Bõe la Biiblã yet sũ-yikrã wɛɛngẽ?
Biiblã sẽn yete
Biiblã wilgame tɩ sũ-yikr sẽn loog noor yaa wẽnga. Pa nafd a soabã la neb nins sẽn be ne-a wã ye. (Yel-bũnã 29:22) Baa nina sũur sẽn mi n yik a bʋʋm zugã, Biiblã wilgame tɩ neb nins sẽn nong ‘sũ-yikrã’ pa na n paam fãagr ye. (Galat rãmbã 5:19-21) Biiblã tara sagls sẽn tõe n sõng ned t’a tõog n bas sũ-yikri.
Sũ-yikr yaa wẽng wakat fãa bɩ?
Ayo. Wakat ninga, y tõe n yika y sũur y bʋʋm zugu. Wala makre, a Neemi sẽn wa n bãng tɩ b namsda a tẽed-n-taas kẽerã, a “sũurã puuga hal wʋsgo.”—Neemi 5:6.
Wẽnnaam me sũur mi n yikame. Pĩnd wẽndẽ wã, a nin-buiidã sẽn da pʋlem tɩ b na n waooga yẽ a ye balã wa n kɩɩs-a lame, n sɩng wẽn-faad waoogre. Rẽ kɩtame tɩ “Sẽn-Ka-Saab sũur puug” ne-ba. (Bʋ-kaoodbã 2:13, 14) La baa ne rẽ, Wẽnnaam a Zeova pa sũ-yikr soab ye. A sũur sã n yik fãa, yaa a bʋʋm zugu. Sẽn paase, a sũurã pa yikd tɩ loog noor ye.—Yikri 34:6; Ezayi 48:9.
Bõe n tõe n kɩt tɩ sũ-yikr yɩ wẽnga?
Sũ-yikr sã n loog nug wall sã n pa bʋʋm zugu, a yaa wẽnga. Ninsaalbã sẽn pa zems zãngã sũ-yikr wae n yaa woto. Ad makr a wãna:
A Kayẽ sẽn wa n maan maoong n kõ Wẽnnaam t’a pa reegã, a ‘sũurã puuga hal wʋsgo.’ A Kayẽ basame t’a sũ-yikrã paam pãnga, hal t’a wa kʋ a yaoã.—Sɩngre 4:3-8.
Wẽnnaam sẽn wa n zoe Niniiv nebã nimbãaneg n pa sãam-bã, no-rɛɛs a Zonaas ‘sũurã yikame.’ Wẽnnaam remsa a Zonaase, n wilg-a t’a ‘sẽn yikd a sũur woto wã,’ a pa tar bʋʋm, la t’a ra segd n zoee nin-kãensã sẽn yaa yel-wẽn-maandb sẽn tek yam n kos sugrã nimbãanega.—Zonaas 3:10–4:1, 4, 11.a
Bõe n tõe n sõng-y tɩ y bas sũ-yikri?
Bãng-y sũ-yikr sẽn loog noor sẽn tõe n wa ne bũmb ningã. Neb kẽer tõe n tagsdame tɩ f sũur sã n yik tɩ f maan bũmb n wilg rẽ, f yaa raoa. Sɩd-sɩdã, ned sã n pa tar yõk-m-menga, yaa pãn-komsem meng-menga. Biiblã yeelame: “Ned sẽn ka tar yõk-m-meng wẽnda tẽng lalg sẽn lʋɩ n bas-a.” (Yel-bũnã 25:28; 29:11) La d sã n mao n bɩɩs yõk-m-menga, d wilgdame tɩ d yaa raoa la tɩ d tara yam. (Yel-bũnã 14:29) Biiblã yetame: “Sũ-maasem soab n são gãndaoogo.”—Yel-bũnã 16:32.
Y sũur sã n yik bɩ y yõk y menga, tɩ ra wa kɩt tɩ y maan bũmb n wa maand y bãngẽ ye. Yɩɩn-sõamyã 37:8 yetame: “Zãgs sũ-yikri, la f bas sũ-puugri. Sik f sũuri, t’a ra wa kɩt tɩ f maan sẽn yaa wẽng ye.” Bãng-y tɩ d sũurã sã n wa yiki, d tara d sẽn tõe n maane: D tõe n yãka yam n sik d sũurã, n da wa maan “wẽng ye.” Yaa wa Biiblã sẽn yeelã: “Yãmb sũyã sã n yiki, bɩ y ra maan yel-wẽn ye.”—Efɛɛz rãmb 4:26, Wẽnnaam Sebre, 1983.
Sã n tõe, yãmb wall ned a to sũur sã n wa rat n yik bɩ y looge. Biiblã yeelame: “Fo sã n sɩng zabre, yaa wa f sẽn kãsg ko-koaka. Reng n loog tɩ zabrã ra wa sɩng ye.” (Yel-bũnã 17:14) Yaa sɩd tɩ d segd n welgda d mo-yõsã tao-tao. La yãmb ne ned moor sã n wa yõsge, y segd n basame tɩ y fãa sũyã sigi, tɩ y yaool n maag y yĩng n yẽs ne taab n bao a welgre.
Bao-y yellã vɩʋʋgo. Yel-bũn 19:11 yetame: “Sẽn tar-a yam ka yikd a sũur tao-tao ye.” D sã n deng n bãng yell vɩʋʋg n yaool n yãk d sẽn na n maaneg n são. D sã n maag d yĩng n kelg ned kam fãa, tõe n sõngame tɩ d ra yik d sũur zaalem ye.—Zak 1:19.
Pʋʋs-y n kos-y sũur pʋgẽ bãane. Pʋʋsgã tõe n sõngame tɩ y paam “Wẽnnaam laafɩ wã sẽn yɩɩd ninsaalbã bãngr fãa wã.” (Filip rãmbã 4:7) Ne pʋʋsgã maasem me, d tõe n paama Wẽnnaam vʋʋsem sõngã sẽn tõe n sõng-d tɩ d bɩɩs zʋg-sõma wala yõk-m-menga, sũ-mare, la bãane.—Luk 11:13; Galat rãmbã 5:22, 23.
Bao-y y zo-rãmbã ne yam. Naoor wʋsgo, d rɩkda d tũud-n-taasã togs-n-taare. (Yel-bũnã 13:20; 1 Korẽnt rãmbã 15:33) La Biiblã keoogda tõnd tɩ d ‘ra yõg zood ne sũ-tʋʋl-neda, la d ra rɩk sũ-pu-ned n maan d tũud-n-taag ye.’ Bõe yĩnga? ‘Sã n ka rẽ, d wat n dɩka a zʋgdã tɩ wa lebg bẽdg d mengã yĩnga.’—Yel-bũnã 22:24, 25.
a Wõnda a Zonaas saka remsgã, n sik a sũurã. Bala Wẽnnaam kɩtame t’a gʋls Zonaas sebrã sẽn be Biiblã pʋgẽ wã.
Kiba-kãensã wilgdame tɩ naoor wʋsgo, ninsaal sẽn pa zems zãngã “sũ-yikr ka wat ne tɩrlem Wẽnnaam nifẽ ye.”—Zak 1:20.