“Ra wõnda m tara bũmb nins fãa m sẽn da ratã”

M KIBARÃ

M doga Moreyall sẽn yaa Kebɛk tẽng ning sẽn yaa kãseng n yɩɩda. M tara kẽem bi-pugla, la yap kom-dibli a yiibu. D roagdbã ra nonga tõnd wʋsgo. B wuba tõnd Roozmõ tẽn-bilã pʋgẽ. D zakã neb ra zemsda taaba, tɩ d vɩɩmã noome.

M sẽn da yaa biiga, m da nonga Biiblã. M tẽrame tɩ m sẽn wa n tar yʋʋm 12, m da karemda a Zeezi vɩɩmã sẽn yɩ to-to, Biiblã babg ning b sẽn da gʋls ne Gɛrkã pʋgẽ. Ra nooma maam wʋsgo. A Zeezi sẽn da nong nebã la a zoet b nimbãanegã kẽe maam, tɩ m da rat n lebg wa yẽ. Bʋko, m sẽn wa n bɩtẽ wã, yam-kãng menemame. Rẽ me m wa n sɩng n tara tũud-n-ta-wẽnse.

M baaba ra peebda mizikã yʋʋm-teoog a ye b sẽn boond tɩ sagsofonne. A wa n dɩk n kõo maam. La pa rẽ bal ye. A kɩtame me tɩ m nong mizikã, hal tɩ wa lebg rẽ la m dat n maan m vɩɩmã pʋgẽ. M sẽn da nong mizikã kɩtame tɩ m zãms gitaar me wẽebo. M wa n naaga m zo-rãmb a wãn tɩ d maand mizik ning b sẽn boond tɩ rokã, n kẽnd zĩis wʋsg n deemdẽ. Neb yʋy sẽn yi mizikã yiisg wɛɛngẽ wa n yãa maam n dat n yiis m mizikã. M wa n paama kõntra ne tẽngã Ɛstidio kẽengã. Tao-tao bal tɩ m yʋʋrã yiime, tɩ b ningd m mizikã Kebɛk radio wã.

Ra wõnda m tara bũmb nins fãa m sẽn datã. M da yaa bi-bɩɩga, tɩ m yʋʋrã yi, la m da tar ligd n maand m yam. Beoogã sã n vẽege, m maanda yĩn-wɩsgre, rẽ poore, zʋrnalist-rãmb n wat n sõsd ne-ma. Sẽn paase, m kẽnda zĩig tɩ nebã watẽ, tɩ m sĩyn otograf-rãmba, la m da yit tele wã me. Yʋngo, m wẽeda miziki, la m kẽnd soaare rãmbẽ. Sẽn na yɩl tɩ kʋʋngã ra kẽes-m rabeem tɩ m pa tõog n yɩɩle, m wa n sɩnga rãam yũubu. Rẽ tɩ m ket n yaa bi-bɩɩga. La m wa n basa rẽ n kẽ dorgã. Sẽn paase, m da vɩ yaare, la m yooda.

Neb kẽer ra rat n vɩɩmda wa maam, bala ra wõnda m tara sũ-noogo. La m yamẽ m da yaa m ye, tɩ m vɩɩmã me ra pa tar neng ye. M sã n da wa yaa m ye, rẽ maneg n namsda maam. Ra sãamda m sũuri, tɩ m maand yɩɩre. M sẽn wa n lebg nin-kãseng tɩ m yʋʋrã yi wã, neb a yiib sẽn da yiisd m mizikã n ki ne sɩda wã bãaga. Namsa maam. M da nonga mizikã, la a sẽn da kɩt tɩ m vɩ to-to wã ra yii m yamã fasɩ.

BIIBLÃ SẼN TOEEM MAAM TO-TO

Baa m yʋʋrã sẽn da yi wã, m da miime tɩ dũniyã sẽn kẽnd neng ningã pa sõma ye. M da sokda m meng bõe yĩng tɩ wẽnemã yaa wʋsg woto? Bõe yĩng tɩ Wẽnnaam pa kẽesd a toogo? M da mi n pʋʋsda Wẽnnaam n dat sogs-kãensã leoore. Vugri m gilg n maana kõnsɛɛr-dãmba. M sẽn lebg n wa, m le sɩnga Biiblã kareng yɛsa. M da pa wʋmd m sẽn karemdã võor sõma ye. La m bãngame tɩ dũniyã saab kolgame.

M karengã pʋgẽ, m bãngame tɩ vugri, a Zeezi loee noor rasem 40. (Matye 4:1, 2) M tagsame tɩ ma-me sã n loe noore, tõe tɩ Wẽnnaam vẽneg a meng ne-m tɩ m bãng-a. M yãka daar n na n sɩnge. La semen a yiib nand tɩ daar-n-kãng ta, a Zeova Kaset rãmb n wa n kogs m zakã noore. M sẽn pakã bal la m sẽn yeel-b tɩ b kẽ. Yaa wa m da gũud-b lame. A ye yʋʋr la a Jacques. M ges-a-la kuii, n sok-a yaa: “Bõe la d tõe n maan n bãng tɩ d vɩɩ dũni-kãngã saabã wakate?” A laka a Biiblã n karem 2 Tɩmote 3:1-5. Rẽ poore, m soka b yiibã sogsg wʋsgo. M sũur yɩɩ noog ne b leoorã, bala b ra tikda Biiblã zugu, la yaa vẽeneg me. Rẽ poore, b ra lebgd n wat n kaagd-m lame. M bãngame tɩ ra pa le yaa tɩlɛ tɩ m loe noor ye.

M sɩnga Biiblã zãmsg ne-ba, n pa vaandẽ ye. M wa n wõrsa m zoob-wogdã, la m sɩng tigissã kẽnd Rĩungã roogẽ. B sẽn da reegd maam to-to tigissẽ wã kɩtame tɩ m maneg n kɩs sɩd tɩ m bãnga sɩdã.

Sẽn na n yɩl n tũ bũmb nins m sẽn zãmsd Biiblã pʋgẽ wã, m da segd n toeema bũmb wʋsgo. M da tog n basa dorgã yũubu, la m zãag m meng ne yoobã. M da segdame me n bas m rat-m-yembrã, la m wilg tɩ neb a taabã yell pak-m lame. M sẽn da wubd m kamb a yiibã m ye wã yĩng me, m da tog n baoo sẽk n mi n sõsd ne-ba, la m sõng-b tẽebã wɛɛngẽ. Rẽ kɩtame tɩ m bas mizikã, n tɩ bao tʋʋm lozĩnd pʋga. La yaoodã ra pa waoog ye.

Tõog n toeem woto fãa pa yɩ nana ye. Dorgã basg namsa maam wʋsgo, tɩ ra yaa wa bãaga. Wakat ning menga, m da mi n le yũume. (Rom dãmbã 7:19, 21-24) La bũmb ning sẽn yɩ toog n yɩɩd yaa yoobã basgo. Sẽn paase, m nug-tʋʋmdã ra yaamsd-m-la wʋsgo, tɩ yaoodã me sẽn da pa waoogã komsd m raoodo. Ligd ning m sẽn da paamd lɛɛr a yiib pʋgẽ m sẽn da maand mizikã wakatã, ligd a woto la m da paamd kiis a tãab pʋgẽ.

Pʋʋsgã sõnga maam tɩ m kell n modg n toeeme, baa ne zu-loeesã. M mikame me tɩ m sã n karemd Biiblã n pa vaandẽ, sõngda wʋsgo. Vɛrse-rãmb kẽer n keng m raood sõma. Wala makre 2 Korẽnt rãmb 7:1 sẽn yet kiris-nebã tɩ b modg n ‘yɩlg b mens ne rẽgd ning sẽn dẽgemd yĩngã ne sɩɩgã.’ Vɛrse a to sẽn kɩt tɩ m bas m yam tɩ m na n tõog n basa m minim-wẽnsã yaa Filip rãmb 4:13. Be b yetame: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” Wẽnnaam a Zeova leoka m pʋʋsgã, n sõng-m tɩ m wʋm Biiblã goamã võore, la m tũ a sẽn yetã. Rẽ kɩtame tɩ m dɩk m meng n kõ-a. (1 Pɩyɛɛr 4:1, 2) M deega lisg yʋʋmd 1997, n lebg a Zeova Kaset soaba.

BIIBLÃ ZÃMSG SẼN NAF MAAM TO-TO

M kɩsa sɩd tɩ m sã n da ket n yaa yɩɩn-yɩɩnda, woto tɩ m kii hal daar zãra. La rũndã-rũndã, m vɩɩmã tara barka. M pʋg-sõng a Elvie sɩd yaa bark meng n kõ-ma. Tõnd d yiibã fãa yaa wakat fãa so-pakdba, n sõngd neb a taab tɩ b zãmsd Biiblã. Rẽ nooma maam wʋsgo, la sõngd-m tɩ m maand sũ-noog ne bũmb nins m sẽn tarã. Hakɩɩka, m pʋʋsda a Zeova bark wʋsgo, a sẽn sak tɩ m lebg a zoa wã.—Zã 6:44.