Zeremi sebre
40 A Zeova goma ne a Zeremi, gũudbã naab a Nebuzaradan+ sẽn bas-a Rama+ t’a loogã poore. A Nebuzaradan ra sẽba a nusã ne bãense, n tall-a n kẽng be. A Zeremi ra bee Zerizalɛm la Zida neb nins b sẽn tar n dabd yembd Babilonnã sʋka. 2 Dẽ, gũudbã naab talla a Zeremi n yi kɛɛnga, n yeel-a yaa: “Fo Wẽnnaam a Zeova pĩnd n togsame tɩ yel-be-kãngã na n paama zĩ-kãngã. 3 A Zeova kɩtame tɩ rẽ pids wa a sẽn da yeelã, bala yãmb maana yel-wẽn n beeg a Zeova, n pa sak a koɛɛgã ye. Yaa rẽ yĩng la bõn-kãngã sẽn paam yãmbã.+ 4 Rũndã, mam na n yãka bãensã sẽn be fo nusẽ wã n bas foo. Sã n taa fo yam tɩ f na n tũ maam n kẽng Babilonne, bɩ f wa tɩ m na n gesa f yelle. La fo sã n pa rat n tũ maam n kẽng Babilonne, bɩ f ra wa ye. Ade! Soolmã tõr bee fo taoore. Kẽng zĩig ning fãa fo sẽn date.”+
5 Nand meng t’a Zeremi yãk yam n na n lebge, a Nebuzaradan yeelame: “Lebg n leb a Safan+ biig a Ahikam+ biig a Gedaliya+ nengẽ, ned ning Babilon rĩmã sẽn yãk t’a soog Zida tẽnsã nengẽ, n pa ne-a. Zĩnd nin-buiidã sʋka, wall f kẽng zĩig ning fãa f sẽn date.”
Gũudbã naab kõ-a-la rɩɩb la kũuni, la a bas-a t’a looge. 6 Dẽ, a Zeremi kẽnga a Safan biig a Ahikam biig a Gedaliya nengẽ Mizpa,+ n tɩ pa ne-a. A zĩnda neb nins b sẽn bas soolmã pʋgẽ wã sʋka.
7 Kaoosg zugẽ, tãb-biisã nanambs nins fãa sẽn da be weoogẽ wã ne b rapã wʋmame tɩ Babilon rĩmã yãka a Ahikam biig a Gedaliya t’a soog soolmã, la t’a yãk-a lame t’a soog soolmã neb nins sẽn yaa naong rãmbã b sẽn pa tall n kẽng yembd Babilonnã. Yaa rapã, pagbã la kambã fãa.+ 8 Dẽ, b waa a Gedaliya nengẽ Mizpa.+ Yɩɩ a Netaniya biig a Ismayɛlle,+ a Kareya kamb a Zohanan+ ne a Zonatã, a Tanumet biig a Seraya, Netofa rao a Efayi kambã, ne a Zezaniya+ sẽn yaa Maakat raoã biigã, n paas b rapã. 9 A Safan biig a Ahikam biig a Gedaliya wẽename n yeel bãmb ne b rapã yaa: “Ra yɛɛs-y ne tʋm n kõ Kalde nebã ye. Zĩnd-y soolmã pʋgẽ n tʋm n kõ Babilon rĩmã, tɩ bũmb fãa na n yɩɩ sõma ne-yã.+ 10 Sã n yaa ne maam, mam na n paa Mizpa sẽn na yɩl n gomd yãmb yʋʋr yĩnga, Kalde neb nins sẽn na n wat tõnd nengẽ wã taoore. La yãmb segd n wẽka divẽ la kaam, la y wob tɩɩs biisi, n bĩng-b y rʋgdã pʋsẽ. Zĩnd-y tẽns nins yãmb sẽn deesã pʋsẽ.”+
11 Zʋɩf-rãmb nins fãa sẽn da be Mowaabe, Amonne, Edom la soolem a taabã pʋsẽ wã me wʋmame tɩ Babilon rĩmã basa neb Zida, la t’a yãka a Safan biig a Ahikam biig a Gedaliya t’a na n soog-ba. 12 Dẽ, Zʋɩf-rãmbã sɩngame n yit zĩis nins fãa b sẽn da sãeegã n wat Zida soolmẽ wã, la a Gedaliya nengẽ Mizpa. B wẽka divẽ la b wob tɩɩs biis hal wʋsgo.
13 A Kareya biig a Zohanan ne tãb-biisã nanambs nins fãa sẽn da be weoogẽ wã waa a Gedaliya nengẽ Mizpa. 14 Bãmb yeel-a lame yaa: “Fo pa mi tɩ Amon nebã+ rĩm a Baalis tʋma a Netaniya biig a Ismayɛll t’a wa kʋ foo la?”+ La a Ahikam biig a Gedaliya pa tẽ b sẽn yeelã ye.
15 Rẽ poore, a Kareya biig a Zohanan soos n yeela a Gedaliya Mizpa yaa: “Bas tɩ m kẽng n tɩ kʋ a Netaniya biig a Ismayɛlle. Ned baa a ye pa na n bãng ye. Bõe yĩng t’a na n kʋ foo, tɩ Zida neb nins sẽn tigim taab fo nengẽ wã fãa sãeege, tɩ neb nins sẽn kell Zida wã ki?” 16 La a Ahikam biig a Gedaliya+ yeela a Kareya biig a Zohanan yaa: “Ra maan woto ye. Bala bũmb ning fo sẽn yet a Ismayɛll zugã yaa ziri.”