Sebr ning sẽn tar yõod n tɩ yɩɩdã yiisgu

“M sɩng n gũuda rẽ na maan yʋʋm 19 woto!” Bõe la d saam-biigã sɩng n gũud hal sẽn kaoose? Yaa Gʋls-sõamyã, dũni-paalgã lebgre, Matiye-Vẽnegre, Bengali sẽn yaa a buud-gomdã pʋgẽ. Neb wʋsg me yeta woto, b sã n yiis Gʋls-sõamyã dũni-paalgã lebgre, b buud-gomdã pʋgẽ. La yãmb zoe n soka y meng n ges bõe la b maande, Biibl-kãens lebgr la b yiisgã wɛɛngẽ bɩ?

Pipi, siglgã taoor lʋɩtb sull ning sẽn get sɛbã gʋlsg yellã kõta sor tɩ b lugl sull sẽn na n lebg Biiblã. B sã n lugl sull Biiblã lebgr yĩnga, tʋʋmdã kaoosda yʋʋm a wãna? Ad a Nicholas Ahladis sẽn tʋmd ne sull ning sẽn get d sɛbã lebgr yellã sẽn be Warwik, Niuyorkã sẽn yete: “Bũmb wʋsg yell la b segd n tagse. Wala makre, neb a wãn la b tõe n paam tɩ b tʋm tʋʋmdã, buud-gomdã sã n yaa toog bɩ pa toogo, karemdbã sã n mii Biiblã kibay la vɩɩmã sẽn da yaa to-to wakat kãngã, la nebã sẽn gomd buud-gomdã to-to wã sã n pa yembr zĩig fãa. D sã n na n gese, sẽn yaa zĩig ning fãa, sull b sẽn lugl Biiblã lebgr yĩng tõe n dɩka yʋʋmd n tar n dabd yʋʋm a tã n lebg Biiblã babg ning b sẽn da gʋls ne gɛrkã bala. La tõog n lebg Biiblã tõrã, tõe n kaoosa yʋʋm a naase, bɩ sẽn yɩɩd rẽ. Sã n yaa ne mugsã goam la b na n lebg Biiblã, kaoosd n yɩɩga woto menga.”

Sull ning sẽn na n lebg Biiblã sẽn yãk a toogo, b yãkda neb buud toor-toor sẽn be yɩnga, wakat ninga, neb sẽn be tẽns a taab pʋsẽ, tɩ b na n lebgd n karemd bũmb nins Biiblã lebgrã sullã sẽn lebgã. Nin-kãens maanda rẽ zaalem. B sẽn gʋlsd bũmb ninsã sõngdame tɩ sẽn lebgd-b Biiblã tõe n yiis Biibl t’a goamã yaa sɩda, vẽenega, tɩ nebã tõe n wʋm a võor me. Afirikdisiid saam-biig a yembr sẽn zãmsd nebã Biiblã lebgrã sẽn yaa to-to wã yeelame yaa: “Sẽn lebgd-b Biiblã getame tɩ b tara zɩɩb sẽn yaa kãseng a Zeova la neb nins sẽn karemd a Gomdã taoore.”

Lebgrã tʋʋmd sã n sa, b tog n ẽmpirima Biibl-dãmbã masã. Sẽn na yɩl n tõog n maan rẽ, tõnd sɛbã ẽmpirimgã zĩigẽ dãmbã tog n paama bũmb toor-toor sẽn ta bãmb piig bɩ sẽn yɩɩd rẽ. Wala makre, papiye, gʋls-koom, bũmb n na n ludi, koll buudu, bũmb n na n sẽbe, kulɛɛr sẽn yaa wa wanzuri, bũmb n na n teel sebrã poorã, bũmb sẽn na n sõng tɩ b tõog n naag seb-vãadã taaba, la bũmb a taaba. Yʋʋmd 2019 wã, yaa sẽn yɩɩd milyaar piig la b yiis n na n da te-kãensã Biiblã yiisg yĩnga. Yʋʋm-kãnga, d tẽed-n-taas nins sẽn tʋmd sɛbã ẽmpirimg zĩisẽ wã tʋma sẽn yɩɩd lɛɛr tus 300 n tõog n yiis Biibl-dãmbã la b tool-ba.

Bõe yĩng tɩ b rɩkd sẽk wʋsg la b kẽesd ligd wʋsg woto tʋʋm-kãensã pʋgẽ? A Joel Blue sẽn tʋmd ne tõnd biru ning sẽn get sɛbã ẽmpirimg yell dũniyã gill zugã yeelame yaa: “Tõnd sẽn yiisd sɛb ninsã sʋka, Biiblã n tar yõod n tɩ yɩɩdã. Rẽ n so tɩ d rat t’a sẽn yaa to-to wã waoog Wẽnnaam ning tõnd sẽn tũudã, la koɛɛg ning tõnd sẽn moondã.”

Gʋls-sõamyã, dũni-paalgã lebgrã sẽn yãk a toogo, d yiisda Biibl-dãmb a taab neb kẽer takɩ yĩnga. Wala makre, Gʋls-sõamyã dũni-paalgã lebgrã bee ne braille zoensã yĩnga, buud-goam piig pʋgẽ. Yɩl n tõog n maan Biiblã tõr ne braille, tõe n dɩka lɛɛr a nii. Sẽn paase, b sã n dɩk Biiblã ne braille wã babs toor-toorã n naag taaba, woglmã tata metr a 2,3 bɩ sẽn yɩɩd rẽ. Sẽn paase, d yiisda Biibl sẽn yaa toor neb nins sẽn be bãens roogẽ wã yĩnga, bala bãensã roog rãmb pa sakd tɩ sebr paok sẽn tagem kẽ be ye.

Gʋls-sõamyã dũni-paalgã lebgrã nafda neb nins sẽn karemd-a wã. D gom Kiluba tigingã yelle. Bee zĩig b sẽn boond tɩ Tombe, Repiblik Demokartik di Kõngo soolmẽ wã. Tombe bee sẽn yɩɩd kɩlometr 1 700 ne na-tẽngã. Yaa Biibl a yembr bal la a Zeova Kaset rãmb nins sẽn be be wã ra tara. Yaa Kiluba buud-gomdã Biibl-kʋdre. Yaa Biibl-kãng la d saam-biis nins sẽn wɛgsd sõssã ra tar n segend tigissã n deesd taaba. La yʋʋmd 2018 sa-sik kiuugã tɛka, b yiisa Gʋls-sõamyã, dũni-paalgã lebgrã tõre, Kiluba buud-gomdã pʋgẽ, tɩ tigingã ned fãa tõe n paame.

Ad saam-bi-poak a ye sẽn gomd alema sẽn yeele, b sẽn lebs n maneg Gʋls-sõamyã, dũni-paalgã lebgrã a buud-gomdã pʋgẽ wã: “Mam pa le yet tɩ m segd n karma Biiblã ye. Mam yãgdame n na n karm-a.” Ned a ye sẽn be bãens roogẽ gʋlsame n yeel yaa: “B kõo maam Gʋls-sõamyã, dũni-paalgã lebgrã. M sẽn bãngd bũmb ninsã toeemda mam vɩɩmã. Mam zɩ n wʋm Wẽnnaam Gomdã võor sõma woto, sã n pa m sẽn sɩng Biibl-kãng karengã tɛka. M dat n bãng a Zeova Kaset rãmbã n paase, la m sẽn tõe n maan to-to n lebg b nin-yende.”

Neb nins fãa sẽn karemd Gʋls-sõamyã, dũni-paalgã lebgrã sũy yaa noog ne kũun toor-toorã sẽn sõngd tɩ b tõe n yiis Biibl-kãnga. B wilga soay toɛy-toɛy donate.jw.org pʋgẽ, y sẽn tõe n tũnug n kõ kũuni. D pʋʋsd-y-la bark wʋsgo, y sẽn sak n kõt kũunã yĩngã.