Tũudmã sɛb fãa sʋka, Biiblã to kae ye. Hal pĩnd wẽndẽ n tãag rũndã, nebã wʋsg sẽn tẽed bũmb ninsã tika Biiblã zugu. Sebr kae sẽn tall pãng nebã zug n ta Biiblã ye. La sebr kae me b sẽn wɩd n ta Biiblã, la b vaees n na n ges a goamã sã n yaa sɩd ye.

Wala makre, bãngdb n yet tɩ d pa tõe n kɩs sɩd tɩ Biibl-dãmb nins d sẽn tarã goamã yaa sẽn da be pipi Biibl-dãmbã pʋgẽ wã ye. Tũudmã yɛl-mit a ye yeela woto: “D pʋd n pa tõe n kɩs sɩd tɩ d tõog n bãnga goam nins sẽn da be Biiblã pʋgẽ sɩngrẽ wã takɩ ye. Yaa b sẽn ges pipi Biibl-dãmbã n lebs n gʋlsã bal la d tõog n paame. Rẽ me, zĩis wʋsg la b tudg-yã. Sẽn paase, b sẽn wa n na n gʋls seb-kãensã tɩ b sẽn da gʋls pipi Biibl-dãmbã taa yʋʋm kobse, tɩ d sã n mak-b taab bɩ d ne bũmb wʋsg sẽn pa wõnd taaba.”

Neb kẽer nengẽ, yaa b tũudmã n kɩt tɩ b tagsdẽ tɩ d pa tõe n kɩs sɩd ne rũndã-rũndã Biibl-dãmbã ye. A Faizal kibarã wilgda rẽ. A zakã rãmb ra yet-a lame tɩ Biiblã yaa Wẽnnaam sebre, la tɩ bʋko, b toeema a goamã. Ad a sẽn yeele: “Kɩtame tɩ ned sã n wa gomd Biiblã yell ne-ma, m yamã yooda ne a sẽn yetã. M da yeta m meng yaa: ‘Pa Biibl sɩd-sɩdã la b sẽn tarã ye. B toeema a goamã!’ ”

La tara yõod tɩ d bao n bãng Biiblã goamã sã n toeemame bɩ? Bɩ d sok d meng woto: M sã n pa mi Biiblã goamã sã n toeemame bɩ pa toeeme, m tõe n tẽe pʋlem-noodã sẽn be be wã sɩda? (Rom-dãmbã 15:4) Sẽn ges-b pĩnd Biibl-dãmb n lebs n gʋlsã tudgame, hal tɩ d pa tõe n kɩs sɩd ne rũndã-rũndã Biibl-dãmbã bɩ? Sã n yaa rẽ, d na n sak n teega sagls nins sẽn be be wã n yãk d sẽn segd n maaneg tʋʋmã wɛɛngẽ, zakã pʋgẽ vɩɩmã la tũudmã wɛɛngẽ sɩda?

Yaa sɩd tɩ pipi Biibl-dãmbã pa le be ye. La d ket n tõe n paama Biibl-kʋda, baa b rãmb nins b sẽn gʋls ne nugã. Bõe n sõng tɩ Biibl-kʋd-kãensã pa sãam zãnga? Neb n bao n na n kɩt tɩ Biiblã menem fasɩ, tɩ sãnda bao n na n toeem a goamã, la b pa tõog ye. Bõe yĩnga? Wãn to la woto fãa kɩt tɩ y tõe n kɩs sɩd ne rũndã-rũndã Biibl-dãmbã? D na n leoka sogs-kãensã sõss nins sẽn pʋgdã pʋgẽ.

YELLÃ: B sẽn na n sɩng Biiblã gʋlsgã, yɩɩ papiris la gãnd zugu.a (2 Tɩmote 4:13) Bõe yĩng tɩ rẽ ra tõe n kɩt tɩ Biibl pa beẽ?

Papirisã kẽegda nana-nana, a pelgdame, n sãamd tao-tao. A Parkinson ne a Quirke sẽn yaa pĩnd Eziptã yɛl-mitbã yeelame tɩ papiris tõe n yurame, wall a pʋd n lebg wa tom. B paasame tɩ b sã n bĩng papirisã seb-pindim, tõe n bʋkame, wall põoge, pa rẽ bɩ yõens wall rayʋʋs wãb-a, bɩ mogd moke. Tẽn-vaeesdbã yãa papiris kẽere, la b sẽn bĩng-b zĩig ningã ra bʋka wʋsgo, wall yaa wĩndgã n pãbe, tɩ maneg n sãam tao-tao.

Gãndã kaoosd n yɩɩda papirisã, la b sã n pa bãng b zãabo, bɩ b sã n bĩng-b zĩig sẽn bʋgsa, wall sẽn yaa tʋʋlg wʋsgo, sãamdame.b Mogd tõe n moka gãndã. Rẽ n so tɩ sebr a ye yeel tɩ bũmb nins b sẽn gʋls pĩnd wẽndẽ wã kẽer sã n ketẽ me, pa waoog ye. B sẽn gʋls Biiblã bũmb nins zugã sã n da sãam fasɩ, d ra pa na n tarẽ Biiblã, n bãng sẽn be a pʋgẽ wã ye.

SẼN YƖ TO-TO TƖ BIIBLÃ KETẼ: Tõod nins Wẽnnaam sẽn kõ zʋɩf-rãmbã pʋgẽ, a ra yeelame tɩ rĩm fãa tog n gʋlsa tõod-kãens sebr a to zug n tar n karemdẽ. (Tõodo 17:18) Yaa Biiblã pipi sɛb a nu wã. Sẽn paase, seb-gʋlsdb wʋsg n maag b yĩng n ges Biibl-kʋdã n lebs n gʋls ne nugu, tɩ ra lebg sebr sẽn wae. Pipi kiris-nebã wakatã tɩ Israyɛll soolmẽ wã, la baa Masedoan sẽn da be zĩ-zãrgã, b tõe n paama seb-kãens zʋɩf-rãmbã karen-dotã pʋsẽ. (Luk 4:16, 17; Tʋʋmã 17:11) Maana wãn tɩ seb-kãens ketẽ?

Biibl-mit a Comfort yeelame tɩ yaa rʋgd pʋsẽ la zʋɩf-rãmbã ra bĩngd seb-pindim nins zut b sẽn gʋls Biiblã, sẽn na yɩl tɩ ra sãam ye. Yaa vẽeneg tɩ pipi kiris-nebã me maana woto. Rẽ n so tɩ b yã Biibl-dãmb b sẽn gʋls ne nugu, tɩ be yagd rʋgd pʋsẽ, teed bĩngr dotẽ, tãens bogdẽ, la zĩis saagã sẽn pa niid wʋsgo.

RŨNDÃ-RŨNDÃ: Biiblã sɛb wʋsg b sẽn ges n lebs n gʋls ne nug n kete, hal tɩ b sõorã yaa tusa. Kẽer meng taa yʋʋm 2 000. Pĩnd wẽndẽ sebr kae t’a seb-kʋdã sõore, la b sẽn kaoos to-to wã ta Biiblã seb-kʋdã ye.

YELLÃ: Tũudum la politik taoor dãmb wʋsg n maan b sẽn tõe fãa sẽn na yɩl tɩ nebã ra paam Biiblã ye. B tũnuga ne b naamã n gɩdg tɩ ned ra tall a toorẽ Biible, b ra lebg-a, la b ra yiis Biibl-dãmb me ye. Ad makr a yiibu:

• Yʋʋmd 167 sẽn deng a Zeezi rogmã: Rĩm a Antiokus Epifan sẽn da rat n modg zʋɩf-rãmbã tɩ b kẽ gɛrk-rãmbã tũudmã, a kõo noor tɩ b sã n yã Biibl bɩ b sãam-a. Rẽ tɩ yaa Biiblã babg ning b sẽn da gʋls ne ebre wã n be. Kʋdemdã yɛl-mit a Graetz yeelame tɩ rĩmã “tʋm-tʋmdbã pãrsa seb-pindim nins zut b sẽn da gʋls tõodã, n yõog bugum, la b kʋ sẽn da karemd-b seb-kãens n baood raood kengr la belsgã.”

• Na maan yʋʋm 800 rũndã: Katolikã taoor dãmb kẽer yãame tɩ b wẽnd-dotã neb n bas egiliizã minimdã, n moond Biiblã sẽn yetã. B sũyã yikame tɩ b yeel tɩ rẽ tɛka, nebã sẽn segd n tarẽ yaa Yɩɩn-sõamyã b sẽn lebg ne latẽ wã bala, la tɩ ned ning fãa sẽn tar Biiblã sɛb a taabã yaa kɩɩsda. Katolikã taoor dãmb wa n tigma taaba, n dɩk no-sɩɩr sẽn maneg n zẽn yellã. B yãka neb n kõ-b noor tɩ b kẽnd zagsã pʋsẽ, la zĩig ning fãa b sẽn tagsd tɩ kɩɩsdb beeme wã, n gẽes-b hal n wa paam-ba. B wilgame tɩ roog ning fãa pʋgẽ b sẽn yã kɩɩsda, bɩ b sãam roogã.

Biiblã bɛɛbã sã n da tõog t’a menem fasɩ, d ra pa na n bãng sẽn be Biiblã pʋgẽ wã ye.

SẼN YƖ TO-TO TƖ BIIBLÃ KETẼ: Yɩɩ Israyɛll soolmã pʋgẽ la a Antiokus Epifan kɩt t’a tʋm-tʋmdbã gilg n gẽes Biibl-dãmbã n sãame. La rẽ tɩ zʋɩf-rãmb n tɩ vɩ tẽn-zẽmse. Bãngdbã wilgame tɩ pipi kiris-nebã wakatẽ tɩ zʋɩf-rãmb koabg zugu, bãmb pis-yoob n da tɩ vɩ tẽn-zẽnga. Zʋɩf-rãmbã sẽn beẽ fãa, b ra bĩngda gʋls-sõamyã b karen-dotẽ wã. Yaa seb-kãens la kiris-nebã ne zʋɩf-rãmbã ra ket n karemdẽ.—Tʋʋ. 15:21.

Na maan yʋʋm 800 rũndã, neb sẽn nong Biiblã n kell n modg n lebg-a buud-goam a taab pʋgẽ, la b yiis-a, baa bɛɛbã sẽn bao n na n maan-b yellã. Yʋʋmd 1450 wã sẽnes tɩ Biiblã ra bee na maan buud-goam 33 pʋgẽ, baa sẽn da pa a tõrã. Rẽ tɩ b nan pa maan masĩn-bɛdã b sẽn tar n yiisd sɛbã ye. B sẽn maan masĩn-kãens tɛkã, Biiblã lebgr la a yiisgã paama pãng hal wʋsgo.

RŨNDÃ-RŨNDÃ: Baa tũudum la politik taoor dãmb sẽn bao n na n menes Biiblã fasɩ wã, hal ne rũndã, sebr kae b sẽn lebg la b yiis tɩ ta Biiblã ye. Tẽns kẽere, Biiblã goam sãnda kẽe nebã goam pʋgẽ, tɩ b laloa wã noy kẽer me tik Biiblã zugu. Neb milyõ-rãmb n tũud Biiblã goamã.

YELLÃ: Baa sẽn yɩ papiris la gãnd zug la b sɩng Biiblã gʋlsgo, tɩ ra tõe n kɩt t’a pa le beẽ wã, n paas b sẽn bao n na n menes-a fasɩ wã, a ket n beeme. Neb me n bao n na n toeem Biiblã goamã. Yɩɩ Biibl lɛbgdba, la neb sẽn da get-a n lebgd n gʋlsdẽ. B sẽn pa rat n toeem bãmb sẽn tẽed bũmb ninsã tɩ zems ne Biiblã sẽn yetã, b baoome n na n wẽn a goamã. Ad makr a wãna:

• Pʋʋsg zĩiga: Nand tɩ yʋʋmd 200 sẽn deng a Zeezi rogmã ta, Samari seb-gʋlsdb sẽn da get Biiblã pipi sɛb a nu wã b sẽn boond tɩ Pẽntatekã n lebsd n gʋlsdẽ wã paasa goam Yikr 20:17 wã pʋgẽ. Ad b sẽn paasã: “Gerizim tãngã zugu. Be la y segd n me tẽn-kugri.” B da ratame tɩ nebã tẽ tɩ bãmb sẽn me wẽnd-doog Gerizim tãngã zugã yaa bũmb sẽn zems ne Biiblã sẽn yetã.

• B sẽn yet tɩ Wẽnnaam yaa mens a taabã: Biiblã gʋlsg sẽn sa wã, pa maan yʋʋm 300 la rao a ye sẽn da tẽed tɩ Wẽnnaam yaa mens a tãab paas goam 1 Zã 5:7 wã pʋgẽ ye. A paasa woto: “Arzãn pʋga: Yaa ba wã, la gomdã, la Sɩɩg-sõngo. La bãmb b tãabã yaa yembre.” Gom-kãensã pa be Biibl-kʋdã pʋgẽ ye. Biibl-mit a Metzger yeelame tɩ yʋʋmd 500 wã tɛka, seb-gʋlsdbã sã n da rɩk Biiblã b sẽn lebg ne latẽ-kʋdgã, n paas Biibl ning b sẽn boond tɩ Vulgatã sẽn yaa ne latẽ wã n na n ges n lebg n gʋlse, b wʋsgã ra wae n paasda gom-kãensã.

• Wẽnnaam yʋʋrã: Biibl-lɛbgdb n yãk Wẽnnaam yʋ-peellã Biibl-dãmb nins b sẽn lebgã pʋgẽ, n yetẽ tɩ bãmb tika zʋɩf-rãmbã minung a ye zugu. B ledga yʋʋrã ne naam yʋy wa “Zu-soaba,” bɩ “Wẽnnaam” bala. La Biiblã pʋgẽ, pa Naandã bal la b boond ne yʋ-kãensã ye. B boola ninsaalba, wẽn-naandse, la baa a Sʋɩtãan mengã woto.—Zã 10:34, 35; 1 Korẽnt-rãmbã 8:5, 6; 2 Korẽnt-rãmbã 4:4, Wẽnnaam Sebre, 1983.a

SẼN YƖ TO-TO TƖ BIIBLÃ KETẼ: Pipi, baa ne sẽn ges-b Biibl-kʋdã n lebs n gʋlsã kẽer sẽn pa maag b yĩnga, tɩ sãnda me toeem goamã, wʋsgã ra tara minim sõma, n maag b yĩng n tʋm tʋʋmdã neere. Yʋʋmd 500 n tãag yʋʋmd 900 wã, seb-gʋlsdb nins b sẽn da boond tɩ Masorɛt-rãmbã gesa Biiblã babg ning b sẽn da gʋls ne ebre wã n lebs n gʋlse. Yaa seb-kãens la b sẽn boond tɩ tɛgs masoretikã. B ra maagda b yĩng n sõd gom-biisã, n ges b sã n pa yĩm bɩ n paas gom-bila. B sã n yã gomd Biibl-kʋdã pʋgẽ, n tagsdẽ tɩ sẽn gʋls-b rẽ wã tudgame, b gʋlsda sebrã kɩreng n wilgi. B pa saag n na n toeem bũmb ye. Bãngd a Goshen-Gottstein yeelame tɩ masorɛt-rãmbã ra getame tɩ bãmb sã n soog b meng n toeem bũmb Wẽnnaam Gomdã pʋgẽ, yaa yel-wẽn-kãseng meng-menga.

Yiib-n-soaba, Biibl-kʋd b sẽn da gʋls ne nugã wʋsg keta rũndã-rũndã, tɩ bãngdbã tõe n ges n bãng zĩis nins seb-gʋlsdbã sẽn tudgã. Wala makre, maana yʋʋm wʋsg tɩ tũudum a ye taoor dãmb da yetẽ tɩ yaa Biibl ning bãmb sẽn tar ne latẽ wã la Biibl sɩd-sɩdã. La 1 Zã 5:7 wã, b paasa goam nins d sẽn da zoe n togs zugẽ wã. Baa ãngilindã Biibl ning b sẽn boond tɩ La Bible du roi Jacques pʋgẽ, b paasa gom-kãense. La bãngdbã sẽn yã Biibl-kʋd kẽerã, bõe la b bãng-yã? A Metzger yeela woto: “Sã n pa latẽ wã Biibl-kʋdã pʋgẽ bala, goam nins b sẽn paas 1 Zã 5:7 pʋgẽ wã pa be Biibl-kʋd a taabã sẽn yaa ne siriyake, kopte, armeniyẽ, etiopiyẽ, araabe, la ɛslavon wã ye.” Woto kɩtame tɩ b yãk gom-kãens La Bible du roi Jacques b sẽn lebs n yiisã pʋgẽ, la Biibl-dãmb a taab pʋgẽ.

Biibl-kʋd a taab n be tɩ d tõe n tik rẽ n wilg tɩ Biiblã goam pa toeem bɩ? Yʋʋmd 1947 wã, b yãa Biiblã seb-pindim b sẽn boond tɩ mog-kɩɩngã seb-pindmã. B sẽn gʋls seb-pindim-kãens yɩɩda yʋʋm tusri. Bãngdbã ra tõeeme masã n mak sẽn be seb-kãens pʋgẽ wã ne tɛgs masoretikã. Rao a ye sẽn naag n maan vaeesg mog-kɩɩngã seb-pindmã pʋgẽ yeelame t’a yembr seka na wilg tɩ yʋʋmd 500 n tãag 1500 wã, zʋɩf-rãmb nins sẽn ges Biiblã goam n lebs n gʋlsã sɩd maaga b yĩng n tʋme.

Dublẽ sẽn be Irlãnd soolmẽ wã, sɛb bĩngr zĩig n be tɩ b boond tɩ Chester Beatty. Biiblã goam b sẽn lebs n gʋls papiris zug la b yã, n tɩ bĩng be. Yaa Biiblã babg ning b sẽn da gʋls ne gɛrkã fãa la bala. Na maan yʋʋm 100 b sẽn gʋls Biiblã bab-kãng n sa wã poor la b lebs n gʋls papiris-kãense. Sebr a ye yeelame tɩ papiris-kãensã sõngame tɩ b paam vẽenem n paas Biiblã sɛb zugu, la tɩ leb n wilgdame tɩ b sẽn ges Biiblã n lebs n gʋlsã pa toeem a goamã ye.

RŨNDÃ-RŨNDÃ: Baa ne Biiblã seb-kʋdã sẽn waooge, n leb n yaa kʋd wʋsgã, a goamã pa toeeme ye. Pʋd n sõngame tɩ d paam vẽenem n paas Biiblã zugu. A Frederic Kenyon yeelame tɩ bũmb toɛy-toɛy n be hal sẽn kaoose, n wilgdẽ tɩ Biiblã babg ning b sẽn da gʋls ne gɛrkã goamã pa toeem wʋsgo, la tɩ seb-kʋdr a to kae n yaa woto ye. A yeelame me tɩ bãngdbã sʋka, pʋ-peelem soab pa na n yeel tɩ rũndã-rũndã Biibl-dãmbã goamã toeema wʋsg ye. Bãngd a Green me goma Biiblã babg ning b sẽn da gʋls ne ebre wã yelle, n yeel tɩ d tõe n yeelame tɩ pĩnd wẽndẽ sebr kae b sẽn ges n lebs n gʋls naoor wʋsgo, tɩ tʋʋmdã yɩ sõma wa Biiblã nengẽ wã ye.

Hal ne rũndã, Biiblã ketame, tɩ sẽn dat-a fãa tõe n paam n karme. Y sã n tara Biible, bɩ y bas y yam tɩ goam nins sẽn be be wã yaa yembr ne sẽn be Biibl-kʋdã pʋgẽ wã. Seb-kãngã pʋgẽ, d yãame tɩ yɩɩ papiris la gãnd zug la b sɩng Biiblã gʋlsgo, tɩ rẽ ra tõe n kɩt t’a pa be rũndã-rũndã, la tɩ neb n bao n na n kɩt t’a menem fasɩ, tɩ kẽer me bao n na n toeem a goamã. La bõe n kɩt tɩ Biiblã ket hal ne rũndã? Bõe yĩng tɩ yaa sebr sẽn ka to?

Neb wʋsg sẽn karem Biiblã wa n baas n kɩsa sɩd wa tʋm-tʋmd a Poll tɩ yaa “Wẽnnaam n kɩt tɩ b gʋls gʋls-sõamyã fãa.” (2 Tɩmote 3:16) B kɩsa sɩd tɩ Biiblã sẽn ket hal ne rũndã wã, yaa sẽn mik tɩ yaa Biiblã bal n yaa Wẽnnaam gomde, tɩ Wẽnnaam kogend-a wã yĩnga. A Faizal, rao ning yell d sẽn gom pipi sõsgã pʋgẽ wã wa n yãka yam n na n zãms Biiblã n bãng a zakã rãmb sẽn yetã sã n yaa sɩda. A sẽn bãng bũmb ninsã ling-a-la wʋsgo. A sẽn sɩng zãmsgã, pa yã n kaoos la a bãng tɩ bũmb wʋsg b sẽn zãmsd nebã egiliiz-rãmbẽ wã pa be Biiblã pʋgẽ ye. A sẽn bãng me tɩ Biiblã wilgdame tɩ Wẽnnaam ratame tɩ tẽngã wa yɩ arzãnã, yɩ-a-la noogo.

A yeelame: “Masã, m kɩsa sɩd tɩ Biiblã m sẽn tarã yaa Wẽnnaam n kõ ninsaalbã. Wẽnnaam sẽn tõog n naan yĩngr la tẽngã, a na kong pãng sẽn na n kogl sebr ning a sẽn kõ tõndã sɩda? Ned sã n yeel tɩ Wẽnnaam pa tõe rẽ, yaa wa a sẽn yet tɩ Wẽnnaam tõogã tara koaka. Maam la ãnd n na n yeel tɩ bũmb n be Wẽnnaam sẽn pa tõe?”—Ezayi 40:8.