A Zeezi yeela woto: “Rao a ye n dag n be n yaa arzɛk soaba, n yeelgd fu-sõama sẽn yaa neeba. La daar fãa, a tara bũmb fãa tɩ seke, t’a vɩɩmã yaa noog wʋsgo. Naong soab a yembr sẽn boond t’a Lazaar dag n gãee arzɛk soabã zak noore. La a yĩngã fãa da pida ne noada. A rag n nongẽ lame n paam rɩ-zeremsã sẽn yit arzɛk soaba taabl zug n lʋɩtẽ wã n dɩ. La sẽn paase, baasã wat n lelemda a noadã.”—Luk 16:19-21.

La nin-kãensã sẽn yaa zẽk-m-mens rãmbã manesem ra yaa wãn ne naong rãmbã? B ra pa rat n pẽneg-b ye. B pʋd n da boond-b lame tɩ ‛am ha·’aʹrets, sẽn dat n yeel tɩ tẽng-tom neba, neb sẽn pa mi tõogã, la sẽn pa zems tɩ b zãms-b tõogã. (Zã 7:49) A Zeezi kibarã pʋgẽ, “naong soab” a Lazaar makda nin-kãensã. A rag n nongẽ lame n “paam rɩ-zeremsã sẽn yit arzɛk soabã taabl zug n lʋɩtẽ wã” n dɩ. A Lazaar yĩngã sẽn da yaa noadã, arzɛk soabã ra pa rat n pẽneg-a ye. Woto me, Fariizẽ-rãmbã sẽn da get naong rãmbã wa neb sẽn ka bark Wẽnnaam nifẽ wã kɩtame tɩ b ra pa rat n pẽneg-b ye.