãmbã 6:18.
Bõe yĩng tɩ ned segd n lebs n doge?
A Zeezi yeelame: “Sɩd-sɩda, mam yeta foo tɩ ned ning fãa sẽn pa lebs n doge, a pa tõe n kẽ Wẽnnaam Rĩungã pʋgẽ ye.” (Zã 3:3) Woto wã, ned sã n lebs n doge, pakda sor t’a na n wa paam n rɩ naam ne Kiristã Wẽnnaam Rĩungã pʋgẽ. Rĩun-kãng bee saasẽ. Rẽ n so tɩ Biiblã yeel tɩ neb nins sẽn paam ‘rogem-paalgã’ paamame tɩ b bĩng-b rogem-pʋɩɩr “saasẽ.” (1 Pɩyɛɛr 1:3, 4) Neb nins sẽn lebs n dogã kɩsa sɩd tɩ b na n ‘naaga Kiristã n yɩ rĩm-dãmba, n dɩ naam.’—2 Tɩmote 2:12; 2 Korẽnt rãmbã 1:21, 22.
Wãn to la ned lebsd n doge?
A Zeezi sẽn wa n gomd rẽ yellã, a yeelame tɩ neb nins sẽn lebs n dogã, roga ne “koom la ne vʋʋsem sõngo.” (Zã 3:5) Wilgdame tɩ b segd n lis-b-la ne koom, tɩ rẽ poor bɩ b lis-b ne vʋʋsem sõngo.—Tʋʋma 1:5; 2:1-4.
A Zeezi n yɩ pipi ned sẽn lebs n doge. B lis-a-la Zʋrdẽ kʋɩlgẽ wã. Rẽ poore, Wẽnnaam zae-a-la (n lis-a) ne vʋʋsem sõngã. Dẽnd, ne vʋʋsem sõngã maasem, a Zeezi lebs n dogame n yaa Wẽnnaam bi-ribla, n saagd n na n le tɩ vɩɩmd saasẽ. (Mark 1:9-11) Wẽnnaam pidsa saag-kãnga, a sẽn vʋʋg a Zeezi t’a lebg malɛkã.—Tʋʋma 13:33.
Neb nins sẽn lebs n dogã me rengd n paamame tɩ b lis-b ne koom, n yaool n wa paam vʋʋsem sõngã.a (Tʋʋma 2:38, 41) Rẽ poore, b saagda ne b sũy fãa tɩ b na n wa tɩ vɩɩmda saasẽ. Yaa Wẽnnaam sã n wa vʋʋg-b la b na n paam tɩ b saagrã pidsi.—1 Korẽnt rãmbã 15:42-49.
Tags-kɛg neb kẽer sẽn tar lebs n dogã wɛɛngẽ
Tags-kɛgrã: Ned sã n dat n paam fãagr wall n lebg Kiris-neda, yaa tɩlɛ t’a lebs n doge.
Sɩdã: Kirist maoongã pa kɩt tɩ neb nins sẽn lebs n dog n na n tɩ vɩɩmd ne Kiristã saasẽ wã bal paam fãagr ye. Kɩtame tɩ neb nins sẽn na n vɩɩmd tẽngã zugã Wẽnnaam Rĩung naam sasa wã, me tõe n paam fãagre. (1 Zã 2:1, 2; Vẽnegre 5:9, 10) Sẽn na n vɩɩmd-b tẽngã zugã na n vɩɩmda wakat sẽn kõ sa tẽngã sẽn na n lebg arzãnã pʋgẽ.—Yɩɩn-sõamyã 37:29; Matiye 6:9, 10; Vẽnegre 21:1-5.
Tags-kɛgrã: Ned tõe n yãka yam n na n lebs n doge.
Sɩdã: Ned buud fãa tõe n paama Wẽnnaam zoodo, la a paam fãagre. (1 Tɩmote 2:3, 4; Zak 4:8) La yaa Wẽnnaam n yãkd neb nins sẽn na n lebs n dogã, n zae-b ne a vʋʋsem sõngã. Biiblã yetame tɩ lebs n dogã “pa be ne ned raab wall a modgr ye. Bee ne Wẽnnaam sẽn maand lohormã.” (Rom dãmbã 9:16) D tõe n lebga gom-biis nins sẽn yaa “lebs n dogã” tɩ “rogem sẽn yit yĩngri.” Woto wilgdame tɩ yãk yam n na n lebs n dogã “yita yĩngri,” rat n yeel tɩ Wẽnnaam nengẽ.—Zã 3:3, notã.
a La a Korney ne a zakã rãmb nengẽ pa yɩ woto ye.—Tʋʋma 10:44-48.