Wãn to la d moond koe-noogã?

Ka la bilfu, a Zeova na n tũnuga ne a Rĩungã n kɩt tɩ d zu-loeesã fãa sa. Woto yaa koe-noogo, hal tɩ d pa tõe n pa togs neb a taabã ye. A Zeezi yeela a karen-biisã tɩ b taas nebã fãa koe-kãnga! (Matiye 28:19, 20) Bõe la a Zeova Kaset rãmbã maand tɩ wilgdẽ tɩ b tũuda a Zeezi noorã?

1. Wãn to la Matiye 24:14 goamã pidsd rũndã-rũndã?

A Zeezi pĩnd n togsame yaa: “Rĩungã koe-no-kãngã na n moona dũniyã tɛk fãa.” (Matiye 24:14) A Zeova Kaset rãmbã sũur nooma b sẽn paam n naag n tʋmd tʋʋm-kãngã sẽn tar yõod wʋsgã. D moonda koe-noogã dũniyã gill zugu, buud-goam tusr la zak pʋsẽ! Sẽn na yɩl n tõog n tʋm tʋʋm-kãngã sẽn yaa kãsengã baooda modgre, la baoodẽ me tɩ d sigl sõma. Sã n da pa tũ ne a Zeova sõngre, d ra pa na n tõog tʋʋmdã ye.

2. Bõe la d maand sẽn na yɩl n paam nebã n taas koɛɛgã?

D moonda zĩis nins fãa nebã sẽn beẽ. D rɩkda pipi kiris-nebã togs-n-taare, n moond “zak-zaka.” (Tʋʋma 5:42) D sẽn maand woto wã, d paamda neb milyõ-rãmb n taasd koɛɛgã yʋʋmd fãa. La sẽn mik tɩ pa wakat fãa la nebã be b zagsẽ wã, d moonda zãma zĩisẽ me. Wakat fãa, d baooda segb n na n gom a Zeova la a raabã yell ne nebã.

3. Ãnd dãmb n segd n moon koe-noogã?

Kiris-ned hakɩɩk fãa segd n taasa neb a taabã koe-noogã. D pa reemd ne tʋʋm-kãngã ye. D moonda koɛɛgã wa d sẽn tõe tɛk fãa, bala fãagda yõya. (Karm-y 1 Tɩmote 4:16.) B pa yaood tõnd sẽn na yɩl tɩ d tʋm tʋʋmdã ye. Bala Biiblã pʋgẽ, b yeelame yaa: “Yãmb deega zaalem, bɩ y kõ zaalem.” (Matiye 10:7, 8) Pa nebã fãa n sakd n kelgd tõnd ye. La d ket n moonda koɛɛgã, bala d miime tɩ d sã n maand woto, d sakda a Zeova, la d noogd a sũuri.

D BAO N BÃNG N PAASE

4. D modgda wʋsg sẽn na yɩl tɩ koɛɛgã ta nebã fãa

VIDEO: B moona koɛɛgã “hal tɩ ta dũniyã tɛk fãa” (7:33)

• A Zeova Kaset rãmbã sẽn modgd n moond koɛɛgã wɛɛngẽ, bõe n noom yãmba?

Karm-y Matiye 22:39 la Rom dãmb 10:13-15, tɩ rẽ poor bɩ y leok sogsgã:

• Wãn to la tõnd sẽn moond koɛɛgã wilgdẽ tɩ d nonga d taabã?

• A Zeova tagsg yaa wãn ne neb nins sẽn moond koe-noogã?​—Ges-y vɛrse 15 wã.

5. Tõnd yaa Wẽnnaam tʋmd-n-taase

Kibay wʋsg n wilgd t’a Zeova wilgda tõnd sor koɛɛgã mooneg pʋgẽ. Wala makre, daar a ye zaabre, Nuvɛll Zelãnd saam-biig yʋʋr sẽn boond t’a Poll n da moond koɛɛgã zak-zaka, n wa ta zak a ye n mik paga. Baraar yibeoogã bala, pagã ra pʋʋsa Wẽnnaam n pʋd a yʋʋrã sẽn yaa Zeova wã, n kos t’a tʋm ned t’a wa sõs ne-a. Ad saam-biig a Poll sẽn yeele: “Lɛɛr a tãab poor bala, mam taa a zakã noore.”

Karm-y 1 Korẽnt rãmb 3:9, tɩ rẽ poor bɩ y leok sokrã:

• Wãn to la kibay wa a soab ning sẽn zĩnd Nuvɛll Zelãndã yaa kaset t’a Zeova wilgda tõnd sor koe-moonegã pʋgẽ?

Karm-y Tʋʋm 1:8, tɩ rẽ poor bɩ y leok sokrã:

• Bõe yĩng tɩ yaa tɩlɛ tɩ d paam a Zeova sõngre, sẽn na yɩl n tõog n moon koɛɛgã?

Yãmb miime bɩ?

Semennã pipi tigsgã sasa, d paamda zãmsg sẽn sõngd tõnd tɩ d paamd minim n moond koɛɛgã. Yãmb sã n zoe n kẽnga tigis-kãnga, y tagsg yaa wãn ne zãmsg ning y sẽn paamã?

6. D sakda Wẽnnaam sẽn kõ noor tɩ d moon koɛɛgã

Pipi kiris-nebã wakatẽ, neb n mak n na n kɩt t’a Zeezi karen-biisã bas koɛɛgã moonego. Pipi kiris-nebã ‘goma bʋ-kaoodb taoor sẽn na yɩl n paam sor n moon koe-noogã.’ (Filip rãmbã 1:7) A Zeova Kaset rãmbã me maanda woto rũndã-rũndã.a

VIDEO: B gomda bʋ-kaoodb taoor sẽn na yɩl n paam sor n moon koe-noogã (2:28)

Karm-y Tʋʋm 5:27-42, tɩ rẽ poor bɩ y leok sokrã:

• Bõe yĩng tɩ d pa na n tol n bas koɛɛgã moonego?​—Ges-y vɛrse 29, 38, la 39.

KƲMSGO

A Zeezi yeela a karen-biisã tɩ b taas koe-noogã buud fãa neba. A Zeova sõngda a nin-buiidã tɩ b tʋmd tʋʋm-kãnga.

Lebg-n-gese

• Wãn to la d moond koɛɛgã dũniyã gill zugu?

• Wãn to la tõnd sẽn moond koɛɛgã wilgdẽ tɩ d nonga d taabã?

• Yãmb tagsdame tɩ koe- moonegã tõe n kõ-d-la sũ-noog bɩ? Bõe yĩnga?

BŨMB A TAABA

A Zeova Kaset rãmbã sẽn maand to-to n moond galʋ-tẽn-bɛd pʋsẽ.

B moonda koɛɛgã zãma wã zĩisẽ Paari galʋ-​tẽngẽ wã (5:11)

Bõe la a Zeova Kaset rãmbã maand n tõogd n taasd koɛɛgã neb sẽn zoe n bas b tẽnga?

B taasda koɛɛgã neb nins sẽn zoe n bas b tẽngã 5:59

Pag a ye sẽn kẽesd a sẽk zãng koɛɛgã mooneg pʋgẽ sẽn wilgd rẽ sẽn kõt-a sũ-noog to-to.

M sũur nooma m sẽn yãk tʋʋm-kãngã (6:29)

A Zeova Kaset rãmbã kẽnga bʋ-kaoodb taoor naoor wʋsg n tɩ paam bʋʋm, tɩ sõng tɩ koɛɛgã mooneg lebg nana.

“Rĩungã koe-moonegã yell taa bʋ-kaoodbã taoore” (Wẽnnaam Rĩungã Rĩm rɩta naam!, sak 13)

5. Dũniyã yɛl toeema yʋʋmd 1914 tɛka

Ges-y VIDEO wã.

VIDEO: Dũniyã yɛl toeema yʋʋmd 1914 tɛka (1:10)

A Zeezi ra pĩnd n togsa dũniyã yɛl sẽn na n yɩ to-to, a sã n wa sɩng a naamã rɩɩbo. Karm-y Luk 21:9-11, tɩ rẽ poor bɩ y leok sokrã:

• Yel-kãensã sʋka, bʋs la yãmb ne, pa rẽ bɩ n wʋmd tɩ b gomd b yelle?

Tẽn-tʋmd a Poll ra bilga nebã yel-manesem sẽn na n yɩ to-to ninsaalbã naamã yaoolem wakatã. Karm-y 2 Tɩmote 3:1-5, tɩ rẽ poor bɩ y leok sokrã:

• Yãmb neeme tɩ nebã yel-manesmã yaa woto rũndã-rũndã bɩ?

6. Wilg-y tɩ y kɩsa sɩd tɩ Wẽnnaam Rĩungã rĩm rɩta naam

Karm-y Matiye 24:3, 14, tɩ rẽ poor bɩ y leok sogsgã:

• Tʋʋm-bʋg sẽn tar yõod wʋsg n wilgd tɩ Wẽnnaam Rĩungã rĩm rɩta naam masã?

• Bõe la y tõe n maan n naag n tʋm tʋʋm-kãngã?

Wẽnnaam Rĩungã rĩmã rɩta naam masã. Wakat ning a sẽn na n wa soog tẽngã gillã kolgame. Karm-y Ebre-rãmb 10:24, 25, tɩ rẽ poor bɩ y leok sokrã:

• Bõe la tõnd ned kam fãa segd n maane, d “sẽn ne tɩ daarã kolgdame wã yĩnga”?