7, 8. Zu-loe-bʋs la a Zoob paam-yã, la a sẽn tõog toog n kell n sak a Zeova wã wilga bõe?

⁷ A Zeova basa a Sʋɩtãan t’a kɩt tɩ zu-loees toor-toor paam a Zoobe. (Zoob 1:12-19) A Zoob manesem yɩɩ wãn zu-loeesã pʋgẽ? Biiblã wilgame t’a pa tol n “yeel tɩ Wẽnnaam ka maan-a neer ye.” (Zoob 1:22) La a Sʋɩtãan pa bas woto ye. A wa n yeelame tɩ “gãong ned gãong yĩnga. Ned na n dɩka a sẽn tar fãa n kõ a vɩɩm yĩnga.”b (Zoob 2:4) Rẽnd a Sʋɩtãan wilgame t’a Zoob mengã sã n paam toog a yĩn-gãongã pʋgẽ, a na n kɩɩsa a Zeova tɩ wilg t’a pa sak n deeg tɩ yaa yẽ la a soab ning sẽn ka to wã ye.