² Yʋʋmd fãa, d naagda neb milyõ-rãmb dũniyã gill zug n tẽeg ned a ye d sẽn nong wʋsg kũum yelle. Yaa a Zeezi Kirist. (1 Pɩy. 1:8) D naagda taab n tẽeg a soab ning sẽn kõ a vɩɩmã tɩ yɩ maoong n fãag tõnd ne yel-wẽndã la kũumã yelle. (Mat. 20:28) Sɩd me, a Zeezi ratame t’a karen-biisã tẽegd a kũumã yelle. Yʋng ning b sẽn yõk-a wã, a wilga bũmb d sẽn tog n maand n tẽegd a kũumã yelle. A yeelame yaa: “Maand-y woto n tẽegd mam yelle.”—Luk 22:19.