A Zeezi tẽn-tʋmdbã tũu noor ning a sẽn kõ-bã, n moon koɛɛgã dũniyã gill zugu. Yʋʋmd 47 wã, saam-biisã sẽn be Ãntiyoosã tʋma a Poll ne a Barnabaas tɩ b na n gilg n moone. B yiibã moona koɛɛgã ne yẽesem Aazimineer soolmã fãa pʋgẽ, wala makre Dɛrbe, Listr la Ikoniyom.

A Poll ne a Barnabaas ra moonda ned buud fãa koɛɛgã, rakã-rãmb la naong rãmba, kom-bɩɩs la nin-kẽemba. Neb wʋsg sakame n lebg Kirist karen-biisi. A Poll ne a Barnabaas moona Sɩpr guvɛrneer a Sɛrziyus Polus koɛɛgã. La rao a ye sẽn bʋgd bagr n mak n na n gɩdg-ba, t’a Poll yeel-a yaa: ‘A Zeova na n sɩbga foo.’ Zĩig pʋgẽ, raoã lebga zoanga. Guvɛrneer a Polus sẽn yã rẽ, a lebga kiris-neda.

A Poll ne a Barnabaas ra moonda zĩig fãa. Zagsẽ, raasẽ, soayã zutu, la Zʋɩf-rãmbã tigsg rotẽ. Vugri, b sãooga rao sẽn da yaa põor Listr tẽngã pʋgẽ. Neb wʋsg sẽn yã yel-solemdã, b tagsame t’a Poll ne a Barnabaas yaa wẽnnaam-dãmba, tɩ b bao n na n maan maand n kõ-ba. La a Poll ne a Barnabaas gɩdg-b lame n yeel yaa: ‘Yaa Wẽnnaam bal la yãmb segd n waooge. Tõnd yaa ninsaalb bala.’ La Zʋɩf-rãmb kẽer n wa n belg nebã tɩ b lob a Poll kuga, n tẽed t’a kiime, tɩ b vu-a n yiis tẽngã. La a ra pa ki ye. Saam-biisã wa n dɩk-a lame n kuili. Rẽ zugẽ, a Poll leba Ãntiyoos.

Yʋʋmd 49 wã, a Poll le gilgame n moon koɛɛgã. A leba Aazimineer n tɩ ges saam-biisã, la a sãag hal Erop n moon koɛɛgã. Wala makre, a kẽnga Atɛn, Efɛɛz, Filip, Tesalonik la tẽns a taaba. A Sɩlaas, a Luk n paas bi-bɩɩg a ye yʋʋr sẽn boond t’a Tɩmote n tũ a Poll n gilgi. B naaga taab n tʋme, n lugl tigimsi, la b sõng tigimsã neb tɩ b tẽebã paam pãnga. A Poll paa Korẽnt yʋʋmd la pʋɩ-sʋka, n sõng saam-biisã. A moona koɛɛgã, n zãms nebã, la a gʋls lɛta n tool tigims wʋsgo. A ra sẽta fu-rot me n koosdẽ. La a wa n leba Ãntiyoos.

Yʋʋmd 52 wã, a Poll le gilga naoor a tãab-n-soab n moone. A sɩnga Aazimineer. A kẽnga hal Filip tẽngã, n lebg n sig Korẽnt. A paa Efɛɛz yʋʋm wʋsgo, n zãms nebã, n sãoog bãad-rãmba, la a sõng tigingã neba. A ra sõsda tigsg roog pʋgẽ daar fãa, tɩ nebã kelgdẽ. Neb wʋsg lebga kiris-neba. A Poll sẽn moon koɛɛgã tẽns wʋsgo, a lebg n waa Zerizalɛm.

Pag n da be Filip tẽngã pʋgẽ, tɩ zĩn tar-a. Zĩnã ra sõngda pagã t’a bʋgd bagre, t’a sẽn tʋmd n kõt neb ninsã paamd ligd wʋsgo. A Poll ne a Sɩlaas sẽn wa Filip n moond koɛɛgã, pagã pʋg-b-la rasem wʋsgo. Zĩnã ra maandame tɩ pagã kelemd n yetẽ yaa: “Nin-kãensã yaa Wẽnnaam sẽn ka to wã yembse.” A Poll wa n baas n yeela zĩnã yaa: ‘Ne a Zeezi yʋʋre, yi n bas pagã.’ Zĩnã sɩd yiime.

Pagã sẽn da tʋmd n kõt neb ninsã sẽn yã tɩ bãmb pa na n le paam ligdã, b sũurã yika wʋsgo, tɩ b yõk a Poll ne a Sɩlaas n kẽng bʋ-kaoodbã taoore, n yeel yaa: ‘Nin-kãensã kɩɩsda tẽngã noyã, la b zãmsd nebã bũmb sẽn yaa toor ne tõnd sẽn mi wã.’ Bʋ-kaoodbã kɩtame tɩ b pãb a Poll ne a Sɩlaase, la b kẽes-b bãens roogo. Sẽn da gũud-a bãens-roogã sẽb-b lame, n kẽes-b zĩig ning sẽn yaa lik bida wã pʋgẽ.

A Poll ne a Sɩlaas ra yɩɩndame n pẽgd a Zeova, tɩ neb a taabã sẽn be bãensã roogẽ wã kelgdẽ. Yʋn-sʋk sasa, tẽngã rigimda wʋsgo. Bãensã roog rigimdame, tɩ kʋɩlensã fãa pagse. Sɛn-dãmbã b sẽn tall n sog bi-beesã kaoome. Sẽn da gũud-a bãens roogã waa tao-tao, n mik tɩ kʋɩlensã pagsame. A sẽn da tẽed tɩ bi-beesã fãa yii n zoeeme wã, a rɩka sʋʋg n na n kʋ a menga.

La a Poll zẽka a koɛɛg n yeele: ‘Da kʋ f meng ye. Tõnd fãa bee ka.’ Raoã kẽeme n yĩgimd a Poll ne a Sɩlaas taoore, n sok-b yaa: “Bõe la mam segd n maan n paam fãagre?” La b yeel-a lame: ‘Foo ne f zakã rãmb tog n tẽe a Zeezi.’ Dẽ, a Poll ne a Sɩlaas sõng-b lame tɩ b bãng a Zeova. Raoã ne a zakã nebã fãa reega lisgu.

A Tɩmote ra yaa bi-bɩɩg n be Listr tigingã pʋgẽ. A baaba ra yaa Gɛrk neda, t’a ma yaa Zʋɩf. A ma yʋʋr la a Eniis, t’a yaab-poakã yʋʋr yaa a Loyiis. B yiibã zãmsa a Tɩmote hal a yãadmẽ, t’a bãng bũmb wʋsg a Zeova zugu.

A Poll sẽn na n gilg naoor a yiib-n-soab n moon koɛɛgã, a tɩ gesa Listr tigingã neba. A gũus n gesame t’a Tɩmote ra nonga saam-biisã wʋsgo, n sõngd-b ne a sũur fãa. A Poll kos-a lame t’a tũ yẽ n gilgi. Bilf-bilfã, a Poll sõnga a Tɩmote t’a moon koe-noogã sõma, la a bãng nebã zãmsgo.

A Poll ne a Tɩmote sẽn da kẽngẽ fãa, vʋʋsem sõngã ra sõngd-b lame. Daar a ye yʋngo, vʋʋsem sõngã vẽnega a Poll t’a yã rao sẽn yet-a t’a wa Masedoan n sõng-ba. Dẽ, a Poll ne a Tɩmote la a Sɩlaas n paas a Luk kẽnga be n tɩ moon koɛɛgã la b lugl tigimsi.

Tesalonik sẽn yaa Masedoan tẽng a ye wã pʋgẽ, rap la pagb wʋsg n lebg a Zeezi karen-biisi. La Zʋɩf-rãmb kẽer ra maanda sũ-kiir ne a Poll la a tũud-n-taasã. B tigma neb wʋsgo, tɩ b yõg saam-biisã n tall n kẽng tẽngã taoor dãmb nengẽ, n yeel-b yaa: ‘Nin-kãensã yaa Rom tẽngã bɛɛba.’ Yell n da tõe n paam a Poll ne a Tɩmote. Rẽ n so tɩ b yik ne yʋngã n zoe n kẽng Beere.

Neb nins sẽn da be Beere wã sɩd ra ratame n wʋm koe-noogã. Gɛrk-rãmb la Zʋɩf-rãmb n lebg a Zeezi karen-biisi. Zʋɩf-rãmb kẽer n yi Tesalonik n wa n na n sãam koɛɛgã moonego. La a Poll zoe n looga Atɛn. A Tɩmote ne a Sɩlaas paa Beere n sõng saam-biisã. A Poll wa n yeela a Tɩmote t’a leb Tesalonik n tɩ sõng saam-biisã, bala neb n da namsd-b wʋsgo, b sẽn tũud a Zeezi wã yĩnga. A wa n tʋma a Tɩmote t’a gilg n sõng tigims wʋsgo.

A Poll yeela a Tɩmote yaa: ‘B na n namsa neb nins sẽn dat n tũ a Zeova wã.’ B namsa a Tɩmote menga, la b kẽes-a bãens roogo. La a sũur da noomame, a sẽn paam n na n wilg t’a sakda a Zeova wã.

A Poll yeela Filip tẽngã saam-biisã yaa: ‘M na n tʋma a Tɩmote yãmb nengẽ. A na n sõnga yãmb tɩ y tõog n tũ a Zeova sõma, la a wilg yãmb y sẽn segd n moon koɛɛgã to-to.’ A Poll ra miime t’a Tɩmote sɩd na n maana woto. A Poll ne a Tɩmote yɩɩ zo-rãmb n kaoos yʋʋm wʋsgo, la b naag taab n tʋm a Zeova tʋʋmdã.

A Poll sẽn gilg naoor a tãab-n-soab n moon koɛɛgã, a lebg n waa Zerizalɛm. La b yõk-a lame n kẽes bãens roogo. Ne yʋngã, a Zeezi yeel-a lame yaa: ‘Fo na n kẽnga Rom n tɩ moon koɛɛgã.’ B talla a Poll n yi Zerizalɛm n kẽng Sezaare. Be, a maana yʋʋm a yiib bãensã roogẽ. B wa n tall-a lame n kẽng guvɛrneer a Fɛstus taoore, t’a yeel yaa: ‘M datame t’a Sezaar kao mam bʋʋd Rom.’ A Fɛstus leokame: “Fo sẽn dat t’a Sezaar kao fo bʋʋdã, yaa a Sezaar n na n kao fo bʋʋdã.” B kẽesa a Poll koom-koglg pʋgẽ t’a na n loog Rom, la saam-biis a yiib n tũ-a. Yaa a Luk ne a Aristark.

B sẽn wa n be koomã zugã, sob-kẽeng n yiki, n fug n kaoos rasem wʋsgo. Nebã fãa ra tẽedame tɩ b na n kiime. La a Poll wa n yeelame: ‘Kelg-y-yã. Malɛk n yeel maam zãmsd pʋgẽ yaa: “Polle, ra zoe rabeem ye. Fo segd n yalsa a Sezaar taoore.” Dẽ wã yĩnga, ra yɛɛs-y ye. Ned baa a ye pa na n ki ye.’

Sobgã kaoosa rasem 14. B wa n tool n nee tẽnga. Yaa Malt tẽngã. Koom-koglgã yẽ ra fãoo bũmb n wã zãnga, la neb kobs-yi la pis-yopoe la yoobã baa a ye pa ki ye. Kẽer rugame, tɩ sãnda gãd koom-koglgã ra-pɛgdã n dug n ta koomã noore. Malt nebã gesa b yell sõma, n widg bugum n kõ-b tɩ b woode.

Kiis a tãab poore, sodaasã talla a Poll n kẽ koom-koglg a to pʋgẽ n loog Rom. B sẽn ta wã, saam-biisã wa n seg-a lame. A Poll sẽn yã-bã, a paama raoodo, n pʋʋs a Zeova barka. Baa b sẽn da yõk a Pollã, b basame t’a bao roog n be be, n yaooda, la b kɩt tɩ sodaag gũud-a. A zĩnda be yʋʋm a yiibu, tɩ nebã wat n get-a, t’a moond-b Wẽnnaam Rĩungã koɛɛga, la a zãmsd-b bũmb wʋsg a Zeezi zugu. A Poll gʋlsa lɛta wʋsg me n tool tigimsã sẽn be Aazimineer la Zide wã. A Zeova sɩd kɩtame t’a Poll moon koe-noogã tẽns wʋsgo.