9. Bõe la neb kẽer tẽed burã wɛɛngẽ tɩ pa zemse?

⁹ A Zezi sẽn yeel tɩ ‘yãoã yaa yẽ yĩngã’ kɩtame tɩ neb kẽer tẽed tɩ burã sɩd lebga a Zezi yĩngã. La pa yɩ woto ye.a A Zezi ra zĩi tʋm-tʋmdbã taoore, tɩ bur sẽn ka ning rabɩllã me rɩg b taoore. Rẽnd yaa vẽeneg t’a maka burã ne a yĩngã, wa a sẽn da wae n dɩkd makr n zãmsd nebã.—Zã 2:19-21; 4:13, 14; 10:7; 15:1.

10. Soaalã zaabr dɩɩbã sasa, burã makda bõe?

¹⁰ Burã sẽn da rig tʋm-tʋmdbã taoor tɩ b na n wãbã makda a Zezi yĩngã. Pĩndã, kiris-neb hakɩkã ra tagsdame tɩ burã makda sẽn paam-b vʋʋsem sõng zaeebã, Biiblã sẽn boond b rãmb tɩ “Kirist yĩngã.” B ra tagsda woto, bala a Zezi kao burã n kõ a tʋm-tʋmdbã, tɩ b yaool n pa kao yẽ mengã kõbr baa a ye a kũumã sasa ye. (Ef. 4:12; Rom 12:4, 5; 1 Kor. 10:16, 17; 12:27) La b sẽn maan vaeesgo, b bãngame tɩ burã makda a Zezi yĩngã. Biiblã wilga a Zezi ‘sẽn nams a yĩngã pʋgẽ’ to-to, hal n ki kũum da-luk zugu. Rẽnd Soaalã zaabr dɩɩbã sasa, burã makda a Zezi yĩngã a sẽn kõ tɩ yɩ maoong tõnd yel-wẽnã yĩngã.—1 Pɩɛ. 2:21-24; 4:1; Zã 19:33-36; Heb. 10:5-7.

15, 16. Bõe la b maand ne burã Soaalã zaabr dɩɩbã sasa?

¹⁵ Sõsgã sã n wa kolg saabo, sõsdã na n wilgame tɩ wakat taame tɩ d na n maan wa a Zezi sẽn yeel a tʋm-tʋmdbã tɩ b maanã. Wa d sẽn da togsã, bur sẽn ka ning rabɩlle, la divẽ la b talld n maand Soaalã zaabr dɩɩbã. Y na n mikame tɩ rẽ zoe n bee taabl zugu, sõsdã sɛɛga. Sõsdã na n karma Biiblã n wilg a Zezi sẽn maan to-to ne burã, la a sẽn yeel bũmb ningã. Wala makre, a Matɩe Evãnzillã yeta woto: “A Zezi rɩka bur n ning barka, n kao n kõ b karen-biisã n yeele: ‘Bɩ y reeg n dɩ, yãoã yaa mam yĩnga.’ ” (Mat. 26:26) A Zezi kaoa burã, sẽn na yɩl n kõ a tʋmd-tʋmdbã sẽn da zĩ a goabg la a rɩtgã. Tʋʋl-nif kiuug rasem 14 daare, y na n mikame tɩ b zoe n kaoa bur sẽn ka ning rabɩlle, tɩ be asiɛt-rãmb pʋsẽ.