B sã n yeel tɩ “Sõngo,” rat n yeelame tɩ bõe?
Biiblã sẽn yete
B sã n yeel tɩ ned bɩ bũmb yaa sõngo, rat n yeelame t’a welga toore, n pa tar dẽgd ye. Ebre buud gomdã pʋgẽ, “sõngã” rat n yeelame tɩ “sẽn welge.” Dẽnd neb bɩ bũmb sẽn yaa sõng welgame n yaa yɩlemde, n zãr ne sẽn yaa rẽgd la wẽnga.
Wẽnnaam a ye n yaa Sõngo, hal tɩ d pa tõe n bãng n bilg ye. Biiblã yetame: “Ned ka be n yaa sõng wa Zusoabã ye.”a (1 Sãmwɛll 2:2, Wẽnnaam Sebre, 1983) Dẽnd yaa Wẽnnaam bal n tar sor n na n lugl noy sõngã wɛɛngẽ.
Bũmb ning fãa sẽn yit Wẽnnaam nengẽ yaa “sõngo.” Sẽn yɩɩd fãa bũmb nins sẽn tar loees ne a tũubã. Wala makre, Biiblã pʋgẽ b gomda:
Zĩ-sõng yelle: A Moyiiz sẽn kolg n na n ges tuugã sẽn wit bugmã, Wẽnnaam yeel-a lame yaa: “Zĩig ning fo sẽn yɛsã yaa zĩig sẽn welg toore.”—Yikri 3:2-5.
Kibs sẽn welg toore: Pĩnd wẽndẽ, Israyɛll nebã ra tara kibs rãmb b sẽn maand n waoogd a Zeova, tɩ b boondẽ tɩ “kibs bɩ tig sẽn welg toore.”—Maan-kʋʋre 23:37.
Te-sõma: Pĩnd wẽndẽ, teed n da be Zerizalɛm wẽnd-doogẽ wã tɩ b tar n maand bũmb toor-toor n waoogd Wẽnnaam. B ra boonda te-kãens tɩ ‘teed . . . sẽn welg toore.’ (1 Rĩm-dãmbã 8:4) Nebã ra nanda te-kãensã, la b ra pa waoogd-b ye.b
Ninsaal sẽn pa zems zãngã tõe n yɩɩ sõng bɩ?
N-ye. Wẽnnaam yeela kiris-nebã yaa: “Yãmb segd n yɩɩ sõamyã, bala mam yaa sõngo.” (1 Pɩyɛɛr 1:16, MN) Yaa sɩd tɩ ninsaal sẽn pa zems zãngã yĩnga, a pa tol n tõe n yɩ sõng wa Wẽnnaam sẽn datã ye. Baasgo, Wẽnnaam nifẽ, neb nins sẽn sakd a noyã yaa neb “sẽn welg toore, la sẽn tat Wẽnnaam yam.” (Rom-dãmbã 12:1) Ned sẽn modgd n dat n yɩ sõng wilgda rẽ a no-goamã la a tʋʋm-tʋmdɩ wã pʋgẽ. Wala makre, a tũuda Biiblã sẽn yetã n “lak a meng ne yoobo,” la “a lebg sõng a yel-manesem fãa pʋgẽ.”—1 Tesalonik-rãmbã 4:3; 1 Pɩyɛɛr 1:15, MN.
Ned tõeeme n pa le yɩ sõng Wẽnnaam nifẽ bɩ?
N-ye. Ned sã n wa pa le tũud Wẽnnaam noyã, Wẽnnaam pa le get t’a soab yaa sõng ye. Wala makre, Biiblã sebr ning b sẽn boond tɩ Ebre wã yaa lɛtr a Poll sẽn gʋls n tool a “ba-biis sẽn welg toor Wẽnnaam yĩnga.” Baasgo, a keoog-b lame tɩ b gũus tɩ b ned baa a ye ra wa “tall sũur sẽn yaa wẽng la sẽn ka tẽeda, hal t’a wa wẽnemd n bas Wẽnnaam sẽn vɩ wã ye.”—Ebre-rãmbã 3:1, 12.
Neb sẽn tagsde, tɩ pa sɩda
Tagsg sẽn pa sɩda: F sã n yõk f meng n pa maan bũmb kẽere, f lebgda sõngo.
Sẽn yaa sɩda: Biiblã wilgdame tɩ ned sẽn “sɩbgd a menga,” n yõkd a meng n pa maand bũmb kẽer pa tar yõod Wẽnnaam nifẽ ye. (Koloos-rãmbã 2:23) Wẽnnaam datame tɩ d rɩ bõn-sõma nins a sẽn kõ-dã yõodo. Biiblã yetame: “Ned sã n dɩtẽ la a yũuda, la a paam sũ-noogo, a bãng tɩ yaa Wẽnnaam kũuni.”—Koɛɛg soaba 3:13.
Tagsg sẽn pa sɩda: Ned sã n pa kẽ kãadem, a lebgda sõng n paase.
Sẽn yaa sɩda: Kiris-ned tõe n yãka yam n pa kẽ kãadem ye. La pa rẽ n na n kɩt t’a yɩ yɩlemd Wẽnnaam nifẽ ye. Yaa sɩd tɩ sẽn pa kẽ-b kãadmã tõe n tũu Wẽnnaam tɩ bũmb pa tiis-b ye. (1 Korẽnt-rãmbã 7:32-34) La Biiblã wilgdame tɩ sẽn kẽ-a kãadema me tõe n yɩ sõng Wẽnnaam nifẽ. A Zeezi karen-biisã sʋka, kẽer da kẽe kãadem. Wala makre, a Pɩyɛɛre.—Matye 8:14; 1 Korẽnt-rãmbã 9:5.
a Zeova wã yaa Wẽnnaam yʋ-peellã. Biiblã vɛrse-rãmb wʋsg pʋgẽ, b pʋta Wẽnnaam yʋʋrã n naag ne gom-bil ning sẽn yaa “sõngã.”
b Biiblã yeta vẽeneg tɩ d pa segd n maan bũmb n tar n pʋʋsd Wẽnnaam ye.—1 Korẽnt-rãmbã 10:14.