-
Wãn to la b moond koe-noogã?Vɩɩmd-y wakat sẽn kõn sa!—Biiblã zãmsg sebre
-
-
SAK 21
Wãn to la b moond koe-noogã?
Ka la bilfu, a Zeova na n tũnuga ne a Rĩungã n kɩt tɩ d zu-loeesã fãa sa. Woto yaa koe-noogo, hal tɩ d pa tõe n pa togs neb a taabã ye. A Zeezi yeela a karen-biisã tɩ b taas nebã fãa koe-kãnga! (Matiye 28:19, 20) Bõe la a Zeova Kaset rãmbã maand tɩ wilgdẽ tɩ b tũuda a Zeezi noorã?
1. Wãn to la Matiye 24:14 goamã pidsd rũndã-rũndã?
A Zeezi pĩnd n togsame yaa: “Rĩungã koe-no-kãngã na n moona dũniyã tɛk fãa.” (Matiye 24:14) A Zeova Kaset rãmbã sũur nooma b sẽn paam n naag n tʋmd tʋʋm-kãngã sẽn tar yõod wʋsgã. D moonda koe-noogã dũniyã gill zugu, buud-goam tusr la zak pʋsẽ! Sẽn na yɩl n tõog n tʋm tʋʋm-kãngã sẽn yaa kãsengã baooda modgre, la baoodẽ me tɩ d sigl sõma. Sã n pa tũ ne a Zeova sõngre, d pa tõogd tʋʋmdã ye.
2. Bõe la d maand sẽn na yɩl n paam nebã n taas koɛɛgã?
D moonda zĩis nins fãa nebã sẽn beẽ. D rɩkda pipi kiris-nebã togs-n-taare, n moond “zak-zaka.” (Tʋʋma 5:42) D sẽn maand woto wã, d paamda neb milyõ-rãmb n taasd koɛɛgã yʋʋmd fãa. La sẽn mik tɩ pa wakat fãa la nebã be b zagsẽ wã, d moonda zãma zĩisẽ me. Wakat fãa, d baooda segb n na n gom a Zeova la a raabã yell ne nebã.
3. Ãnd dãmb n segd n moon koe-noogã?
Kiris-ned hakɩɩk fãa segd n taasa neb a taabã koe-noogã. D pa reemd ne tʋʋm-kãngã ye. D moonda koɛɛgã wa d sẽn tõe tɛk fãa, bala fãagda yõya. (Karm-y 1 Tɩmote 4:16.) B pa yaood tõnd sẽn na yɩl tɩ d tʋm tʋʋmdã ye. Bala Biiblã pʋgẽ, b yeelame yaa: “Yãmb deega zaalem, bɩ y kõ zaalem.” (Matiye 10:7, 8) Pa nebã fãa n sakd n kelgd tõnd ye. La d ket n moonda koɛɛgã, bala d miime tɩ d sã n maand woto, d sakda a Zeova, la d noogd a sũuri.
D BAO N BÃNG N PAASE
D ges a Zeova Kaset rãmbã sẽn modgd to-to sẽn na yɩl n moon koɛɛgã dũniyã gill zugã, la a Zeova sẽn sõngd-b to-to wã.
D moonda koɛɛgã dũniyã gill zugu: (A) Kostarika, (B) Etazĩni, (D) Benẽ, (E) Taylãnde, (F) Yappe, (G) Suwɛɛde
4. D modgda wʋsg sẽn na yɩl tɩ koɛɛgã ta nebã fãa
A Zeova Kaset rãmbã maanda modgr wʋsg sẽn na yɩl n moon nebã koe-noogã zĩig fãa. Ges-y VIDEO wã, tɩ rẽ poor bɩ y leok sokrã.
A Zeova Kaset rãmbã sẽn modgd sẽn na yɩl n moon koɛɛgã wɛɛngẽ, bõe n noom yãmba?
Karm-y Matiye 22:39 la Rom dãmb 10:13-15, tɩ rẽ poor bɩ y leok sogsgã:
Wãn to la tõnd sẽn moond koɛɛgã wilgd tɩ d nonga d taabã?
A Zeova tagsg yaa wãn ne neb nins sẽn moond koe-noogã?—Ges-y vɛrse 15 wã.
5. Tõnd yaa Wẽnnaam tʋmd-n-taase
Kibay wʋsg n wilgd t’a Zeova wilgda tõnd sor koɛɛgã mooneg pʋgẽ. Wala makre, daar a ye zaabre, Nuvɛll Zelãnd saam-biig yʋʋr sẽn boond t’a Poll n da moond koɛɛgã zak-zaka, n wa ta zak a ye n mik paga. Baraar yibeoogã bala, pagã ra pʋʋsa Wẽnnaam n pʋd a yʋʋrã sẽn yaa Zeova wã, n kos t’a tʋm ned t’a wa sõs ne-a. Ad saam-biig a Poll sẽn yeele: “Lɛɛr a tãab poor bala, mam taa a zakã noore.”
Karm-y 1 Korẽnt rãmb 3:9, tɩ rẽ poor bɩ y leok sokrã:
Wãn to la kibay wa a soab ning sẽn zĩnd Nuvɛll Zelãndã yaa kaset t’a Zeova wilgda tõnd sor koe-moonegã pʋgẽ?
Karm-y Tʋʋm 1:8, tɩ rẽ poor bɩ y leok sokrã:
Bõe yĩng tɩ yaa tɩlɛ tɩ d paam a Zeova sõngre, sẽn na yɩl n tõog n moon koɛɛgã?
Yãmb miime bɩ?
Semennã pipi tigsgã sasa, d paamda zãmsg sẽn sõngd tõnd tɩ d paam minim n moon koɛɛgã. Yãmb sã n zoe n kẽnga tigis-kãnga, y tagsg yaa wãn ne zãmsg ning d sẽn paamdã?
6. D sakda Wẽnnaam sẽn kõ noor tɩ d moon koɛɛgã
Pipi kiris-nebã wakatẽ, neb n mak n na n kɩt t’a Zeezi karen-biisã bas koɛɛgã moonego. Pipi kiris-nebã ‘goma bʋ-kaoodb taoor sẽn na yɩl n paam sor n moon koe-noogã.’ (Filip rãmbã 1:7) A Zeova Kaset rãmbã me maanda woto rũndã-rũndã.a
Karm-y Tʋʋm 5:27-42, tɩ rẽ poor bɩ y leok sokrã:
NINA TÕE N SOKAME YAA: “Bõe yĩng t’a Zeova Kaset rãmbã moond zak-zaka?”
Yãmb na n leokame tɩ bõe?
KƲMSGO
A Zeezi yeela a karen-biisã tɩ b taas koe-noogã buud fãa neba. A Zeova sõngda a nin-buiidã tɩ b tʋmd tʋʋm-kãnga.
Lebg-n-gese
Wãn to la b moond koɛɛgã dũniyã gill zugu?
Wãn to la tõnd sẽn moond koɛɛgã wilgd tɩ d nonga d taabã?
Yãmb tagsdame tɩ koe-moonegã tõe n kõ-d-la sũ-noog bɩ? Bõe yĩnga?
BŨMB A TAABA
A Zeova Kaset rãmbã sẽn maand to-to, n moond galʋ-tẽn-bɛd pʋsẽ.
Bõe la a Zeova Kaset rãmbã maand n tõogd n taasd koɛɛgã neb sẽn zoe n bas b tẽnga?
Pag a ye sẽn kẽesd a sẽk zãng koɛɛgã mooneg pʋgẽ sẽn wilgd rẽ sẽn kõt-a sũ-noog to-to.
A Zeova Kaset rãmbã kẽnga bʋ-kaoodb taoor n tɩ paam bʋʋm naoor wʋsgo, tɩ sõng tɩ koɛɛgã mooneg lebg nana.
“Rĩungã koe-moonegã yell taa bʋ-kaoodbã taoore” (Wẽnnaam Rĩungã Rĩm rɩta naam!, sak 13)
a Yaa Wẽnnaam n yeel tɩ d moon koɛɛgã. Woto wã, pa tɩlɛ t’a Zeova Kaset rãmbã kos nanambsã sor sẽn na yɩl n moon koe-noogã ye.
-
-
Y sã n modg n wa reeg lisgu, y na n paama bark wʋsgo!Vɩɩmd-y wakat sẽn kõn sa!—Biiblã zãmsg sebre
-
-
SAK 23
Y sã n modg n wa reeg lisgu, y na n paama bark wʋsgo!
A Zeezi wilgame tɩ ned sã n dat n lebg yẽ karen-biiga, yaa tɩlɛ t’a reeg lisgu. (Karm-y Matiye 28:19, 20.) La reeg lisg rat n yeelame tɩ bõe? Bõe la ned segd n maan n wa tõog n deeg lisgu?
1. Reeg lisg rat n yeelame tɩ bõe?
Gɛrk gom-bil ning b sẽn lebg tɩ “lisã” võorã yaa “bõr koomẽ.” A Zeezi sẽn wa n na n deeg lisgã, b bõr-a-la Zʋrdẽ kʋɩlgã pʋgẽ. Rẽ poore, a ‘yii koomẽ wã.’ (Mark 1:9, 10) Woto me, b sã n na n lis ned t’a lebg kiris-ned hakɩɩka, b lisd-a-la zãnga, bɩ b bõrd-a-la koomã pʋgẽ.
2. Ned sã n deeg lisgu, wilgda bõe?
Ned sã n deeg lisgu, a wilgdame t’a rɩka a meng n kõ Wẽnnaam a Zeova. Wãn to la ned rɩkd a meng n kõ Wẽnnaam? Nand tɩ ned reeg lisgu, a segd n pʋʋsa a Zeova yẽ a yembre, n yeel-a t’a rat n tũ-a-la wakat fãa yĩnga. A pʋlemdame t’a na n waooga a Zeova a ye tãa, la tɩ bũmb ning sẽn na n tall yõod n yɩɩd ne-a yaa Wẽnnaam daabã maanego. A yãka yam n na n “kɩɩs a mengã raabo,” la a kell n tũ bũmb ning a Zeezi sẽn zãms nebã, la a rɩk a togs-n-taare. (Matiye 16:24) A sẽn dɩk a meng n kõ a Zeova n deeg lisgã kɩtame t’a tõe n paam zood sõma ne a Zeova, la ne a tẽed-n-taasã.
3. Bõe la ned tog n maan n yaool n tõog n deeg lisgu?
Nand tɩ y tõog n deeg lisgu, tara yõod tɩ y bao n bãng a Zeova, la y bɩɩs y tẽebã. (Karm-y Ebre-rãmb 11:6.) Y bãngrã la y tẽebã sã n paasdẽ, y sẽn nong a Zeova to-to wã me na n paasdame. Y na n dat n moonda koɛɛgã n gomd a yelle, la y tũud a noyã. (2 Tɩmote 4:2; 1 Zã 5:3) Naoor wʋsgo, ned sã n modg t’a sẽn vɩ to-to wã ‘waoogd a Zeova, tɩ tat a yam zãnga,’ a yãkda yam n dɩk a meng n kõ Wẽnnaam, n deeg lisgu.—Kolos rãmbã 1:9, 10.a
D BAO N BÃNG N PAASE
D ges a Zeezi sẽn deeg lisgã sẽn sõngd tõnd tɩ d bãng bũmb ninga, la ned sẽn tõe n segl a meng to-to n wa reeg lisgu.
4. A Zeezi lisgã sẽn sõngd tõnd tɩ d bãng bũmb ninga
Karm-y Matiye 3:13-17, n bãng a Zeezi lisgã sẽn yɩ to-to wã. Rẽ poor bɩ y leok sogsgã:
B sẽn wa n na n lis a Zeezi wã t’a ra yaa bi-pɛɛlg bɩ?
Wãn to la b lis-a? Yaa koom la b yãk n mes-a bɩ?
A Zeezi sɩnga tʋʋmd ning Wẽnnaam sẽn kõ-a t’a tʋm tẽngã zugã, a lisgã poore. Karm-y Luk 3:21-23 la Zã 6:38, tɩ rẽ poor bɩ y leok sokrã:
A Zeezi lisgã poore, tʋʋm-bʋg n da pak-a n yɩɩda?
5. Y tõe n modgame n wa reeg lisgu
Sɩngrẽ wã, y tõe n getame tɩ rɩk y meng n kõ Wẽnnaam n deeg lisgã yaa toog wʋsgo. La y sã n kell n zãms Biiblã, y na n bãnga a Zeova sõma, n wa tõog n dɩk y meng n kõ-a n deeg lisg n pa yɛɛs ye. Sẽn na yɩl n bãng neb kẽer sẽn maan dẽ to-to, bɩ y ges VIDEO wã.
Karm-y Zã 17:3 la Zak 1:5, tɩ rẽ poor bɩ y leok sokrã:
Wãn to la ned tõe n segl a meng n wa reeg lisgu?
Rɩk f meng n kõ a Zeova yaa f sẽn na n yeel-a tɩ f na n tũ-a-la wakat fãa yĩnga
D lisgã sasa, d wilgda nebã taoor tɩ d rɩka d meng n kõ Wẽnnaam
6. Ned sã n deeg lisgu, a lebgda a Zeova zakã neda
Ned sã n deeg lisgu, a lebgda a Zeova zakã neb sẽn be dũniyã gill zugã neda. Baa d sẽn yit tẽns toor-toore, tɩ d yɛlã me yaa toor-toorã, bũmb nins d sẽn tẽedã, la noy nins d sẽn tũudã fãa yaa a ye. Karm-y Yel-bũn 3:32 la 1 Pɩyɛɛr 2:17, tɩ rẽ poor bɩ y leok sokrã:
Sã n yaa ne vɛrse-kãensã sẽn yetã, ned sã n deeg lisgu, wãn to la nafd-a?
NEB KẼER SẼN YETE: “Mam nan pa segl n sa n na n deeg lisg ye.”
Sã n yaa woto ne yãmb me, y tagsdame tɩ yɩta sõma tɩ y modg n wa reeg lisg bɩ?
KƲMSGO
A Zeezi wilgame tɩ ned sã n dat n lebg yẽ karen-biiga, yaa tɩlɛ t’a reeg lisgu. Ned sã n dat n wa reeg lisgu, a segd n bɩɩsa a tẽebã, n tũud a Zeova noyã, la a rɩk a meng n kõ-a.
Lebg-n-gese
Reeg lisg rat n yeelame tɩ bõe, la bõe yĩng tɩ rẽ tar yõodo?
Bõe yĩng tɩ rɩk f meng n kõ Wẽnnaam la lisgã reegr tar yõodo?
Bõe la ned segd n maan n yaool n dɩk a meng n kõ Wẽnnaam n deeg lisgu?
BŨMB A TAABA
Reeg lisg sẽn dat n yɛɛlga, la sẽn pa rat n yɛɛlga.
Bũmb toor-toor ned sẽn tõe n maan n wa tõog n deeg lisgu.
“Ned sã n nong a Zeova la a rat n pʋʋs-a barka, a reegda lisgu” (Yʋʋmd 2020 tʋʋlg kiuug Gũusg Gasgã)
Bũmb ning sẽn kɩt tɩ rao a ye yãk yam n deeg lisgu.
Bõe yĩng tɩ lisgã reegr tar yõodo, la bõe la y tõe n maan n segl y meng n wa tõog n deeg lisgu?
“M segd n deega lisg bɩ?” (Les jeunes s’interrogent. Réponses pratiques [volume 2], chapitre 37)
a Ned sã n da zoe n deega lisg tũudum a to pʋgẽ, a segd n le reega lisgu. Bõe yĩnga? Bala, tũudum-kãng pa zãmsd nebã sɩdã sẽn be Biiblã pʋgẽ wã ye.—Ges-y Tʋʋm 19:1-5 la seb-kãngã sak 13.
-