SOGSG KOM-BƖƖSÃ SẼN SOKDE
Wãn to la m tõe n sigl m sẽkã sõma?
Bõe yĩng tɩ f segd n sigl f sẽkã?
D tõe n dɩka sẽkã n mak ne ligdi. F sã n sãam f sẽkã, f wat n dat-a lame n pa le tõe n paam ye. La f sã n sigl f sẽkã sõma f na n tõog n maana f sẽn datã, la f paam sẽk n maan bũmb a taab sẽn kõt-f sũ-noogo.
Biiblã saglga: “Kʋɩɩm tara raab wʋsgo, la a pa tar baa fʋɩ ye. La ned ning sẽn tʋmd sõma na n paamame tɩ seke.”—Yel-bũnã 13:4.
Kʋmsgo: F sã n sigl f sẽkã sõma, f na n tõog n maana bũmb wʋsgo.
F sã n minim n sigind f sẽkã sõma, f sã n wa lebg kãsma f yɩta ned sẽn tʋmd ne a sẽkã sõma. Rẽ na n sõng-f lame me tɩ f ra wa bõn f tʋʋm ye. Fo sã n yaa tʋʋm taoor soaba, fo na n sak n basa tʋm-tʋmd sẽn pa wat tʋʋmã lɛɛr wakat fãa t’a tʋm f tʋʋmdã bɩ?
Biiblã saglga: “Ned sẽn maand sɩd ne sẽn yaa bilf maanda sɩd ne sẽn yaa wʋsgo.”—Luk 16:10.
Kʋmsgo: F sã n sigind f sẽkã sõma, wilgda f sẽn yaa ned ning buudu.
D fãa sak n deegame tɩ tõog n sigl f sẽkã sõma pa bũmb sẽn yaa nana ye. Bɩ d ges zu-loees a wãn sẽn kɩt tɩ yaa woto.
Pipi zu-loɛɛgã: Zo-rãmbã
“M zo-rãmbã sã n bool-m tɩ m wa tɩ d yi, wakat fãa m modgdame n kẽnge, baa m sã n pa tar sẽka. M yeta m meng yaa: ‘M sã n lebg n wa, m na n tʋma tʋʋm nins m sẽn segd n tʋmã tao-tao.’ La pa yãkd neng wakat fãa ye. Sẽn paase yɛlã manegd n zẽname.”—A Cynthia.
Zu-loɛɛg a 2: Pemsmã kokre
“Tele wã sãamda sẽka. F sã n sɩng bũmb gesgo, yaa toog tɩ f tõog n yiki.”—A Ivy.
“M tõe n tõga m tablɛtã n kaoos lɛɛr-dãmba. M sũur mi n sãamda wʋsgo, bala bũmb ning sẽn tõe n wa kɩt tɩ m bas m tablɛtã tõgbã, yaa bateri wã sã n wa ki.”—A Marie.
Zu-loɛɛg a 3: D sã n minim n viigd d tʋʋmã
“M nong n yetame tɩ m na n maana ɛgzɛrsis-rãmb nins b sẽn kõt tõnd lekollẽ wã, la tʋʋm a taabã m sẽn segd n tʋmã wakat a to. M wat n dɩka m sẽkã n maan bũmb sẽn pa tar yõod baa bilfu, tɩ rẽ poor bɩ m pa le tar sẽk n na n tʋm tʋʋm nins m sẽn da segd n tʋmã ye. Woto pa sẽk siglg sẽn yaa sõma ye.”—A Beth.
F sã n sigl f sẽkã sõma, f na n tõog n maana bũmb wʋsgo
F sẽn tõe n maane
Gʋls bũmb nins f sẽn dat n maanã. Wala makre zakã tʋʋma, la ɛgzɛrsis-rãmb nins b sẽn kõt-f tɩ f wa maan zakẽ wã. Gʋls wakat takɩ f sẽn na n dɩk n tʋm tʋʋmd fãa semennã pʋgẽ.
Biiblã saglga: “Bãng bũmb nins sẽn tar yõod n yɩɩdã n bake.”—Filip rãmbã 1:10.
Gʋls bũmb nins f sẽn dat n maan f sã n wa pa tar tʋʋma. Wala makre n kẽ rezo sosiyo-rãmbã pʋgẽ wall f ges tele. Gʋls sẽk ning f sẽn kẽesd bõn-kãens maaneg pʋgẽ semen pʋgẽ wã.
Biiblã saglga: “Kell-y n kẽn-y ne yam, n da sãam y sẽkã ye.”—Kolos rãmbã 4:5.
Sigl f tʋʋmã. Lebgd n get bũmb nins f sẽn gʋlsã. Sẽk ning f sẽn yãk n na n maan bũmb nins sẽn tar yõod n yɩɩdã n yaa wʋsg bɩ? F segd n booga sẽk ning f sẽn dɩkd n kokd pemsmã bɩ?
Saglga: Gʋls bũmb nins f sẽn dat n maan daarã pʋgẽ wã, tɩ f sã n tʋʋmd n sa bɩ f rẽeg tɩ f saame.
Biiblã saglga: “Sãmbg sẽn kae, sẽn tʋmd-a sõma magb kɩtdame t’a yɛl yãkd nenga.”—Yel-bũnã 21:5.
Tũ f na-kẽndrã. Yaa sõma tɩ f mi n zãgs bũmb kẽer maanego, sẽn na yɩl n paam sẽk n maan bũmb nins sẽn tar yõod n yɩɩdã. Woto, f na n yãame tɩ f tara sẽk wʋsgo. F na n tõogame me n maan bũmb nins sẽn noom foomã.
Biiblã saglga: “Bɩ y yɩ neb sẽn tʋmd wʋsgo, la ra maan-y laas-laas y tʋʋmã pʋgẽ ye.”—Rom dãmbã 12:11, tẽngr notã.
Maan bũmb sẽn noom foo, la f ra yɩ yãg-yãg n maan rẽ ye. Bi-bɩɩg a ye yʋʋr sẽn boond t’a Tara yeelame yaa: “Wakat ninga m tõe n maana bũmb a yiib n sa zãnga, la m yeel m meng yaa: ‘M tõe n vʋʋsa bilfu. M na n gesa tele minit 15. Rẽ poore m na tʋm m tʋʋm a taabã.’ Minit 15 wã wat n lebga minit 30, tɩ minit 30 wã wa lebg lɛɛre. Tar-n-tarẽ, m sẽn wat n bãng tɩ m gesa tele wã n kaoos lɛɛr a yiibu!”
Bõe la f tõe n maane? Ges bũmb nins f sẽn maand n kokd pemsmã wa bũmb f sẽn segd n maand wakat-wakate, la pa bũmb sẽn naag f daar fãa tʋʋmã ye.
Biiblã saglga: “Bũmb ka be n são ne ninsaal n yɩɩd a sẽn na n . . . noog a sũur a tʋʋm-toogã yĩng ye.”—Koɛɛg soaba 2:24.