Bao n bãng Kiristã tʋʋmd Wẽnnaam daabã pidsg pʋgẽ

“SƖNGR wakatẽ, Wẽnnaam naana saasã la tẽngã,” la bũmb nins fãa a sẽn maanã ra yaa “sõma wʋsgo.” (Sɩng. 1:1, 31) A Zeova naana ninsaalbã n da rat tɩ b vɩɩmã tall bark wakat fãa. La b sẽn kɩɩs Wẽnnaam Edɛnnã kɩtame t’a sẽn da rat tɩ ninsaalbã vɩɩm tall bark to-to wã viigi. Baasgo, a Zeova sẽn dat bũmb ning ne ninsaalbã la tẽngã pa na n vaal ye. Wẽnnaam wilgame t’a Ãdem yagens nins sẽn na n sak yẽ wã na n paama fãagre. A na n lebs n lugla tũudum hakɩɩkã, la a sãam wẽng soabã ne a tʋʋm-wẽnsã fãa. (Sɩng. 3:15) Rẽ poore, bũmba fãa na n le yɩɩ “sõma wʋsgo.” A Zeova na n maana rẽ ne a Bi-ribl a Zeezi Kirist maasem. (1 Zã 3:8) Woto yĩnga, yaa tɩlɛ tɩ d bao n bãng tʋʋmd ning Kiristã sẽn tar Wẽnnaam daabã pidsg pʋgẽ wã.—Tʋʋ. 4:12; Fili. 2:9, 11.

KIRISTÃ TƲƲMD SẼN YAA A SOABA

² D sã n bʋgs tʋʋmd ning Kiristã sẽn tar Wẽnnaam daabã pidsg pʋgẽ wã, d mikdame t’a tʋʋmdã tara nens wʋsgo. A Zeezi Kirist yaa ãdem-biisã Fãagda, a yaa Maan-kʋʋdb kãsma, a yaa tigingã Zu-soaba, la rũndã-rũndã, a yaa Wẽnnaam Rĩungã Rĩma. D sã n maag d yĩng n tags Kiristã tʋʋm toor-toorã zugu, na n kɩtame tɩ d maneg n nand bũmb nins Wẽnnaam sẽn maand a raabã pidsg yĩngã, la d nong Kirist Zeezi hal wʋsg me. Biiblã wilgda Kiristã tʋʋm toor-toorã kẽere.

³ Kiristã koe-moonegã sasa, a sõnga nebã tɩ b bãng tɩ yɩl tɩ ãdem-biisã lebs n maneg b yellã ne Wẽnnaam, tũuda ne yẽ maasem. (Zã 14:6) A Zeezi sẽn yaa ãdem-biisã Fãagdã, a sakame n ki tɩ yɩ maoongo, n na n fãag neb wʋsgo. (Mat. 20:28) Dẽnd a Zeezi pa ned sẽn kõ tõnd mak-sõng Wẽnnaam tũubã wɛɛngẽ bal ye. A tara tʋʋm-kãsenga, a Zeova sẽn dat n maan bũmb ning n kõ ninsaalbã pʋgẽ. Yaa yẽ maasem yĩng bal la tõnd tõe n maneg yell ning sẽn be tõnd ne Wẽnnaam sʋkã. (Tʋʋ. 5:31; 2 Kor. 5:18, 19) A Zeezi kũumã sẽn yɩ maoongã ne a vʋʋgrã paka sore, tɩ wẽn-sakdbã tõe n wa paam bark sẽn kõn sa Wẽnnaam Rĩungã naam sasa.

⁴ A Zeezi sẽn yaa Maan-kʋʋdb kãsmã yĩnga, a tõe n ‘kʋma tõnd d pãn-komsmã pʋgẽ,’ la a yõk Wẽnnaam sɛɛg a karen-biisã sẽn be tẽng zugã yĩnga. Tẽn-tʋmd a Poll goma rẽ yell n yeel yaa: “Pa maan-kʋʋdb kãsem sẽn pa tõe n kʋm tõnd d pãn-komsmã pʋgẽ la tõnd tar ye. D tara maan-kʋʋdb kãsem sẽn paam makr bũmb fãa pʋgẽ wa tõndo, n yaool n pa tar yel-wẽnd ye.” A Poll sagla neb nins sẽn tẽed a Zeezi Kiristã tɩ b mao n dɩ Wẽnnaam sẽn maan bũmb ning tɩ d tõe n maneg d yellã ne-a wã yõodo. A yeelame: “Rẽ wã yĩnga, bɩ d kolg Wẽnnaam bark geerã n pʋʋs-a ne bas-m-yam, n paam nimbãan-zoeer la bark sẽn na n sõng-d d sẽn wat n dat sõngr wakate.”—Ebre. 4:14-16; 1 Zã 2:2.

⁵ A Zeezi yaa kiris-neb tigingã Zu-soab me. Pipi kiris-nebã wakatẽ, pa ninsaal n da yaa b taoor soab ye. Yaa woto me ne tõnd rũndã-rũndã. A Zeezi wilgda tõnd sor ne vʋʋsem sõngã maasem, la ne kãsem-dãmbã maasem. A Zeezi ne a saasẽ Ba wã na n wa soka nin-kãensã b sẽn ges Wẽnnaam piisã yell to-to wã wɛɛngẽ. (Ebre. 13:17; 1 Pɩy. 5:2, 3) A Zeova ra togsa bãngr-gomd a Zeezi zug n yeel yaa: “Gese! Mam kɩtame t’a yaa buud toɛy-toɛyã kaset soaba, buud toɛy-toɛyã taoor soab la b naaba.” (Eza. 55:4) A Zeezi yeela a karen-biisã bũmb tɩ wilgdẽ tɩ bãngr-gomdã pidsame. A yeel-b lame yaa: “Ra sak-y me tɩ b bool yãmb tɩ taoor dãmba, bala, yãmb Taoor soab yaa a yembre: Yaa Kiristã.”—Mat. 23:10.

⁶ A Zeezi togsa gomd sẽn wilgd t’a tara yam-sõngo, la t’a rat n sõng-d lame. A yeelame: “Bɩ y wa mam nengẽ, yãmb fãa sẽn yɛ la sẽn tʋk zɩɩbo, la mam na bels yãmba. Rɩk-y mam yubl-balgdgã n pidi, la y rɩk yam mam nengẽ, bala mam yaa sũ-maasem soab la sik-m-meng soaba. Dẽ, y na paam yolsgo. Bala mam yubl-balgdgã yaa bʋgsgo, tɩ m zɩɩbã yaa faasga.” (Mat. 11:28-30) A Zeezi Kirist sẽn get tigingã yell ne bʋgsem la ne manesem sẽn kengd d raoodã, wilgdame t’a rɩkda Wẽnnaam a Zeova sẽn yaa a saasẽ Ba wã togs-n-taare, n yaa “pe-kɩɩm-sõngo.”—Zã 10:11; Eza. 40:11.

⁷ A Poll pipi lɛtrã a sẽn tool Korẽnt kiris-nebã pʋgẽ, a sõng-d lame tɩ d bãng a Zeezi Kirist tʋʋmdã neng a to. Ad a sẽn yeele: “A segd n dɩɩ naam hal n tãag wakat ning Wẽnnaam sẽn na n ning a bɛɛbã fãa a naoã tẽngrã. La b sã n wa kɩt t’a soog bũmb fãa, Biigã na n saka sẽn kɩt-a t’a soog bũmb fãa wã, sẽn na yɩl tɩ Wẽnnaam lebg bũmb fãa nebã fãa yĩnga.” (1 Kor. 15:25, 28) Nand t’a Zeezi wa tẽngã zugu, a ra yaa Wẽnnaam “tʋʋm-mita,” n yaa Wẽnnaam bõn-naandsã fãa pipi soaba. (Yel. 8:22-31) Wẽnnaam sẽn tʋm a Zeezi t’a wa tẽngã zugã, a maana Wẽnnaam daabã wakat fãa. Baa b sẽn nams-a nams-toaagã, a tɩ kiime n pa tol n kɩɩs a Ba wã ye. (Zã 4:34; 15:10) Wẽnnaam Bi-riblã sẽn kell n sak-a n tãag a kũumã, a vʋʋg-a lame, la a kõ-a sor t’a na n lebg a Rĩungã Rĩma. (Tʋʋ. 2:32-36) Woto yĩnga, Wẽnnaam kõo Kirist Zeezi tʋʋm-kãsenga, t’a na n lʋɩ malɛgs tus-kẽema taoor tɩ b menes ninsaalbã goosneema-rãmbã, la b kɩt tɩ wẽnem buud fãa sa tẽngã zugu. (Yel. 2:21, 22; 2 Tes. 1:6-9; Vẽn. 19:11-21; 20:1-3) Rẽ poore, yaa Wẽnnaam Rĩungã a sẽn bobl Kiristã n na n soog dũniyã gilli.—Vẽn. 11:15.

KIRISTÃ TƲƲMDÃ SAKR SẼN BAOOD TƖ F MAANE

⁸ A Zeezi Kirist kõo tõnd mak-sõngo. A zemsa zãnga. B yãk-a lame t’a na n ges tõnd yelle. Sẽn na yɩl n ket n dɩt a sẽn get tõnd yell ne nonglmã yõodo, d segd n kell n maana sɩd ne a Zeova, la d kẽnd nao-yakemd a ye ne a siglgã.

⁹ Pipi kiris-nebã wakatẽ, a Zeezi karen-biisã ra mii tʋʋmd ning a sẽn tar Wẽnnaam daabã pidsg pʋgẽ wã sõma. B wilga rẽ ne b tʋʋma, n da tʋmd ne yam a yembre, la b sulgd b mens n sakd Kiristã sẽn wilgd-b sor ne vʋʋsem sõngã maasmã. (Tʋʋ. 15:12-21) Tẽn-tʋmd a Poll goma zems-n-taar ning sẽn da be kiris-neb nins sẽn paam vʋʋsem sõng zaeebã sʋkã, n yeele: “D sẽn togsd sɩdã, nonglmã maasem yĩng bɩ d bɩ bũmb fãa pʋgẽ, soab ning sẽn yaa zugã pʋgẽ, rat n yeel tɩ Kiristã. Yẽ maasem yĩnga, yĩngã tõr soga taab sõma, n kɩt tɩ kõb-sugdsã sõngd taab n kõt bũmb ning sẽn yaa tɩlɛ wã. Yĩngã wil fãa sã n tʋmd sõma, sõngdame tɩ yĩngã bɩtẽ, a sẽn paamd pãng nonglem pʋgẽ wã yĩnga.”—Efɛɛ. 4:15, 16.

¹⁰ Tigingã nebã fãa sã n sakd Kiristã sẽn wilgd-d sor to-to wã, n naagd taab n tʋmdẽ la b zemsd taaba, b sõorã fɩɩgdame, tɩ nonglem sẽn kɩtd tɩ “neb zemsd taab sõma” wã be b sʋka.—Zã 10:16; Kolo. 3:14; 1 Kor. 12:14-26.

¹¹ Dũniyã yɛl toor-toorã sẽn pidsd Biiblã bãngr-gomdã, sõngdame tɩ d bãng vẽeneg tɩ yʋʋmd 1914 tɛka, a Zeezi Kirist lebga Rĩungã rĩma. Rũndã-rũndã, a rɩta naam a bɛɛbã sʋka. (Yɩɩn. 2:1-12; 110:1, 2) Woto võor yaa bõe ne neb nins sẽn be tẽngã zugã? Ka la bilfu, a Zeezi na n wilgame t’a yaa “rĩm-dãmb Rĩma, la zu-soben-dãmb Zu-soaba,” n sɩbg a bɛɛbã wa Wẽnnaam sẽn datã. (Vẽn. 11:15; 12:10; 19:16) Woto, a Zeova sẽn da pʋlem bũmb ning kɩɩsgã poor Edɛnnã na n pidsame, tɩ neb nins sẽn be Kiristã nug-rɩtgã paam fãagre. (Mat. 25:34) D sũur nooma d sẽn bãng tʋʋmd ning Kiristã sẽn tar Wẽnnaam daabã pidsg pʋgẽ wã! Bɩ d ket n sakd Kiristã zu-sobendã, n naagd taab n tʋmd Rĩungã tʋʋm dũniyã gill zug yaoolem wakat kãensã.