A Elizabɛt ra tara a roagd t’a yʋʋr boond t’a Maari. A ra bee Nazarɛte, Galile soolmẽ wã. B ra rɩk-a lame n kõ a Zozɛf t’a na n wa yɩ a paga. A Zozɛf ra yaa ra-wãada. A Elizabɛt pʋgã sẽn wa n ta kiis a yoobe, malɛk a Gabriyɛll kẽnga a Maari nengẽ. A sẽn ta wã, a pʋʋs-a lame n yeel yaa: ‘A Zeova ninga foo bark wʋsgo.’ La a Maari pa wʋm a Gabriyɛll gomdã võor ye. A Gabriyɛll yeel-a lame yaa: ‘Fo na n dɩka pʋg n dog bi-ribla, n pʋd a yʋʋr t’a Zeezi. A na n wa yɩɩ Rĩma. A Rĩungã pa na n tol n tall tɛk ye.’

La a Maari yeelame: ‘Mam nan pa mi rao ye. M na n maana wãn n dog biiga?’ T’a Gabriyɛll leok-a yaa: ‘A Zeova tõee bũmb fãa. A vʋʋsem sõngã na n waa fo zugu, tɩ fo rog bi-ribla. Fo roagd a Elizabɛt me rɩka pʋga.’ Dẽ, a Maari yeelame yaa: ‘Mam yaa a Zeova tʋm-tʋm-poaka. Bɩ a sẽn yeelã fãa pidsi.’

A Maari yikame n kẽng tẽng sẽn be tãensẽ wã, n na n tɩ ges a Elizabɛte. A sẽn ta n pʋʋsã, biigã zĩnda a Elizabɛt pʋgẽ wã n virsi. A Zeova vʋʋsem sõngã kẽe a Elizabɛt t’a yeel yaa: ‘Maari, bɩ a Zeova ning-f barka. Mam paamame tɩ Mesi wã ma wa mam yirã.’ La a Maari yeelame: ‘Mam pẽgda a Zeova ne m sũur fãa.’ A Maari kell n paa a Elizabɛt nengẽ kiis a tãabo, n yaool n leb a yirã Nazarɛte.

A Zozɛf sẽn wa n bãng t’a Maari tara pʋga, a ra pa le rat t’a yɩ a pag ye. La a sẽn wa n gõe yʋngo, malɛk n gom ne-a zãmsd pʋgẽ n yeel-a yaa: ‘Ra bas a Maari ye. A pa maan bũmb sẽn yaa wẽng ye.’ Dẽ, a Zozɛf mara a Maari, n tall-a n kuil a zakẽ wã.

Rom soolmã naab a Sezaar Ogust yiisa noore, n yeel tɩ ned fãa segd n leba a ba-yiri, tɩ b sõd-a. Dẽ, a Zozɛf ne a Maari kẽnga Betlehɛm, bala yaa be la a Zozɛf ba-yirã. A Maari rogmã ra kolgame.

B sẽn ta Betlehɛm, roog ra ka le be ye. B kong n kẽe rũms roogẽ. Yaa be la a Maari rog a biig a Zeezi. A maneg n vil-a-la ne pɛɛla, n gãneg-a rũmsã rɩɩb koglg pʋgẽ.

Pe-kɩɩmb n da be weoogẽ ne yʋngã, n gũud b piisã. La ra pa zãr ne Betlehɛm ye. Zĩig pʋgẽ, malɛk n puk b taoorã, t’a Zeova ziirã vẽenem yãge, n lim-ba. Pe-kɩɩmbã yɛɛsame, la malɛkã yeel-b lame yaa: ‘Da yɛɛs-y ye. M tara koe-noog n na n togs-yã. B roga Mesi wã rũndã, Betlehɛm tẽngẽ wã.’ Wakat kãnga, malɛgs wʋsg n puk saasẽ, n yetẽ yaa: ‘Bɩ Wẽnnaam paam pẽgr saasẽ, la bɩ laafɩ zĩnd tẽngã zugu.’ Rẽ poore, malɛgsã menemame. Pe-kɩɩmbã na n maana wãna?

B yeela taab yaa: ‘Wa-y tɩ d kẽng Betlehɛm mas-masã.’ B sɩd looga tao-tao. B sẽn ta wã, b yãa a Zozɛf ne a Maari sẽn be rũms roogẽ ne b bi-pɛɛlgã.

Pe-kɩɩmbã togsa nebã bũmb ning malɛkã sẽn yeelã, la nebã yɛɛsame. A Maari pa tol n yĩm malɛkã goam ye. A ra tagsda rẽ yell wʋsgo. Pe-kɩɩmbã leba weoogẽ wã, la b pʋʋsa a Zeova barka, b sẽn wʋm la b yã bũmb ningã yĩnga.

Israyɛll tẽngã yaanga, tẽng a ye n da be be t’a nebã tẽed tɩ ãdsã tõe n sõng-b lame. Yʋng a ye, tẽn-kãng rap n yã ãdg sẽn puk saasẽ, n pɩnd wʋsgo. B tũu ãdgã, la a tall-b lame n kẽng Zerizalɛm. B sẽn ta, b soka nebã yaa: ‘Biig ning sẽn na n lebg Zʋɩf-rãmbã rĩmã bee yɛ? Tõnd waame n na n yĩgimd a taoor n waoog-a.’

Zerizalɛm rĩm a Erood sẽn wʋm tɩ b gomd rĩm-paalg yellã, a yɛɛsame. A soka maan-kʋʋdb kãsem-dãmbã yaa: ‘B sẽn gomd rĩm ning yellã, yaa yɛ la a tog n doge?’ B leok-a lame yaa: ‘No-rɛɛsdbã ra yeelame tɩ na n yɩɩ Betlehɛm.’ Dẽ, a Erood boola rap nins sẽn yi yaangã n yeel-b yaa: ‘Kẽng-y Betlehɛm n tɩ gẽes biigã, la y wa togs maam a sẽn beẽ. Ma-me rat n tɩ yĩgimd n waoog-a lame.’ Yaool n da yaa ziri.

Rapã le yãa ãdgã sẽn sɩng kẽnde, tɩ b pʋg-a n ta Betlehɛm. Ãdgã tɩ yalsa roog a ye zugu. Rapã kẽe roogã pʋgẽ n yã a Zeezi ne a ma a Maari. B yĩgimdame n waoog biigã, la b kõ-a sãnem, wisdu, la miir sẽn tar yũ-noogo. Rẽ yĩnga, yaa a Zeova n tʋm rapã a Zeezi nengẽ sɩda? Ayo.

Yʋn-kãnga, a Zeova yeela a Zozɛf zãmsd pʋgẽ yaa: ‘A Erood rat n kʋʋ a Zeezi. Yik n dɩk f pagã ne f biigã n zoe n kẽng Ezɩpt. Pa be, hal tɩ m wa yeel-f tɩ f lebg n wa.’ Tao-tao bala, a Zozɛf tall-b lame n loog Ezɩpt.

A Zeova ra yeela rap nins sẽn yi yaangã tɩ b ra leb a Erood nengẽ ye. A Erood sẽn wa n bãng tɩ rapã pa na n le wa wã, a sũurã yika wʋsgo. A sẽn da pa mi a Zeezi sẽn beẽ wã yĩnga, a kɩtame tɩ b kʋ Betlehɛm kom-dibli nins yʋʋm sẽn zems a Zeezi yʋʋmã. La a Zeezi ra põsame, n be hal Ezɩpt.

A Erood sẽn wa n ki wã, a Zeova yeela a Zozɛf yaa: ‘Masã, fo tõe n lebg n kuilame.’ A Zozɛf ne a Maari la a Zeezi leba Israyɛlle. B tɩ zĩnda Nazarɛt tẽngẽ wã.

A Zozɛf ne a Maari ra bee Nazarɛt ne a Zeezi, ne b kom-pugli wã la b kom-dibli a taabã. A Zozɛf ra yaa ra-wãada, n da tʋmd wʋsg n get a zakã rãmb yelle. A ra sõngd-b lame me tɩ b bãngd a Zeova la a tõogã. Yẽ ne a zakã rãmb ra kẽnda Zʋɩf-rãmbã karen-doogẽ wã wakat fãa n pʋʋsd a Zeova, la b kẽnd Zerizalɛm yʋʋmd fãa, n maand Pakã kibsa.

A Zeezi sẽn wa n tar yʋʋm 12, yẽ ne a roagdbã kẽnga hal Zerizalɛm, wa b sẽn da maand yʋʋmd fãa wã. Tẽngã ra pida ne neb sẽn wa n na n maan Pakã. Pakã sẽn sa, a Zozɛf ne a Maari le rɩka yir sore, n tẽed t’a Zeezi bee nebã sʋk tɩ b kuiisẽ. La b wa n gẽes-a lame n pa yã ye.

B leba Zerizalɛm n tɩ gẽes b biigã n kaoos rasem a tãabo. B wa n tɩ yã-a-la wẽnd-doogẽ wã. A Zeezi ra zĩi karen-saam-dãmbã sʋka, n kelgd-b sõma, la a sokd-b sogsgo. Karen-saam-dãmbã sẽn yã t’a Zeezi tara yam wʋsgã, ling-b lame tɩ b sɩng n sokd-a sogsgo. A sẽn da leokd to-to wã me ling-b lame. B ra neeme t’a wʋmda a Zeova tõogã võor sõma.

A Zozɛf ne a Maari sẽn da pa ne-a wã, b sũur sãama wʋsgo. A Maari yeela a Zeezi yaa: ‘Tõnd gẽesa foo zĩig fãa. Foo ra bee yɛ?’ La a Zeezi yeel-b lame: ‘Yãmb pa mi tɩ mam tog n zĩnda m Ba wã roogẽ la?’

A Zeezi tũu a baaba ne a ma, n leb Nazarɛte. A Zozɛf wilga a Zeezi ra-wãad sẽn tʋmd to-to. Fo tagsdame t’a Zeezi sẽn wa n yaa biiga, a manesmã ra yaa wãna? A ra bɩtame, t’a yamã paasdẽ, tɩ Wẽnnaam ne nebã nong-a.

A Zakari ne a Elizabɛt biig a Zã sẽn wa n bɩ wã, a lebga no-rɛɛsa. A Zeova kɩtame t’a Zã wilg nebã tɩ Mesi wã watame. La pa Zʋɩf-rãmbã karen-dotẽ wã bɩ tẽnsã pʋsẽ la a ra zãmsd nebã ye. Ra yaa we-raoogẽ wã. Nebã ra yita Zerizalɛm la Zide tẽns wʋsg n wat n kelgd a Zã. A wilg-b lame tɩ b sã n dat n ta Wẽnnaam yam, b pa segd n le maan sẽn yaa wẽng ye. Nebã sẽn kelg a Zã wã, wʋsg toeemame, t’a lis-b Zʋrdẽ kʋɩlgẽ wã.

A Zã ra yera fuug sẽn wʋg ne yʋgemd kõbdo. A ra wãbda sʋy la a rɩt weoogẽ sɩɩdo. A ra ka baood bũmb wʋsg ye. Nebã fãa ra rat n bãnga a Zã sẽn yaa ned ninga. Baa Fariziyẽ-rãmbã ne Sadiseyẽ-rãmbã sẽn yaa wuk-m-mens rãmbã waa a Zã nengẽ, t’a yeel-b yaa: ‘Yãmb me segd n basa y tʋʋm-wẽnsã. Ra tags-y tɩ y yɩɩda neb a taabã, y sẽn yet tɩ y yaa a Abrahaam kambã yĩng ye. Woto pa wilgd tɩ y yaa Wẽnnaam kamb ye.’

Neb wʋsg wa n soka a Zã yaa: ‘Bõe la d segd n maan n tõog n ta Wẽnnaam yam?’ La a leok-b lame yaa: ‘Ned sã n tar fut a yiibu, bɩ a yãk a ye n kõ ned ning sẽn ka tare.’ Fo mii bũmb ning sẽn kɩt t’a yeel woto wã bɩ? A ra ratame tɩ nebã bãng tɩ b sã n dat n ta Wẽnnaam yam, b segd n nonga b taabã.

A Zã yeela yõor-yaood deegdbã yaa: ‘Da le zãmb-y ned ye.’ A yeela sodaasã me yaa: ‘Da maan-y ned pãnga, bɩ n yag ziri ye.’

Maan-kʋʋdbã ne Levi nebã me wa n yeela a Zã yaa: ‘Nebã fãa rat n bãnga fo sẽn yaa ned ninga.’ La a Zã yeel-b lame yaa: ‘Mam yaa ned ning sẽn be-a we-raoogẽ, n kelemd n yet nebã tɩ b lebg n wa a Zeova nengẽ, wa no-rɛɛs a Ezayi sẽn da reng n togsã.’

Nebã sũur da nooma ne a Zã sẽn zãmsd-b bũmb ningã. Wʋsg ra sokda b mens sã n yaa yẽ n yaa Mesi wã. La a yeel-b lame yaa: ‘Ned sẽn yɩɩd maam n wate. Mam pa zems tɩ lok a neooda wã wĩy ye. Mam lisda nebã koom pʋgẽ, la yẽ na n lisa nebã vʋʋsem sõng pʋgẽ.’

A Zã ra moondame n yetẽ: ‘Ned sẽn yɩɩd maam n wate.’ A Zeezi sẽn wa n tar yʋʋm 30, a yii Galile n kẽng Zʋrdẽ kʋɩlgẽ wã. A Zã ra bee be n lisd nebã. A Zeezi ra ratame t’a Zã lis-a. La a Zã yeel-a lame: ‘Pa maam n segd n lis foo ye. Foo n segd n lis maam.’ La a yeela a Zã yaa: ‘A Zeova n dat tɩ fo lis maam.’ Rẽ, b kẽe koomẽ wã, t’a Zã lis-a koomẽ wã.

A Zeezi sẽn yi koomẽ wã, a pʋʋsame. Wakat kãng bala, yĩngr pakame, la Wẽnnaam vʋʋsem sõngã siga a zug wa walle. Dẽ, a Zeova zĩnda saasẽ n yeel yaa: “Fo yaa mam Bi-ribla, mam sẽn nong a soabã. Fo taa mam yam.”

A Zeova vʋʋsem sõngã sẽn sig a Zeezi zugã, a lebga Kirist bɩ Mesi, n na n sɩng tʋʋmd ning Wẽnnaam sẽn tʋm-a t’a wa tʋm tẽngã zugã.

A Zeezi lisgã poor bala, a kẽnga weoogẽ n maan rasem 40. A sẽn lebg n wa wã, a kẽng n na n tɩ yãa a Zã. A Zã sẽn wa n ne-a t’a watẽ wã, a yeelame: ‘Ad Wẽnnaam Pe-bilã. Yaa ne yẽ maasem la dũniyã nebã na n paam b yel-wẽnã sugri.’ A sẽn yeel woto wã, kɩtame tɩ nebã bãng tɩ yaa a Zeezi la Mesi wã. Fo mii bũmb ning sẽn maane, a Zeezi sẽn wa n be weoogẽ wã bɩ? D na n yãa rẽ.

A Zeezi sẽn deeg lisgã poore, vʋʋsem sõngã tall-a lame n kẽng weoogẽ, t’a maan rasem 40 n pa rɩ ye. Dẽnd kom n da tar-a wʋsgo. A Sʋɩtãan waame n na n mak-a. A yeela a Zeezi yaa: ‘Fo sã n sɩd yaa Wẽnnaam Biiga, bɩ f kɩt tɩ kug-kãensã lebg buri.’ La a Zeezi togsa bũmb sẽn be Wẽnnaam Gomdã pʋgẽ, n yeele: ‘B gʋlsame tɩ ninsaal pa tog n vɩ ne rɩɩb bal ye. A segd n kelga goam nins fãa a Zeova sẽn yetã.’

A Sʋɩtãan leb n yeela a Zeezi yaa: ‘Fo sã n sɩd yaa Wẽnnaam Biiga, bɩ f bas f meng n lʋɩ tẽnga. B gʋlsame tɩ Wẽnnaam na n kɩtame t’a malɛgsã kok foo.’ La a Zeezi leb n togsa bũmb sẽn be Wẽnnaam Gomdã pʋgẽ, n yeele: ‘B gʋlsame tɩ ned pa segd n mak a Zeova ye.’

Rẽ poore, a Sʋɩtãan wilga a Zeezi dũniyã soolem fãa la b arzɛgsã, n yeel-a yaa: ‘Fo sã n yĩgimd vugr bal n waoog maam, mam na n kõo foo woto fãa.’ La a Zeezi leokame: ‘Sʋɩtãana, looge! B gʋlsame tɩ yaa a Zeova a ye bal la d segd n waooge.’

Dẽ, a Sʋɩtãan loogame, la malɛgs wa n kõo a Zeezi rɩɩbo. Rẽ poore, a Zeezi tɩ moona Rĩungã koe-noogã. Yaa tʋʋm-kãng yĩng la a Zeova tʋm-a tẽngã zugu. Nebã sũur da nooma ne a sẽn zãmsd-b bũmb ninsã, la b tũud-a n kẽnd zĩig fãa.

Yʋʋmd 30 wã tʋʋl-nif kiuugã pʋgẽ, a Zeezi kẽnga Zerizalɛm. Neb wʋsg ra waame n na n maan Pakã kibsa. Kibsã sasa, b ra kʋʋda rũms n maand maand wẽnd-doogẽ wã. Neb kẽer tallda b rũms n wa, tɩ sãnda wat n daad rũmsã Zerizalɛm.

A Zeezi taa wẽnd-doogẽ wã n mik tɩ neb n koosd rũms wẽnd-doogã pʋgẽ. B ra baooda ligd a Zeova roogẽ wã. Bõe la a Zeezi maan-yã? A rɩka wĩ n maan kalwaase, n dig piisã la niisã n yiis wẽnd-doogẽ wã. A luba ligd-tekdbã taabl-dãmba, tɩ b ligdã sãeege. A Zeezi yeela neb nins sẽn da koosd marwalã yaa: ‘Yiis-y bõn-kãensã kaanẽ. Da rɩk-y mam Ba wã roog tɩ yɩ koosem doog ye.’

A Zeezi sẽn maan bũmb ningã linga neb nins sẽn da be wẽnd-doogẽ wã. A karen-biisã tẽega b sẽn da yeel bũmb ning Mesi wã wɛɛngẽ wã. B ra yeelame: ‘Mam na n nonga a Zeova roogã ne m sũur fãa.’

Yʋʋmd 33 wã, a Zeezi waa wẽnd-doogẽ wã n le rig neb sẽn da be beenẽ n koosd teedo. A pa bas tɩ nebã maan bũmb sẽn pa sõma a Ba wã roogẽ ye.

Pakã poore, a Zeezi ne a karen-biisã wa n dɩka sor n debd Galile. B tũu Samari. B wa n kolga tẽng b sẽn boond tɩ Sɩsaar. A Zeezi tɩ zĩnda bulg noor n na n vʋʋse. B ra boonda bulgã t’a Zakoob bulga. A karen-biisã kẽnga tẽngã pʋg n na n tɩ ra rɩɩbo.

Pag n wa bulgẽ wã n na n yãk koom. A Zeezi yeel-a lame yaa: ‘M bõos koom n yũ.’ Tɩ pagã yeel-a yaa: ‘Bõe yĩng tɩ fo gomd ne maam? Mam yaa Samari neda. Zʋɩf-rãmbã pa gomd ne Samari nebã ye.’ La a Zeezi leokame: ‘Fo sã n da mi mam sẽn yaa ned ninga, fo na n kosa maam tɩ m kõ-f vɩɩm koom.’ Dẽ, pagã sok-a lame yaa: ‘Fo gomdã rat n yeelame tɩ bõe? Bala fo pa tar lʋʋg n na n yãk koomã ye.’ T’a Zeezi yeele: ‘Ned ning sẽn na n yũ koom ning mam sẽn kõtã, ko-yũud kõn le yõk-a ye.’ Pagã yeelame: ‘M Zu-soaba, m bõos ko-kãng wɛ.’

A Zeezi yeela pagã yaa: ‘Tɩ bool f sɩdã t’a wa.’ La pagã leokame: ‘Mam pa tar sɩd ye.’ T’a Zeezi yeele: ‘Fo sẽn yeelã yaa sɩda. Fo mara naoor a nu. La fo sẽn be ne rao ningã pa fo sɩd ye.’ La pagã yeelame: ‘Fo yaa no-rɛɛsa. Mam buudã neb yetame tɩ tõnd tog n pʋʋsa Wẽnnaam tãn-kãngã zugu. La Zʋɩf-rãmbã yetame tɩ yaa Zerizalɛm bal la d tog n tɩ pʋʋs Wẽnnaam. Mam miime tɩ Mesi wã sã n wa, a na n wilga tõnd d sẽn tog n pʋʋs Wẽnnaam to-to.’ Dẽ, a Zeezi yeela pagã bũmb a sẽn da zɩ n yeel ned a to. A yeel-a lame yaa: ‘Yaa maam la Mesi wã.’

Pagã kẽnga tẽngã pʋgẽ n tɩ togs Samari nebã yaa: ‘M tagsdame tɩ mam yãa Mesi wã. A togsa bũmb wʋsg mam zugu. Wa-y n ges-y-yã.’ B tũu pagã n wa bulgẽ wã, la a Zeezi zãms-b-la bũmb wʋsgo.

Samari nebã kosa a Zeezi t’a pa b tẽngẽ wã. A paa be rasem a yiibu, n zãms nebã, hal tɩ wʋsg tẽ a goamã. B yeela pagã yaa: ‘Tõnd sẽn kelg raoã, d bãngame tɩ yaa yẽ n na n fãag ninsaalbã.’

A Zeezi sẽn deeg lisgã poor bilfu, a sɩngame n moond n yetẽ: ‘Wẽnnaam Rĩungã kolgame.’ Neb n lebg a karen-biisi, n da tũud-a n gilgd Galile ne Zide soolmã. A Zeezi wa n kuila a ba-yirã Nazarɛte. A kẽnga Zʋɩf-rãmbã tigsg roogẽ, n dɩk a Ezayi sebrã n zẽk a koɛɛg n karem yaa: ‘A Zeova kõo maam a vʋʋsem sõngã, sẽn na yɩl tɩ m moon koe-noogã.’ Woto rat n yeelame tɩ bõe? Rat n yeelame tɩ baa nebã sã n dat t’a Zeezi maan yel-soalma, bũmb ning sẽn kɩt t’a Zeova kõ-a vʋʋsem sõngã yaa sẽn na yɩl t’a moon koe-noogã. A sẽn karem n sa wã, a yeela nebã yaa: ‘Rũndã, yãmb sẽn wʋm gomd ningã pidsame.’

Rẽ poore, a Zeezi kẽnga Galile mogrẽ wã. Beenẽ, a yãa a karen-biis a naas sẽn yõgd zĩma. Yaa a Pɩyɛɛre, a Ãndere, a Zak la a Zã. A yeel-b lame yaa: ‘Wa-y n tũ-y maam. Mam na n kɩtame tɩ y yõgd neba, wa y sẽn yõgd zĩmã to-to wã.’ Zĩig pʋgẽ, b basa zĩmã yõgb n tũ a Zeezi. Bãmb ne a Zeezi gilga Galile, n moon a Zeova Rĩungã koɛɛga. B ra moonda Zʋɩf-rãmbã tigsg rotẽ, raasẽ, la soayã zutu. B sẽn da kẽngẽ fãa, neb wʋsg n da tũud-ba. Nebã ra gomda a Zeezi yell zĩig fãa, baa hal Siiri menga.

A Zeezi wa n kõo a karen-biis kẽer tõog tɩ b sãoog bãase, la b rig zĩn-dãmba. Kẽer me tũ-a lame n tɩ moon tẽn-bɛd la tẽn-bõones pʋsẽ. Pagb sẽn yaa wẽn-sakdb gesa a Zeezi ne a karen-biisã yelle. Wala makre, a Maari sẽn yit Magdala wã ne a Zan la a Suzan.

A Zeezi wilga a karen-biisã b sẽn tog n moon to-to, la a tʋm-b tɩ b tɩ moone. B sẽn wa n gilgd Galile n moond koɛɛgã, neb wʋsg lebga a Zeezi karen-biisi, n deeg koom lisgu. Neb wʋsg n da rat n lebg a karen-biisi, t’a yeel tɩ b yaa wa kood sẽn be pʋʋg pʋgẽ n dat tigsgu. A yeelame: ‘Pʋʋs-y a Zeova n kos t’a tʋm neb sẽn na n wa sõng n tigsi.’ A Zeezi wa n yãka a karen-biis 70 n tʋm-b yiib-yiibu, tɩ b gilg Zide n moon koɛɛgã. B sõnga neb buud fãa tɩ b bãng Wẽnnaam Rĩungã. Karen-biisã sẽn lebg n wa wã, b ra yãgdame n dat n togs a Zeezi b sẽn tõog n maane. A Sʋɩtãan ra ka tõe n maan baa fʋɩ n gɩdg koɛɛgã mooneg ye.

A Zeezi ra ratame t’a karen-biisã kell n moon koɛɛgã sẽn tar yõod wʋsgã, baa a sã n wa loog saasẽ. Rẽ n so t’a yeel-b yaa: ‘Moon-y koe-noogã dũniyã zĩig fãa. Zãms-y nebã Wẽnnaam goamã, la y sõng-b tɩ b reeg koom lisgu.’

A Zeezi waa tẽngã zug n na n moon Wẽnnaam Rĩungã koe-noogo. A Zeova kõ-a-la vʋʋsem sõngã t’a maan yel-soalma, n wilg a sẽn na n maane, a sã n wa lebg Rĩma. A sãooga bãas buud toor-toore. A sẽn da kẽngẽ fãa, bãad-rãmb n da wat a nengẽ n kot sõngre, la a sãoog-b lame. A ra pukda zoens nini, n kɩtdẽ tɩ wʋms tõe n wʋme, tɩ põy tõe n kẽne. Zĩn sã n da tar ned me, a rigda zĩnã. Nebã sã n da sɩɩs a fuugã noor bala, b paamda laafɩ. A sẽn kẽngẽ fãa, nebã ra tũud-a lame. A Zeezi mi n dat n zĩnda a yembre, tɩ nebã ket n watẽ. Baa ne rẽ, a ra sõngd-b lame.

Vugri, a Zeezi ra zĩi roog pʋgẽ tɩ nebã yaa wʋsgo. Neb n tʋk bãad sẽn pa tõe n kẽn n wa. Roogã sẽn da pidã yĩnga, b ra pa tõe n kẽ ye. B rʋʋ roogã zug n maan võore, n tũ be n sik rao wã a Zeezi taoore. A Zeezi yeela rao wã yaa: ‘Yik n kẽne.’ A sɩd yikame n kẽne, tɩ nebã yɛɛs wʋsgo.

Daar a ye, a Zeezi ra kẽeda tẽn-bil a ye pʋgẽ, tɩ wãoob piig be yɩɩg n kelemdẽ yaa: ‘Zeezi, sõng-do!’ Bãmb wakatẽ wã, ned sã n da yaa wãoore, a pa segd n pẽneg neb a taabã ye. A Zeezi yeel-b lame tɩ b kẽng wẽnd-doogẽ wã, n tɩ maan bũmb ning a Zeova tõogã sẽn yeel tɩ wãoor maan a sã n paam laafɩ wã. B sẽn wa n debdã, b fãa paama laafɩ. La wãoor a ye n lebg n wa pʋʋsa a Zeezi barka, la a pẽg Wẽnnaam. Yẽ a ye bal n lebg n wa.

Pag n da bẽed na maan yʋʋm 12. A maana a sẽn tõe fãa n na n paam laafɩ. Neb kʋʋng n da pʋgd a Zeezi, la pagã wẽdga nebã n kolg a Zeezi n sɩɩs a fuugã noore. Zĩig pʋgẽ, a paama laafɩ. La a Zeezi sokame: “Yaa ãnda n sɩɩs maamã?” Rabeem yõka pagã, la a waa a Zeezi taoore, n togs-a fãa. A Zeezi bels-a lame, n yeel-a yaa: ‘M biiga, kẽng ne laafɩ.’

Tigsg roog taoor soab a ye yʋʋr sẽn boond t’a Zayirus n wa n yeel a Zeezi yaa: ‘M bõos tɩ f wa mam zakẽ wã, tɩ m bi-puglã yĩns zabda wʋsgo.’ A Zeezi sẽn wa n na n ta zakẽ wã tɩ biigã kiime. A yãame tɩ neb wʋsg wa n naaga zakã rãmb tɩ b yãbda. A Zeezi yeel-b lame: ‘Da yãb-y tɩ biigã gõeeme.’ Rẽ poore, a gãda biigã nug n yeel yaa: ‘Biiga yiki.’ Zĩig pʋgẽ biigã yikame n zĩndi, la a Zeezi yeela a roagdbã tɩ b bao rɩɩb n kõ-a. Tags n ges a roagdbã sũur sẽn yɩ noog to-to.

A Zeezi sẽn moond koɛɛgã taa yʋʋmd la pʋɩ-sʋk masã. La bũmb sẽn tar yõod wʋsg la a rat n maane. A rat n yãka neb sẽn na n pa ne yẽ moond koɛɛgã. Ãnd dãmb la a na n yãke, n sõng-b tɩ b wa lebg kiris-neb tigingã taoor lʋɩtba? A ra ratame t’a Zeova sõng-a t’a bãng a sẽn na n yãk b rãmba. Rẽ n so t’a tɩ rʋ tãng zug yẽ a yembre, n pʋʋs a Zeova yʋngã tõre. Beoogã sẽn vẽege, a Zeezi boola a karen-biis kẽere, n yãk neb 12 tɩ b lebg a tẽn-tʋmdba. Fo tẽra tẽn-tʋmdb kẽer yʋy bɩ? Ad b fãa yʋyã: A Pɩyɛɛr, a Ãndere, a Zak, a Zã, a Filip, a Bartelemi, a Toma, a Matiye, a Alfe biig a Zak, a Taade, a Sɩmo ne a Zida Iskariote.

Tẽn-tʋmdb piig la a yiibã na n tũu a Zeezi n gilgi. A wilg-b-la b sẽn tog n moon to-to, la a tʋm-b tɩ b tɩ moone. A Zeova kõ-b-la tõogo, tɩ b na n dig zĩn-dãmb la b sãoog neb bãase.

A Zeezi kɩsa a tẽn-tʋmdb piig la a yiibã sɩda. A bool-b lame t’a zo-rãmba. Fariziyẽ-rãmbã ra tẽedame tɩ tẽn-tʋmdbã yaa neb sẽn pa paam zãmsg ye. La a Zeezi yaool n wilg-b-la b sẽn segd n moon to-to. B paa ne a Zeezi wakat fãa hal n tãag a kũumã, la baa a sẽn wa n vʋʋgã. Tẽn-tʋmdbã wʋsg ra yita Galile wa a Zeezi. Kẽer da tara pagba.

Tẽn-tʋmdbã ra pa zems zãng ye. Bãmb me ra mi n tudgame. Wakat ninga, b gomdame n pa yals n tagse, bɩ n yãk yam n maan bũmb tɩ pa sõma ye. B mi n pa maagd b yĩng ye. B ra kɩɩsda taab meng n na n bãng ned ning sẽn yɩɩd a to bãmb sʋka. La baasgo, b ra yaa nin-sõma, n nong a Zeova. A Zeezi sẽn wa n loog saasẽ wã poore, pipi kiris-neb tigingã sɩnga ne bãmba.

A Zeezi sẽn yãk a tẽn-tʋmdb 12 poore, a siga tãngã sɛɛga, la neb wʋsg n da tigim be. Yaa neb sẽn yi Galile, Zide, Tɩɩr, Sɩdõ, Siiri la tẽns sẽn be Zʋrdẽ kʋɩlgã poore. B waa ne bãad-rãmba, la neb zĩn-dãmb sẽn da namsde, t’a Zeezi sãoog-b fãa. Rẽ poore, a zĩnda tãngã sɛɛga, n zãms nebã. A wilga ned sẽn segd n maane, a sã n dat n lebg Wẽnnaam zoa. D segd n nonga a Zeova, la d sak n deeg tɩ d rata a sõngre. Tõnd sã n pa nong neb a taabã, d pa tõe n yeel tɩ d nonga Wẽnnaam ye. D tog n maana nebã fãa neere, baa neb nins sẽn pa nong tõndã.

A Zeezi yeelame: ‘D sã n nong d zo-rãmbã bala, pa sek ye. D tog n nonga neb nins sẽn pa nong tõndã me, la d kõt nebã sugr ne d sũur fãa. Ned sũur sã n yik ne-do, d segd n kẽnga tao-tao n tɩ kos-a sugri. D maan neb a taabã bũmb ning d sẽn dat tɩ b maan n kõ tõndã.’

A Zeezi kõo nebã sagls a taab sẽn yaa sõma. A yeelame yaa: ‘Yãmb sã n yaa a Zeova zoa, tara yõod n yɩɩd y sẽn na n tar ligd wʋsgo. Bala wagdr tõe n wa zuu yãmb ligdã, la ned pa tõe n zu zood ning y sẽn tar ne a Zeova wã ye. Da sãam-y y sũuri, n sokdẽ tɩ y na n dɩɩ bõe, y na n yũu bõe, bɩ y na n yeelga bõe ye. Yãmb sã n sãam y sũur rẽ yĩnga, pa na n kɩt tɩ y vɩɩmd n kaoos ye. Ges-y liuuli wã. Wẽnnaam kɩtdame tɩ b paamd rɩɩb daar fãa. Da yĩm-y t’a Zeova mii bũmb nins yãmb sẽn datã ye.’

Nebã zɩ n paam tɩ ned zãms-b wa a Zeezi ye. Tũudmã taoor dãmb ra pa zãms-b bõn-kãensã ye. Bõe n kɩt t’a Zeezi ra yaa karen-saam-kãsenga? Bala bũmb nins fãa a sẽn da zãmsd nebã ra yita a Zeova nengẽ.

Fariziyẽ-rãmbã ra yaa wilg-m-mens rãmba. B sã n da maan bũmb sẽn yaa sõma, yaa sẽn na yɩl tɩ nebã yã n pẽg-ba. B ra pʋʋsda neb wʋsg sẽn beẽ, n dat tɩ b yã-ba. B ra zãmsda pʋʋs-wogd ne zugu, tɩ b sã n wa be tigsg rotẽ bɩ soayã noy, bɩ b pʋʋsdẽ tɩ nebã wʋmdẽ. La bũmb la a Zeezi yeel nebã tɩ ling-ba. A yeelame yaa: ‘Ra pʋʋs-y wa Fariziyẽ-rãmbã sẽn pʋʋsd to-to wã ye. B tagsdame tɩ b sã n gomd wʋsgo, Wẽnnaam na n kelgame, la pa sɩd ye. Pʋʋsgã yaa yãmb ne a Zeova sʋk bala. Ra togsd-y gom-yend bal daar fãa ye. A Zeova ratame tɩ y togs-a bũmb ning sẽn sɩd be y sũurẽ wã.’

A Zeezi yeel-b lame yaa: ‘Yãmb segd n pʋʋsa woto: “Tõnd Ba sẽn be saasẽ, bɩ yãmb yʋʋr paam waoogre. Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.”’ A Zeezi leb n yeel-b lame tɩ b tõe n pʋʋsame n kos a Zeova t’a kõ-b b daarã rɩɩbo, b yel-wẽnã sugri, la bũmb a taaba.

A yeela nebã yaa: ‘Pʋʋsd-y wakat fãa. Kos-y y Ba a Zeova, t’a na n kõ-y-la bõn-sõma. Ned fãa ratame n kõ a biig bõn-sõma. Yãmb biig sã n kos yãmb buri, y na n kõ-a-la kugr sɩda? A sã n kos yãmb zĩifu, y na n kõ-a-la waaf sɩda?’

Dẽ, a Zeezi wilg-b-la a sẽn da rat tɩ b bãngã, n yeele: ‘Yãmb sã n miime tɩ y segd n kõo y kambã bõn-sõma, rẽ yĩnga, yãmb Ba a Zeova pa na n sak n kõ yãmb vʋʋsem sõngã sɩda? Yãmb we n kos-a bala.’ Fo tũuda a Zeezi saglgã bɩ? Fo sã n pʋʋsdẽ, bõe la f kot a Zeova?

Yʋʋmd 32 wã, nand tɩ Pakã ta, tẽn-tʋmdbã le gilgame n moon koɛɛgã. B sẽn lebg n wa wã, b ra yɛɛme, t’a Zeezi kɩt tɩ b kẽ koom-koglg n loog Betsayida n na n tɩ vʋʋse. La koom-koglgã sẽn wa n kolg koomã noore, a Zeezi yãa neb tusa sẽn yas n gũud-ba. A ra ratame tɩ yẽ ne a tẽn-tʋmdbã vʋʋse, la baa ne rẽ, a paa ne nebã, n sãoog bãad-rãmbã la a zãms-b bũmb wʋsgo. Daarã tõre, a Zeezi sõnga nebã tɩ b bãng Wẽnnaam Rĩungã. La zĩigã sẽn wa n sɩng sobgre, tẽn-tʋmdbã yeela a Zeezi yaa: ‘Kom n tog n tar nebã. Yeel-b tɩ b kẽng n tɩ bao rɩɩb n dɩ.’

A Zeezi yeela tẽn-tʋmdbã yaa: ‘Pa tɩlɛ tɩ b loog ye. Yãmb meng bao rɩɩb n kõ-ba.’ La tẽn-tʋmdbã sokame yaa: ‘Fo ratame tɩ d kẽng n tɩ ra rɩɩb n wa kõ-b bɩ?’ A Zeezi tẽn-tʋmd a Filip yeelame yaa: ‘Baa tõnd sã n tar ligd wʋsgo, tõnd pa tõe n paam rɩɩb sẽn na n sek nebã fãa ye.’

A Zeezi sokame yaa: ‘Bõe la yãmb tara?’ T’a Ãndere yeele: ‘Tõnd tara bur a nu, ne zĩm-bõones a yiibu. La paooda wʋsgo.’ La a Zeezi yeelame: ‘Tall-y n wa-y ne.’ A yeela nebã tɩ b tigim taab pis-nu-nu, la koabg-koabg n zĩndi. A rɩka burã ne zĩmã, n zẽk a neng yĩngr n pʋʋse. Rẽ poore, a rɩk n kõo a tẽn-tʋmdbã tɩ b pʋɩ nebã. Rap tus a nu, n paas pagbã ne kambã rɩɩme tɩ sek-ba. Tẽn-tʋmdbã wʋka rɩɩbã sẽn kellã tɩ ra sãam ye. Pida pet 12. Yɩɩ yel-solem-kãsenga, pa sɩda?

Yɩɩ nebã noog hal tɩ b ra rat t’a Zeezi lebg b rĩma. La a Zeezi ra miime tɩ wakat ning a Zeova sẽn yãk t’a na n lebg rĩmã nan pa ta ye. Rẽ n so t’a yeel nebã tɩ b kuili, la a yeel a tẽn-tʋmdbã tɩ b kẽ koom-koglg n pasg Galile mogrã n kẽng kɩreng a to wã. B sɩd kẽeme n looge, la a Zeezi rʋʋ tãng zug yẽ a ye. Bõe yĩnga? Bala a ra rat n pʋʋsa a Ba wã. Baa nebã sã n da yaa wʋsg n wat a Zeezi nengẽ, a baooda sẽk wakat fãa n pʋʋsdẽ.

A Zeezi ra tara tõog n sãoogd nebã bãas la a vʋʋgd neb sẽn ki. La pa rẽ bal ye. A ra tõe n kɩtame tɩ sobgã ne saagã maan yẽ sẽn date. Daar a ye, a tɩ pʋʋsa tãng zug n sa, n ges Galile mogrã sẽnese, n mik tɩ sob-kãseng n yiki. A tẽn-tʋmdbã sẽn da be koom-koglgã pʋgẽ wã ra gaada koomã ne b pãngã fãa. A Zeezi yii tãngã zug n sigi, n kẽnd koomã zug n teesd b sẽn beẽ wã. Tẽn-tʋmdbã wa n nee ned sẽn kẽnd koomã zug n watẽ, tɩ rabeem yõk-ba. La a Zeezi yeel-b lame yaa: ‘Yaa maam, da yɛɛs-y ye.’

A Pɩyɛɛr yeelame: ‘Zu-soaba, sã n sɩd yaa foo, bɩ f kɩt tɩ m kẽn koomã zug n seg foo.’ T’a Zeezi yeel-a t’a wa. A Pɩyɛɛr yii koom-koglgã pʋgẽ, n kẽnd koomã zug n dabd a Zeezi nengẽ. A sẽn wa n kolg a Zeezi wã, a gesa sobgã n yɛɛse, n sɩng bõrbo. A kelmame n yeel yaa: ‘Zu-soaba, fãag-ma.’ La a Zeezi gãda a nugã n yeel-a yaa: ‘Bõe yĩng tɩ fo yɛɛse. Fo pa tar tẽeb la?’

A Zeezi ne a Pɩyɛɛr kẽe koom-koglgã pʋgẽ, la zĩig pʋgẽ sobgã yalsame. Tags n ges tẽn-tʋmdbã manesem sẽn yɩ to-to. B yeela a Zeezi yaa: ‘Fo sɩd yaa Wẽnnaam Biiga.’

Daar a to me, a Zeezi kɩtame tɩ sobg ne saag maan yẽ sẽn date. Badaarã, yẽ ne a tẽn-tʋmdbã ra bee koom-koglg pʋg Galile mogrã zugu, t’a leb koom-koglgã poor n gõe. La sob-kãseng n yik mogrã zugu, n pengd koom-koglgã, tɩ koomã kẽedẽ, hal tɩ koom-koglgã rat n pidi. Tẽn-tʋmdbã neka a Zeezi, n yeel yaa: ‘Karen-saamba, tõnd na n kiime. Sõng-do.’ A Zeezi yikame n yeel koomã yaa: ‘Bas bʋrgã.’ Zĩig pʋgẽ, sobgã yalsame, tɩ zĩigã lebg sɩddd. A Zeezi soka a tẽn-tʋmdbã yaa: ‘Yãmb pa tar tẽeb la?’ Tẽn-tʋmdbã goma ne taab n yeel yaa: ‘Baa sobgã ne ko-kãsengã maanda yẽ sẽn datã.’ B bãngame tɩ b sã n teeg a Zeezi zãng-zãnga, b pa segd n le yɛɛs ye.

Fariziyẽ-rãmbã ra kisa a Zeezi, hal n da rat t’a maan yell tɩ b paam n yõk-a. B yeelame t’a pa segd n sãoog ned vʋʋsg daare, bala ned pa segd n tʋm vʋʋsg daar ye. Vʋʋsg daar a ye, a Zeezi yãa rao sẽn dog ne zondo, n zĩ sorã noor n bõosdẽ. A yeela a karen-biisã yaa: ‘Ges-y Wẽnnaam sẽn na n sõng raoã to-to.’ A tʋbsa kolkoodo, n kalem ne tom n yãk n bɛ raoã ninã, n yeel-a yaa: ‘Kẽng Silowe n tɩ widg f nengã.’ Raoã maana woto, la a ninã pukame. A sẽn dog tɛka, a ra zɩ n yã ye.

Nebã yɛɛsame, n yeel yaa: ‘Pa rao-kãngã la sẽn da be sorã noor n bõosdẽ wã, bɩ yaa ned sẽn wõnd-a?’ Raoã yeelame: ‘Yaa maam bala.’ Nebã sok-a lame yaa: ‘Maana wãn tɩ fo ninã puki?’ A sẽn togs-b bũmb ning sẽn maanã, b tall-a lame n kẽng Fariziyẽ-rãmbã nengẽ.

Raoã yeela Fariziyẽ-rãmbã yaa: ‘A Zeezi bɛɛ mam ninã ne tãndo, n yeel tɩ m tɩ widg m nengã. Mam tɩ widgame, tɩ m ninã puki.’ Fariziyẽ-rãmbã yeelame: ‘A Zeezi sã n sak n sãooga ned vʋʋsg daare, dẽnd pa Wẽnnaam n kõt-a tõog ye.’ La neb a taabã yeelame: ‘Sã n pa Wẽnnaam n kõt-a tõogo, a ra pa na n tõog n sãoog ned ye.’

Fariziyẽ-rãmbã boola rao wã baaba ne a ma n sok-b yaa: ‘Maana wãn tɩ yãmb biigã nin puki?’ B yɛɛsame, bala Fariziyẽ-rãmbã ra yeelame tɩ ned sã n yeel t’a tẽeda a Zeezi, b na n diga a soab n yiis tigsg roogẽ wã. Rẽ n so t’a roagdbã leok yaa: ‘Tõnd ka mi ye. Sok-y yẽ mengã.’ Fariziyẽ-rãmbã soka rao wã sogsg wʋsgo, hal t’a wa yeel-b yaa: ‘Mam togsa yãmb zãnga. Yaa bõe tɩ yãmb ket n sokd maam?’ Fariziyẽ-rãmbã sũy yikame, tɩ b rig-a n yiisi.

A Zeezi wa n yãa raoã, n sok-a yaa: ‘Fo tẽeda Mesi wã bɩ?’ T’a leok yaa: ‘M sã n da mi-a, m na n tẽ-a lame.’ T’a Zeezi yeel-a yaa: ‘Yaa maam la Mesi wã.’ A Zeezi pa nin-sõng sɩda? A sãooga raoã, la a sõng-a t’a paam tẽebo.

A Zeezi ra tara zo-rãmb a tãab Betani. Yaa a Lazaar ne a yao a Maari la a kẽem a Mart. Daar a ye, a Zeezi ra bee Zʋrdẽ kʋɩlgã rʋʋndẽ, t’a Maari ne a Mart tʋm tɩ b wa yeel-a yaa: ‘A Lazaar yĩnsã zabda wʋsgo. D kotame tɩ f wa tao-tao.’ La a Zeezi pa loog zĩig pʋgẽ ye. Rasem a yiib poore, a yeela a karen-biisã yaa: ‘Yik-y tɩ d kẽng Betani. A Lazaar gõeeme, la mam na n tɩ nek-a lame.’ La a tẽn-tʋmdbã yeelame: ‘A Lazaar sã n gõeeme, a yĩnsã na n sigame.’ La a Zeezi yeel-b-la vẽeneg t’a Lazaar kiime.

A Zeezi sẽn ta Betani wã t’a Lazaar sẽn ki wã yaa rasem a naase. Neb wʋsg n da wa n na n bels a Mart ne a Maari. A Mart sẽn wʋm t’a Zeezi watame wã, a zoeeme n tɩ seg-a, n yeel-a yaa: ‘Zu-soaba, fo sã n da be ka, mam yaoã ra ka na n ki ye.’ La a Zeezi yeel-a lame yaa: ‘Mart, fo yaoã na n vʋʋgame. Fo tẽeda rẽ bɩ?’ A Mart leokame: ‘Mam miime tɩ kũum vʋʋgrã sasa, a na n vʋʋgame.’ La a Zeezi yeel-a lame yaa: “Mam yaa kũum vʋʋgrã la vɩɩmã.”

Rẽ poore, a Mart tɩ yeela a Maari t’a Zeezi waame. A Maari zoeeme n sɛg a Zeezi. La nebã pʋg-a lame. A taame n yĩgimd a Zeezi taoore, la a tar yãbre. A yeelame: ‘Zu-soaba, fo sã n da be ka, mam kẽemã ra ka na n ki ye.’ A Zeezi sẽn yã t’a Maari sũurã sãama wʋsgã, yẽ me sɩnga yãbre. Nebã yeelame yaa: ‘A sɩd ra nonga a Lazaar wʋsgo.’ La neb kẽer sokame yaa: ‘Bõe yĩng t’a pa wa sãoog a zoa wã?’ Rẽ wã, bõe la a Zeezi na n maane?

A Zeezi kẽnga yaoogẽ wã. B ra paga yaoogã noor ne kug-bedre. A yeelame: ‘Tus-y kugrã n lake.’ T’a Mart yeel yaa: ‘Taa rasem a naase. Woto t’a põogame.’ Baa ne rẽ, b laka kugrã. La a Zeezi pʋʋsame n yeel yaa: ‘M Ba, mam pʋʋsda foo barka, fo sẽn kelg maamã. Mam miime tɩ fo kelgda maam wakat fãa. La mam sẽn zẽk m koɛɛg n gomdã yaa sẽn na yɩl tɩ nebã bãng tɩ foo n tʋm maam.’ Rẽ poore, a zẽka a koɛɛg n yeel yaa: ‘Lazaare, wa yi.’ A Lazaar sɩd yiime, la nebã yɛɛsa wʋsgo. B ra vil-a-la ne pɛɛla, t’a Zeezi yeel tɩ b lok pɛɛlã n bas-a t’a looge.

Neb wʋsg sẽn yã rẽ, b tẽe a Zeezi. La kẽer tɩ togsa Fariziyẽ-rãmbã. Rẽ tɛka, Fariziyẽ-rãmbã baoome n na n kʋ a Lazaar ne a Zeezi. A Zida Iskariot sẽn da naag tẽn-tʋmdb 12 soosame n kẽng Fariziyẽ-rãmbã nengẽ, n tɩ yeel-b yaa: ‘Mam sã n sõng yãmb tɩ y yõk a Zeezi, yãmb na n kõo maam wãna?’ Tɩ b yeel-a tɩ b na n kõ-a-la wanzuri ligd bãmb 30. Rẽ tɛka, a Zida sɩngame n baood a sẽn na n maan tɩ Fariziyẽ-rãmbã paam a Zeezi n yõke.

Zʋɩf-rãmbã ra maanda Pakã yʋʋmd fãa, Nizã kiuugã rasem 14 daare. Ra sõngdame tɩ b tẽegd a Zeova sẽn maan n fãag-b yembd Ezɩpti, n tall-b n kẽng tẽng ning a sẽn da yeel t’a na n kõ-b lame wã. Yʋʋmd 33 wã, a Zeezi ne a tẽn-tʋmdbã maana Pakã Zerizalɛm, yĩngr doog a ye pʋgẽ. B sẽn sa wã, a Zeezi yeelame: ‘Yãmb ned a ye n na n maan zãmb tɩ b yõk maam.’ Tẽn-tʋmdbã sũyã sãamame, tɩ b sok a Zeezi yaa: ‘Yaa ãnda?’ La a yeelame: ‘Yaa ned ning mam sẽn na n kõ burã.’ A Zeezi kaooga burã n kõ a Zida Iskariot. La tao-tao bala, a Zida yikame n looge.

Rẽ poore, a Zeezi pʋʋsame, n kao burã n kõ tẽn-tʋmdb nins sẽn ketã, la a yeele: ‘Reeg-y burã n wãbe, bala makda mam yĩngã, mam sẽn na n kõ yãmb yĩngã.’ A leb n dɩka divẽ wã n pʋʋse, n kõ a tẽn-tʋmdbã la a yeele: ‘Reeg-y divẽ wã n yũ, bala makda mam zɩɩmã mam sẽn na n daage, tɩ nebã fãa tõe n paam b yel-wẽnã sugrã. Yãmb na n wa lebga rĩm-dãmba, n dɩ naam ne maam saasẽ. Bɩ y maand woto yʋʋmd fãa, n tẽegd mam yelle.’ Hal ne rũndã, yʋʋmd fãa, daar-n-kãng sã n ta, neb nins sẽn tũud a Zeezi wã ket n tigimda taab n tẽegdẽ. B boonda tigs-kãng t’a Zeezi kũumã tẽegre.

Tẽn-tʋmdbã sẽn dɩ n sa wã, b wẽe no-koɛɛm n na n bãng ned ning sẽn yaa kãseng bãmb sʋka. La a Zeezi yeel-b lame yaa: ‘Ned ning sẽn tagsd tɩ yẽ la bilfu, yẽ n yaa kãseng yãmb sʋka.’

A Zeezi paasame: ‘Yãmb yaa mam zo-rãmba. Mam togsda yãmb bũmb ning fãa mam Ba wã sẽn dat tɩ m togs yãmbã. Ka la bilfu, mam na n looga m Ba wã nengẽ saasẽ. Yãmb na n paa ka nanda, la yãmb sã n nong taaba, nebã na n bãngame tɩ yãmb yaa mam karen-biisi. Nong-y taab wa mam sẽn nong yãmbã.’

Sẽn na n baase, a Zeezi pʋʋsame n kos a Ba wã t’a gũ a karen-biisã fãa, la a sõng-b tɩ b tõog n zems taab n tʋme. A Zeezi pʋʋsame t’a Zeova yʋʋrã paam waoogre. Rẽ poore, yẽ ne a tẽn-tʋmdbã yɩɩlame n pẽg a Zeova, la b yi. Sẽn yɩ bilfu, b wa n yõka a Zeezi.

A Zeezi ne a karen-biisã pasga Sedrõ longã n dʋ Oliiv tɩɩs tãngã. Yʋn-sʋk ra loogame, tɩ kiuugã yaa pɛɛlga. B sẽn ta Gɛtsemane tɩɩsã zĩigẽ, a Zeezi yeel-b lame yaa: ‘Pa-y ka n gũ.’ A zãaga bilfu, n yĩgimdi. A sũurã ra sãama wʋsgo. La a pʋʋsa a Zeova n yeel yaa: “Bɩ f raabã maane.” Rẽ, a Zeova tʋma malɛk t’a wa keng a raoodo. A Zeezi lebg n waa a tẽn-tʋmdbã nengẽ n mik tɩ b fãa gõeeme, t’a yeel-b yaa: ‘Yik-y-yã! Yãmb pa segd n gũs masã ye. Wakat ning b sẽn na n yõk maam n kõ bɛɛbã taame.’

Sẽn yɩ bilfu, a Zida talla neb wʋsg sẽn zãad sʋʋs la rasab n wa. A ra mii a Zeezi sẽn beẽ, bala a Zeezi ne a tẽn-tʋmdbã ra nong n wata be. A Zida ra yeela sodaasã tɩ b sã n ta, yẽ na n maana bũmb tɩ b bãng a Zeezi. B sẽn ta wã, a kolgame n pʋʋs a Zeezi, n mok-a, t’a Zeezi yeel-a yaa: ‘Zida, fo moka maam n na n kɩt tɩ b yõk maam?’

A Zeezi kolga nebã n sok-b yaa: “Yaa ãnda la yãmb baooda?” Tɩ b leok yaa: “Yaa Nazarɛt rao a Zeezi.” T’a Zeezi yeel-b yaa: “Yaa maam!” La nebã tarame n lʋɩ. A le sok-b lame yaa: “Yaa ãnda la yãmb baooda?” Tɩ b le leok tɩ “yaa Nazarɛt rao a Zeezi.” A Zeezi yeel-b lame yaa: ‘Mam yeela yãmb tɩ yaa maam. Bas-y nin-kãensã tɩ b looge.’

A Pɩyɛɛr sẽn bãng tɩ b na n yõka a Zeezi wã, a fooga sʋʋg n fiuug a Malkuus tʋbrã. Yaa maan-kʋʋdb kãsmã tʋm-tʋmda. A Zeezi sɩɩsa raoã tʋbrã, n sãoog-a. Rẽ poore, a yeela a Pɩyɛɛr yaa: ‘Lebs n sui f sʋʋgã. Fo sã n zabd ne sʋʋga, sʋʋg n na n kʋ-fo.’ Sodaasã yõka a Zeezi n sẽb a nusã, la tẽn-tʋmdbã zoeeme. Nebã talla a Zeezi n kẽng maan-kʋʋdb kãsem a Ann nengẽ. A Ann soka a Zeezi sogsgo, la a kɩt tɩ b tall-a n kẽng maan-kʋʋdb kãsem a Kayif nengẽ. Tẽn-tʋmdbã maana wãna?

A Zeezi sẽn wa n be yĩngr doogẽ wã ne a tẽn-tʋmdbã, a yeel-b lame yaa: ‘Yʋngã, yãmb fãa na n zoe n basa maam.’ La a Pɩyɛɛr yeelame: ‘Pa maam yẽ ye. Baa nebã fãa sã n bas foo, mam kõn bas foo ye.’ T’a Zeezi yeel-a yaa: ‘Nand tɩ no-raoog kelme, fo na n kɩɩsa naoor a tãab tɩ f ka mi maam ye.’

Sodaasã sẽn tall a Zeezi n kẽng a Kayif nengẽ wã, tẽn-tʋmdbã wʋsg zoeeme. La a Pɩyɛɛr ne tẽn-tʋmd a to n pʋg nebã. B sẽn ta, a Pɩyɛɛr kẽe a Kayif zakẽ wã, n tɩ yals bugmã sɛɛg n wootẽ. Vẽenemã yĩnga, tʋm-tʋmd-poak a ye bãnga a Pɩyɛɛre, n yeel yaa: ‘Mam mii foo. Fo ra bee ne a Zeezi.’

A Pɩyɛɛr leokame: ‘Pa sɩd ye. Mam pa mi fo sẽn gomd bũmb ningã yell ye.’ Rẽ poore, a kẽnga zakã noore. Beenẽ me, tʋm-tʋmd-poak a to n yã-a n yeel neb nins sẽn da yas be wã yaa: ‘Rao-kãngã ra bee ne a Zeezi.’ La a Pɩyɛɛr yeelame: ‘Mam meng pa mi a Zeezi ye.’ La rao a ye n yeel-a yaa: ‘Fo ra bee ne-a. Fo sẽn gomd to-to wã meng wilgdame tɩ fo yita Galile, wa a Zeezi.’ A Pɩyɛɛr wẽename n yeel yaa: ‘Mam pa mi-a ye!’

Wakat kãnga, no-raoog n kelme. A Pɩyɛɛr yãa a Zeezi sẽn wẽnemd n ges-a. A tẽega a Zeezi sẽn da yeel-a wã, n yi n yãb sõma.

Sãnedrẽ wã neb tigma taab a Kayif zakẽ wã n na n kao a Zeezi bʋʋdo. B ra zoe n yãka yam n na n kʋ-a, la masã b ra baooda bũmb a sẽn maan tɩ pa zemse, n na n tik rẽ n kʋ-a. La b pa yã ye. A Kayif soka a Zeezi yaa: ‘Fo yaa Wẽnnaam Biig bɩ?’ T’a Zeezi leok tɩ n-ye. Dẽ, a Kayif yeelame: ‘A tʋʋsa Wẽnnaam. Bõe la tõnd baood yɛsa?’ Sãnedrẽ wã neb naaga taab n yeel yaa: ‘B tog n kʋʋ rao-kãngã.’ Rẽ poore, b pãba a Zeezi pɛgse, n tʋbs-a kolkoodo, la b pil a nengã n pãb-a, la b yeel-a yaa: ‘Fo sã n yaa no-rɛɛsa, bɩ f togs sẽn yaa ned ning n wẽ foo wã.’

Beoogã sẽn vẽege, b talla a Zeezi n wa Sãnedrẽ wã roogẽ, n le sok-a yaa: ‘Fo yaa Wẽnnaam Biig bɩ?’ T’a Zeezi yeel-b yaa: ‘Yãmb n yeel tɩ mam yaa Wẽnnaam Biiga.’ Rẽ, b yeelame t’a Zeezi tʋʋsa Wẽnnaam, n tall-a n kẽng Rom guvɛrneer a Põns Pɩlat na-yirã. B sẽn ta be wã, bõe n maane? D na n wa yãa rẽ.

Maan-kʋʋdb kãsem-dãmbã talla a Zeezi n kẽng guvɛrneer a Pɩlat zakẽ wã. A sok-b lame yaa: ‘Bõe la rao-kãngã maan-yã?’ Tɩ b leoke: ‘A yeelame tɩ yẽ yaa rĩma.’ T’a Pɩlat soka a Zeezi yaa: “Foo la Zʋɩf-rãmbã rĩmã bɩ?” T’a Zeezi leoke: “Mam Rĩungã pa dũni-kãngã rẽnd ye.”

Rẽ, a Pɩlat kɩtame tɩ b tall a Zeezi n kẽng Galile naab a Erood nengẽ, t’a ges a Zeezi sã n maana bũmb sẽn pa sõma. La a Erood pa yã bũmb ye. A kɩtame tɩ b tall a Zeezi n leb a Pɩlat nengẽ. A Pɩlat yeela nebã yaa: ‘Maam ne a Erood fãa pa yã bũmb a Zeezi sẽn maan tɩ yaa wẽng ye. Mam na n bas-a lame.’ La nebã kelmame n yeele: ‘Kʋ-y-yã-a! Kʋ-y-yã-a!’ Sodaasã pãba a Zeezi ne kalwaase, n tʋbs-a kolkoodo, la b pãb-a nug-gila. B rɩka gõos n maan naam pugl n fõgen-a, n yaand-a n yetẽ: ‘Zʋɩf-rãmbã rĩma, tõnd pʋʋsda yãmba.’ A Pɩlat le yeela nebã yaa: ‘Mam pa ne bũmb a sẽn maan tɩ yaa wẽng ye.’ La b kelmame n yeele: “Ka-y-yã-a ra-luk zugu!” A Pɩlat basame tɩ b yõk a Zeezi n na n tɩ kʋ.

Sodaasã talla a Zeezi n kẽng zĩig b sẽn boond tɩ Golgota, n ka-a raoog zugu, la b zẽk raoogã n sele. A Zeezi pʋʋsa a Zeova n yeele: ‘M Ba, kõ-b sugri. Bala b ka mi b sẽn maandã ye.’ Nebã ra yaanda a Zeezi, n yetẽ: ‘Fo sã n sɩd yaa Wẽnnaam Biiga, bɩ f sig raoogã zugu. Fãag f meng tɩ d gese.’

B ra kaa bi-bees a yiib n yɛgl a Zeezi. A ye n yeel-a yaa: “Yãmb sã n wa be y Rĩungã pʋgẽ bɩ y tẽeg m yelle.” La a Zeezi yeel-a lame yaa: “F na n zĩnda ne maam Arzãnã pʋgẽ.” Midi poore, tẽngã fãa lebga lik bida, n kaoos lɛɛr a tãabo. A Zeezi karen-biis n da yas ra-lukã sɛɛga. A Zeezi ma a Maari ra bee be. A Zeezi yeela a Zã t’a ges a Maari yell wa a mengã ma.

A Zeezi wa n yeelame: “A pidsame!” A sulga a zugã, n kell n ki. Wakat kãng bala, tẽngã rigimda ne pãnga. La rido-kẽengã sẽn da welgd wẽnd-doogã zĩ-sõngã ne zĩ-sõng sẽn yɩɩdã pãrga zĩis a yiibu. Soda-naab a ye sẽn da be beenẽ yeelame yaa: ‘Rao-kãngã sɩd ra yaa Wẽnnaam Biiga.’

A Zeezi sẽn ki wã, rakãagr a ye b sẽn boond t’a Zozɛf kosa a Pɩlate, n na n sik a Zeezi kũumã raoogã zugu. A Zozɛf manega pɛɛl n ning parfẽ, n vil a Zeezi yĩngã, n tɩ mum yaoog sẽn yaa paall pʋgẽ. A kɩtame tɩ b tus kug-bedr n pag yaoogã noore. Maan-kʋʋdb kãsem-dãmbã yeela a Pɩlat yaa: ‘Tõnd zoeta a Zeezi karen-biisã na n wa rɩk a kũumã, n yeel t’a vʋʋgame.’ Rẽ n so t’a Pɩlat yeel-b yaa: ‘Sog-y yaoogã noore, la y gũ.’

Rasem a tãab-n-soabã, pagb n yik yibeoog pĩnd n kẽng yaoogẽ wã, n mik tɩ kug-bedrã lakame. Malɛk n da be yaoogã pʋgẽ, n yeel pagbã yaa: ‘Ra yɛɛs-y ye. A Zeezi vʋʋgame. Kẽng-y n tɩ yeel-y a karen-biisã tɩ b tɩ seg-a Galile.’

A Maari sẽn yit Magdala wã zoee tao-tao n tɩ yã a Pɩyɛɛr ne a Zã, n yeel-b yaa: ‘Ned n wa n dɩk a Zeezi kũumã.’ A Pɩyɛɛr ne a Zã zoeeme n kẽng yaoogẽ wã. B sẽn ta n mik tɩ yaa vɩʋʋgã, b lebg n kuilame.

A Maari sẽn lebg n kẽng yaoogẽ wã, a yãa malɛgs a yiib yaoogã pʋgẽ, n yeel-b yaa: ‘Mam pa mi b sẽn dɩk m Zu-soabã kũumã n kẽng zĩig ning ye.’ Rẽ poore, a yãa raoa, n tags tɩ yaa yẽ n gũud tɩɩsã sẽn da beenẽ wã. A yeela raoã yaa: ‘M bõos tɩ f wilg-m fo sẽn tall-a n kẽng zĩig ninga.’ La raoã sẽn bool-a n yeel tɩ “Maari” wã, a bãngame tɩ yaa a Zeezi. A Maari zẽka a koɛɛg n yeel yaa: “Karen-saamba,” la a mobg-a. A Zeezi yeel-a lame yaa: ‘Kẽng n tɩ yeel m saam-biisã tɩ fo yãa maam.’ Tao-tao bala, a Maari zoe n kẽnga karen-biisã nengẽ, n yeel-b tɩ yẽ yãa a Zeezi.

Baraare, karen-biis a yiib n yi Zerizalɛm n debd Emayuus tɩ rao wa paam-ba, n sok-b tɩ b gomda bõe yelle, tɩ b leok-a yaa: ‘Fo pa wʋm tɩ rasem a tãab rũndã, maan-kʋʋdb kãsem-dãmbã kʋʋ a Zeezi? La pagb kẽer yeelame t’a vʋʋgame.’ Raoã sok-b lame yaa: ‘Yãmb pa tẽed no-rɛɛsdbã sẽn da yeelã la? B yeelame tɩ Kirist na n kiime, n lebg n vʋʋge.’ A kell n wilg-b-la Gʋls-sõamyã võore. B sẽn ta Emayuusã, karen-biis a yiibã kosa raoã t’a pa. Rɩɩbã sasa, a sẽn pʋʋsã, b bãngame tɩ yaa a Zeezi. La zĩig pʋgẽ, a menemame.

Karen-biis a yiibã yika tao-tao n leb Zerizalɛm, n kẽng roog ning pʋgẽ tẽn-tʋmdbã sẽn da tigim taabã, n togs-b bũmb ning sẽn maanã. La a Zeezi puka roogẽ wã, tɩ b fãa yã-a. Sɩngrẽ wã, tẽn-tʋmdbã pa tẽ tɩ yaa a Zeezi ye. La a yeel-b lame yaa: ‘Ges-y mam nusã. Sɩɩs-y maam. B ra gʋlsame tɩ Kiristã na n vʋʋgame.’

A Zeezi sẽn vẽneg a meng t’a tẽn-tʋmdbã yã-a wã poore, a Pɩyɛɛr yikame n kẽng Galile mogrẽ wã n na n yõg zĩma. A Toma, a Zak ne a Zã n paas karen-biis a taab n tũ-a. Yʋngã tõre, b pa tol n paam zĩm ye.

Yibeoogã pĩnda, b yãa rao sẽn yas koomã noore. Raoã tool n sok-b lame yaa: ‘Yãmb paama zĩm bɩ?’ La b leokame tɩ ayo. Tɩ raoã yeel-b yaa: “Lob-y zĩm-gãmbrã koom-koglgã rɩtg sẽnes.” B sɩd lobame, la b paama zĩm wʋsgo, hal n pa tõe n tak n kẽes koglgã pʋgẽ ye. Zĩig pʋgẽ, a Zã bãngame tɩ raoã yaa a Zeezi, t’a yeele: “Yaa Zu-soabã!” Tao-tao bala, a Pɩyɛɛr yɩkame n lʋɩ koomẽ wã n dug n tãag koomã noore. Karen-biis a taabã pʋg-a-la ne koom-koglgã.

B sẽn ta koomã noore, b yãa bur ne zĩm sẽn dog bugum zugu. A Zeezi yeel-b lame tɩ b yãk zĩmã b sẽn yõgã bilf n wa tɩ b paas n sẽ. Rẽ poore, a yeel-b lame: ‘Wa-y n dɩ-y-yã.’

B sẽn dɩ n sa, a Zeezi soka a Pɩyɛɛr yaa: ‘Fo nonga maam n yɩɩd zĩmã yõgb bɩ?’ T’a Pɩyɛɛr leoke: ‘N-ye, Zu-soaba. Fo miime tɩ m nonga foo.’ A Zeezi yeel-a lame: ‘Bɩ f ges m piisã yelle.’ A le soka a Pɩyɛɛr yaa: ‘Fo nonga maam bɩ?’ T’a Pɩyɛɛr yeele: ‘Zu-soaba, fo miime tɩ m nonga foo.’ La a Zeezi yeel-a lame: “Kɩɩm mam pe-bi wã.” A Zeezi le sok-a-la naoor a tãab-n-soaba. La a Pɩyɛɛr sũurã sãamame, t’a yeele: ‘Zu-soaba, fo mii bũmb fãa. Fo miime tɩ m nonga foo.’ T’a Zeezi yeel-a: “Rɩlg mam pe-bi wã.” Rẽ poore, a yeela a Pɩyɛɛr yaa: “Kell n tũ maam.”

A Zeezi ne a karen-biisã tigma taaba, t’a kõ-b tʋʋm-kãsenga. A yeel-b lame yaa: ‘Kẽng-y n tɩ sõng-y buud toɛy-toɛyã fãa neb tɩ b lebg mam karen-biisi. Zãms-y bãmb bũmb nins mam sẽn wilg yãmbã, la y lis-ba.’ Rẽ poore, a yeel-b lame yaa: ‘Ra yĩm-y ye. Mam na n zĩnda ne yãmb wakat fãa.’

A Zeezi sẽn vʋʋgã, a vẽnega a meng Galile la Zerizalɛm t’a karen-biis wʋsg yã-a. A maana woto n kaoos rasem 40. A zãms-b-la bũmb wʋsgo, la a maan yel-soalem wʋsg me. Rẽ poore, yẽ ne a tẽn-tʋmdbã sega taab Oliiv tɩɩs tãngã zugu, t’a yeel-b yaa: ‘Kell-y n pa-y Zerizalɛm, n gũ bũmb ning m Ba sẽn yeel t’a na n kõo yãmbã.’

Tẽn-tʋmdbã ra pa wʋmd a Zeezi goamã võor ye. B sok-a lame yaa: ‘Yaa masã la fo na n lebg Israyɛll Rĩm bɩ?’ T’a Zeezi leoke: ‘A Zeova sẽn yãk wakat ning n na n kɩt tɩ mam lebg Rĩmã nan pa ta ye. Ka la bilfu, yãmb na n paama vʋʋsem sõngã, n lebg mam kaset rãmba. Moon-y koɛɛgã Zerizalɛm, Zide, Samari, la dũniyã gill fãa.’

Rẽ poore, a Zeezi zẽkame n loog saasẽ, tɩ sawat lud-a. A karen-biisã ra ket n getame, hal n wa pa le ne-a ye.

Karen-biisã yii Oliiv tɩɩs tãngã zug n sig n leb Zerizalɛm. B ra tigimda taab wakat fãa yĩngr doog pʋgẽ, la b pʋʋsdẽ. B ra gũudame t’a Zeezi vẽneg-b tɩ b bãng bũmb a taab n paase.