Sẽn yet-b tɩ b yaa kiris-nebã fãa yaa kiris-neb hakɩk bɩ?

KIRIS-NEBÃ sõor yaa wãna? Sebr a yembr (Atlas de la chrétienté dans le monde [ãngl.]) yeelame tɩ yʋʋmd 2010 soabã pʋgẽ, dũniyã gill zugu, b sõorã ra yɩɩda milyaar a 2. Sebrã paasame tɩ kiris-nin-kãensã bee sul toɛy-toɛy sẽn yɩɩd 41000 pʋsẽ, tɩ bũmb nins b sẽn zãmsd b nin-buiidã yaa toor-toore, tɩ noy nins b sẽn tũudã me pa yembr ye. Pa zaalem tɩ neb kẽer sẽn ne tũudum kãens sõorã sẽn tar paasgã pa le mi b sẽn maandga, wall pʋd n sãamd b sũyã ye. Tõe tɩ b sokda b mens woto: ‘Rẽ yĩnga yaa sẽn yet-b tɩ b yaa kiris-nebã fãa n yaa kiris-neb hakɩk bɩ?’

D rɩk makre. Ned sã n yi a tẽngẽ n na n kẽng tẽng a to, a sã n ta toadgẽ wã, naoor wʋsg b sokd-a-la a sẽn yitẽ. La pa rẽ bal ye. A tog n kɩsa a neng sebr tɩ b ges a sẽn yeelã sã n yaa sɩda. Rẽnd ned me sã n yeel ne noor bal t’a tẽeda Kiristã, bũmb n paooge. A segd n kõo kaset sẽn wilgd t’a sɩd yaa kiris-neda. Rẽ tõe n yɩɩ bõe?

Yaa yʋʋm 10 a Zezi kũumã poor bilf la b sɩng a karen-biisã boolg tɩ “kiris-neba.” Biibl-gʋlsd a Luk yeelame tɩ yɩɩ “Ãntios nebã n sɩng n bool karen-biisã tɩ kiris-neba.” (Tʋʋma 11:26) B sẽn da boond b rãmb tɩ kiris-nebã ra yaa Kiristã karen-biisi. La yɩ Kiristã karen-biig rat n yeelame tɩ bõe? Sebr a yembr (The New International Dictionary of New Testament Theology) yeela woto: “Yɩ a Zezi karen-biig rat n yeelame tɩ f rɩk f vɩɩmã fãa n kõ-a . . . n tʋ-a f yõor tɛka.” Dẽnd kiris-ned hakɩk yaa ned sẽn tũud a Zezi Kirist zãmsgã la a saglsã zãnga, la ne a sũur fãa.

Rẽ yĩnga sẽn yet-b tɩ b yaa kiris-nebã sʋka, d tõe n yãa neb a woto buud bɩ? A Zezi yeelame tɩ bõe n da na n kɩt tɩ b bãng a karen-biis hakɩkã n bake? Seb-kãngã wilgda Biiblã sẽn leokd sogs-kãensã to-to. Sõss nins sẽn pʋgdã pʋsẽ, d na n goma a Zezi goam a nu yelle. Gom-kãens na n sõng-d lame tɩ d bãng a karen-biis hakɩkã n bake. D na n yãa pipi kiris-nebã sẽn tũ gom-kãens to-to. Rẽ poore, d na n bao n bãnga sull ning sẽn sɩd rɩkd b togs-n-taare.

‘Tall-y mam goamã’

“Yãmb sã n tall mam goamã, yãmb yaa mam karen-biis hakɩka. Yãmb na bãng sɩda, la sɩdã na kõ yãmb lohorem.”—ZÃ 8:31, 32.

Woto sẽn dat n yɛɛlga: A Zezi “goamã” yaa bũmb nins a sẽn zãms nebã. Gom-kãens yita Wẽnnaam nengẽ. A Zezi yeela woto: “M Ba sẽn tʋm maamã, b kõo maam noor ne bũmb nins mam sẽn na n togsã, la mam sẽn na n gomã.” (Zã 12:49) A ra wa n pʋʋsa Wẽnnaam a Zeova sẽn yaa a saasẽ Ba wã n yeel woto: “Yãmb goamã yaa sɩda.” A ra wae n tikda Wẽnnaam Gomdã zug n zãmsd nebã. (Zã 17:17; Matɩe 4:4, 7, 10) Dẽnd kiris-neb hakɩkã ‘tallda a goamã,’ rat n yeel tɩ b sakdame tɩ Biiblã sẽn yaa Wẽnnaam Gomdã goam fãa yaa “sɩda.” Bũmb nins b sẽn tẽedã la noy nins b sẽn tũudã fãa tika Biiblã zugu.

Pipi kiris-nebã sẽn tũ rẽ to-to: Tʋm-tʋmd a Poll ra rɩka a Zezi togs-n-taare, n nand Wẽnnaam Gomdã. A yeelame tɩ “Gʋlsg Sõamyã zãng yaa Wẽnnaam n kõ tõndo,” la t’a “bee barka.” (2 Tɩmote 3:16) Kiris-nebã sʋka, rap nins b sẽn da yãkd tɩ b zãmsd b tẽed-n-taasã ra tog n “talla sɩd koɛɛg ning [b] sẽn zãmsã kãn-kãe.” (Tɩt 1:7, 9) B ra sagla pipi kiris-nebã tɩ b ra tũ “ninsaalb bãngr la b belgr sẽn ka yõodo, sẽn yaa ninsaalbã minund sẽn yaa dũniyã rẽnda, la ka Kirist rẽndã ye.”—Kolos rãmba 2:8.

Ãnd rãmb n dɩkd b togs-n-taare?: Sebr a yembr (Catéchisme de l’Église catholique) yeela woto: “Bũmb nins egiliiz [katolikã] sẽn tẽed la b wilgd b nebã pa tik Gʋlsg Sõamyã zug bal ye. Woto yĩnga, katolik-rãmbã segd n sak n deegame tɩ noy nins egiliizã sẽn gãnegã ne Gʋlsg Sõamyã noy zema taaba, la b sak-ba.” Kanada sebr a ye (Maclean’s) pʋgẽ, b wilga bũmb Torõnto tũudum taoor soab a ye sẽn yeele. A soka woto: “Bõe yĩng tɩ d tog n tũ ned sẽn zĩnd yʋʋm tus a yi sẽn loog goama? Tõnd tara d toorẽ yam sẽn yaa sõma wʋsgo, la d sã n dat tɩ wakat fãa bɩ d tagsa wã zems ne a Zezi la Biiblã sẽn yetã, boogda d tagsa wã sõmblem.”

La sebr a ye (Nouvelle Encyclopédie catholique [ãngl.]) goma a Zeova Kaset rãmbã yell n yeel woto: “B sẽn tẽed bũmb ninsã fãa la noy nins b sẽn tũudã fãa tika Biiblã zugu.” Sẽn nan pa kaoose, Kanada, a Zeova Kaset soab n tʋlg n na n sõs ne raoa. La raoã kʋʋga a gomdã n tees Biiblã a sẽn da zãadã n yeel-a woto: ‘Sebr ning fo sẽn zãadã wilgda fo sẽn yaa ned ninga.”

‘Bãmb ka dũniyã rẽnd ye’

“Dũniyã kisga bãmba, bãmb sẽn ka dũniyã rẽndã . . . yĩnga.”—ZÃ 17:14.

Woto sẽn dat n yɛɛlga: A Zezi sẽn da pa dũniyã rẽndã yĩnga, a ra pa kẽesd a toog politikã la zabã buud toor-toor pʋgẽ ye. A wilga rẽnda võor n yeel woto: “Mam soolem ka dũniyã rẽnd ye. Mam soolem sã n da yaa dũniyã rẽnda, mam tʋm-tʋmdbã ra na n zabame tɩ b ra yõk maam n kõ zʋɩf-rãmbã ye. La masã mam soolem ka dũniyã ka rẽnd ye.” (Zã 18:36) A sagla a karen-biisã me tɩ b lak b mens ne tagsa, no-goam la yel-manesem Wẽnnaam Gomdã sẽn gɩdge.—Matɩe 20:25-27.

Pipi kiris-nebã sẽn tũ rẽ to-to: Tũudum yɛl-mit a Jonathan Dymond yeelame t’a Zezi kũumã poore, a karen-biisã kell n “tõdga zabr fasɩ, baa b sẽn na n maan-b bũmb ning fãa. Baa b na yaal-b bɩ n kẽes-b bãense, la baa kũum menga.” B ra saka namsgo, b sẽn pa rat n kẽes b toog zabã pʋsẽ wã yĩnga. B sẽn da vɩ to-to wã me ra kɩtame tɩ b mi-b n bake. A Pɩɛɛr yeela a tẽed-n-taasã woto: “Linga bãmb yãmb sẽn ka le magd ne bãmb n maand wẽng woto wã, la bãmb gomda yãmb wẽnga.” (1 Pɩɛɛr 4:4) Kʋdemd yɛl-mit a Will Durant yeelame tɩ kiris-nebã “sẽn da wilgd bũmb fãa pʋgẽ tɩ b yaa wẽn-zoɛtbã, neb nins sẽn da yaa wẽn-zɩtb la b nong yõ-noogrã sũy ra sãamda ne-ba.”

Ãnd rãmb n dɩkd b togs-n-taare?: Sebr a ye (Nouvelle Encyclopédie catholique [ãngil.]) goma Kiristã sẽn yeel t’a karen-biig pa segd n kẽes a toog zabr pʋgẽ wã yelle, n yeel woto: “Pa segd tɩ ned tõdg t’a kõn kẽes a toog zabr pʋgẽ, a sũur-kaset sẽn pa kõt-a sor yĩng ye.” Sebr a to (Reformierte Presse) pʋgẽ, b yeelame tɩ sull a yembr (African Rights) vaeesame n mik tɩ “sã n pa a Zeova Kaset rãmbã,” yʋʋmd 1994 soabã pʋgẽ, egiliiz-rãmbã fãa kẽesa b toog Ruwãnda zabrẽ wã.

Porfesɛɛr a ye goma nazi-rãmbã sẽn kʋ nin-buiidã ne wẽnem to-to wã yelle, n yeel tɩ “bʋko, sull wall siglg baa a ye pa tol n wilg t’a pa sak b zɩlem-beedã, b wẽnemã la tʋʋm-beed nins fãa b sẽn tʋmã ye.” La nin-kãngã sẽn kẽng n tɩ kaag miize a yembr (Musée de l’Holocauste aux États-Unis) poore, a yeela woto: “Masã, mam bãngame tɩ m tudgame.” A mikame tɩ baa nazi-rãmbã sẽn nams a Zeova Kaset rãmbã ne wẽnem b tẽebã yĩngã, b pa sak n teel-b ye.

La Wẽnnaam noyã sakr wɛɛngẽ yẽ? Sebr a yembr (U.S. Catholic) yeela woto: “Rũndã-rũndã, kom-bɩɩs wʋsg sẽn yaa katolik-rãmb pa sak bũmb ning egiliizã taoor dãmb sẽn yeel yoobã la vɩɩmd ne taab n yaool n pa kẽ kãadmã wɛɛngẽ wã ye.” Seb-kãng pʋgẽ, egiliizã taoor soab a yembr yeela woto: “Neb wʋsg sẽn wa n na n kẽ kãadem reng n vɩɩmda ne taaba. M tagsdame tɩ neb 100 zugu, sẽn yɩɩd neb 50 n maan woto.” La sebr a to (The New Encyclopædia Britannica) wilgame t’a Zeova Kaset rãmbã yẽ “sakda noy nins Wẽnnaam sẽn gãneg zã-m-mengã wɛɛngẽ wã fãa.”

“Bɩ yãmb nong taaba”

“Mam kõta yãmb tõ-paalga. Bɩ yãmb nong taaba. Bɩ y nong taab wa mam sẽn nong yãmbã. Yãmb sã n nong taaba, nebã fãa na n bãngame tɩ yãmb yaa mam karen-biisi.”—ZÃ 13:34, 35.

Woto sẽn dat n yɛɛlga: Kiristã yeela a karen-biisã tɩ b nong taab wa yẽ sẽn nong-bã. Wãn to la a Zezi wilg a karen-biisã a nonglem? A ra nonga ned buud fãa, n pa get a buudu, a yaa pag bɩ a yaa raoa, wa neb wʋsg sẽn da maandã ye. (Zã 4:7-10) A Zezi sẽn da nong nebã kɩtame t’a rɩk a sẽk la a pãng n sõng-ba, la a sak n mong a meng bũmb wʋsg b yĩnga. (Mark 6:30-34) Kiristã wa n wilga a nonglmã ne manesem sẽn ka to. A yeela woto: “Mam yaa pe-kɩɩm-sõngo. Pe-kɩɩm-sõng kõta a vɩɩm a piis yĩnga.”—Zã 10:11.

Pipi kiris-nebã sẽn tũ rẽ to-to: Pipi kiris-nebã ned kam fãa ra boonda a to t’a “ba-biig” wall a “ba-bi-poaka.” (Filemo 1, 2) B ra reegda buud fãa neb b tigimsã pʋsẽ, bala b ra getame tɩ “welgr ka be zʋɩf-rãmbã ne gɛrk-rãmbã sʋka,” tɩ “bãmb fãa tara Zusoab a yembre.” (Rom dãmba 10:11, 12) Yʋʋmd 33 Pãntekotã loogr poore, kiris-neb nins sẽn da be Zerizalɛmmã “ra koosda b pʋt la b teed a taaba, n pʋɩt ligdã. Ned kam fãa ra paamda wala a zu-loɛɛg yolsg sẽn dat tɛka.” Bõe yĩng tɩ b ra maand woto? Yaa sẽn na yɩl tɩ sẽn deeg-b lisg paalmã tõog n zĩnd Zerizalɛm, n kell n da “viigd ne tʋm-tʋmdbã kareng kelgr ye.” (Tʋʋma 2:41-45, Sebr Sõngo) Bõe n da kɩt tɩ b maand woto? Sẽn pa ta yʋʋm 200 tʋm-tʋmdbã kũum poore, a Tɛrtiliẽ wilgame tɩ neb n da yeel woto kiris-nebã zugu: “Ges-y b sẽn nong taab to-to, . . . hal n sak n na n ki taab yĩnga.”

Ãnd rãmb n dɩkd b togs-n-taare?: Sebr a ye (Histoire du déclin et de la chute de l’Empire romain [1837]) wilgame tɩ yʋʋmã sẽn pʋg taabã pʋsẽ, neb nins sẽn yet tɩ b yaa kiris-nebã “namsa taab ne wẽnem wʋsg n yɩɩd neb nins sẽn ka-b kiris-nebã sẽn nams-b to-to wã.” Vaeesg b sẽn maan Etazĩni sẽn nan pa kaoos wilgame tɩ neb nins sẽn yet tɩ b yaa wẽn-tũudba, tɩ b wʋsg yetẽ tɩ b yaa kiris-nebã wae n kisa bu-zẽms neba. Tũudum sull neb sẽn yet tɩ b yaa kiris-neb tõeeme n pa tar loees ne b tẽed-n-taas sẽn be tẽn-zẽnga, tɩ baa b tẽed-n-taasã sã n wa tar zu-loees bɩ b pa tõe n sõng-ba, wall b pa rat n sõng-b ye.

Yʋʋmd 2004 soabã pʋgẽ, sob-bɛd a naas n pɩʋʋg Floriid soolmẽ wã kiis a yiib pʋsẽ. Rẽ poore, sull ning sẽn ges nebã sõngr yellã taoor soab baoome n na n bãng sõngrã sã n sɩd taa nebã. A yeelame tɩ sull kae t’a nebã sigl sõma wa a Zeova Kaset rãmbã, la a pʋlem t’a na n kõ-b-la bũmb ning fãa sẽn paoog-ba. Sẽn deng rẽ, yʋʋmd 1997 soabã pʋgẽ, a Zeova Kaset rãmb n tall tɩto, rɩɩb la fut n tɩ sõng b tẽed-n-taas la neb a taab sẽn da be zu-loees pʋgẽ Repiblik Demokartik di Kõngo. A Zeova Kaset rãmb nins sẽn be Eropã kõo kũun toor-toore. B sẽn kõ bũmb ninsã ligd yɩɩda tõnd ligdã 455000000.

“Mam wilga bãmb yãmb yʋʋre”

“Yãmb sẽn welg neb nins dũniyã pʋgẽ n kõ maamã, mam wilga bãmb yãmb yʋʋre. . . . Mam wilga bãmb yãmb yʋʋre, la mam na n le wilga bãmba.”—ZÃ 17:6, 26.

Woto sẽn dat n yɛɛlga: A Zezi sõnga nebã tɩ b bãng Wẽnnaam yʋʋrã ne a koe-moonegã maasem. A sẽn da wae n karemd Gʋlsg Sõamyã, a ra yãta Wẽnnaam yʋ-peellã be, la a tog n da pʋt-a lame. (Luk 4:16-21) A zãmsa a karen-biisã tɩ b pʋʋs woto: “Tõnd Ba, bɩ y yʋʋr paam waoogre.”—Luk 11:2.

Pipi kiris-nebã sẽn tũ rẽ to-to: Tʋm-tʋmd a Pɩɛɛr yeela tigingã kãsem-dãmb Zerizalɛm tɩ Wẽnnaam tũusa neb bu-zemsã sʋk “b meng yʋʋrã yĩnga.” (Tʋʋma 15:14) Tʋm-tʋmdbã la kiris-neb a taabã ra moondame tɩ “ned ning fãa sẽn pʋʋsd ne [a Zeova, MN] yʋʋr na n paama fãagre.” (Tʋʋma 2:21; Rom dãmba 10:13) Sẽn paase, b ra ningda Wẽnnaam yʋʋrã b sɛbã pʋsẽ. Sebr a ye (la Tossefta) la b gʋls n baas yʋʋmd 300 soabã sẽnese. Yaa sebr sẽn gomd zʋɩf-rãmbã noy yelle. Seb-kãng pʋgẽ, b yeela zʋɩf-rãmb nins sẽn da zabd ne kiris-nebã n yõod b sɛbã woto: “Ned pa segd n bao n na n yiis Evãnzill dãmbã gʋlsdbã sɛb la wẽn-kɩɩsdbã sɛb bugmẽ ye. [Tõe tɩ yaa zʋɩf-rãmb nins sẽn lebg kiris-nebã la b sẽn bool tɩ wẽn-kɩɩsdbã.] B segd n basa seb-kãens b sẽn beẽ wã tɩ bugmã rɩ-ba, . . . bãmb ne Wẽnnaam yʋʋrã sẽn gʋls b pʋsẽ wã.”

Ãnd rãmb n dɩkd b togs-n-taare?: Etazĩni, tũudum taoor dãmb sull a ye (Conseil national des Églises du Christ) kõo noor tɩ b lebg Biibl b sẽn boond tɩ Revised Standard Version. Biibl-kãng yeela a sɩngr-goamã pʋgẽ woto: “Sẽn deng Kirist tũudmã sɩngre, Zidayiismã pʋgẽ, b wa n pa le tũnugd ne yʋ-peell n boond Wẽnnaam-yɛngã, tɩ yaa wa wẽnnaam-dãmb a taab n be tɩ b rat tɩ welgr zĩnd ye. Pa zems tɩ kiris-nebã sẽn be dũniyã gill zugã me ket n pʋt Wẽnnaam yʋ-peellã ye.” Woto kɩtame tɩ b ledg Wẽnnaam yʋ-peellã ne waoogr-yʋʋr sẽn yaa “ZUSOABA.” Sẽn nan pa kaoose, Vatikã wã kõo evɛk-rãmbã noor n yeel woto: “Pa segd tɩ b pʋd tetagrammã (YHWH)a sẽn yaa Wẽnnaam yʋʋrã yɩɩl la pʋʋsg pʋgẽ ye.”

Rũndã-rũndã, ãnda rãmb n pʋt Wẽnnaam yʋ-peellã la b wilgd-a neb a taaba? A Sergey sẽn wa n zems yʋʋm 15 n da be Kirgistã, a gesa filim tɩ b wilg a pʋgẽ wã tɩ Wẽnnaam yʋ-peellã la a Zeova. Rẽ poore, maana sẽn na ta yʋʋm piig t’a pa le wʋm Wẽnnaam yʋ-peellã ye. A wa n tɩ bee Etazĩni, t’a Zeova Kaset rãmb a yiib tɩ kaag-a daar a yembr n wilg-a Wẽnnaam yʋʋrã Biiblã pʋgẽ. A Sergey sũur yɩɩ noog wʋsg a sẽn yã tũudum sull neb sẽn pʋt Wẽnnaam yʋʋrã sẽn yaa Zeova wã. Sɩd me, sebr a yembr (Webster’s Third New International Dictionary) pʋgẽ, b bilga “Wẽnnaam a Zeova” wã sẽn dat n yɛɛlga, n yeel tɩ yaa “Wẽnnaam sẽn ka to, Wẽnnaam ning a Zeova Kaset rãmbã sẽn sakd la b tũudẽ wã.”

[Tẽngr note]

‘Wẽnnaam soolem koe-no-kãngã na n mooname’

“Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—MATƖE 24:14.

Woto sẽn dat n yɛɛlga: Evãnzill gʋlsd a Luk wilgame t’a Zezi “saaga tẽn-bɛd ne tẽn-bõoneg fãa n moon Wẽnnaam soolem koe-noogo.” (Luk 8:1) A Zezi mengã yeela woto: “Yaa tɩlae tɩ mam moon Wẽnnaam soolem koe-noog tẽns a taab me, tɩ bõe, b tʋma maam bõn-kãng yĩnga.” (Luk 4:43) A tʋma a karen-biisã tɩ b tɩ moon koɛɛgã tẽn-bɛd la tẽn-bõoneg pʋsẽ. A wa n yeel-b-la woto: “Yãmb na n yɩɩ mam kaset dãmb . . . dũniyã tɛk fãa.”—Tʋʋma 1:8; Luk 10:1.

Pipi kiris-nebã sẽn tũ rẽ to-to: A Zezi karen-biisã tũ a noorã n pa bas tɩ kaoos ye. “Daar fãa, Wẽnnaam doogã pʋgẽ ne dot pʋsẽ, bãmb zãmsa nebã la b moon a Zezi Kirist koe-noogã n ka bas ye.” (Tʋʋma 5:42) Pa neb kẽer la b ra yãk tigingã pʋgẽ tɩ yaa bãmb bal n da moond koɛɛgã ye. Kʋdemd yɛl-mit a Neander yeelame t’a “Celsus sẽn yɩ ned ning sẽn gʋls pipi n paoog Kirist tũudmã yeelame tɩ lam-wĩidba, zap-rãmba, neb sẽn manegd gãndo, sẽn yaa neb sẽn pa mi sebr baa bilfu, la nin-zaals fãa ra moonda koe-noogã ne yẽesem.” A Jean Bernardi yeela a sebr a ye (Les premiers siècles de l’Eglise) pʋgẽ woto: “[Kiris-nebã] ra segd n kẽnga zĩig zãng n tɩ taas ned buud fãa koɛɛgã. Nebã reegd-b tɩ b pa reegd-ba, b ra segd n moona soayã zut la tẽn-bɛd pʋsẽ, raasẽ la zags pʋsẽ, . . . tɩ koɛɛgã ta dũniyã tɛk fãa.”

Ãnd rãmb n dɩkd b togs-n-taare?: A David Watson sẽn yaa ãngilikã-rãmbã tũudum taoor soab a yembrã yeela woto: “Bũmb a ye sẽn kɩt tɩ nebã wʋsg pa tũud Wẽnnaam ne yẽesmã yaa egiliizã taoor dãmb sẽn pa moond sõma la b pa zãmsd nin-buiidã sõma wã.” A José Luis Pérez Guadalupe sebr a ye (Pourquoi les catholiques s’en vont-ils ? [esp.]) pʋgẽ, a goma egiliiz evãnzelikã rãmba, advãntist-rãmbã la sul a taab yelle, n yeel tɩ “b pa kẽnd zak-zak n moond koɛɛgã ye.” La a yeelame t’a Zeova Kaset rãmbã “kẽeda zak fãa n moond koɛɛgã.”

Sebr a ye (Cato Supreme Court Review, 2001-2002) pʋgẽ, a Jonathan Turley togsa gomd a ye sẽn yaa sɩda. A yeela woto: “F sã n gom a Zeova Kaset rãmbã yelle, zĩig pʋgẽ, nebã fãa la bal tagsda koe-moondb sẽn wat d zagsẽ wã wakat buud fãa yelle. Sã n yaa ne a Zeova Kaset rãmbã, b sẽn kẽed zak-zak n moond koɛɛgã pa b sẽn dat tɩ nebã bãng bũmb nins b sẽn tẽedã bal ye, woto yaa tɩlae ne bãmb mensã tẽebã.”

[Zĩ-gũbri, seb-neng a 9]

Y mii kiris-neb hakɩkã masã bɩ?

Biiblã goam nins d sẽn vaees sõs-kãensã pʋsẽ wã wilgda kiris-neb hakɩkã sẽn segd n maanega. Masã, yãmb tagsdame tɩ ãnd dãmb n wilgd tɩ b sɩd yaa kiris-neb rũndã-rũndã? Baa tũudum sul tusa neb sẽn boond b mens tɩ kiris-nebã, tẽeg-y t’a Zezi yeela a karen-biisã woto: “Ka neb nins fãa sẽn boond maam tɩ ‘Zusoaba, Zusoabã!’ n na n kẽ arzãn soolmẽ ye. Yaa ned ning sẽn maand-a mam Ba sẽn be arzãnã raabã bala.” (Matɩe 7:21) Y sã n bao n bãng neb nins sẽn maand Ba wã raabã, rat n yeel tɩ sẽn wilgd-b tɩ b yaa kiris-neb hakɩkã, n lebg b tẽed-n-taaga, tõe n kɩtame tɩ y wa paam bark sẽn ka sat Wẽnnaam soolmã bɩ a Rĩungã naam sasa. Bɩ y kos a Zeova Kaset soab ning sẽn kõ yãmb seb-kãngã wã t’a sõng-y tɩ y bãng Wẽnnaam Rĩungã, la a sẽn na n wa ne bark ninsã.—Luk 4:43.