Tẽng a ye n da be tɩ b boond tɩ Ʋʋr. Ra pa zãr ne Babɛll ye. Beenẽ nebã ra pa tũud a Zeova ye. B ra pʋʋsda bõn-naandse. La rao a ye n da be be n tũud a Zeova bala. A yʋʋr la a Abrahaam.

Daar a ye, a Zeova yeela a Abrahaam yaa: ‘Bas f tẽngã ne f buudã neba, n kẽng tẽng ning mam sẽn na n wilg foomã.’ Rẽ poore, Wẽnnaam yeelame: ‘Mam na n kɩtame tɩ fo lebg buud wʋsg ba, la fo yĩnga, m na n maana dũniyã nebã wʋsg neere.’

A Abrahaam ra pa mi a Zeova sẽn dat t’a kẽng zĩig ning ye. La a ra miime t’a Zeova na n maana wa a sẽn yeelã. Rẽ n so t’a Abrahaam, a pag a Saara, a ba a Teera n paas a kẽemã biig a Lot wʋk b teed n looge. Sorã yɩɩ woko.

A Abrahaam ne a zakã rãmb wa n taa a Zeova sẽn da ratẽ wã. Tẽngã yʋʋr la Kanaã. Rẽ t’a Abrahaam tara yʋʋm 75. Beenẽ, Wẽnnaam goma ne-a, n yeel yaa: ‘Mam na n kõo fo kambã tẽn-kãngã tɩ b sooge.’ A Abrahaam ne a Saara yaool n da kʋʋlame n pa tar biig ye. Bõe la a Zeova na n maan t’a sẽn yeelã pidsi?

Yʋʋm wʋsg la woto a Saara sẽn lebg a Abrahaam paga. B basa b zakã sẽn da yaa neerã Ʋʋr, n tɩ be fu-roog pʋgẽ. La a Saara pa sãam a sũur ye. Bala a ra miime tɩ b sã n sak a Zeova la sõma.

A Saara sẽn da rat biig ne a sũur fãa wã, a yeela a Abrahaam yaa: ‘M tʋm-tʋmd-poak a Agaar sã n dog fo biiga, a na n yɩɩ ma-me biiga.’ A Agaar sɩd wa n doga bi-ribla. A yʋʋr la a Ismayɛlle.

Yʋʋm wʋsg poore, sãamb a tãab n wa a Abrahaam nengẽ. Rẽ t’a tara yʋʋm 99, t’a Saara tar yʋʋm 89. A Abrahaam tall-b lame tɩ b tɩ zĩnd tɩɩg tẽngre, n segl rɩɩb n kõ-ba. Fo mii sẽn da yaa b rãmb bɩ? Ra yaa malɛgse. B yeela a Abrahaam yaa: ‘Vẽer wakat kãnga, foo ne f pagã na n paama bi-ribla.’ A Saara ra bee fu-roogẽ wã n kelgdẽ. A laa a sũurẽ, n yeele: ‘Mam lebga pʋg-yãanga. M tõe n le rog biiga?’

Yʋʋmd poore, a Saara roga bi-ribla, wa a Zeova malɛkã sẽn da yeelã. A Abrahaam pʋda a yʋʋr t’a Izaak, sẽn dat n yeel tɩ “laado.”

A Izaak sẽn wa n zems yʋʋm a nu, a Saara yãame t’a Ismayɛll mi n yaanda a Izaake. A Saara sẽn da rat a Izaak neerã yĩnga, a kosa a Abrahaam t’a kɩt t’a Agaar ne a Ismayɛll looge. A Abrahaam ra pa rat n sak ye. La a Zeova yeel-a lame yaa: ‘Kelg a Saara. Mam na n gesa a Ismayɛll yelle. La yaa ne a Izaak maasem la mam sẽn togs foo wã na n pidsi.’

A Lot ra bee Kanaã ne a baaba-bil a Abrahaam. A Abrahaam ne a Lot wa n paama rũms wʋsgo, hal tɩ zĩigã ra pa le sekd-b ye. Rẽ n so t’a Abrahaam yeel a Lot yaa: ‘Tõnd pa tõe n le naag taab tẽng a yembr ye. Fo reng n yãk fo sẽn dat n kẽngẽ, tɩ mam yaool n yãke.’ Fo pa tagsd t’a Abrahaam yaa nin-sõng sɩda?

A Lot yãa zĩig sẽn yaa neere, sẽn pẽ tẽng b sẽn boond tɩ Sodom. Koom la yam-maas wʋsg ra bee be. Yẽ ne a zakã rãmb yikame n kẽng be. La b wa n tɩ zĩnda Sodom.

Tẽng n da pẽ Sodom tɩ b boond tɩ Gomoore. Sodom ne Gomoor nebã ra maanda sẽn yaa wẽng wʋsgo, hal t’a Zeova yeel t’a na n sãam-b lame. La a ra pa rat n naag a Lot ne a zakã rãmb n sãam ye. Rẽ n so t’a tʋm malɛgs a yiib tɩ b tɩ yeel a Lot yaa: ‘Yik n zoe n yi tẽngã, bala a Zeova rat n sãam-a lame.’

A Lot pa yik tao-tao n loog ye. Malɛgsã kong n gãda yẽ ne a pagã la b kom-pugli a yiibã nusi, n yiis-b tẽngã. B yeel-b lame yaa: ‘Zoe-y-yã, n da wa ki ye. Ra wẽnemd-y n ges-y poorẽ ye. Yãmb sã n wẽnemd n ges poorẽ, y na n kiime.’

B wa n taa tẽng sẽn boond tɩ Zowaare. La a Zeova kɩtame tɩ bugum ne kidbr ni wa saaga, n dɩ Sodom ne Gomoore. Tẽns a yiibã fãa sãama zãnga. A Lot pagã kɩɩsa a Zeova, n wẽnemd n ges poorẽ, la a lebga yams-kugri. A Lot ne a kom-pugli wã sẽn sak a Zeova wã, b pa ki ye. La b sũur sãama wʋsgo, a Lot pagã sẽn kɩɩs a Zeova wã. Kibarã wilgdame tɩ d segd n saka a Zeova wakat fãa.

A Abrahaam sõnga a biig a Izaak t’a nong a Zeova la a kɩs sɩd t’a sẽn yeelã na n pidsame. A Izaak sẽn wa n tar yʋʋm 25, a Zeova kosa a Abrahaam t’a maan bũmbu. Yaa bũmb sẽn da yaa toog wʋsgo. Yaa bõe?

Wẽnnaam yeela a Abrahaam yaa: ‘M bõos tɩ f rɩk f bi-yẽndã n kẽng Moriya tãng a ye zugu, n maan maoong n kõ maam.’ A Abrahaam ra pa mi bũmb ning sẽn kɩt t’a Zeova kos-a t’a maan woto wã ye. Baa ne rẽ, a sakame.

Vẽkembeoogã yibeoogo, a Abrahaam ne a Izaak la tʋm-tʋmdb a yiib rɩka Moriya sore. B kẽna rasem a tãabo, n wa ne tãmsã sẽn be yɩɩga. A Abrahaam yeela a tʋm-tʋmdbã tɩ b yalse, tɩ yẽ ne a Izaak na n kẽng n tɩ maana maoongo. A Abrahaam kõo a Izaak raadã, tɩ yẽ rɩk sʋʋga. A Izaak soka a baaba yaa: ‘Rũngã tõnd sẽn na n tall n maan maoongã bɛɛ?’ T’a leok yaa: ‘M biiga, a Zeova n na n ges tɩ d paame.’

B sẽn ta tãngã zugã, b maana tẽn-kugri. Rẽ poore, a Abrahaam sẽba a Izaak nusã ne a karsã, n gãneg-a tẽn-kugrã zugu.

A Abrahaam sẽn dɩk sʋʋgã, a Zeova malɛk zĩnda saasẽ n yeele: ‘Abrahaam, ra maan biigã bũmb ye. Masã mam bãngame tɩ fo tẽeda Wẽnnaam ne f sũur fãa, bala fo sakame n dɩk f biigã n na n maan maoongo.’ Rẽ, a Abrahaam yãa pe-raoogo, t’a yɩɩlã gaag tɩɩga. A yɩɩ tao-tao n lok a Izaake, la a tɩ yõk pe-raoogã n maan maoongã.

Baraar tɛka, a Zeova boola a Abrahaam t’a zoa. Fo mii sẽn yaa bũmb ning yĩng bɩ? Yaa a Abrahaam sẽn da maand a Zeova sẽn date, baa a sã n mi n pa wʋmd a Zeova sẽn da ratã võore.

A Zeova leb n yeela a Abrahaam yaa: ‘Mam na n ninga foo barka, la m kɩt tɩ f kambã yɩ wʋsgo.’ A paasame tɩ ne a Abrahaam maasem, a na n maana nin-tɩrsã fãa neere.