A Zeezi wilgame tɩ sẽn tũud-b yẽ wã tõe n paama nams-toaaga. La sẽn na yɩl tɩ b bas b yam, a yeela woto: “B sã n tall yãmb n kẽnge, bɩ y da maan yɩɩr ne yãmb sẽn na n gom to-to, wall y sẽn na n yet tɩ bũmb ning ye. Wakat-kãng bala, b na n wilga yãmb bũmb ning y sẽn na n gomã. Bala, ka yãmb n na n gom ye, yaa yãmb ba sẽn be arzãnã [“saasẽ,” MN] Sɩɩgã sẽn be yãmb pʋsã n na n gome.” A Zeezi paasa woto: “Ned na n kɩtame tɩ b yõk a ba-biig n kʋ, la ba-rãmb me na n maana b kamb a woto. Kamb na n yika ne b ba-rãmb la b ma-rãmb n kɩt tɩ b kʋ-ba. Neba fãa na n kisga yãmb mam yʋʋrã yĩnga, la ned ning sẽn na n yals-a kãenkãe tɩ wakat ta na paam fãagre.”—Matye 10:19-22.

A Zeezi sẽn kõ a tʋm-tʋmdb 12 noy la saglse, n keoog-b la a keng b raoodã sɩd sõng-b-la wʋsgo. La hal baa a Zeezi kũumã la a vʋʋgrã poore, a gom-kãensã na n kell n sõnga neb nins fãa sẽn na n kẽes b toog koɛɛgã mooneg pʋgẽ wã. Bõe n wilgd rẽ? Yaa a Zeezi sẽn yeel tɩ ‘nebã fãa na n kisga’ yẽ karen-biisã. A pa yeel tɩ neb nins a tʋm-tʋmdbã sẽn na n tɩ taas koɛɛgã bal n na n kisg-b ye. Sẽn paase, Biiblã pa wilg t’a Zeezi sẽn tʋm a tʋm-tʋmdbã tɩ b moon koɛɛgã Galɩle wã, neb n tall-b n kẽng gʋvɛrneer dãmb ne rĩm-dãmb taoore, wall b zags rãmb n kɩt tɩ b kʋ-b ye.

Dẽnd yaa vẽeneg t’a Zeezi ra gomda bũmb sẽn da nan wat yelle. D tẽeg t’a yeelame t’a karen-biisã pa na n saag tẽns nins b sẽn da segd n moonã n sa tɩ “Ninsaal Bi-riblã nan ka wa ye.” A gomdã wilgdame t’a karen-biisã pa na n moon Wẽnnaam Rĩungã koɛɛgã n sa tɩ Kirisã nan pa wa ne naam la ziiri, n na n sɩng Wẽnnaam bʋ-kaoorã ye.