Wẽnnaam kisa sɩgaarã, dorgã la tabã yũub bɩ?

Biiblã sẽn yete

Biiblã pa gomd sɩgaar yũub yelle,a bɩ sɩgaarã tall n maan bũmb yell ye. La noy n be be n wilgdẽ tɩ Wẽnnaam pa rat tɩ d tall minim-wẽns bɩ manesem sẽn na n sãam d yĩns laafɩ wã ye. Dẽnd a kisa sɩgaar yũubu.

D nand vɩɩmã. “Wẽnnaam . . . meng n kõt ninsaalbã fãa vɩɩm, vʋʋsem la bũmb fãa.” (Tʋʋma 17:24, 25) Sẽn mik tɩ vɩɩmã yaa Wẽnd kũunã, d pa segd n maan bũmb sẽn na n kʋʋg d yõorã ye. Wala makre, sɩgaarã yũubu. Sɩgaarã naaga bũmb nins sẽn kʋʋd nebã n yɩɩdã sʋka.
D nong d taabã. “Fo tog n nonga f to wa f menga.” (Matiye 22:39) D sã n yũud sɩgaar neb sʋka, yaa kaset tɩ d pa nong-b ye. Bala neb nins sẽn vɩ ne sɩga-yũudbã wat n bẽeda bãas nins b sẽn bẽedã.
D tog n yɩɩ yɩlma. “Kõ-y y yĩnsã tɩ yɩ maoong sẽn vɩ, sẽn yaa sõma, sẽn noom Wẽnnaam.” (Rom dãmbã 12:1) “Bɩ d yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda, n lebgd sõamyã n paasd Wẽnnaam zoeesã pʋgẽ.” (2 Korẽnt rãmbã 7:1) Ned sẽn yaa yɩlemd yaa sõma, t’a yĩngã pa rẽgd ye. Sɩga-yũud yaool n yãka yam n yũud bũmb sẽn dẽgemd a yĩngã wʋsgo, n sãamd-a. Dẽnd a pa yɩlemd ye.

Bõe la Biiblã yet marizuana wã ne dorg buud toor-toorã yũub wɛɛngẽ, baa yaa pemsem kokr sasa?

Biiblã pa gomd marizuana wã bɩ dorg rãmb a taab yell ye. La a yeta bũmb toor-toor sẽn wilgd tɩ marizuana wã bɩ dorg buud fãa yũub yaa wẽnga, baa pemsem kokr sasa. D goma rẽ yell yĩngrã. La ad sagls a taab me:

D tog n gũusa ne d tagsa wã. “Fo tog n nonga a Zeova sẽn yaa fo Wẽnnaamã . . . ne f yamã fãa.” (Matiye 22:37, 38) “Modg-y tɩ y yamã ket n vẽen sõma.” (1 Pɩyɛɛr 1:13) Ned sẽn yũud dorg pa so a meng ye. Neb wʋsg meng lebga dorgã yembse. B sẽn tagsd bal yaa b sẽn na n maan n paam dorg n yũ. B pa get b sẽn na n maan to-to n paam tags-sõma ye.—Filip rãmbã 4:8.
D tog n saka taoor-dãmbã noyã. ‘Sakd-y nanambsã ne pãn-soaadbã.’ (Tɩte 3:1) Tẽns wʋsg pʋsẽ, b gãnega noy dorg kẽer wɛɛngẽ. D sã n dat n ta Wẽnnaam yam, d tog n saka taoor-dãmbã noyã.—Rom dãmbã 13:1.

Sɩgaarã yũubã ne yãmb yĩns laafɩ wã

Siglg ning sẽn get laafɩ wã yellã wilgame tɩ yʋʋmd fãa, sẽn ta neb milyõ a yoob la sɩgaarã ne dorgã la tabã kʋʋda. Bãmb sʋkã, sẽn yɩɩd neb 600 000 n kiidi, b sẽn vɩ ne nin-kãensa wã yĩnga. D ges sɩgaarã ne dorgã sẽn sãamd neb nins sẽn yũudã yĩns laafɩ wã to-to, la neb nins sẽn vɩ ne-bã me.

Kãnsɛɛrã. Tabã bɩ sɩgaarã wall dorgã tara põzonom toaaga. Sebr a ye yeelame tɩ “sɩga-yũudb koabg zugu, bãmb 90 wã fãa na n bẽe fulfuudã kãnsɛɛre.” Tabã bɩ sɩgaarã wall dorgã leb n tõe n kɩtame tɩ kãnsɛɛr yõk ned noore, a ragsendakã, a koko-raoogã, a sãoorã, la a yĩnsã wil a taaba.

Vʋʋsmã bãase. Tabã bɩ sɩgaarã wall dorgã kɩtdame tɩ fulfuudã bãas ne vʋʋsmã bãas a taab yõk neda. Kamb nins sẽn vɩ ne sɩga-yũudba, dorg-yũudb bɩ tab-mogdbã wae n bẽeda asem, kõs-kʋdgo, tɩ b fulfuudã pa paasd sõma, n leb n pa tʋmd sõma ye.

Sũur bãaga. Naoor wʋsgo, tabã bɩ sɩgaarã wall dorgã kɩtdame tɩ crise cardiaque bɩ sũur bãag yõk neda. Tabã bɩ sɩgaarã wall dorgã pʋgẽ, gaaz buud n be be (monoxyde de carbone) n tũud fulfuudẽ wã n kẽed zɩɩmã pʋgẽ nana-nana. Gaazã sã n ta zɩɩmã pʋgẽ, a tusda pemsmã n yiisi. Pemsmã sã n yaool n pa waoog zɩɩmã pʋgẽ, sũurã tʋmda wʋsg sẽn na yɩl tɩ yĩngã paam pemsem.

Pagb nins sẽn tʋtã. Pagb nins sẽn tʋt n yaool n yũud sɩgaar bɩ dorg wall b mogd tabã wae n dogdame tɩ daarã pa ta ye. Biigã rogdame n yaa kɩdg wʋsgo, bɩ n zoe n bẽedẽ. Wala makre, a no-bɩmsã tõeeme n pa sõma, a tõe n wa bẽe vʋʋsmã bãase, bɩ n tiig n ki zĩig pʋgẽ.

a Ka wã, sɩgaarã yũubã tõe n yaa sɩga-moodã wall tãb-rʋkã b sẽn fõogdã. La saglsã d sẽn na n yã sõs-kãngã pʋgẽ wã tõe n sõnga sẽn mogd-b tabã, bɩ n fõogd tab-zomã ne b yõyã, wall b yũud sɩgaarã ne manesem a to wã.