1, 2. a) Bool-bʋg sẽn be yamleoog la b taas neb nins fãa sẽn dat n kẽes-b mens baleng sẽn yaa yɩlemdã pʋgẽ wã? b) Bõe n tõe n wa rat n sãam tõnd tẽebã?

TÕND sẽn ya a Zezi karen-biisã yĩnga, d mii a bool-kãngã sẽn be yamleoogã hal sõma: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. . . . Tɩ bõe, mam yɛla yaa naana, la mam zɩɩb yaa faasga.” (Matɩe 11:28-30) Kiris-nebã leb n paamda ‘yolsg sẽn yit a Zeova nengẽ.’ (Tʋʋma 3:19, NW ) Sãmbg sẽn ka be, yãmb meng mii sɩd nins y sẽn zãms Biiblã pʋgẽ wã sẽn wat ne yolsg ningã, n tar beoog-raar saagr sẽn kõt sũ-noog la y tũud a Zeova noyã y vɩɩmã pʋgẽ.

² Baasg zãnga, a Zeova sõgen dãmbã kẽer sũy mi n wa sãamame. Wakat ninga sũ-sãangã pa kaoosd ye. La sasa ninga a tõe n kaoosa wʋsgo. Sã n beẽ n beẽ, neb kẽer tõe n wa tagsdame tɩ kiris-ned tʋʋmã lebga zɩɩb sẽn zɩs wʋsg ne bãmba, la tɩ pa kõt vʋʋsg wala a Zezi sẽn da kãabã ye. Tags-kɛg woto tõe n wa rat n sãama zood ning kiris-ned sẽn tar ne a Zeova wã.

Kirist tũudmã pa weoogd ned ye

5. Yɩ kiris-nedã wɛɛngẽ, bõe n tõe n wõnd lebende?

⁵ Yaa sɩd tɩ f sã n yaa kiris-neda f segdame n mao wʋsgo. (Luk 13:24) A Zezi pʋd n da yeela woto: “Ned ninga fãa sẽn ka rɩkd a kũum [da-luk] n tũ maam, a ka tõe n yɩ mam karen-biig ye.” (Luk 14:27) F sã n kelg gom-kãensã zugẽ-zugẽ, tõe n wõnda wa b yaa lebend ne a Zezi sẽn da yeel tɩ yẽ zɩɩbã yaa faasg n kõt vʋʋsgã, la gom-kãensã yaool n pa kɩɩsd taab ye.

6, 7. Bõe yĩng tɩ d tõe n yeel tɩ tõnd sẽn balemd Wẽnnaam to-to wã pa wat ne yaamse?

⁶ Baa yĩn-wɩsgr la tʋʋm tood sẽn tõe n wa ne yĩngã yaamsã, rẽ tõe n kõo sũ-noog la yolsgo, sã n mikame tɩ yaa bũmb sẽn be bark yĩng la d maand rẽ. (Koɛɛg Soaba 3:13, 22) La bõe n ye be t’a bark yɩɩd d sẽn na n taasd d taabã sɩd ning sẽn be Biiblã pʋgẽ wã? Sẽn paase, d sã n ges nafa nins d sẽn paamd d sẽn modgd n tũud vɩɩm manesem noy nins Wẽnnaam sẽn kõ wã sẽn tar yõod wʋsgã, d mikdame tɩ d naongã pa baa fʋɩ ye. (Yelbũna 2:10-20) Baa b sã n wa namsd-d Wẽnnaam Rĩungã yĩnga d na n gesa rẽ wala waoogre.—1 Pɩɛɛr 4:14.

⁷ A Zezi zɩɩbã sɩd kõta yolsgo, sẽn yɩɩd fãa, d sã n mak-a ne tẽeb lik ning pʋgẽ neb nins sẽn ket ziri tũudmã pʋgẽ sẽn be wã. Wẽnnaam nong-d-la hal wʋsgo, la a pa baood tɩ d maan yɛl d sẽn pa tõe ye. A Zeova ‘tõogã ka toog ye.’ (1 Zã 5:3) Kirist tũudum hakɩkã b sẽn bilg Gʋlsg Sõamyã pʋgẽ wã sakr pa weoogd ned ye. Tõnd sẽn balemd Wẽnnaam to-to wã pa wat ne yaams la raood komsg ye.