Yel-bũnã 17:17: “F zoa hakɩɩk nong-f-la wakat fãa”

Yel-bũnã 17:17 goamã võore

Zoa hakɩɩk yaa ned f sẽn tõe n teeg zãng-zãnga. A maanda sɩd ne-f wakat fãa wa ned f sẽn kĩ ne, sẽn yɩɩd fãa f sã n wa maood ne zu-loeese.

“F zoa hakɩɩk nong-f-la wakat fãa.” D tõe n lebga gom-kãngã tɩ “zoa wilgda wakat fãa t’a nong-f lame.” Ebre gom-bil ning b sẽn lebg tɩ ‘nong-f lame’ wã pa f sẽn na n tagsd a soabã yell bal ye. Yaa f sẽn na n wilg ne f tʋʋmd-tʋmdɩ tɩ f nonga f to wã ne nonglem sẽn pa baood a meng nafre. (1 Korẽnt rãmbã 13:4-7) Zo-rãmb sẽn nong taab ne nonglem a woto kelld n wilgame tɩ b nonga taaba, baa b moorã sã n wa yõsge, wall zu-loees a taab sasa. B sakd n kõta taab sugr me. (Yel-bũnã 10:12) A to wã yɛl sã n wa yãkd nenga, a pa maand sũ-kiir ye. A pʋd n naagd-a lame n maand sũ-noogo.—Rom dãmbã 12:15.

“F zoa hakɩɩk . . . yaa f ba-biig f sẽn tõe n teeg yel-pakr wakate.” Yel-bũnã wilgdame tɩ neb sẽn kĩ ne taab tõe n nonga taab wʋsgo. Dẽnd d sã n maand d sẽn tõe fãa n na n sõng d zoa yel-pakr wakate, d maanda wa a ba-biig bɩ a ma-biig sẽn da na n maane. Sẽn paase, zu-loɛɛg baa a ye pa tõe n sãam zood a woto buud ye. Pʋd n paasd zood pãnga, bala zu-loeesã kɩtdame tɩ y nonglmã paamd pãnga, tɩ y maneg n waoogd taaba.

B sẽn yeel bũmb ning n yaool n na n togs Yel-bũnã 17:17 goamã

Yel-bũn sebrã pida ne yam goam la sagls sẽn yaa koeese, sẽn sõngd karemdã t’a bʋgse. Rĩm a Salomo n gʋls goam nins sẽn be Biiblã seb-kãngã pʋgẽ wã fãa la bala. A sẽn gʋls to-to wã wõnda Ebre yɩɩn-yɩɩndbã sẽn wʋgd b goamã to-to wã. B tũnugda ne goam a yiib sẽn tũud taab bɩ sẽn yaa toor-toore. Pipi gomdã tõe n teenda yiib-n-soabã, bɩ n yaa toor fasɩ ne-a. Yel-bũnã 17:17 tara goam a yiibu, tɩ yiib-n-soab gomdã teend pipi soabã. Yel-bũnã 18:24 goamã tara tagsa a yiib sẽn yaa toor-toore. Be b yetame yaa: “Tũud-n-taas n be tɩ b sẽn dat bal yaa sãam taaba, la zoa ning n be n nong-f n yɩɩd f ba-biiga.”

Tõe t’a Salomo sẽn wa n gʋlsd Yel-bũnã 17:17 wã t’a ra tagsda zood ning sẽn da be a ba a Davɩɩd ne rĩm a Sayull biig a Zonatã sʋkã yelle. (1 Sãmwɛll 13:16; 18:1; 19:1-3; 20:30-34, 41, 42; 23:16-18) Baa ne a Davɩɩd ne a Zonatã sẽn da pa kĩ ne taabã, b ra nonga taab n yɩɩd ba-biisi. A Zonatã sakame meng n gẽneg a yõor n na n fãag a zoa a Davɩɩde.a

B sẽn lebg Yel-bũnã 17:17 wã to-to Biibl a taab pʋsẽ

“F zoa nong-f-la wakat fãa, la a lebgda f ba-biig yel-pakr wakate.”—The Bible in Basic English.

“F zoa yaa f zoa wakat fãa, a yaa f ba-biig sẽn dog toog wakat yĩnga.”—Moffatt Translation of the Bible.

“F zoa wilgdame t’a yaa f zoa wakat fãa, a rogame n na n sõng-f toog wakate.”—The Complete Jewish Study Bible.

Ges-y video koɛɛg sẽn gomd Yel-bũn sebrã sẽn gomd bũmb ningã yelle.