Pid-y golã n tʋm

9, 10. Tẽn-kʋdem wẽndẽ wã, gol ra makda bõe, la bõe yĩng t’a Zezi bool nebã tɩ b wa rɩk a golã n pidi?

⁹ Ges-y tɩ goam nins sẽn yit Matɩe 11:28, 29 (NW ) pʋgẽ a Zezi yeelame: “Bɩ y pid mam golã n zãms mam nengẽ.” Rẽ wẽnde, talg ra tõe n gesame tɩ yaa wala a ra pida gol n tʋmdẽ. Tẽn-kʋdem wẽndẽ wã, gol ra makda yembdo. (Sɩngre 27:40; Maankʋʋre 26:13, NW; Tõodo 28:48, NW ) Tʋm-tʋmdb wʋsg a Zezi sẽn segã tʋma ne gol meng-meng b sẽn da palgd b bãgdẽ wã, n dɩkd zɩɩb sẽn yaa zɩsdo. Golã sã n da maana sõma, ra yaa nana ne yublã la bãgdã, la a sã n da pa sõma, a ra tõe n medg-f lame. A Zezi sẽn da yaa ra-wãadã, tõe t’a maana gol dãmba, la a ra segd n mii a sẽn na n maan gol to-to t’a yɩ ‘bʋgsga.’ Tõe t’a baoo gãong bɩ pɛɛl n gãneg zĩig ning sẽn da sɩɩsd yublã la bãgdã, sẽn na yɩl tɩ golã yɩ bʋgsg wʋsgo.

¹⁰ A Zezi sẽn yeel tɩ “bɩ y pid mam golã,” tõe t’a rɩka a mengã n mak ne ned sẽn da kõt gol dãmb sẽn maan sõma, sẽn da na n yɩ ‘nana’ ne tʋm-tʋmd yubl la a bãgdo. Woto, a Zezi paasame: “Mam zɩɩb yaa faasga.” Woto ra rat n yeelame tɩ golã raoog ra pa zabd bãgdo, la tʋʋmdã me leb n pa yembd tʋʋmd ye. Yaa sɩda, a sẽn bool a kɛlgdbã tɩ b wa sak a golã, a Zezi ra pa kõt-b yolsg zĩig pʋgẽ ne yɛl nins fãa sẽn da weoogd-b rẽ wẽndã ye. Baasg zãnga, a sẽn tall tagsg sẽn yaa toorã ra na n waa ne yolsgo. B sã n da maan toeeng b vɩɩm manesmã pʋgẽ la b yɛlã maaneg pʋgẽ, ra na n yolsa bãmb me. Sẽn yɩɩd fãa, saagr sẽn yaa vẽeneg la sẽn tar pãng ra na n sõng-b lame tɩ b yɩɩrã booge.

Y tõe n paama yolsgo

11. Bõe yĩng t’a Zezi sẽn yeel nebã ra pa rat n yeel tɩ b pidg gol n dɩk a to?

¹¹ Ges-y t’a Zezi pa yeel tɩ nebã ra na n pidga gol n dɩk a to ye. Rom da na n ket n soo tẽngã, wala rũndã-rũndã goosneema rãmbã sẽn so zĩis nins kiris-nebã sẽn vɩẽ wã. Pipi yʋʋm kob-gĩndẽ wã, b ra na n ket n yaooda Rom lampo wã wakat fãa. Bãas la talemd ra na n ket n beeme. Neba pa-zems zãngã la b yel-wẽna ra na n ket n namsd-b lame. Ne rẽ fãa, b ra tõe n paama yolsgo, b sã n da sak a Zezi zãmsgã, la yaa woto ne tõnd me rũndã-rũndã.

12, 13. Bõe la a Zezi wilg vẽeneg tɩ na n waa ne yolsgo, la neb kẽer manesem yɩɩ wãn to?

¹² Bilgr ning a Zezi sẽn maan ne golã rɩk n tʋm yɩɩ vẽeneg karen-biisã maaneg tʋʋmd pʋgẽ. Sãmbg sẽn ka be, a Zezi tʋʋm-kãseng yɩɩ neb a taabã zãmsgo, n da gomd Wẽnnaam Rĩungã yell n yɩɩda. (Matɩe 4:23) Woto a sẽn yeel tɩ “pid-y mam golã,” yaa vẽeneg tɩ woto ra rat n yeelame tɩ b wa tũ yẽ n tʋm tʋʋmd ning yẽ mengã sẽn tʋmdã. Evãnzill dãmbã wilgdame t’a Zezi tusa pʋ-peelem dãmb tɩ b toeem b tʋʋmã, sẽn yaa bũmb sẽn pak neb wʋsg n yɩɩd b vɩɩmã pʋgẽ wã. Tẽeg-y a sẽn bool a Pɩɛɛre, a Ãndere, a Zak la a Zã to-to wã: “Wa-y n tũ-y maam tɩ m na n kɩtame tɩ y bao mam neba.” (Mark 1:16-20) A wilga nin-kãensã sẽn yaa zĩm yẽedbã tɩ b ra na n paama sũ-noogo, b sã n da maan tʋʋmd ning yẽ sẽn da ningd pipi zĩigẽ a vɩɩmã pʋgẽ wã, n maan-a yẽ sor-wilgr pʋgẽ la ne a sõngre.

¹³ Kɛlgdb kẽer sẽn yaa Zʋɩf rãmb wʋma a Zezi zãmsgã võor n tũ-a. Mams-y mogrã noor yɛlã d sẽn karemd Luk 5:1-11 pʋgẽ wã sẽn yɩ to-to. Zĩm yẽedb a naas n tʋm n nams yʋngã tõr n pa paam baa fʋɩ ye. Zĩig pʋgẽ wã, b zĩm gãmba wã pidame! Woto ra pa wa yaar bal ye. Ya a Zezi n kẽes a toogo. B sẽn ges mogrã noorã, b yãa neb kʋʋng sẽn da rat sõma n kelg a Zezi zãmsgã. Rẽ sõngame n wilg a Zezi sẽn yeel nin-kãensã a naasã bũmb ningã võore: ‘Sẽn sɩng masã, yãmb na n yɩɩ mam neb baoodba.’ B manesem yɩɩ wãn to? “Bãmb sẽn tall kogenda n wa kooma noore, bãmb basa fãa n tũ a Zezi.”

14. a) Wãn-wãn la d tõe n paam yolsg rũndã-rũndã? b) Koe-no-bʋg sẽn kõt yolsg la a Zezi moon-yã?

¹⁴ Yãmb me tõe n saka woto. Zãms nebã Biiblã sɩdã ket n kẽngda taoore. Sẽn zems a Zeova Kaset rãmb milyõ a yoob sẽn be dũniyã gill zug n sak a Zezi boollã sẽn yet tɩ b “pid [a] golã.” B lebga ‘neb baoodba.’ (Matɩe 4:19) Neb kẽer dɩka tʋʋm kãng tɩ yaa b wakat fãa tʋʋmde, tɩ neb a taab yãk b wakatã pedg n maand-a wa b sẽn tõe tɛka. B fãa getame tɩ tʋʋm kãng kõt-b-la yolsgo, tɩ b vɩɩmã yɩɩr boogdẽ. Tʋʋm-kãng tara bũmb sẽn kõt-b sũ-noogã, sẽn yaa togs neb a taabã koe-noogã, “Wẽnnaam soolem koe-noogo.” (Matɩe 4:23) Wakat fãa yaa yamleoog bũmb tɩ d gom koe-noog yelle, sẽn yɩɩd fãa koe-noog kãngã yelle. Biiblã tara zãms-kãsems nins d sẽn tõe n tũnug ne n kɩt tɩ neb wʋsg sak n deeg tɩ b tõe n booga b vɩɩmã yɩɩre.—2 Tɩmote 3:16, 17.

15. Wãn to la a Zezi zãmsgã sẽn tɩ loe ne vɩɩmã tõe n naf yãmba?

¹⁵ Baa neb nins sẽn sɩng bal n zãmsd Wẽnnaam Rĩungã wɛɛngẽ wã rɩɩ a Zezi zãmsgã sẽn tɩ loe ne vɩɩm manesmã nafa. Neb wʋsg sɩd tõe n yeelame t’a Zezi zãmsgã yols-b lame la a sõng-b tɩ b toeem b vɩɩmã zãnga. Y tõe n bãnga rẽ y toore, y sã n zãms vɩɩm manesem noy kẽer b sẽn togs a Zezi vɩɩmã la a koe-moonegã kɩbay pʋsẽ, sẽn yɩɩd fãa Evãnzill dãmb nins a Matɩe, a Mark la a Luk sẽn gʋlsã pʋsẽ.

Yolsgã sẽn tõe n paam to-to

16, 17. a) Yɛ la y tõe n yã a Zezi zãms-kãsems kẽere? b) Bõe n yaa tɩlae sẽn na yɩl n paam yolsg ne a Zezi zãmsgã tũub maasem?

¹⁶ Yʋʋmd 31 T.W. pẽrẽntã wã wakate, a Zezi kõo sõsg sẽn toeem yẽ wakatẽ dũniyã. B nong n boond-a lame tɩ Tãng zug Zãmsgã. B gʋls-a-la Matɩe sak a 5 n tɩ ta a 7 la Luk sak a 6 pʋgẽ, la a kʋmsda zãmsg wʋsg nins a sẽn kõ wã. Y tõe n yãa a Zezi zãmsg a taab zĩis a taab Evãnzill dãmbã pʋsẽ. Yɛl wʋsg a sẽn togs be wã võor yaa nana, baa ne b tũub sẽn tõe n yɩ toogã. Bõe yĩng tɩ y pa na n maag y yĩng n karem sag-kãens n tags b zut sõma? Bas-y t’a tagsa wã tall pãng y tagsgã la y manesmã zutu.

¹⁷ Vẽenega, b tõe n sigla a Zezi zãmsgã ne manesem toor-toore. Tigim-y zãms-kãsemsã, n yãk a yembr daar a yembr fãa yĩng kiuugã pʋgẽ, tɩ y bõn-datlã yaa y tũ-b y vɩɩmã pʋgẽ. Wãn to? Be neere, ra karm-y-b zugẽ-zugẽ bal ye. Tẽeg-y naabã sẽn yaa arzɛk soabã sẽn sʋk a Zezi Kirist bũmb ningã yelle: “Mam na n maana bõe n paam vɩɩm sẽn ka sɛta?” A Zezi sẽn lebg n tẽeg Wẽnnaam Tõogã no-kãsemsã, rao wã yeelame t’a ra zoe n tũuda bãmb fãa. La a ra ket n neeme t’a segd n maana bũmb n paase. Dẽ, a Zezi yeel-a lame t’a modg wʋsg n tũ Wẽnnaam noyã tɩ zemse, n yɩ a karen-biig sẽn moond koe-noogã. Yaa wa raowã ra pa rat n maan tɩ ta woto fãa ye. (Luk 18:18-23) Woto yĩnga, ned ning sẽn dat n zãms n bãng a Zezi zãmsgã rũndã-rũndã segd n tẽegame tɩ sak n deeg tɩ zãms-kãens yaa sɩd yaa toor ne b tũubã sẽn boogd yɩɩrã.

18. Bilg-y yãmb sẽn tõe to-to n dɩk zĩ-gũbr ning sẽn naag ne sõs-kãngã wã n tʋm to-to.

¹⁸ Sẽn na yɩl n sɩng a Zezi zãmsgã vaeesg la a tũubu, bɩ y ges pipi tikrã zĩ-gũbrã sẽn naag ne sõsgã. A tɩ loee ne Matɩe 5:3-9. Sɩda, tõnd ned kam fãa tõe n dɩka sẽk sõma n bʋgs sagl-kãsems nins b sẽn togs verse kãensã pʋsẽ wã zutu. La y sã n ges sagl-kãens fãa, bõe la y tõe n yeel y manesmã wɛɛngẽ? Yãmb sã n sɩd rat n paam yolsg ne y yɩɩrã wʋsgã, bõe n na n sõng-y tɩ y maan woto? Y sã n paas y nonglmã ne tẽebã yɛla, n bas bõn-kãensã tɩ b yãmb y tagsa wã n yɩɩge, wãn to la rẽ na n maneg-y n paase? Yãmb vɩɩmã pʋgẽ, yell n pak yãmb tɩ y pa segd n leb n maan yɩɩr wʋsg ne-a, sẽn na yɩl tɩ kõ-y sor tɩ y tõog n ges tẽebã yɛl yell n yɩɩd bɩ? Sã n yaa woto, na n paasa y sũ-noogã masã.

19. Bõe la y tõe n maan n paam yam la bãngr n paase?

¹⁹ Bũmb la y tõe n maan n paase. Bõe yĩng tɩ y pa na n gom verse kãensã yell ne Wẽnnaam sõgen a to, y kẽed-n-taagã, y roagda, bɩ y zoa? (Yelbũna 18:24; 20:5) Ning-y y yamẽ tɩ naabã sẽn yaa arzɛk soabã sʋka ned a to, a Zezi, yell sẽn yaa kãseng wɛɛngẽ. Leokrã ra tõe n paasa a sũ-noogã la a vɩɩm sẽn pa satã saagre. Sõgen taagã yãmb sẽn sõsd ne verse kãensã zutã pa zem a Zezi ye. Baasg zãnga, y sã n sõs a Zezi zãmsgã zugu na n nafa yãmb y yiibã fãa. Modg-y n maan woto tao-tao.

20, 21. Yɛl na-kẽndr bʋg la y tõe n tũ n tõog n zãms n bãng zãmsg nins a Zezi sẽn kõ wã, la yaa bõe n tõe n sõng-y tɩ y mak n gese y sã n bɩta yel-kãens maaneg pʋgẽ?

²⁰ Leb-y n ges zĩ-gũbr ning sẽn naag zãms-kãngã, t’a gom-zugã yaa: “Zãmsg sẽn na yɩl n sõng-yã.” B tigma zãms-kãens tɩ y tõe n vaees a yembr daar fãa. Pipi, y tõe n karma a Zezi sẽn da yeel bũmb ningã verse nins b sẽn sõdgã pʋgẽ wã. Rẽ poor bɩ y tags a goamã yelle. Tags-y y sẽn tõe n tũ-b y vɩɩmã pʋgẽ to-to. Yãmb sã n tagsdẽ tɩ y zoe n maanda woto, bɩ y tags n ges bũmb yãmb sẽn tõe n maan n tũ Wẽnnaam zãms-kãngã yãmb vɩɩmã pʋgẽ n paase. Tũ-y-yã-a baraare. Yãmb sã n segd n modgame n wʋm a võore, bɩ n ges y sẽn tõe n tũ-a to-to, bɩ y paas daar a to rẽ yĩnga. Baasg zãnga, ning-y y yamẽ tɩ pa tɩlae tɩ y bãng zãmsgã zãng-zãng n yaool n kẽng zãmsg a to wã zĩigẽ ye. Daar ning sẽn pʋgdã, y tõe n gesa zãmsg a to. Semen baasgẽ, y tõe n lebg n gesa wãn to la y tõog n tũ a Zezi zãmsg a naas bɩ a nu. Semen a yiib-n-soabã, bɩ y paas zãmsg a taaba, daar ne a to fãa. Y sã n yã tɩ y pa tõog n tũ zãmsg ninga, bɩ y ra koms raood ye. Woto yaa bũmb sẽn na n paam kiris-ned fãa. (2 Kɩbaya 6:36; Yɩɩl Sõamyã 130:3; Koɛɛg Soaba 7:20; Zak 3:8) Kell-y n kẽng-y taoor n tũ zãms-kãens semen a tãab-n-soabã la a naas-n-soabã pʋsẽ.

²¹ Kiuug a yembr bɩ sẽn yɩɩd woto pʋgẽ y tõe n saa zãmsg 31 wã fãa. Sẽn yaa to-to fãa, y tagsg na n yɩɩ wãn to, y sã n wa maan woto? Y sũur pa na n yɩ noog n paas sɩda, bɩ tõe tɩ y paam yolsg n paas sɩda? Baa y sã n tõog n tũ-b-la sõma n paas bilf bala, y yɩɩrã na n boogame, wall y tõog n mao ne y yɩɩrã tɩ sãoog pĩnda, la y na n tõog n bãnga y sẽn na n ket n maand rẽ to-to. Ra yĩm-y tɩ tags-sõma a taab n be a Zezi zãmsgã pʋgẽ b sẽn pa ning ka ye. Bõe yĩng tɩ y pa na n bao bãmb kẽer n mak n tũ-ba?—Filip rãmba 3:16.

22. Bõe n tõe n yɩ, d sã n tũ a Zezi zãmsgã, la yel-bʋs yas la d segd n zãmse?

²² Y tõe n yãame tɩ baa ne a Zezi golã sẽn yaa zɩɩb me wã, a sɩd yaa bʋgsga. A zãmsgã la yɩ a karen-biigã zɩɩb yaa faasga. Tʋm-tʋmd a Zã meng sẽn yɩ a Zezi karem-biig la a zo-nongr sẽn yɩɩd yʋʋm 60 pʋgẽ yeela woto: “Tɩ bõe, Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) Yãmb me tõe n talla bas-m-yam kãng buudu. Yãmb sã n tũud a Zezi zãmsgã n paasdẽ, y na n yãtame n paasdẽ tɩ bũmb ning sẽn wat ne yɩɩr neb wʋsg vɩɩm pʋgẽ rũndã-rũndã wã pa na n kõ yãmb yɩɩr wa bãmb ye. Y na n yãame tɩ y paama yolsg wʋsgo. (Yɩɩl Sõamyã 34:9) La bũmb a to n be a Zezi golã sẽn bʋgsã pʋgẽ tɩ y segd n vaeese. A Zezi leb n yeelame tɩ yẽ yaa ‘sũ-mar soaba la nin-naana.’ Wãn to la rẽ tɩ loe ne tõnd sẽn segd n zãms a Zezi nengẽ la d rɩk a togs-n-taarã? Sõsg ning sẽn pʋgdã pʋgẽ, d na n goma rẽ yelle.—Matɩe 11:29.

‘Bɩ y zãms bũmb nins mam sẽn na n wilg yãmbã’

“Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo.”—MATƖE 11:29.

1. Bõe yĩng tɩ d sã n zãms bũmb ning a Zezi sẽn wilg tõndã, na n tall yamleoog la barka?

WAKAT buud fãa, a Zezi Kirist talla tagsgo, zãmsg la manesem sẽn zemse. A pa kaoos tẽngã zug ye, la a maana tʋʋmd sẽn zĩnd bark la yamleoogo, sẽn paase a kell n talla a sũ-noogã. A tigma karen-biis la a zãms-b b sẽn na n maan to-to n balem Wẽnnaam, n nong ãdem-biisã la b tõog dũniyã. (Zã 16:33) A pidsa b sũyã ne saagr la a tũnug ne ‘koe-noogã n vẽneg-b ne vɩɩm la yĩng sẽn ka kiida yelle.’ (2 Tɩmote 1:10) Yãmb sã n ya a karen-biiga, yãmb tagsdame tɩ yɩ karen-biig rat n yeelame tɩ bõe? D sã n vaees a Zezi sẽn yet bũmb ning karen-biisã wɛɛngẽ wã, d tõe n bãnga d sẽn na n maan tɩ d vɩɩmã zĩnd bark to-to. Woto baoodame tɩ d sak yẽ tagsgã la d tũ no-kãsems kẽere.—Matɩe 10:24, 25; Luk 14:26, 27; Zã 8:31, 32; 13:35; 15:8.

2, 3. a) Yɩ a Zezi karen-biig rat n yeelame tɩ bõe? b) Bõe yĩng tɩ tar yõod tɩ d sʋk d meng n gese, ‘Ãnd soab karen-biig la mam lebg-yã?’

² Kiris-neb Gerɛk Gʋlsg Sõamyã pʋgẽ, gom-biig ning b sẽn lebg tɩ “karen-biigã” rat n yeelame tɩ ned sẽn tikd a yam bũmb zugu, bɩ ned sẽn zãmsde. Gom-biig sẽn tɩ loe ne rẽ n be zãms-kãngã verse yẽgrã pʋgẽ Matɩe 11:29 pʋgẽ: ‘Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo.’ N-ye, karen-biig yaa ned sẽn zãmsde. Naoor wʋsgo Evãnzill dãmbã rɩka gom-biig ning sẽn yaa “karen-biigã” n tɩ loe ne neb nins sẽn da tũud a Zezi n pẽ-a n yɩɩdã, sẽn tog sor ne-a a sẽn da wa n moondẽ la b ra paamd zãmsg a nengẽ wã. Tõe tɩ kẽer saka a Zezi zãmsgã bala, n pa bao n vẽneg-a nebã taoor ye. (Luk 6:17; Zã 19:38) Evãnzill gʋlsdbã me goma “a Zã [sẽn yaa Lisdã me] karem-biisa ne Fariziẽ dãmba karem-biis” yelle. (Mark 2:18) A Zezi sẽn yeel a karen-biisã tɩ b ‘gũus ne Fariziẽ dãmba zãmsgã’ yĩnga, d tõe n sʋka d mense: ‘Ãnd soab karen-biig la mam lebg-yã?’—Matɩe 16:12.

³ Tõnd sã n ya a Zezi karen-biisi, n paam zãmsg a nengẽ, rẽnd neb a taabã na n paama tẽeb kengr tõnd sɛɛgẽ. B segd n yãame tɩ tõnd lebga nin-bʋgsg la sũ-bʋgsem soab n yɩɩd pĩndã. Tõnd sã n yaa taoor soab d tʋʋmã zĩigẽ, d sã n yaa roagdba, bɩ d tara pe-kɩʋʋng tʋʋm kiris-neb tigingã pʋgẽ, neb nins yell tõnd sẽn getã tagsdame tɩ d tara manesem ne-b wa a Zezi sẽn tall manesem ning ne a karen-biisã bɩ?

A Zezi manesem ne nebã sẽn yɩ to-to

4, 5. a) Bõe yĩng tɩ pa toog tɩ d bãng a Zezi sẽn tall manesem ning ne neb sẽn da tar zu-loeesã? b) Yel-bʋg la a Zezi yã a sẽn wa n dɩt Fariziẽ a yembr yiri?

⁴ D segd n bãnga a Zezi sẽn tall manesem ning ne nebã, sẽn yɩɩd fãa ne neb nins sẽn tall zu-loe-kãsemsã. Rẽ bãngr pa segd n yɩ toog ye. Biiblã tara kɩbay wʋsg sẽn wilgd a Zezi sẽn tall manesem ne neb a taaba, tɩ kẽer da be namsg pʋgẽ. Bɩ d ges tũudmã nanambse, sẽn yɩɩd fãa Fariziẽ dãmbã sẽn tall manesem ning me ne neb sẽn tall zu-loees woto. B manesemã sẽn yaa lebend ne a Zezi wã na n kõ-d-la zãmsgo.

⁵ Yʋʋmd 31 T.W., a Zezi sẽn da wa n moond Galile, “Fariziẽ a ye kosa a Zezi tɩ b wa rɩ ne yẽnda.” A Zezi pa maan sãmbg la a sak boollã ye. “La a Zezi kẽe Fariziẽ wã zakẽ n zĩnd n na n dɩ. La gese, tẽnga pag a yembr sẽn yaa yel-wẽn soaba bãngame t’a Zezi zĩ n dɩta Fariziẽ wã zakẽ, yẽ talla albatr tʋko sẽn pid ne tɩdar kaam n wa yaas bãmb poorẽ n yãbe. La a nintãm sẽn madg bãmb nao wã, a yẽesa bãmb ne a zoobdo, la a moka bãmb nao wã n ning bãmb tɩdar kaam.”—Luk 7:36-38.

6. Bõe yĩng tɩ pagã sẽn yaa ‘yel-wẽn soabã’ tõog n wa Fariziẽ wã yiri?

⁶ Yãmb tõe n mamsa rẽ bɩ? Sebr a yembr yeta woto: “Pagã (v. 37) tũnuga ne nebã minung sẽn da kõt sor tɩ nimbãan dãmb tõe n kẽng kibs a woto zĩigẽ sẽn na yɩl n paam rɩ-kɛlã.” Yaa rẽ n kɩt tɩ d tõe n bãng bũmb ning sẽn tõe n kɩt tɩ ned da tõe n kẽ kibs a woto zĩigẽ tɩ b pa bool-a wã võore. Tõe tɩ neb a taab n da gũud rɩ-kɛl rɩɩbã saabẽ. Baasg zãnga, pʋg-kãngã talla manesem sãanga. A pa zĩnd kɛɛng n gũudẽ tɩ rɩɩbã sa ye. A ra pa tar yʋ-noog ye, a sẽn da yaa ‘yel-wẽn soab’ b sẽn da mi sõma wã yĩnga, hal t’a Zezi tol n yeel t’a mii “yẽ yel-wẽna sẽn [da] yaa wʋsgã.”—Luk 7:47.

7, 8. a) Tõnd manesem ra na n yɩɩ wãn to yell ning b sẽn togs Luk 7:36-38 pʋgẽ wã taoore? b) A Simo manesem yɩɩ wãn to?

⁷ Mams-y n ges yãmb sẽn da na n vɩ wakat kãng n be a Zezi zĩigẽ. Y manesem da na n yɩɩ wãn to? Yãnd ra na n yõk-y lame, pʋg-kãngã sã n da pẽneg-y bɩ? Rẽ ra na n tusa yãmb tɩ y maan bõe? (Luk 7:45) Ra na n sãama y sũur bɩ?

⁸ Yãmb sã n da be sãamb a taabã sʋka, yãmb tagsgã ra na n wõnega Fariziẽ a Simo rẽndã ne manesem buud bɩ? “Fariziẽ ninga sẽn bool [a Zezi wã] sẽn yã woto yẽ tagsda a sũur pʋgẽ: ‘Dao kãngã sã n yaa Wẽnnaam no-rɛɛsa, a na n bãnga pag ninga sen tikd yẽ wã yelle, tɩ yẽ yaa yel-wẽn soaba.’” (Luk 7:39) Sẽn yaa lebende, a Zezi ra yaa nimbãan-zoeta. A bãngame tɩ pagã ra bee nimbãaneg la yɩɩr pʋgẽ. B pa togs tõnd pagã sẽn maan to-to n wa kẽ yel-wẽn pʋgẽ ye. A sã n sɩd ra yaa pʋg-yoodre, ra pa wõnd galʋ-tẽngã neb sẽn da yaa Zʋɩf rãmb sẽn da yaa wẽn-tũudbã sõng-a lame ye.

9. A Zezi manesem yɩɩ wãn to, la tõe tɩ rẽ waa ne bõe?

⁹ La a Zezi ra rat n sõnga pagã. A Zezi yeel-a lame: “Fo paama f yel-wẽna sugri.” Rẽ poore, a paasame: “Fo tẽeb n fãag foom. Kẽng ne laafɩ.” (Luk 7:48-50) Yaa zĩ-kãngã la kɩbarã sata. Nina tõe n yeelame t’a Zezi pa sõng pagã wʋsg ye. A ning-a-la bark n yeel-a t’a tõe n loogame. Yãmb tagsdame t’a leba a vɩ-yookã pʋgẽ bɩ? Baa d sẽn pa tõe n yeel vẽeneg tɩ sɩd yɩɩ woto wã, bɩ y ges a Luk sẽn yeel bũmb ning n paasã. A togsame t’a Zezi saaga “tẽn-bɛd ne tẽn-bõoneg fãa n moon Wẽnnaam soolem koe-noogo.” A Luk leb n paasame tɩ “pagb kẽere,” sẽn da ya a Zezi karen-biisi, n “yãk b paoong n sõng a Zezi.” Tõeeme tɩ pʋg-kãngã sẽn da tek yam n kos sugr la a tar mi-beoogã ra bee pʋg-kãensã sʋka, n sɩng n tar wẽn-zoeer vɩɩm ne sũur kaset sẽn yaa yɩlemde, t’a vɩɩmã tar võor masã, la a tar nonglem sẽn yaa kãseng n yɩɩd ne Wẽnnaam.—Luk 8:1-3.

A Zezi sẽn da yaa toor to-to ne Fariziẽ rãmbã

10. Bõe yĩng tɩ be nafr tɩ d tags kɩbar ning sẽn tɩ loe ne a Zezi la pagã a Simo yirã zugu?

¹⁰ Bõe zãmsg la d tõe n paam ne kɩba-kãngã sẽn tar pãngã? A sɩd sidgda yĩnga, bɩ bõe? Y sã n da be a Simo yirã, y tagsg ra na n yɩɩ bõe? Y ra na n maana wa a Zezi bɩ, bɩ y ra na n tagsa wa Fariziẽ wã sẽn yaa zaka soaba baa yaa bilf bɩ? A Zezi ra yaa Wẽnnaam Biribla, rẽ d pa tõe n tags la d maan wa yẽ sẽn maana kɛpɩ ye. Tõeeme tɩ d pa na n yɩ tao-tao me n tags tɩ d wõnda a Simo sẽn yaa Fariziẽ wã ye. Ned-ned n na n sak n yeel t’a maanda wa Fariziẽ.

11. Bõe yĩng tɩ d pa rat tɩ b yeel tɩ tõnd yaa wa Fariziẽ rãmbã?

¹¹ D sã n zãms kaset sẽn yit Biiblã la sɛb a taab pʋsẽ, d tõe n wa yeelame tɩ Fariziẽ rãmbã ra tagsdame tɩ nin-buiidã la tẽngã neer da zaoo bãmb zutu. Wẽnnaam Tõogã sẽn da yaa vẽeneg tɩ b tõe n wʋm a võorã nana-nana wã ra pa sek-b ye. Zĩig ning bãmb sẽn tẽed tɩ Tõogã wõnda a pa togsd yɛlã n welgã, b baoome n na n wilg n leke, n wilg tõogã sẽn tũud to-to, sẽn na yɩl tɩ sũur-kasetã ra tall tʋʋmd a tũubã pʋgẽ ye. Tũudum taoor dãmb kãensã makame n na n yãk noor sẽn wilgd ned manesem sẽn segd n yɩ to-to yɛlã fãa taoore, baa yel-yaals taoore.a

12. Tags-bʋg la Fariziẽ rãmbã ra tar b mensã zutu?

¹² Pĩnd yɛl-mit a Zozɛf sẽn vɩɩmd pipi yʋʋm kob-gĩndẽ wã wilga vẽeneg tɩ Fariziẽ rãmbã ra geta b mens wa nin-sõma, nin-tɩrs la wala neb sẽn mi b tʋʋmd sõma. Sãmbg sẽn ka be, Fariziẽ rãmb kẽer da wõnda woto. Woto tõe n kɩtame tɩ d tags a Nikodɛm yelle. (Zã 3:1, 2; 7:50, 51) Wakat n zĩnd tɩ bãmb kẽer sak kiris-nedemdã tũudum. (Tʋʋma 15:5) Tʋm-tʋmd a Poll sẽn yaa kiris-nedã gʋlsa Zʋɩf rãmb kẽere, wala makre Fariziẽ rãmbã wɛɛngẽ woto: “Bãmb wɩngda ne Wẽnnaam tʋʋmde, la bãmb ka tar vẽnegr ye.” (Rom dãmba 10:2) Baasg zãnga, Evãnzill dãmbã bilgd-b-la wala nin-buiidã sẽn da get-b to-to wã, wala wuk-m-mens rãmba, tɩtaam dãmba, neb sẽn get tɩ b mens yaa tɩrse, nin-sãbsdba, neb sẽn nong b taab taal ningri, la nin-pa-nandem dãmba.

A Zezi tagsgo

13. Bõe la a Zezi yeel Fariziẽ rãmbã wɛɛngẽ?

¹³ A Zezi ninga gʋlsdbã la Fariziẽ rãmbã taal n yeel tɩ b yaa ninsaan-kãrzukma. “Bãmb sẽbda zɩɩb sẽn yaa zɩsgo n tʋkd neba, la bãmb mens ka sɩɩsd bãmb ne b nug-bil ye.” N-ye, zɩɩbã ra yaa zɩsgo, tɩ gol ning b sẽn modg nebã tɩ b pidã ra pa bʋgs ye. A Zezi kẽnga taoor n bool gʋlsdbã ne Fariziẽ rãmbã tɩ “yalemba.” Yalem yaa yell ne nin-buiidã. A Zezi leb n boola gʋlsdbã ne Fariziẽ rãmbã tɩ “sor-wilgdb sẽn yaa zoense,” la a yeel tɩ b ra “basda bũmb nins sẽn yaa neer n yɩɩd tõog pʋgẽ sẽn yaa tɩrlem la nimbãan-zoeere la sɩda.” Ãnd soab n dat t’a Zezi ges-a wa Fariziẽ?—Matɩe 23:1-4, 16, 17, 23.

14, 15. a) A Zezi manesmã ne a Matɩe Levi wilgda bõe Fariziẽ rãmbã yel-manesem wɛɛngẽ? b) Zãms-bʋs sẽn tar yõod wʋsg la d tõe n bãng kɩba-kãngã pʋgẽ?

¹⁴ Evãnzill dãmbã karemdb fãa la bal tõe n yãame tɩ Fariziẽ rãmb wʋsg sẽn yɩɩd yaa nin-sãbsdba. A Zezi sẽn bool a Matɩe Levi, sẽn yaa yõor yaood rɛɛgd t’a wa yɩ a karem-biigã poore, a Levi maana kibs kãseng a yĩnga. Biiblã yetame: “Fariziẽ dãmb ne gʋlsdba yẽgma ne a Zezi karem-biisã n yeele: ‘Yaa bõe tɩ yãmb dɩtẽ la y yũud ne yõor yaood deegdba la yel-wẽna rãmba?’ A Zezi leoka bãmb yaa: ‘ . . . Mam ka wa n na n bool nin-tɩrs tɩ b tek yam n kos sugr ye, yaa yel-wẽna rãmba.’ ”—Luk 5:27-32.

¹⁵ A Levi mengã bãnga bũmb a to a Zezi sẽn yeel sasa kãnga: “Bɩ y kẽng n zãms koe-kãng võore: Mam sũur nooma ne ninbãan-zoeere, la ka ne maand ye.” (Matɩe 9:13) Baa Fariziẽ rãmbã sẽn da yet tɩ b tẽeda no-rɛɛsdb sẽn yaa Hebre rãmbã goama, b pa sak gom-kãngã sẽn yit Oze 6:6 pʋgẽ wã ye. Zĩ-kãngã wɛɛngẽ b ra kɩta sɩd tɩ b sã n da na n kɩɩs tõogã me, yaa sẽn yɩl n sak rog-n-mikã. Tõnd ned kam fãa segd n sʋka a meng woto: ‘B mii maam wa ned sẽn gãd noy kẽer dem-dem hal tɩ sugr kaẽ bɩ, wala noy nins sẽn wilgd f meng tagsg yɛl zut bɩ wala tagsg nebã sẽn nong n tar yell wɛɛngẽ wã bɩ? Bɩ neb a taabã miimi tɩ sẽn yɩɩd fãa mam yaa nimbãan-zoɛt la nin-sõngo?’

16. Fariziẽ rãmbã manesem da yaa wãn to, la wãn to la d tõe n gũus n da yɩ wa bãmba?

¹⁶ Fariziẽ rãmbã sẽn da minim bũmb ning yaa sãbsg woo sãbsgo. Fariziẽ rãmbã ra baooda zang buud fãa, sẽn yaa sɩd bɩ b sẽn mamse. B kɩtame tɩ nebã yam pa gãe ye, la b ra tẽegd b kongrã. Fariziẽ rãmbã ra wukda b mens ne b sẽn kõt zẽ-biis sẽn pa zem baa fʋɩ wala b sẽn boond b rãmb tɩ mante, anɛt la kumẽ wã yembr piig zugã. B ra wilgda b wẽn-zoeerã ne b futã ningr la b mak n na n wilg buudã sore. Sɩd-sɩda, tõnd sã n dat tɩ d tʋʋmã zems ne makr ning a Zezi sẽn kõ wã, d segd n gũusame n da nong wakat fãa n baood neb a taabã pãn-komsem la d zẽnd-b ye.

Wãn to la a Zezi ra welgd yɛlã?

17-19. a) Wilg-y a Zezi sẽn welg yell sẽn da tõe n wa ne zu-loees wʋsg to-to. b) Yaa bõe n kɩt tɩ yellã ra kõt yɩɩre, la a pa be yamleoogo? d) Yãmb sã n da be zĩig ning pagã sẽn pẽnegẽ a Zezi wã, y manesem da na n yɩɩ wãn to?

¹⁷ A Zezi sẽn da welgd yɛlã to-to wã ra yaa toor wʋsg ne Fariziẽ rãmbã rẽndã. Ges-y a Zezi sẽn maan to-to n welg yell sẽn da tõe n yɩẽ yel-kãseng menga. Ra yaa pag zɩɩm sẽn da yit sẽn kaoos sẽn na maan yʋʋm 12. Y tõe n karma kɩbarã Luk 8:42-48 pʋgẽ.

¹⁸ A Mark kɩbarã yetame tɩ “rabeem yõka pagã t’a rigda.” (Mark 5:33) Bõe yĩnga? Sãmbg sẽn ka be, ya a sẽn da mi t’a kɩɩsa Wẽnnaam Tõogã yĩnga. Sã n yaa ne Maankʋʋre 15:25-28, pag zɩɩm sẽn yit tɩ pa tũ ne sãmpogr ra yaa rẽgdo, zɩɩmã yiib sẽn kaoos sasa ningã fãa pʋgẽ, n paas rasem a yopoe. Bũmb bɩ ned ning fãa a sẽn sɩɩs ra lebgda rẽgdo. Sẽn na yɩl n sɩɩs a Zezi, yɩɩ tɩlae ne pʋg-kãngã t’a wẽdg kʋʋngã sʋk n ta-a. D sã n ges kɩbarã yʋʋm 2000 poore, pʋg-kãngã nimbãaneg tar-d lame.

¹⁹ Yãmb sã n da zĩndẽ be badaare, wãn to la y ra na n ges yellã? Bõe la y ra na n yeelẽ? Bãng-y t’a Zezi talla sõmblem, nonglem la naneb ne pagã, hali n pa gom n leb yell ba a yembr a sẽn maan sẽnẽ ye.—Mark 5:34.

20. B sã n da baoodẽ tɩ d tũ Maankʋʋre 15:25-28 rũndã-rũndã, yel-to-bʋg la d ra na n mao ne?

²⁰ Bõe la d tõe n zãms yel-kãngã pʋgẽ? Mams-y yãmb sẽn na n yaa kãsem soab n be kiris-neb tigingẽ rũndã-rũndã. La sẽn paase, mams-y Maankʋʋre 15:25-28 sẽn da na n yaa tõog b sẽn baood tɩ kiris-nebã tũ rũndã-rũndã tɩ kiris-nin-poak kɩɩs tõog kãnga, n be yɩɩr pʋgẽ n pa mi a sẽn maandg ye. Y manesem da na n yɩɩ wãn to? Y ra na n ning-a-la yãnd zãma wã taoor ne sagl-toos bɩ? Tõeeme tɩ y yeel tɩ “Waii, m kõn yaa n tol n maan woto ye! M na n tũu a Zezi makr n yɩ nin-sõngo, n tall nonglem, n yɩ wʋmd la m tall nanebo.” Be neere! Baasg zãnga, yaa rɩk a Zezi togs-n-taar n maan woto wã la tʋʋmdã.

21. Bõe la a Zezi zãms nebã Tõogã wɛɛngẽ?

²¹ Sẽn yɩɩd fãa, nebã ra getame t’a Zezi ra kõt-b-la yolsgo, n waoogd-b la a kengd b raoodo. Zĩig ning Wẽnnaam Tõogã sẽn da yaa vẽenegã, a sẽn yet bũmb ningã bal la a võorã. A sã n da pa togs yɛlã n welge, nebã ra na n tũu b sũur kasetã koɛɛga, la woto b ra tõe n wilga b nonglem ne Wẽnnaam ne sard nins b sẽn dɩkd ne b mensã. Tõogã ra pa dem-dem ye. (Mark 2:27, 28) Wẽnnaam da nonga a nin-buiidã, wakat fãa a maana sẽn na kõ-b sũ-noogo, la b sã n da konge a ra sakame n tall nimbãan-zoeer ne-ba. A Zezi ra yaa woto.—Zã 14:9.