To-kãsengã yaa bõe?

Biiblã sẽn yete

To-kãsengã sasa, yɛl ninsaalbã sẽn zɩ n yã n na n maane. Biiblã bãngr-goamã wilgame tɩ rẽ na n zĩnda “yaoolem wakatã” sasa. (2 Tɩmote 3:1; Dãniyɛll 12:4) Wakat kãng na n yɩɩ “toog wakate. A buud zɩ n zĩnd bõn-naandsã Wẽnnaam sẽn naanã sɩngr n tãag wakat kãnga, la a buud kõn le zĩnd a bada.”—Mark 13:19; Dãniyɛll 12:1; Matiye 24:21, 22.

Yɛl sẽn na n maan to-kãsengã sasa

• Ziri tũudmã sãoongo. B na n sãama ziri tũudmã zĩig pʋgẽ hal tɩ ling nebã. (Vẽnegre 17:1, 5; 18:9, 10, 21) Politik pãn-soaadb n na n maan bõn-kãnga, n pids Wẽnnaam daabo.—Vẽnegre 17:3, 15-18.a

• B na n bao n sãama tũudum hakɩɩkã. Ezekɩyɛll bãngr-gomdã pʋgẽ, b yeelame tɩ “Goog tẽng sẽn be Magoog soolem pʋgã” na n makame n menes sẽn tũud-b tũudum hakɩɩkã. “Goog tẽng sẽn be Magoog soolem pʋgã” makda tẽns sẽn lagem taaba. La Wẽnnaam na n kogla a nin-buiidã tɩ b pa sãam-b ye.—Ezekɩyɛll 38:1, 2, 9-12, 18-23.

• B na n kaoo nebã sẽn be dũniyã zugã bʋʋdo. A Zeezi na n kaoo nebã fãa bʋʋdo. A “na n welga nebã sul a yiibu, wa rũm-kɩɩm sẽn welgd piis ne bʋʋse.” (Matiye 25:31-33) Yaa ned kam fãa sẽn na n teel a “ba-biisã” bɩ a sẽn pa na n teel-bã la a na n tik n kao a bʋʋdo. A “ba-biisã” yaa neb nins sẽn na n naag-a n dɩ naam saasẽ wã.—Matiye 25:34-46.

• B na n tigma Wẽnnaam Rĩungã nanambsã. Wẽn-sakdb nins b sẽn yãk tɩ b na n tɩ naag Kiristã n dɩ naamã na n kiime tɩ b vʋʋg-ba, tɩ b tɩ vɩɩmd saasẽ.—Matiye 24:31; 1 Korẽnt rãmbã 15:50-53; 1 Tesalonik rãmbã 4:15-17.

• Armagedõ. B boonda Armagedõ sẽn yaa “Wẽnnaam Sẽn-tõe-a-fãa wã ra-kãsengã zabrã” t’a “Zeova daarã” me. (Vẽnegre 16:14, 16; Ezayi 13:9; 2 Pɩyɛɛr 3:12) B na n sãama neb nins Kiristã sẽn na n ning taalã. (Sofoni 1:18; 2 Tesalonik rãmbã 1:6-10) B na n sãama dũniyã goosneema-rãmbã fãa me. Biiblã pʋgẽ, b maka dũniyã gill goosneema-rãmbã ne we-rũng sẽn tar zut a yopoe.—Vẽnegre 19:19-21.

Yɛl sẽn na n maan to-kãsengã poore

• B na n paga a Sʋɩtãan ne a zĩn-dãmbã. Malɛk sẽn tar pãng n na n lob a Sʋɩtãan ne a zĩn-dãmbã “bog-zulungã” pʋgẽ, tɩ lebg wa b sẽn ki n pa le tõe n maan bũmb ye. (Vẽnegre 20:1-3) A Sʋɩtãan sã n wa be bog-zulungẽ wã, na n yɩɩ wa b sẽn yõk ned n pag bãens roogo. A pa na n le tõog n belg ned baa a yembr ye.—Vẽnegre 20:7.

• Yʋʋm tusrã naam na n sɩngame. Wẽnnaam Rĩungã Rĩm na n sɩnga a naamã sẽn na n kaoos yʋʋm tusrã rɩɩbo. Rẽ na n waa ne bark wʋsg n kõ ninsaalbã. (Vẽnegre 5:9, 10; 20:4, 6) “Kʋʋn-kãseng” b sẽn pa wilg b sõor n na n “põs to-kãsengã sasa,” n zĩnd tẽngã zug n yã a Zeezi naamã sẽn na n kaoos yʋʋm tusrã sɩngre.—Vẽnegre 7:9, 14; Yɩɩn-sõamyã 37:9-11.