“Yãmb ka mi daarã la wakatã me ye”

“Woto yĩnga, bɩ y gũ, tɩ bõe, yãmb ka mi daarã la wakatã me ye.”—MAT. 25:13.

1-3. a) Mak-bʋs n tõe n sõng-d tɩ d wʋm a Zezi yel-bũn a yiib võore? b) Sogs-bʋs la d na n leoke?

TAGS-Y n ges-y yãmb sẽn na n yaa sofɛɛre, tɩ y tẽngã nin-kãseng a ye kos-y tɩ y wa rɩk-a t’a kẽng sɛk sẽn tar yõod wʋsgo. Yãmb sẽn wa n dat n tɩ rɩk-a wã, y mikame tɩ y esãensã pa na n sek kẽndã, tɩ y kẽng tao-tao n na n tɩ ra. La yãmb sẽn kẽng esãensã raabã, nin-kãsengã yõd n yiime, n gẽes yãmb n pa yã ye. A sɛkã sẽn kolgã yĩnga, a ra pa tõe n yals n gũ yãmb ye. A kosa ned a to t’a rɩk-a n tɩ siki. Sẽn yɩ bilfu, yãmb lebg n waame n mik t’a loogame. Y sũur kõn sãam sɩda?

² Masã, tags-y n ges-y sã n da yaa yãmb la nin-kãsengã. Nand tɩ y loogã, y boola neb a tãab n kõ-b tʋʋmd sẽn tar yõodo, n wilg-b yãmb sẽn dat tɩ b tʋm to-to wã, tɩ b fãa sake. La yãmb sẽn wa n lebg n wa, y mikame tɩ yaa neb a yiib bal n tʋm tʋʋmdã. Yãmb sẽn sok sẽn pa tʋm-a wã, a padmame. A pʋd n pa mak meng ye. Y sũur na yɩ noog ne-a sɩda?

³ Mak-kãensã wõnda a Zezi yel-bũn a yiibu. Yaa a yel-bũnd ning sẽn gomd pʋg-sadb piig yellã, la sẽn gomd-a talã-rãmb yellã. A wẽe yel-bũn-kãens n na n wilg tɩ dũniyã saab wakate, kiris-neb nins sẽn paam vʋʋsem sõngã zaeebã sãnda na n wilgame tɩ b tara yam la tɩ b tũuda sɩdã, la tɩ kẽer pa na n maan woto ye.a (Mat. 25:1-30) A Zezi wilga a yel-bũnã võore, n yeele: “Woto yĩnga, bɩ y gũ, tɩ bõe, yãmb ka mi daarã la wakatã me ye.” A ra gomda wakat ning a sẽn na n wa sãam a Sʋɩtãan dũniyã yelle. (Mat. 25:13) Tõnd me segd n tũu sagl-kãngã rũndã-rũndã. D sã n tũ a Zezi saglgã, wãn to la d na n nafe? Ãnd rãmb n zoe n gũ? La bõe la d segd n maan n tõog n gũ?