1 Bõe yĩng tɩ d pʋʋsdẽ?

PƲƲSGÃ: Biiblã sẽn gomd bũmb nins yellã sʋka, nebã sẽn dat n bãng n yɩɩd yaa pʋʋsgã. D na n goma sogsg a yopoe nebã sẽn nong n sokd b mens pʋʋsgã wɛɛngẽ yelle, la d bao n bãng Biiblã sẽn leokd-b to-to. Sõs-kãensã na n sõng-y-la pʋʋsgã wɛɛngẽ. B na n kɩtame tɩ y tʋlg n sɩng pʋʋsgo, wall sõng-y tɩ y paas y pʋʋsgã sõmblem.

DŨNIYÃ gill zugu, neb buud toor-toor la tũudum toɛy-toɛyã neb pʋʋsdame. B pʋʋsda b yen-yen wall b naagd taab n pʋʋsdẽ. B pʋʋsda zĩis toɛy-toɛya. Wala makre, egiliiz rãmbẽ, sɩnagoog rãmbẽ, misa pʋsẽ la zĩis a taaba. Kẽer tɩʋta pĩy la teed a taab n pʋʋsdẽ, sãnda pʋʋsda ne sapele rãmba, pʋʋsg sɛba, bõn-naands wall imaaz rãmba, pa rẽ bɩ ne yɛl a taaba.

Pʋʋsgã kɩtame tɩ ninsaalbã yaa toor fasɩ ne bõn-vɩɩs a taabã fãa sẽn be tẽngã zugã. Yaa sɩd tɩ yɛl wʋsg wɛɛngẽ, ãdem-biisã ne rũmsã wõnda taaba. Wala makre, rɩɩbo, pemsem la koom yaa tɩlae ne b fãa. Wala rũmsã, ninsaal me rogdame, n vɩɩmde, la a wa ki. (Koɛɛg Soaba 3:19) La yaa ninsaal bal n pʋʋsde. Bõe yĩnga?

D tõe n leokame bal tɩ yaa tʋlsem kãng sẽn be ne-dã yĩnga. Nebã fãa la bal geta pʋʋsgã wa bũmb sẽn sõngd ninsaal t’a tõog n gom ne Wẽnnaam, bɩ ne bũmb sẽn yaa sõng la sẽn be wakat fãa. Sɩd me, Biiblã wilgame tɩ Wẽnnaam naana tõnd n ning “wakat sẽn ka sɛt tagsg” d sũyã pʋsẽ. (Koɛɛg Soaba 3:11) Daar a yembre, a Zezi Kirist yeelame tɩ “sũ-noog rãmb la neb nins sẽn mi tɩ b segd n baoa Wẽnnaamã.”—Matɩe 5:3, NW.

Sɩd yaa ãdem-biisã sẽn “mi tɩ b segd n baoa Wẽnnaamã” yĩng n kɩt tɩ b met tũudum dot la b maand pʋʋsg teed toɛy-toɛy la teed a taab tũudmã yʋʋr yĩnga, la b nong pʋʋsgã. Kẽer baooda Wẽnnaamã b toore, tɩ sãnda teeg neb a taab n dat sõngre. La rẽ yĩnga y pa tagsd tɩ ninsaal tõog sẽn paood wʋsgã yĩnga, a pa tõe n sõng a to sõma sɩda? Tõnd yaa pãn-komsem dãmba, d yõor pa wogme, la d leb n pa mi yɛlã fãa ye. Dẽnd yaa ned sẽn tar pãng la yam sẽn yɩɩd tõnd dẽndã hal zĩig sẽn zãre, t’a yõor woglem me yɩɩd tõnd bal n tõe n sõng-d tɩ d paam sẽn yaa tɩlae ne-dã. La yaa bõe sẽn yaa tɩlae ne ninsaal n kɩt t’a pʋʋsdẽ wã?

Rẽ yĩnga sasa n zoe n zĩnd tɩ y tʋlg n paam sor-wilgri, yam, pa rẽ bɩ y tʋlg n paam sogsg kẽer leoore, sẽn wõnd ninsaal pa tõe n leok n kõ-y bɩ? Rẽ yĩnga sasa n zoe n zĩnd tɩ y ned maan kaalem tɩ y rat belsg bɩ? Sasa n zĩnd tɩ y tʋlg sor-wilgr yell pʋgẽ, y sẽn da pa mi y sẽn maandg yĩng bɩ? Y zoe n maana yel-wẽnd me n wa ningd y meng taale, tɩ kɩt tɩ y rat tɩ Wẽnnaam sugr bɩ?

Biiblã pʋgẽ, b wilgdame tɩ d tõe n pʋʋsa Wẽnnaam bʋʋm kãensã fãa yĩnga. Pʋʋsgã wɛɛngẽ, yaa Biiblã bal n tõe n sõng tõnd sõma n yɩɩda. Sẽn paase, Biiblã pʋgẽ, d yãta pagb la rap sẽn yɩ wẽn-sakdb pʋʋsgo. B pʋʋsa Wẽnnaam n kos belsgo, sor-wilgri, b yel-wẽn sugri, la b kos tɩ b leok b sogsg sẽn da yaa toog wʋsg ne-ba.—Yɩɩl Sõamyã 23:3; 71:21; Daniɛll 9:4, 5, 19; Habakuk 1:3.

Baa pʋʋs-kãens sẽn yɩ toor-toorã, bũmb n kɩt tɩ b wõnd taaba. Nin-kãensã fãa ra mii bũmb rũndã-rũndã neb wʋsg sẽn pa wae n miẽ wall b sẽn pa nande, tɩ yaool n yaa bõn-kãng bal n kɩtd tɩ ned pʋʋsg reege. Rat n yeel tɩ b fãa ra mii a soab ning b sẽn segd n pʋʋsã.

2 Ãnda la d segd n pʋʋse?

RẼ YĨNGA baa nebã sẽn pʋʋsd a soab fãa, pʋʋsg toor-toorã rebda zĩ-yend bɩ? Rũndã-rũndã, wʋsg tagsda woto. Neb nins sẽn dat tɩ tũudum toɛy-toɛyã neb naagd taab n maand yɛl kẽere, la b yetẽ tɩ baa tũudmã sẽn yaa toor-toorã, b fãa yaa sõma wã sɩd tagsda woto. La rẽ yĩnga tõeeme tɩ sẽn tagsd-b woto wã tudgame bɩ?

Biiblã wilgdame tɩ pʋʋsgã wʋsg nebã sẽn pʋʋsd pa rebd Wẽnnaam nengẽ ye. Sɩd me, pĩnd wẽndẽ, neb wʋsg ra wae n pʋʋsda bõn-naandse. La Wẽnnaam da keooga a nin-buiidã naoor wʋsg tɩ b ra pʋʋs bõn-naandg ye. Wala makre, Yɩɩl Sõamyã 115:4-6 goma bõn-naandsã yell n yeel woto: “Bãmb tara tʋba, la b ka wʋmd ye.” Gomdã yaa vẽenega. Bõe yĩng tɩ y na n pʋʋs wẽnnaam sẽn pa tol n tõe n wʋm y goama?

Biiblã kibar a ye n wilgd rẽ maaneg sẽn sɩd ka yõodã võor vẽenega. A gomda Wẽnnaam no-rɛɛs a Eli yelle. Daar a yembre, a Eli yeela wẽnnaam a Baal no-rɛɛsdbã tɩ b pʋʋs b wẽnnaamã tɩ yẽ me pʋʋs a Wẽnnaamã, tɩ b ges bʋg n na n leoke, la tɩ sẽn na n leok-a wã soab la Wẽnnaam sɩd-sɩda. A Baal no-rɛɛsdbã sakame, n pʋʋs baraar ne b pãng fãa hal n wa kelemdẽ menga, la b wẽnnaamã pa tol n maan rãamd ye! Kibarã wilgame tɩ b kell n “ka wʋm koɛɛg tɩ b gomd leokr ye.” (1 Rĩm dãmba 18:29) La a Eli sẽn pʋʋsã, bõe n maane?

A Eli sẽn pʋʋsã, a Wẽnnaamã leok-a-la zĩig pʋgẽ, n kɩt tɩ bugum yi saasẽ n wa rɩ maoongã a sẽn kʋ wã. Bõe yĩng t’a pʋʋsgã reege, t’a Baal no-rɛɛsdbã pʋʋsg pa reege? 1 Rĩm dãmb 18:36, 37 wã wilgda bũmb a ye sẽn kɩt t’a Eli pʋʋsgã reege. Yaa sɩd t’a pʋʋsgã yɩɩ koɛɛga. Zemsa hebre wã gom-biis 30 bala. La baa a sẽn pa gom wʋsgã, a pʋda Wẽnnaam yʋ-peellã sẽn yaa a Zeova wã hal naoor a tãabo.

A Baal ra yaa Kanaã nebã wẽnnaam t’a yʋʋrã võor yaa “Soaada,” bɩ “Zusoaba.” B soolmẽ wã, tẽng fãa yaool n da tara a Baale. La ãndũniyã fãa pʋgẽ, Zeova wã yẽ yaa yʋ-yɛng bala. B sã n wa pʋd yʋ-kãngã, yaa a soabã yell bal la b gomda. Wẽnnaam kãngã yeela a nin-buiidã woto: “Mam yaa [a Zeova, NW ], yaa mam yʋʋr la woto. Mam pa na n dɩk m waoogrã n kõ ned a to ye.”—Ezai 42:8.

Rẽ yĩnga d tõe n yeelame t’a Eli pʋʋsgã ne a Baal no-rɛɛsdbã pʋʋsgã kẽnga zĩ-yend sɩda? Yoob la nin-kʋʋr fãa naaga yɛl nins nebã sẽn da maand n waoogd a Baalã sʋka. La a Zeova sẽn da kɩtd tɩ Israɛll nebã maand bũmb nins n waoogd-a wã yẽ ra yaa sõma zãnga, n zẽkd b zug la wilgd-b tɩ b segd n zãaga b mens ne tʋʋm-wẽns buud fãa. Woto yĩnga, bɩ y tags yãmb me pʋʋsgã yelle. Y sã n dat n tool koɛɛg y zoa y sẽn waoogd wʋsgo, b sã n dɩk-a n tɩ kɩs ned a to sẽn pa tar yʋ-noog wa y zoa wã, y sũur na n yɩɩ noog sɩda? Yaa vẽeneg tɩ ayo!

Bãng-y tɩ y sã n pʋʋsd a Zeova, yaa Naandã sẽn yaa ãdem-biisã Ba wã la y pʋʋsda.a No-rɛɛs a Ezai ra pʋʋsa a Zeova n yeel-a woto: “[Zeova, NW ], yãmb yaa tõnd ba.” (Ezai 63:16) Yaa yẽ la Wẽnnaam ning yell a Zezi sẽn da gomd ne a karen-biisã, a sẽn wa yeel-b t’a ‘rabda a Ba sẽn yaa bãmb me Ba wã nengẽ, la a Wẽnnaam sẽn yaa bãmb me Wẽnnaamã nengẽ’ wã. (Zã 20:17) A Zeova yaa a Zezi Ba. Yaa yẽ la Wẽnnaam ning a Zezi sẽn da pʋʋsdã. Leb n yaa yẽ la Wẽnnaam ning a Zezi sẽn yeel a karen-biisã tɩ b pʋʋsã.—Matɩe 6:9.

Rẽ yĩnga Biiblã wilgdame tɩ d tõe n pʋʋsa a Zezi, a Maari, nin-sõmã wã wall malɛgsã bɩ? Abada! A wilgdame tɩ yaa a Zeova a ye bal la d segd n pʋʋse. Ad bʋʋm a yiib sẽn kɩt tɩ yaa woto. Pipi, pʋʋsgã naaga bũmb nins d sẽn maand n waoogd Wẽnnaamã pʋgẽ. Biiblã yaool n yeelame tɩ yaa a Zeova a ye bal la d segd n waooge. (Yikri 20:5) Yiib-n-soaba, Biiblã wilgdame tɩ yaa Wẽnnaam n ‘wʋmd pʋʋsgã.’ (Yɩɩl Sõamyã 65:3) Baa a Zeova sẽn kõ malɛgs la ninsaalb tʋʋm wʋsgã, a zɩ n dɩk pʋʋsgã kelgrã n bobl malɛk wall ninsaal ye. A yeelame tɩ yaa yẽ a toor n kelgd tõnd pʋʋsgã.

Woto yĩnga, y sã n dat tɩ Wẽnnaam kelg y pʋʋsgã, segdame tɩ y tẽeg Biiblã saglg ning sẽn pʋgdã. A yeta woto: “Ned ninga fãa sẽn pʋʋsd ne [a Zeova, NW ] yʋʋr na n paama fãagre.” (Tʋʋma 2:21) La rẽ yĩnga a Zeova kelgda pʋʋsg buud fãa bɩ, bɩ d sã n dat t’a kelg-do, bũmb n be d sẽn segd n bãnge?

[Tẽngr note]

[Foto, seb-neng a 5]

A Eli ne a Baal no-rɛɛsdbã kibarã wilgdame tɩ pʋʋsgã fãa pa rebd zĩ-yend ye

3 Wãn to la d segd n pʋʋse?

TŨUDUM wʋsg taoor dãmb tagsdame tɩ ned sẽn segd n zã a meng to-to a sẽn wat n pʋʋsdẽ wã tara yõod wʋsgo. Wala makre, b wilgda b nebã b sẽn segd n yals bɩ n zĩnd to-to, goam nins b sẽn segd n pʋde, la yel-maandɩ a taab me. La Biiblã wilgd-d lame tɩ rẽ fãa pa tar yõod ye. Sẽn pakã yaa pʋʋsgã menga. La wãn to la d segd n pʋʋse?

Biiblã tara kibay sẽn wilgd Wẽnnaam neb sẽn da pʋʋs-a zĩis toɛy-toɛya, la ne manesem toor-toore. Yɛlã sẽn da yaa to-to wã kɩtame tɩ kẽer pʋʋs b sũurẽ, tɩ sãnda zẽk b koees n pʋʋse. Kẽer me naka b nens yĩngr n pʋʋse, pa rẽ bɩ b yĩgimdi. La b baa a ye pa rɩgl imaaz a taoor wall a tall sapele bɩ teed a taab n pʋʋse, pa rẽ bɩ b ges pʋʋsg sɛb pʋsẽ ye. B pʋʋsgã yɩɩ goam sẽn yi b sũurẽ. Yɩɩ b toorẽ goama. Bõe n kɩt tɩ Wẽnnaam kelg-ba?

Wa d sẽn yã sõsg ning sẽn loogã pʋgẽ wã, yaa Wẽnnaam a Zeova a yembr bal la b pʋʋs-yã. La ad bũmb a to me sẽn tar yõod wʋsgo. Pipi Zã 5:14 soabã yeta woto: ‘Tõnd tara tẽeb kãng ne bãmba, tɩ tõnd sã n kos bũmb sẽn zems bãmb daabo, b kelgda tõndo.’ D segd n pʋʋsame tɩ zems ne Wẽnnaam daabã. Woto rat n yeelame tɩ bõe?

Sẽn na yɩl n pʋʋs tɩ zems ne Wẽnnaam daabã, rẽndame tɩ d reng n bãng Wẽnnaam daabã sẽn yaa a soaba. Rẽnd yaa tɩlae tɩ d zãms Biiblã, n yaool n wa tõogd n pʋʋsdẽ tɩ zemsdẽ. La rẽ yĩnga woto rat n yeelame tɩ d sã n pa reng n zãms Biiblã hali n wa lebg biibl-mita, Wẽnnaam pa reegd d pʋʋsg bɩ? Abada! Baasgo, Wẽnnaam datame tɩ d bao n bãng a raabã, n modgd n wʋmd a võore, la d tũudẽ. (Matɩe 7:21-23) D segd n pʋʋsdame tɩ zemsd ne bũmb nins d sẽn zãms Biiblã n bãngã.

D sã n bãngd a Zeova la d bãngd a raabã n paasdẽ, d tẽebã pãng me na n paasdame. Tẽebã me tara yõod wʋsg pʋʋsgã wɛɛngẽ. A Zezi ra yeela woto: ‘Bũmb ninga fãa yãmb sẽn na n kos ne tẽeb pʋʋsg pʋgẽ, yãmb na n deegame.’ (Matɩe 21:22) La pa rat n yeel tɩ d tẽ zond yaar ye. Rat n yeelame tɩ d kɩs sɩd ne bũmb d sẽn pa ne, tɩ kaset yaool n be n wilgdẽ tɩ bũmb ning d sẽn tẽedã sɩd beeme. (Hebre dãmba 11:1) Biiblã pida ne kaset toor-toor sẽn wilgd tɩ baa d sẽn pa tõe n yã a Zeova wã, a beeme, d tõe n teeg-a lame, la t’a kelgda neb nins sẽn tẽed-a wã pʋʋsg ne yamleoogo. Sẽn paase, d tõe n kos-a lame meng t’a paas-d tẽebo, la a sakd n kõt-d-la bũmb ning fãa sẽn yaa tɩlae ne-dã.—Luk 17:5; Zak 1:17.

Ad bũmb a to me sẽn tar yõod wʋsg pʋʋsgã wɛɛngẽ. A Zezi ra yeela woto: “Ned ka tõe n ta m Ba nengẽ, a sã n ka mam maasem yĩng ye.” (Zã 14:6) Woto wilgdame tɩ yaa ne a Zezi maasem bal la d tõe n pʋʋs a Zeova. Rẽ n so t’a Zezi yeel a karen-biisã tɩ b kos ne yẽ yʋʋre. (Zã 14:13; 15:16) Woto pa rat n yeel tɩ d segd n pʋʋsa a Zezi ye. D pʋʋsda Wẽnnaam n kotẽ t’a reeg pʋʋsgã a Zezi maasem yĩnga, bala yaa yẽ n kɩt tɩ d tõe n pʋʋs a Ba wã sẽn zems zãnga, la sẽn yaa d Ba-sõngã.

A Zezi tʋm-tʋmdbã ra kos-a-la woto: “Zusoaba, bɩ y zãms tõnd pʋʋsgo.” (Luk 11:1) Yaa vẽeneg tɩ b pa ra kot t’a wilg-b bũmb nins yell d sẽn gom tɩ loogã. B sẽn da rat n bãngã yaa bũmb ning b sẽn tõe n kos b pʋʋsg pʋgẽ wã.

[Foto, seb-neng a 6]

D sã n dat tɩ Wẽnnaam kelg d pʋʋsgo, segdame tɩ d pʋʋsgã zems ne a raabã, tɩ d pʋʋs ne tẽebo, la d kos a Zezi maasem yĩnga

4 Pʋʋsgã pʋgẽ bõe la d tõe n kose?

ZĨIG zãng la bala, nebã mii pʋʋsg ning a Zezi sẽn wilg a karen-biisã, n boond-a tɩ “tõnd Ba sẽn be saasẽ” pʋʋsgã. La baasgo, neb wʋsg pa wʋmd pʋʋs-kãngã võor ye. Neb milyõ rãmb mii a goamã ne zugu, n pʋʋsd-a daar fãa, n tõe n pʋʋs-a naoor wʋsg daar a ye pʋgẽ menga. La a Zezi ra pa rat n yeel tɩ b segd n dɩka a pʋʋsgã n pʋʋsd n yɩlemdẽ ye. Bõe n kɩt tɩ d tõe n yeel woto?

Nand t’a Zezi wilg pʋʋs-kãngã, a yeela woto: “Yãmb sã n pʋʋsdẽ, bɩ y ra tar bõn-yɛng togsg n yɩlemdẽ ye.” (Matɩe 6:7, NW ) Rẽ yĩnga, woto wã, a Zezi wẽneg n kɩɩsa a gomdã n wilg a karen-biisã pʋʋsg b sẽn segd n dɩk ne zug n pʋʋsd n yɩlemdẽ bɩ? Yaa vẽeneg tɩ ayo! Yaa bũmb nins d sẽn tõe n pʋʋs n kose, la bũmb nins sẽn tar yõod n yɩɩd tɩ d segd n gom dẽ me yell d pʋʋsg pʋgẽ wã la a Zezi sẽn wilgã. D maag d yĩng n fees a sẽn yeel pʋʋs-kãng pʋgẽ wã. A bee Matɩe 6:9-13.

‘Tõnd Ba sẽn be saasẽ, tɩ yãmb yʋʋr yɩ ne waoogre.’

A Zezi sẽn yeel woto wã, a tẽega a karen-biisã tɩ yaa a Zeova sẽn yaa a Ba wã bal la b segd n pʋʋse. La rẽ yĩnga y mii bũmb ning sẽn kɩt tɩ Wẽnnaam yʋʋrã tar yõod woto, la bũmb ning sẽn kɩt t’a segd n yɩ ne waoogre, rat n yeel t’a paam sõmsgã bɩ?

D yaab a Ãdem ne a Hawa naanegã poore, b rõda Wẽnnaam n sãam a yʋʋrã sẽn yaa sõngã. Wẽnnaam a Zeova bɛ a Sʋɩtãan kãn-a lame t’a yagda ziri, t’a pa rɩt a naamã ãdem-biisã neer yĩnga, la t’a pa segd n yɩ yĩngr la tẽng naab ye. (Sɩngre 3:1-6) Neb wʋsg kẽe a Sʋɩtãana, n yet nebã tɩ Wẽnnaam pa nong ãdem-biisã, t’a yaa wẽnem soab sẽn dat bal n nams ninsaalbã, tɩ sãnda tolg n kɩɩsdẽ tɩ Naand kae ye. Neb kẽer kisa a yʋʋrã sẽn yaa a Zeova wã menga, n pʋd n yãk-a Biibl dãmb nins b sẽn yiisdã pʋgẽ, la b gɩdgd nebã tɩ b ra pʋd yʋʋrã ye.

Biiblã wilgdame tɩ Wẽnnaam na n wa remsa yel-kãensã fãa. (Ezekɩɛll 39:7) A sã n wa maan dẽ, yãmb me na n paama y mens ne yɛl nins sẽn namsd-y-yã. Wãn to la a na n maan dẽ? A Zezi pʋʋsgã goam nins sẽn pʋglã leokda sok-kãngã.

“Tɩ yãmb soolem wa.”

Rũndã-rũndã, tũudmã taoor dãmb sẽn zãmsd nebã bũmb nins Wẽnnaam soolmã bɩ a Rĩungã zugã kɩɩsda taaba. La wa a Zezi kɛlgdbã sẽn da mi wã, Wẽnnaam no-rɛɛsdbã ra pĩnd n togsame tɩ Mesi wã sẽn yaa fãagdã ra na n wa yɩɩ rĩma. A na n yɩɩ Rĩung ning sẽn na n toeem-a dũniyã Rĩma. (Ezai 9:5, 6; Daniɛll 2:44) A na n puka a Sʋɩtãan bãongo, la a menes-a ne a tʋʋmã fãa n kɩt tɩ Wẽnnaam yʋʋrã paam waoogre. Wẽnnaam Rĩungã na n kɩtame tɩ zabã, bãasã, komã, la baa kũumã meng sa. (Yɩɩl Sõamyã 46:10; 72:12-16; Ezai 25:8; 33:24) Yãmb sã n pʋʋsd n kotẽ tɩ Wẽnnaam soolmã bɩ a Rĩungã wa, yaa wala y sẽn kot bal t’a pʋlem-kãensã fãa pidsi.

‘Tɩ yãmb daab maan dũniyã zug wa sẽn maand saasẽ wã.’

A Zezi gom-kãensã wilgdame tɩ Wẽnnaam daabã na n sɩd wa maana dũniyã zug wa sẽn maand saasẽ wã, zĩig ning Wẽnnaam mengã sẽn beẽ wã. B pa tõog n gɩdg Wẽnnaam daabã t’a pa maan saasẽ ye. Be, Wẽnnaam Biigã zaba ne a Sʋɩtãan ne a poorẽ dãmbã, n dig-b tɩ b sig dũniyã zugu. (Wilgri 12:9-12) A Zezi pʋʋsgã kos-kãensã b tãabã fãa sõngd-d lame tɩ d bãng bũmb nins sẽn tar yõod n yɩɩdã. Yaa Wẽnnaam daabã, pa tõnd raabã ye. Yaa Wẽnnaam daabã n nafd a bõn-naandsã wakat fãa n yɩɩda. Rẽ n so t’a Zezi Kirist sẽn yɩ ned sẽn zems zãngã ra yeel a Ba wã woto: “Bɩ y maan yãmb daabo, ka mam dẽnd ye.”—Luk 22:42.

“Bɩ y kõ tõnd dɩɩb rũndã.”

Rẽ poore, a Zezi wilgame tɩ d tõe n pʋʋsa yɛl nins sẽn pak tõndã yĩng me. D sã n pʋʋs Wẽnnaam n kos bũmb sẽn yaa tɩlae ne-d daarã pʋgẽ, pa wẽng ye. Sɩd me, woto maaneg tẽegd-d lame tɩ yaa a Zeova n “kõt [ãdem-biisã] fãa vɩɩm, la vʋʋsem, la bũmb fãa.” (Tʋʋma 17:25) Biiblã wilgdame t’a Zeova yaa wa Ba sẽn nong a kamba, n kõt-b bũmb nins sẽn yaa tɩlae ne-bã ne sũ-noogo. La wa roagd sẽn nong a kamba, a pa na n kõ-b bũmb b sẽn dat t’a miẽ tɩ pa na n naf-b ye.

“Kõ-y tõnd d yel-wẽnã sugri.”

Yaa tɩlae tɩ y paam Wẽnnaam sugr bɩ? Rũndã-rũndã, neb wʋsg pa le mi yel-wẽnd sẽn yaa a soaba, la a wẽnemã sẽn ta zĩig ning me ye. La Biiblã wilgdame tɩ yaa yel-wẽnd n wa ne tõnd zu-loeesã, bala, yel-wẽn-kãng n kɩt tɩ ãdem-biisã kiidẽ wã. Tõnd fãa sẽn dog ne yel-wẽnã yĩnga, d mi n kongdame, tɩ sã n pa Wẽnnaam n kõ-d sugri, d pa tõe n wa paam vɩɩm sẽn pa satã ye. (Rom dãmba 3:23; 5:12; 6:23) Ad d sẽn mi Biiblã sẽn yet bũmb ningã, kengda raoodo! A yeta woto: “[Zeova], yãmb yaa sõngo, la y kõta sugri.”—Yɩɩl Sõamyã 86:5.

“Fãag tõnd wẽng soabã nugẽ.”

Rẽ yĩnga yãmb miime tɩ yaa tɩlae tɩ y paam Wẽnnaam koglg bɩ? Neb wʋsg pa rat n sak n deeg t’a Sʋɩtãan sẽn yaa “wẽng soabã” sɩd beeme ye. La a Zezi wilgame t’a Sʋɩtãan sɩd beeme, n yeel t’a yaa “dũniyã naaba.” (Zã 12:31; 16:11) A Sʋɩtãan sãama dũni kãngã a sẽn so wã nebã tagsgo, la a rata ne a sũur fãa n sãam yãmb tagsgã, sẽn na yɩl tɩ y ra tõog n bao n lebg y saasẽ Ba a Zeova zoa ye. (1 Pɩɛɛr 5:8) La a Zeova pãng yɩɩda a Sʋɩtãan hal zĩig sẽn zãre. A tʋll n kogla neb nins sẽn nong yẽ wã.

D sẽn vaees pʋʋsg ning a Zezi sẽn zãms a karen-biisã goam kẽerã, pa bũmb nins d sẽn tõe n kos d pʋʋsg pʋgẽ wã tɛk la rẽ ye. Tẽeg-y tɩ 1 Zã 5:14 goamã wilgdame tɩ bũmb ning fãa tõnd sẽn kos Wẽnnaam tɩ zems ne a raabo, a kelgda tõndo. Woto yĩnga, ra tags-y tɩ y zu-loɛɛg paoodame, n pa sek y na pʋʋs Wẽnnaam n kos a sõngr ye.—1 Pɩɛɛr 5:7.

La yaa wãn yẽ ne wakat ning la zĩig ning d sẽn pʋʋsdã? Rẽ yĩnga sẽn yaa wakat ning la zĩig ning la d pʋʋsdã tara yõod bɩ?

Pʋʋsgã:

5 Tara zĩig la wakat takɩ bɩ?

YAA vẽeneg tɩ y neeme tɩ tũudum wʋsg neb meta ro-bɛd pʋʋsgã yĩnga, la b wilgd b nebã wakat nins takɩ b sẽn segd n pʋʋsdẽ. La rẽ yĩnga Biiblã wilgda zĩis la sasa takɩ d sẽn segd n pʋʋs bɩ?

Biiblã wilgdame tɩ wakat kẽer n be n sɩd zems ne pʋʋsgo. Wala makre, daar a ye, nand t’a Zezi ne a karen-biisã rɩ la b yũ, a pʋʋsa Wẽnnaam bark rɩɩbã yĩnga. (Luk 22:17) A Zezi ne a karen-biisã sã n da wa tigim taaba, b pʋʋsdame me. Rẽnd b ra maanda wa zʋɩf rãmbã sẽn da minim n maand b karen-dotã pʋsẽ la Zerizalɛm wẽnd-doogẽ wã. Wẽnnaam pʋd n da yeelame tɩ b me a roogã tɩ yɩ “pʋʋsg roog buud fãa yĩnga.”—Mark 11:17.

Wẽnnaam nin-buiidã sã n tigim taab n pʋʋs-a, a mi n deegda b kosgã. B sã n naaga taab yam a yembr n pʋʋs Wẽnnaam, tɩ b pʋʋsgã me zems ne a Gomdã noyã, noom-a lame. Pʋʋsg pʋd n tõe n kɩtame tɩ Wẽnnaam maan bũmb a sẽn da pa sɩf n na n maane. (Hebre dãmba 13:18, 19) A Zeova Kaset rãmbã tigsg fãa sasa, b pʋʋsdame. Y sã n kẽng a Zeova Kaset rãmbã Rĩung Roog ning sẽn pẽ ne yãmbã, y na n wʋma pʋʋs-kãensã.

La Biiblã pa wilg sasa la zĩig takɩ d sẽn segd n pʋʋs ye. Biiblã tara kibay sẽn wilgd neb sẽn pʋʋs Wẽnnaam sasa toor-toore, la zĩis toɛy-toɛya. A Zezi ra yeela woto: “Fo sã n pʋʋsdẽ, kẽ f roogẽ n pag kʋɩlengã n pʋʋs fo Ba sẽn be zĩig sẽn solge. La fo Ba sẽn yã tɩ fo soosame n pʋʋsã, bãmb na keo foom.”—Matɩe 6:6.

Rẽ yĩnga gom-kãensã pa kengd y raood sɩda? Y sɩd tõe n pʋʋsa yĩngr la tẽng naabã y yembr la wakat ning fãa y sẽn date, la y tõe n kɩsa sɩd me t’a kelgd-y lame. Dẽnd pa lingr la a Zezi sẽn da mi n bao zĩig n tɩ pʋʋs a yembrã ye. Daar a ye, a pʋʋsa yʋng tõre, tɩ yaa vẽeneg t’a ra rata Wẽnnaam sor-wilgri, sẽn na n yɩl n bãng n maan bũmb yõod sẽn tagme.—Luk 6:12, 13.

Biiblã tara kibay sẽn wilgd rap la pagb me sẽn pʋʋs Wẽnnaam b sẽn da wa n dat n yãk yam n maan bũmb sẽn tar yõod wʋsgo, wall b sẽn da wa n maood ne zu-loe-kɛgemse. Sasa kẽere, b zẽka b koees n pʋʋse, la wakat ning me, b pʋʋsa b sũurẽ bala. Sãnda naaga b taab n pʋʋse, la kẽer pʋʋsa b yembre. Bũmb ning sẽn da tar yõodã yaa b pʋʋsgã. Wẽnnaam pʋd n yeta a nin-buiidã tɩ b ra “viig ne pʋʋsg ye.” (1 Tesalonik rãmbã 5:17, Sebr Sõngo) A sakd n kelgda neb nins sẽn maand a raabã pʋʋsg wakat fãa. Woto pa wilgd tɩ Wẽnnaam nonga tõnd sɩda?

Rũndã-rũndã, neb wʋsg sẽn tẽed tɩ Wẽnnaam toor kae ne ninsaalbã yĩnga, b sãmbdame tɩ pʋʋsg ka yõod ye. La tõe tɩ yãmb me sokda y meng pʋʋsgã sã n sɩd tõe n naf-y lame.

[Foto, seb-neng a 9]

D tõe n pʋʋsa sasa buud fãa la zĩig fãa

Pʋʋsgã:

6 Tõe n naf-d lame bɩ?

RẼ YĨNGA pʋʋsg tõe n naf-d lame bɩ? Biiblã wilgdame tɩ neb nins sẽn tũud Wẽnnaam ne b sũur fãa wã pʋʋsg nafd-b lame. (Luk 22:40; Zak 5:13) Sɩd me, pʋʋsgã tõe n sõng-d lame tɩ d bãng Wẽnnaam la d paam a zoodo, la tõe n naf-d-la yɛl a taab wɛɛngẽ me. Wãn to?

D rɩk makr wa biig sẽn na n paam kũuni. Yãmb na n wilg-a lame t’a segd n nooga a sũur kũunã yĩng bɩ, bɩ y na n wilg-a lame t’a segd n pʋʋsa barka? D sã n togs ned bũmb sẽn be d sũurẽ, kɩtdame tɩ d maneg n tags bõn-kãng yelle, la paasda a pãng me. La rẽ yĩnga yaa woto me, d sã n togs Wẽnnaam bũmb sẽn be d sũurẽ wã bɩ? N-ye! Ad makr kẽer sẽn wilgd rẽ.

Bark pʋʋsgo. D sã n pʋʋsd d Ba wã bark neer ning fãa a sẽn maand tõndã yĩnga, kɩtdame tɩ d tagsd bark toor-toorã d sẽn paamdã yelle. Rẽ na n kɩtame tɩ d maneg n wilg-a d mi-beoogo, na n paasa d sũ-noogã, la kɩt me tɩ d maneg n kɩs-a sɩda.—Filip rãmba 4:6.

Ad makre: A Zezi ra pʋʋsa a Ba wã bark a sẽn da kelgd a pʋʋsgã la a leokd-a wã yĩnga.—Zã 11:41.

Yel-wẽnd sugr kosgo. D sã n pʋʋs Wẽnnaam n kos d yel-wẽnd sugri, kɩtdame tɩ d tʋll n da tol n le maan a buudu, la kɩt me tɩ d sũurã maneg n sãam ne d sẽn maanã. Leb n kɩtdame tɩ d bãng tɩ yel-wẽnd sɩd pa sõma ye. Sẽn paase, d na n paama sũur pʋgẽ bãane, n pa le ning d meng taal ye.

Ad makre: A Davɩɩd da pʋʋsa Wẽnnaam n wilg t’a sũur sãama yel-wẽnd a sẽn maan yĩnga.—Yɩɩl Sõamyã 51.

Sor-wilgri, la yam kosgo. D sã n pʋʋsd a Zeova n kot-a sor-wilgr wall yam sẽn na yɩl n bãng n yãk yam n maan bũmb tɩ zemse, tõe n kɩtame tɩ d yɩ sik-m-meng soaba. Bala na n kɩtame tɩ d tẽeg tɩ pa bũmba fãa la d tõe n maane, la kɩt me tɩ d maneg n teeg d saasẽ Ba wã.—Yelbũna 3:5, 6.

Ad makre: A Salomo sika a meng n kos a Zeova sor-wilgr la yam sẽn na yɩl n tõog n ges Israɛll nin-buiidã yell tɩ zemse.—1 Rĩm dãmba 3:5-12.

Pʋʋs Wẽnnaam toog wakate. Toog wakate, d sã n pelg d pʋg n pʋʋse, d na n paama yolsgo, la na n kɩtame me tɩ d maneg n teeg a Zeova la d ra teeg d meng ye.—Yɩɩl Sõamyã 62:8.

Ad makre: Rĩm a Aza pʋʋsa Wẽnnaam n kos sõngre, bɛ pãng sẽn yɩɩd-a sẽn da wa n dat n zab ne-a yĩnga.—2 Kibaya 14:11.

Pʋʋs neb a taab sẽn dat sõngr yĩnga. Pʋʋs-kãens buudã sõngd-d lame tɩ d mao n da wa yɩ rat-m-yembr soaba, la paasd d nimbãan-zoeerã me.

Ad makre: A Zezi pʋʋsa a karen-biisã yĩnga.—Zã 17:9-17.

Pʋʋs n pẽg Wẽnnaam. D sã n pʋʋs a Zeova n pẽg-a a tʋʋm-kãsemsã, a nonglmã, a tɩrlmã la a pãn-tõod toor-toorã yĩnga, na n kɩtame tɩ d maneg n nong-a la d waoogd-a. Pʋʋs kãens buudã paasda zood ning d sẽn tar ne Wẽnnaam sẽn yaa d Ba wã pãnga.

Ad makre: A Davɩɩd pẽga Wẽnnaam ne a sũur fãa bũmb nins a sẽn naanã yĩnga.—Yɩɩl Sõamyã 8.

Bark a to d sẽn paamd ne pʋʋsgã maasem, yaa ‘Wẽnnaam laafɩ wã sẽn yɩɩd nebã bãngr fãa’ wã. (Filip rãmba 4:7) Sɩd me, dũni kãngã sẽn pid ne zu-loeesã pʋgẽ, d sã n paam sũur pʋgẽ bãane, yaa bark tɛkẽ. A paasda yĩns laafɩ menga. (Yelbũna 14:30) La rẽ yĩnga yaa tõnd modgr yĩng bal n kɩtd tɩ d paam sũur pʋgẽ bãanã bɩ, bɩ tũuda ne bũmb sẽn yɩɩd rẽ?

[Foto, seb-neng 10]

Pʋʋsgã tõe n sõng-d lame tɩ d paam Wẽnnaam zoodo, la nafd-d yɛl a taab wɛɛngẽ me

Pʋʋsgã:

7 Wẽnnaam na n kelgame la a leok-d bɩ?

NEB wʋsg tʋll n bãnga sok-kãngã leoorã ne b sũur fãa. Biiblã wilgdame t’a Zeova sɩd kelgda pʋʋsg nins d sẽn pʋʋsd-a rũndã-rũndã wã. A nan kelg-d bɩ a kõn kelg-dã bee ne tõnd n yɩɩda.

A Zezi puka a wakatẽ tũudmã taoor dãmb sẽn da pʋʋsd ne pʋ-likã bãongo. B ra ratame bal tɩ b taabã get-b wa nin-tɩrse. A Zezi yeelame tɩ nin-kãensã “paamda b keoore,” sẽn yaa nebã sẽn na n get-b la b pẽgd-bã, la tɩ b pa na n paam sẽn tar yõod n yɩɩdã ye. Rat n yeel tɩ b pa na n paam tɩ Wẽnnaam kelg-b ye. (Matɩe 6:5) Rũndã-rũndã me, neb wʋsg pʋʋsda wa b mensã sẽn date, la pa wa Wẽnnaam sẽn datã ye. B sẽn pa tũud Biiblã sagls nins d sẽn wilg tɩ loogã yĩnga, Wẽnnaam pa kelgd b pʋʋsgã ye.

La yãmb yẽ? Rẽ yĩnga Wẽnnaam na n kelg-y lame la a leok-y bɩ? Rẽ pa be ne-y yĩngã kõbgo, y sẽn yit tẽng ninga wall y tarem ye. Biiblã yet-d-la vẽeneg woto: “Wẽnnaam ka tũusd neb ye. La buud fãa sʋka, ned ninga sẽn zoet bãmba, la sẽn maand tɩrga, yẽ soab tata bãmb yam.” (Tʋʋma 10:34, 35) Rẽ yĩnga yãmb yaa ned sẽn zoet Wẽnnaam la sẽn maand tɩrg bɩ? Ned sã n zoet Wẽnnaam, rat n yeelame t’a waoogda Wẽnnaam wʋsgo, n pa tol n dat n maan bũmb sẽn sãamd a sũur ye. Ned sẽn maand tɩrg yaa ned sẽn modgd n maand Wẽnnaam daabã n yɩɩd yẽ mengã wall nebã raabo. Rẽ yĩnga y sɩd ratame tɩ Wẽnnaam kelg y pʋʋsgã bɩ? Sã n yaa rẽ, bɩ y bãng tɩ Biiblã wilgda y sẽn tog n pʋʋs to-to tɩ Wẽnnaam kelge.a

Neb wʋsg tʋllame tɩ Wẽnnaam leok b pʋʋsgã ne yel-solemde. La baa pĩnd wẽndẽ menga, Wẽnnaam da pa wae n leokd nebã pʋʋsg ne yel-soalem ye. Mi n maana yʋʋm kobs tɩ nebã pa yã yel-solemd ye. Sẽn paase, Biiblã wilgame t’a Zezi tʋm-tʋmdbã kũum poore, yel-soalmã saame. (1 Korẽnt dãmba 13:8-10) La rẽ yĩnga rat n yeelame tɩ rũndã-rũndã, Wẽnnaam pa le leokd ned pʋʋsg bɩ? Abada! Ad kosg kẽer a sẽn leokde.

Wẽnnaam kõta yam. Yam hakɩkã yita a Zeova nengẽ. A sakd n kõt-a-la ned ning fãa sẽn dat a sor-wilgri, la sẽn modgd n dat n tũ rẽ.—Zak 1:5.

Wẽnnaam kõta neb a vʋʋsem sõngã tɩ sõngd-ba. Wẽnnaam sã n wa maand bũmbu, pãng ning a sẽn tall n na n kɩt tɩ bõn-kãng pidsã la b sẽn boond tɩ vʋʋsem sõngã. Pãng buud pa be n zem-a ye. Pãn-kãngã tõe n sõng-d lame tɩ d tõog toogo. Sũ-sãams sasa, a tõe n kɩtame tɩ d tall sũur pʋgẽ bãane. A tõe n sõng-d lame me tɩ d paam zʋg-sõma. (Galat dãmba 5:22, 23) A Zezi yeela a karen-biisã tɩ ned sã n kos Wẽnnaam a vʋʋsem sõngã, a kõta a soab ne yamleoogo.—Luk 11:13.

Wẽnnaam vẽnegda neb nins sẽn sɩd rat n bãng-a wã. (Tʋʋma 17:26, 27) Dũniyã gill zugu, neb n sɩd rat ne b sũur fãa n bãng sɩdã. B tʋll n bãnga Wẽnnaam, rat n yeel t’a yʋʋrã, a raabã ne tẽngã la ne ãdem-biisã, la b sẽn tõe n paam a zood to-to. (Zak 4:8) A Zeova Kaset rãmbã wae n segda neb a woto buudu, n sõngd-b ne yamleoog tɩ b bãngd Biiblã sẽn yet bũmb ning woto fãa wɛɛngẽ wã.

Yaa yãmb sẽn tʋll n bãng y sogsg toor-toor leoor yĩng n kɩt tɩ y reeg seb-kãngã bɩ? Yãmb baooda Wẽnnaam bɩ? Sã n yaa rẽ bɩ y bãng tɩ y sẽn paam seb-kãngã wã, tõe tɩ yaa y pʋʋsg la Wẽnnaam leok-yã.

[Tẽngr note]