Ãnd dãmb n moond koe-noogã?

“ . . . na n moona dũniyã tɛk fãa.”—MATƖE 24:14.

A ZEOVA KASET RÃMBÃ moonda koe-noogã dũniyã gill zugu. B tũnugda ne manesem toor-toor n maand rẽ:

Ne noor goama. Wala a Zezi ne a karen-biisã sẽn maanã, a Zeova Kaset rãmbã me kẽngda nebã nengẽ n moond-b koe-noogã. (Luk 8:1; 10:1) B pa gũud tɩ nebã wa bãmb nengẽ ye. A Zeova Kaset rãmbã sõor sẽn yɩɩd milyõ a yopoe wã fãa moonda nebã Wẽnnaam Rĩungã koɛɛgã. B moonda zak-zaka, soayã noyã, ne telefõnne, la ne manesem a taaba. Rɩẽ, a Zeova Kaset rãmbã rɩka sẽn yɩɩd lɛɛr dãmb milyaar a ye la pʋɩ-sʋk n moon koɛɛgã.

B zãmsda nebã yɛl Wẽnnaam Rĩungã zugu, la b zãmsd-b “bũmb nins fãa [a Zezi] sẽn da togsã” me. (Matɩe 28:20) Kiuug fãa, b zãmsda sẽn yɩɩd neb milyõ a nii Biiblã zaalem.

A Zeova Kaset rãmbã moonda koɛɛgã tẽns 236 pʋsẽ dũniyã gill zugu. B moonda neb buud fãa. B moonda dũniyã ween-vɩɩs a naasã fãa, tẽn-bɛd la tẽn-bõoneg pʋsẽ, waood sẽn beẽ la wĩndg sẽn zabdẽ. B pa yaood-b rẽ yĩng ye. Yaa bãmb mensã n dɩkd b ligd la b sẽk n tʋmd tʋʋm-kãngã, b sẽn nong Wẽnnaam la b nong nebã yĩnga.

Ne sɛba. B yiisda seb-kãngã gom-zug sẽn yaa Gũusg Gasgã moonda a Zeova Rĩungã ne buud goam 185 masã. Kiuug fãa, b yiisda sẽn yɩɩd bãmb milyõ 42. B yiisda Réveillez-vous ! wã me sẽn gomd Rĩungã yellã ne buud goam 83, tɩ kiuug fãa b yiisd sẽn na ta bãmb milyõ 40.

Seba, seb-biy la seb-vãado, CD/MP3 rãmba, la DVD rãmb sẽn wilgd Biiblã goam võor bee ne buud goam 540. Yʋʋm piig sẽn loogã pʋgẽ, a Zeova Kaset rãmbã yiisa sẽn yɩɩd bãmb milyaar 20 n pʋɩ nebã. Rat n yeelame tɩ dũniyã gill zugu, ned fãa ra tõe n paama bãmb b tãabo.

Sẽn paase, a Zeova Kaset rãmbã yiisa Biibl dãmba, la b kos tɩ neb a taab yiis Biibl dãmb n kõ-ba. B yiisa Les Saintes Écritures — Traduction du monde nouveau wã tõr bɩ a pʋɩ-sʋk ne buud goam 96. Sẽn yɩɩd bãmb milyõ 166 la b pʋɩ nebã.

Ne b tigissã maasem. Tigissã a Zeova Kaset rãmbã sẽn maand semen fãa Rĩungã Rotẽ wã pa tũudum yel-maandɩ bal ye. Yaa sẽn na yɩl n zãms nebã. B wɛgsda sõss sẽn tik Biiblã zugu, la b tũnugd ne Gũusg Gasgã la sɛb a taab n zãmsd Biiblã. Tigissã sasa, b zãmsda b sẽn tõe n moon koe-noogã sõma to-to.

A Zeova Kaset rãmbã tigims sẽn yɩɩd 107000 wã pʋsẽ, b zãmsda bõn-yɛng dũniyã gill zugu, tɩ rẽ kɩt tɩ b tar tẽeb a yembre. Ned ning fãa sẽn dat tõe n wa kelgame. B pa kot ligd be ye. La woto fãa ra pa na n tall yõodo, a Zeova Kaset rãmbã sã n da pa tũud bũmb ning b sẽn zãmsd nebã ye.

Ne bãmb mengã mak-sõngã. B modgame n zãad b mens sõma, la b modgdẽ me n maand neb a taabã bũmb ning b sẽn dat tɩ b maan bãmbã. (Matɩe 7:12) Baa ne b sẽn pa zems zãng n miẽ n kongdẽ wã, b rata ne b sũur fãa n moon koɛɛgã n sõng nebã buud fãa, la b sã n tõe me, b sõngda neb nins sẽn dat sõngrã.

A Zeova Kaset rãmbã sẽn moondã, pa sẽn na yɩl n kɩt tɩ dũniyã neb gill lebg b tũudmã neb ye. La a Zeova meng sã n wa ges tɩ moonegã seka wa yẽ sẽn dat to-to wã, rẽ masã la dũniyã saab na n ta, wa a Zezi sẽn da yeelã. La saabã sasa, bõe n na n paam tẽngã menga, la neb nins sẽn be a zugã?

[Foto, seb-neng a 7]

A Zeova Kaset rãmbã moonda koɛɛgã dũniyã gill zugu

‘Sɛɛbã’ võor yaa bõe?

“. . . dẽ, dũniyã sɛɛb na yaool n ta.”—MATƖE 24:14.

NEBÃ nong n gomda dũniyã saab yelle. Sɛb la filim dãmb pʋsẽ, b tũnugda ne yɛl sẽn maand laado, bɩ bãngdbã sẽn yet bũmb nins n wilgd dũniyã saab sẽn tõe n yɩ to-to. B yetame tɩ na n tũu ne zab-te-bɛda, bũmb sẽn na n yi yĩngr n wa wẽ tẽngã, bã-longdem, waood bɩ tʋʋlg sẽn loog noore, bɩ bõn-bãn sẽn na n yi zĩig a to n wa sãam tẽngã.

Tũudmã taoor dãmb me tagsg yaa toor-toor rẽ wɛɛngẽ. Bãmb wʋsg yetame tɩ saabã sasa, vɩɩm buud fãa na n menema tẽng zugu. Tũudum taoor soab a ye yeela Matɩe 24:14 wɛɛngẽ woto: “Vɛrse kãngã bee Wẽnnaam Gomdã pʋgẽ vɛrse nins sẽn tar yõod wʋsg n yɩɩdã sʋka. . . . Tõnd zãmaanã sẽn na n paam sãoong ningã na n yɩɩ kãsenga, hal tɩ ned pa rat n mams sãoongã sẽn na n yɩ to-to wã ye.”

Neb nins sẽn tagsd woto wã yĩma bũmb a yembre: Wẽnnaam a Zeova sẽn “yẽbg” tẽngã, a “ka naan-a t’a lebg zaalem ye. [A] naan-a lame tɩ neb zĩnd a zugu.” (Ezai 45:18) Dẽnd a Zezi sẽn gom saabã yellã, a ra pa rat n yeel tɩ tẽngã meng na n sãamame ye. A ra pa rat n yeel me tɩ ninsaalbã fãa na n menemame ye. A ra rat n yeelame tɩ yaa nin-wẽnsã, rat n yeel tɩ neb nins sẽn na n kell n zãgs tɩ b kõn tũ a Zeova noyã la b na n sãame.

D rɩk makre. Wala yãmb sẽn na n tar zag-neere, n dɩk n kõ neb tɩ b zĩnd a pʋgẽ zaalem. Neb kẽer zãada zakã sõma, n pa namsd b taabã ye. La neb a taab n be beenẽ n baood yɛla, n zabd taaba, n namsd neb a taabã sẽn be zakã pʋgẽ wã, la b sãamd zakã. Yamb sagl-b lame, la b zãgsame tɩ b kõn kelg ye.

Bõe la y na n maan sẽn na yɩl n welg yellã? Yãmb na n pãba y zakã n wã bɩ? Ayo. Tõe tɩ y na n diga nin-wẽnsã n yiisi, la y maneg y zakã.

A Zeova me na n maana bũmb sẽn wõnd woto. A vẽnega yɩɩl-gʋlsdã t’a yeel woto: “Tʋʋm-wẽns maandbã na n sãamame la neb nins sẽn tẽed Zusoabã na n sooga dũniyã. A keta bilf bala tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye. La sũ-maasem dãmbã na n sooga dũniyã, n maan sũ-noog laafɩ wʋsg yĩnga.”—Yɩɩl Sõamyã 37:9-11.

Rẽ wɛɛngẽ, Wẽnnaam vẽnega tʋm-tʋmd a Pɩɛɛr me t’a yeel woto: “Yaa ne Wẽnnaam goamã la yĩngr be hal pĩnda, la koom kɩtame tɩ tẽng puk yẽ pʋgẽ, la ne ko-kãngã dũniyã sẽn da be pĩndã sãama koom sẽn lim-a wã yĩnga.” (2 Pɩɛɛr 3:5, 6) Tʋm-tʋmd a Pɩɛɛr ra gomda a Nowe wakatẽ sa-kãsengã yelle. Wakat kãngã, yɩɩ wẽn-kɩɩsdbã la b sãam-yã, lakae pa tẽngã ye. Sa-kãsengã sẽn zĩnd dũniyã gill zugã yɩɩ “mamsg wẽn-kɩɩsdbã sẽn na n yaool n zĩndã yĩnga.”—2 Pɩɛɛr 2:6.

A Pɩɛɛr paasa woto: “Yĩngr la dũniyã sẽn be masã wã bĩnga bugum yĩnga.” D sã n karem n tek ka bala, d pa na n wʋm a gomdã võor ye. La bãng-y tɩ vɛrse wã paasame tɩ “la wẽn-kɩɩsdbã sãoong daare.” Yaa wẽn-kɩɩsdbã la b na n sãame, lakae pa tẽngã ye. Bõe n na n pʋgle? A Pɩɛɛr yeelame tɩ “wa sẽn zems bãmb kãabgo, tõnd gũuda yĩngr paalga [rat n yeel tɩ Wẽnnaam Rĩungã a sẽn bobl Mesi wã] la tẽn-paalga, [rat n yeel tɩ nin-tɩrs zãmaana] tɩrlem sẽn na n zĩnd b pʋsẽ.”—2 Pɩɛɛr 3:7, 13.

Biiblã bãngr-goamã wilgdame me tɩ saabã kolgame. Sẽn na yɩl n bãng yɛl kẽer sẽn wilgd rẽ, bɩ y karem Matɩe 24:3-14 la 2 Tɩmote 3:1-5.a

Matɩe 24:14 goamã yaa vẽeneg tɩ bi-bilf meng tõe n wʋm a võore. Bõe yĩng masã tɩ neb wʋsg sã n dat n wilg a võorã bɩ b kẽed moogo? Yaa a Sʋɩtãan n lud nebã yam sẽn na yɩl tɩ b ra wʋm bũmb ning sẽn be Wẽnnaam Gomdã pʋgẽ wã võor ye. (2 Korẽnt dãmba 4:4) Sẽn paase, Wẽnnaam solga wuk-m-mens rãmbã a raabã, n yaool n vẽneg-a sik-m-mens rãmbã. Rẽ wɛɛngẽ a Zezi yeela woto: “Mam pẽgda yãmba, yãmb sẽn solg bõn-kãens ne yẽesem dãmbã la ne yam dãmbã, n yaool n vẽneg kom-bõoneg ne bõn-kãensã yĩnga.” (Matɩe 11:25) D sẽn be sik-m-mens rãmbã sʋk n mi Wẽnnaam Rĩungã sẽn yaa bũmb ningã, la d gũud bark nins a sẽn na n wa kõ neb nins sẽn be a poorẽ wã, sɩd yaa zu-zẽkr bũmb n kõ-do!