Biiblã pʋgẽ, b sẽn gomd bũmb ning yell n tɩ yɩɩdã yaa Wẽnnaam Rĩungã. Yaa ne Rĩun-kãng maasem la a Zeova na n kɩt tɩ tẽngã lebg arzãn wa a sẽn da sɩng n datã. Wẽnnaam Rĩungã yaa bõe? Bõe n kɩt tɩ d miẽ t’a rĩmã zoe n dɩta naam? Bõe la a zoe n maane? La bõe me la a na n wa maane? Sag-kãngã ne a yiibã sẽn pʋgdã pʋgẽ, d na n leoka sogs-kãensã.

1. Wẽnnaam Rĩungã yaa bõe? Ãnda la a rĩmã?

Wẽnnaam Rĩungã yaa goosneema Wẽnnaam a Zeova sẽn lugli. A Zeezi Kirist n yaa rĩmã. A bee saasẽ n dɩt naam. (Matiye 4:17; Zã 18:36) Biiblã pʋgẽ, b yeelame t’a Zeezi “na n yɩɩ Rĩma, n dɩ naam . . . wakat sẽn kõn sa.” (Luk 1:32, 33) A Zeezi sẽn yaa Wẽnnaam Rĩungã Rĩmã, a na n wa rɩɩ naam neb nins fãa sẽn be tẽngã gillã zugu.

2. Ãnd dãmb n naag a Zeezi n dɩt naamã?

A Zeezi pa rɩt naamã a yembr ye. Biiblã pʋgẽ, b yeelame tɩ “neb sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ . . . segd n dɩɩ naam tẽngã zugu.” (Vẽnegre 5:9, 10) Neb a wãn n na n naag Kiristã n dɩ naamã? A Zeezi sẽn wa tẽngã zugã tɛka, neb milyõ-rãmb n lebg a karen-biisi. Yaa b fãa n na n naag-a n dɩ naam bɩ? Ayo. Yaa neb 144 000 bal n na n kẽng saasẽ n tɩ naag-a n dɩ naam. (Karm-y Vẽnegr 14:1-4.) Kiris-neb a taabã fãa sẽn be tẽngã zugã na n yɩɩ Rĩungã poorẽ dãmba.​—Yɩɩn-sõamyã 37:29.

3. Bõe yĩng tɩ Wẽnnaam Rĩungã sõmblem yɩɩd ninsaalbã goosneema-rãmbã?

Baa ninsaalbã nanambsã sẽn modgd n na n maan bõn-sõma wã, b pa tar tõog n tõe n maan b sẽn datã fãa ye. Sẽn paase, nanambs nins sẽn na n ledg-bã tõe n yaa rat-m-ye rãmba, n pa baood nin-buiidã neer ye. La ned pa na n tol n ledg a Zeezi sẽn yaa Wẽnnaam Rĩungã rĩmã ye. Wẽnnaam kɩtame tɩ “Rĩung sẽn ka sãamd” beẽ. (Dãniyɛll 2:44) A Zeezi na n wa rɩɩ naam tẽngã gill zugu. A pa na n bak ned n sõng ye. A Zeezi nonga nebã, a yaa maan-neer soaba, la tɩrlem soaba. A na n wa zãmsa nebã tɩ b nong taaba, n maand taab neere, n pa maand taab kɛgr ye.​—Karm-y Ezayi 11:9.

4. Goosneema sẽn tar pãng n na n wa soog tẽngã gilli

A Zeezi tara tõog wʋsg n yɩɩd ninsaalbã nanambs nins fãa sẽn zĩndã. Karm-y Matiye 28:18, tɩ rẽ poor bɩ y leok sokrã:

• Bõe n kɩt t’a Zeezi naamã yɩɩd ninsaalbã naam?

Ninsaalbã goosneema-rãmbã wae n toeemdame. Sẽn paase, goosneema fãa rɩta naam tẽngã babg ning zug bala. La Wẽnnaam Rĩungã yẽ? Karm-y Dãniyɛll 7:14, tɩ rẽ poor bɩ y leok sogsgã:

• Bõe yĩng tɩ Wẽnnaam Rĩungã sẽn “ka na n toll n sãamã” yaa bõn-sõngo?

• Bõe yĩng tɩ Wẽnnaam Rĩungã sẽn na n wa soog tẽngã gillã yaa bõn-sõngo?

5. B segd n ledga ninsaalbã goosneema-rãmbã

Bõe yĩng tɩ Wẽnnaam Rĩungã segd n ledg ninsaalbã goosneema-rãmbã? Ges-y VIDEO wã, tɩ rẽ poor bɩ y leok sokrã.

VIDEO: Wẽnnaam Rĩungã yaa bõe?​—B sẽn kʋrge (1:41)

• Ninsaalbã naamã waa ne zu-loe-bʋse?

Karm-y Koɛɛg soab 8:9, tɩ rẽ poor bɩ y leok sogsgã:

• Yãmb tagsdame tɩ Wẽnnaam Rĩungã segd n ledga ninsaalbã goosneema-rãmbã bɩ? Bõe yĩnga?

6. Wẽnnaam Rĩungã taoor dãmb wʋmda tõnd yɛlã võore

Tõnd rĩm a Zeezi sẽn yɩ ninsaal n zĩnd tẽngã zugã yĩnga, a ‘tõe n kʋma tõnd d pãn-komsmã pʋgẽ.’ (Ebre-rãmbã 4:15) Neb 144000 a Zeova sẽn yãk tɩ b na n tɩ rɩ naam ne a Zeezi saasẽ wã yaa pagb la rap “sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ.”​—Vẽnegre 5:9.

• Yãmb pa tagsd t’a Zeezi ne a na-rɩt-n-taasã sẽn mi d zu-loeesã la b mi rẽ sẽn namsd tõnd to-to wã, kengda raood sɩda?

7. Wẽnnaam Rĩungã noyã sõmblem ka to ye

Goosneema-rãmbã lugunda noy b sẽn tagsd tɩ na n nafa b nin-buiidã, la kogl-ba. Wẽnnaam Rĩungã me lugla noy a poorẽ dãmbã sẽn segd n tũ. Karm-y 1 Korẽnt rãmb 6:9-11, tɩ rẽ poor bɩ y leok sogsgã:

• Yãmb tagsdame tɩ nebã fãa sã n tũud noy nins Wẽnnaam sẽn luglã, vɩɩmã na n yɩ wãn-wãna?a

• Yãmb tagsdame t’a Zeova tara sor n na n yeel a Rĩungã poorẽ dãmbã tɩ b tũ no-kãensã bɩ? Bõe yĩnga?

• Bõe n wilgd tɩ neb nins sẽn pa tũud no-kãensã tõe n toeemame?​—Ges-y vɛrse 11.

KƲMSGO

Wẽnnaam Rĩungã yaa goosneema sɩd-sɩd sẽn be saasẽ, n na n wa soog tẽngã gill n dɩ naam.

Lebg-n-gese

• Ãnda rãmb la Wẽnnaam Rĩungã taoor dãmba?

• Bõe n kɩt tɩ Wẽnnaam Rĩungã sõmblem yɩɩd ninsaalbã goosneema-rãmbã?

• Togs-y bũmb kẽer a Zeova sẽn dat tɩ Rĩungã poorẽ dãmbã maane?

BŨMB A TAABA

A Zeezi yeelame tɩ Wẽnnaam Rĩungã bee ned fãa sũurẽ bɩ?

“Wẽnnaam Rĩungã yaa bũmb sẽn be y sũurẽ bɩ?” (Bee jw.org)

Bõe yĩng t’a Zeova Kaset rãmbã sakd Wẽnnaam Rĩungã n yɩɩd ninsaalbã goosneema-rãmbã?

Yaa Wẽnnaam Rĩungã la b sakda (1:43)

Biiblã pʋgẽ, bõe la b yet neb 144000 a Zeova sẽn yãk tɩ b na n naag a Zeezi n dɩ naamã wɛɛngẽ?

“Ãnd dãmb n dabd saasẽ?” (Bee jw.org)

Bõe n kɩt tɩ pag a ye b sẽn da pag bãens-roog kɩs sɩd tɩ yaa Wẽnnaam bal n tõe n wa ne tɩrlem dũniyã zugu?

“Mam bãnga yel-kɛgã tɩɩm” (Yʋʋmd 2011 sɩpaolg kiuug Réveillez-vous ! wã )

A Zeezi yeela a karen-biisã tɩ b pa segd n yɩ “dũniyã rẽnd” ye. (Zã 15:19) Ra kẽes f toog dũniyã yɛlẽ wã rat n yeelame tɩ f ra kẽes f toog dũni-kãngã politikã la a zabã pʋsẽ ye. Togs sɩdã, ra kẽes f toog dũniyã yɛlẽ wã pa nana wakat fãa ye. Nebã tõe n yaala tõnd rẽ yĩnga. Bõe la d tõe n maan n kell n pa kẽes d toog dũniyã yɛlẽ, la d kell n maan sɩd ne d Wẽnnaam a Zeova?

1. Kiris-neb hakɩɩkã tagsg yaa wãn ne ninsaalbã goosneema-rãmbã?

Kiris-nebã waoogda goosneema-rãmbã. Tõnd maanda wa a Zeezi sẽn yeelã, n ‘kõt a Sezaar bũmb nins sẽn yaa a Sezaar dẽndã,’ rat n yeel tɩ d tũuda d tẽngã laloa wã, wala makre, laloa ning sẽn yet tɩ d yaood lampo-rãmbã. (Mark 12:17) Biiblã pʋgẽ, b wilgame tɩ ninsaalbã goosneema-rãmbã rɩta naam, bala yaa a Zeova n kõ sore. (Rom dãmbã 13:1) Dẽnd d miime tɩ ninsaalbã goosneema-rãmbã sẽn tar naam bɩ zu-sobend ningã pa ta Wẽnnaam dẽndã ye. D gũudame tɩ Wẽnnaam wa welg ninsaalbã zu-loeesã fãa ne a Rĩungã sẽn be saasẽ wã maasem.

2. Wãn to la d tõe n wilg tɩ d pa kẽesd d toog dũniyã yɛlẽ?

Wa a Zeezi, tõnd pa kẽesd d toog politikã yɛlẽ ye. Daar a ye, nebã yãa yel-solemd a Zeezi sẽn maane, n bao n na n kɩt t’a lebg b rĩmã. La a Zeezi zãgsame. (Zã 6:15) Bõe yĩnga? Bala, wa a sẽn wa n yeelã, a “Rĩungã pa dũni-kãngã rẽnd ye.” (Zã 18:36) Tõnd sẽn yaa a Zeezi karen-biisã, yɛl toor-toor pʋgẽ, d wilgdame tɩ d pa kẽesd d toog dũni-kãngã yɛlẽ ye. Wala makre, d pa kẽnd zab ye. (Karm-y Mise 4:3.) D waoogda tẽnsã darpo-rãmbã, la d pa waoogd-b wa d sẽn waoogd Wẽnnaam to-to wã ye. (1 Zã 5:21) Sẽn paase, d pa teend wall n zabd ne politik sull bɩ taoor soab baa a ye. Yel-kãensã la a taab pʋgẽ, d wilgdame tɩ d maanda sɩd zãng-zãng ne Wẽnnaam goosneema wã, rat n yeel t’a Rĩungã.

D BAO N BÃNG N PAASE

3. Kiris-neb hakɩɩkã pa kẽesd b toog dũniyã yɛlẽ ye

A Zeezi ne a karen-biisã kõo tõnd mak-sõngo. Karm-y Rom dãmb 13:1, 5-7 la 1 Pɩyɛɛr 2:13, 14. Rẽ poor bɩ y ges VIDEO wã, la y leok sogsgã.

VIDEO: Bõe yĩng tɩ kiris-neb hakɩɩkã pa kẽesd b toog dũniyã yɛlẽ​—Pipi babgo (4:28)

• Bõe yĩng tɩ d segd n waoog ninsaalbã goosneema-rãmbã?

• Wãn to la d wilgd tɩ d sakd-b lame?

Zabr sasa, tẽns kẽer tõe n yetame tɩ b pa kẽesd b toogo, la b yaool n maand bũmb n sõngd tẽns nins sẽn zabd taabã. Ra kẽes f toog dũniyã yɛlẽ wã sɩd rat n yeelame tɩ bõe? Karm-y Zã 17:16. Rẽ poor bɩ y ges VIDEO wã, la y leok sokrã.

VIDEO: Bõe yĩng tɩ kiris-neb hakɩɩkã pa kẽesd b toog dũniyã yɛlẽ​—Babg a 2 (3:11)

• Ra kẽes f toog dũniyã yɛlẽ wã rat n yeelame tɩ bõe?

La goosneema-rãmbã sã n dat tɩ d maan bũmb sẽn kɩɩsd Wẽnnaam tõogã yẽ? Karm-y Tʋʋm 5:28, 29. Rẽ poor bɩ y ges VIDEO wã, la y leok sogsgã.

VIDEO: Bõe yĩng tɩ kiris-neb hakɩɩkã pa kẽesd b toog dũniyã yɛlẽ​—Babg a 3 (1:18)

• Ninsaalbã tõog sã n kɩɩsd Wẽnnaam tõogã, bʋg la d segd n tũ?

• Yel-bʋs pʋgẽ la kiris-ned pa na n tũ goosneema-rãmbã sẽn yetã?

4. Ra kẽes-y y toog dũniyã yɛlẽ, baa y sũurã pʋgẽ

Karm-y 1 Zã 5:21. Rẽ poore, bɩ y ges VIDEO wã, la y leok sogsgã.

VIDEO: Bõe yĩng tɩ kiris-neb hakɩɩkã segd n tall raoodo?​—Ra kẽ dũniyã yɛlẽ wã wɛɛngẽ (2:49)

• Video wã pʋgẽ, bõe yĩng t’a Ayenge yãk yam n pa naag politikã sulli, wall n naag n pʋʋs darpo wã?

• Yãmb tagsdame t’a yam-yãkrã yaa yam tʋʋmd bɩ?

Bõe ne bõe wɛɛngẽ me la tõe n yɩ toog tɩ d kell n pa kẽes d toog dũniyã yɛlẽ? Ges-y VIDEO wã, tɩ rẽ poor bɩ y leok sogsgã.

VIDEO: D sẽn bãng Gũusg Gasgã pʋgẽ​—Modg n kell n da kẽ dũniyã yɛlẽ wã (5:16)

• Tẽns toor-toor sã n wa wagsd taab ɛspoorã wɛɛngẽ, bõe la d segd n maan n kell n da kẽes d toog dũniyã yɛlẽ?

• Baa politikã taoor dãmb yam-yãkr ning sã n na n nafda tõndo, wall wa ne zu-loees n kõ-do, bõe la d segd n maan n kell n da kẽes d toog dũniyã yɛlẽ?

• Wãn to la kiba-kɩtbã, pa rẽ bɩ neb nins d sẽn nong n be ne wã goam tõe n wa kɩt tɩ yɩ toog tɩ d kell n da kẽes d toog dũniyã yɛlẽ?

KƲMSGO

Kiris-nebã maooda wʋsg sẽn na yɩl n da kẽes b toog politikã yɛlẽ, b tagsa wã, b no-goamã la b tʋʋm-tʋmdɩ wã pʋgẽ.

Lebg-n-gese

• Bõe la d kõt ninsaalbã goosneema-rãmbã?

• Bõe yĩng tɩ d pa kẽesd d toog politikã yɛlẽ?

• Yel-bʋs n tõe n wa kɩt tɩ yɩ toog tɩ d pa kẽes d toog dũniyã yɛlẽ?

BŨMB A TAABA

Tõe n wa yɩɩ tɩlɛ tɩ d mong d meng bõe sẽn na yɩl n kell n da kẽes d toog dũniyã yɛlẽ?

A Zeova zɩ n bas tõnd ye (3:14)

Bõe la zak rãmb tõe n maan n pĩnd n segl b mense, bũmb nins sẽn tõe n wa kɩt tɩ yɩ toog tɩ b pa kẽes b toog dũniyã yɛlẽ wã wɛɛngẽ?

D ra tol n kẽes d toog dũniyã yɛlẽ, baa d sã n wa be zãma zĩigẽ (4:25)

Ned sã n zabd a tẽng yʋʋr yĩnga, pa rẽ n yaa zu-zẽkr ne a soab tɩ yɩɩd ye. Bõe yĩnga?

“Sã n yaa ne Wẽnnaam, bũmb fãa tõeeme” (5:19)

Y sẽn tõe n maan to-to n kell n da kẽes y toog dũni-kãngã yɛlẽ, y sã n wa na n yãk yam tʋʋmã wɛɛngẽ.

“Ned kam fãa na n tʋka a meng zɩɩbo” (Yʋʋmd 2006 tʋʋlg kiuug pipi daar Gũusg Gasgã)