Galaad lekollã sẽn nafd nebã to-to dũniyã gill zugu

Yʋʋmd fãa, b boonda neb sẽn yit dũniyã zĩis toor-toor la sẽn kẽes b mens zãng-zãng Wẽnnaam tʋʋmdã pʋgẽ tɩ b kẽnd n tɩ paamd zãmsg Galaad lekollẽ wã. B lugla lekoll-kãnga a Zeova Kaset rãmbã karen-do-kãsengã sẽn be Patɛrsõn, Etazĩni soolmẽ wã.a Lekollẽ wã, b zãmsda karen-biisã b sẽn tõe n maneg n tʋm tʋʋm nins b sẽn tʋmd a Zeova siglgã pʋgẽ wã to-to tɩ yɩ sõma n paase. Zãmsg ning b sẽn paamdã sõngd-b lame tɩ b tõe n teel tigimsã sõma, la b sõng filiyall-dãmbã sẽn be dũniyã gill zugã tɩ b tʋʋmdã kẽng taoore.

Galaad lekollã yaa lekoll neb sẽn yit dũniyã zĩis toor-toor sẽn kẽnde. Wala makre, Galaad lekoll 147 soabã b sẽn maan yʋʋmd 2019 wã, yɩɩ karen-biis bãmb 56, sẽn yit tẽns 29 pʋsẽ n kẽnge. Sẽn kẽng-bã yaa neb sẽn kẽes b mens zãng-zãng Wẽnnaam tʋʋmdã pʋgẽ, n yaa Betɛllẽ tʋm-tʋmdba, tigims sull yel-gɛtba, misioneer-dãmb wall zall so-pakdba.

Lekollã seglgã sɩngda hal sẽn kaoose, nand tɩ lekollã sɩngr daar ta. Wala makre, tõnd biru-kãsengẽ wã, biru ning sẽn get so-toakã yellã raada neb nins b sẽn bool lekollẽ wã sɩlgã biye-rãmba. Galaad lekoll 147 soabã wɛɛngẽ, yɩlẽ tɩ karen-biis nins fãa sẽn yit tẽn-zẽmsã kẽ sɩlgã b tẽngẽ wã n wa Patɛrsõn la b le tõog n lebe, ned fãa sɩlg biye ligd kolga tus kobs-yoobe. Karen-biis nins sẽn yit Salomo ko-sʋk tẽnsẽ wã ra segd n kẽe sɩlgã, n sig n kẽ a to, hal naoor a naas n yaool n ta Patɛrsõn. Lekollã poore, b ra segd n kẽe sɩlgã, n sig n kẽ a to, hal naoor a tã n yaool n ta b tẽngẽ wã. So-toakã fãa yɩɩda kɩlometr 35 400. Karen-biig fãa sɩlg biye ligd rat n taa miliyõ a ye la tus kobs-tã. Sẽn na yɩl n kẽgs ligdã, biru ning sẽn get so-toakã yellã tũnugda ne ordinatɛɛr pʋgẽ tʋʋm-teoogo, bɩ lozisiyɛlle sẽn sõngd-b tɩ b tõe n bao sɩlg biye-rãmb ligd sẽn pa toogo. La baa sɩlgã biye raab poor menga, lozisiyɛllã tõe n maana semen pa rẽ bɩ kiis meng n ket n gẽesd biye ligd sẽn pa ta b sẽn zoe n da wã. Biru ning sẽn get so-toakã yellã tũnugda ne boniis-rãmb me, n daad biye-rãmba.

Karen-biis wʋsg segd n paama viiza n tõog n kẽ Etazĩni. Sẽn na yɩl tɩ karen-biisã tõog n paam rẽ, tõnd biru-kãsengã biru ning sẽn get bʋ-kaoorã yellã sõngd-b lame tɩ b tõog n paam karen-biis viiza-rãmba. Karen-biig fãa viiza la a sɛbã manesgã ligd yɩɩda tus kobs-yi la piig la a yoobe.

Wãn to la zãmsg ning karen-biisã sẽn paamdã nafd tõndo? A Hendra Gunawan yaa kãsem-soab sẽn be Aazidisiidɛst. A bee tiging a yembr pʋgẽ ne saam-biig ne a pag sẽn paam n tɩ karem Galaad lekollẽ wã. A yeelame yaa: “Pĩndã, tõnd tigingã pʋgẽ, wakat fãa so-pakdb ra pa be ye. La saam-biigã ne a pagã waoongã poore, b yẽesmã, la b sẽn tʋmd ne yamleoogã kɩtame tɩ d tẽed-n-taas a taab yãk yam n na n sɩng so-pakrã. Kaoosg poore, tõnd tigingã saam-bi-poak a ye meng n kẽng Rĩungã koe-moondb lekollã.”

A Sergio Panjaitan tʋmda Aazidisiidɛst Betɛllẽ wã. A tʋmda ne d tẽed-n-taas sẽn paam n kẽng Galaad lekollã. A yeelame yaa: “Zãmsg ning b sẽn paamã pa nafd bãmb bal ye. Nafda tõnd me. B zãmsa bũmb wʋsgo. La b pa baood n na n wilg tɩ b yɩɩda b taabã ye. B wilgda tõnd bũmb nins b sẽn zãms-bã. Woto yaa bũmb sẽn kengd tõnd raoodo, tɩ tõnd me tõe n keng neb a taabã raoodo.”

Siglgã maanda wãn n paamd ligdã n get lekoll-kãngã yelle? Yaa ne kũunã y sẽn kõt dũni gill tʋʋmdã yĩnga maasem. B wilga donate.jw.org pʋgẽ bũmb toor-toor d sẽn tõe n maan n kõ kũuni. Neb wʋsg tũnugda ne rẽ n kõt b kũunã. D pʋʋsda y fãa barka, y sẽn kõt kũun ne yamleoog tɩ teend lekoll-kãngã neb sẽn yit dũniyã zĩis toor-toor sẽn kẽngd n tɩ n paamd zãmsgã.