BIIBLÃ VƐRSE-RÃMB B SẼN BILG A VÕORE
Yel-bũn 3:5, 6: “Ra teeg f meng bãngr ye”
“Teeg a Zeova ne f sũur fãa, la f ra teeg f meng bãngr ye. Fo sẽn maand fãa pʋgẽ bɩ f tags a yelle, la a na kɩt tɩ f soayã yɩ tɩrse.”—Yel-bũnã 3:5, 6, Dũni-paalgã lebgre.
“Bɩ f teeg Sẽn-Ka-Saab ne f sũur fãa, la f ra teeg f meng bãngr ye. Bɩ f tẽeg Sẽn-Ka-Saab yelle, bũmb nins fãa f sẽn maandã pʋgẽ, la bãmb na n manega f soayã.”—Yel-bũnã 3:5, 6, Wẽnnaam Sebre, 2014.
Yel-bũn 3:5, 6 goamã võore
D sã n wa rat n yãk yam bũmb sẽn tar wʋsg wɛɛngẽ, yaa Wẽnnaam a Zeovaa la d segd n tẽeg t’a wilg-d sore, la pa d mensã ye.
“Teeg a Zeova ne f sũur fãa.” D wilgdame tɩ d teega a Zeova, d sã n maand bũmb nins a sẽn datã. D segd n teega a Zeova zãng-zãng ne d sũurã fãa. Biiblã pʋgẽ, b sã n gomd sũur yelle, makda ned sẽn sɩd yaa a soabã, rat n yeel t’a tagsa wã, a yel-manesmã, a tʋlsmã, la a zʋgã. Woto wã, teeg Wẽnnaam ne d sũur fãa pa rat n yeel bal tɩ d tagsd a yell ye. Yaa d sẽn na n yãk yam n teeg-a, n kɩs sɩd t’a sẽn yaa d Naandã, a mii sẽn yaa sõma ne-do.—Rom dãmbã 12:1.
“Ra teeg f meng bãngr ye.” D segd n teega Wẽnnaam, bala d sẽn pa zems zãngã yĩnga, d tagsa wã mi n pa zems ye. D sã n teeg d menga, bɩ n tikd d mengã tagsa wã zug n yãkd yam, d tõe n wa yãka yam n maan bũmb n tagsd tɩ yaa sõma, tɩ yaool n na n wa ne yelle. (Yel-bũnã 14:12; Zeremi 17:9) Wẽnnaam yamã yɩɩda tõnd rẽndã hal zĩig sẽn zãre. (Ezayi 55:8, 9) D sã n tũud Wẽnnaam noyã la a saglsã, d vɩɩmã na n talla barka.—Yɩɩn-sõamyã 1:1-3; Yel-bũnã 2:6-9; 16:20.
“Fo sẽn maand fãa pʋgẽ bɩ f tags a yelle.” Sẽn yaa bũmb ning fãa la d rat n maan d vɩɩmã pʋgẽ, la d yam-yãkr fãa pʋgẽ, d segd n bao n bãnga Wẽnnaam tagsgo. Sẽn na yɩl n maan woto, d segd n pʋʋsame n kos-a t’a wilg-d sore, la d tũud a sẽn yet bũmb nins a Gomdã sẽn yaa Biiblã pʋgẽ wã.—Yɩɩn-sõamyã 25:4; 2 Tɩmote 3:16, 17.
“A na kɩt tɩ f soayã yɩ tɩrse.” Wẽnnaam kɩtdame tɩ d soayã yaa tɩrse, a sẽn sõngd tõnd tɩ d tũud a noyã sẽn yaa tɩrsã yĩnga. (Yel-bũnã 11:5) Woto sõngda tõnd tɩ d gĩnd zu-loeese, la d tar sũ-noog wʋsgo.—Yɩɩn-sõamyã 19:7, 8; Ezayi 48:17, 18.
B sẽn yeel bũmb ning n yaool n na n togs Yel-bũn 3:5, 6 goamã
Yel-bũn sebrã sẽn be Biiblã pʋgẽ wã kõta sagls sẽn tõe n sõng-d tɩ d paam sũ-noogo, la vɩɩm sẽn tar bark Wẽnnaam nifẽ. Pipi sags a wɛ wã yaa wa sagls ba sẽn gʋls n tool a bi-nongre. Sak a 3 wilgda neb nins sẽn nong Naandã sẽn yaa yam-kãseng soabã saglsã la b tũudẽ wã sẽn paamd bark ninsi.—Yel-bũnã 3:13-26.
a Zeova wã yaa Wẽnnaam yʋ-peellã.—Yɩɩn-sõamyã 83:18.